ສະຫະລັດ ກ່າວວ່າ ອົບພະຍົບທາງເຮືອຫລາຍພັນຄົນ ທີ່ພາ
ກັນລ່ອງລອຍຢູ່ຕາມທະເລໃນເຂດເອເຊຍຕາເວັນອອກສຽງ
ໃຕ້ນັ້ນ ຕ້ອງການຄວາມຊ່ວຍເຫຼືອ ຢ່າງຮີບດ່ວນ.
ຮອງລັດຖະມົນຕີ ຕ່າງປະເທດ ສະຫະລັດ ທ່ານນາງ Anne
Richard ໄດ້ກ່າວຕໍ່ບັນດານັກຂ່າວທີ່ບາງກອກ ໃນວັນສຸກມື້
ນີ້ວ່າ “ພວກເຮົາຕ້ອງຊ່ວຍຊີວິດໄວ້ຢ່າງຮີບດ່ວນ.”
ທ່ານາງ Richard ກ່າວວ່າ “ພວກເຮົາຕ້ອງຊ່ວຍກູ້ ເອົາຊີວິດ
ໄວ້ຢ່າງຮີບດ່ວນ. ພວກເຮົາຕ້ອງພັດທະນາຊ່ອງທາງໃຫ້ດີຂື້ນ
ໃນການສົນທະນາ ແລະພົບປະກັນກ່ຽວກັບບັນຫາຕ່າງໆເຫລົ່າ
ນີ້ ແລະເອົາບາດກ້າວ ເວລາຜູ້ຄົນໄດ້ອອກສູ່ທະເລຢູ່ໃນເຮືອ ແລະພວກເຮົາຕ້ອງໄດ້ໄປ
ແລະຊອກຫາສາເຫດຮາກເຫງົ້າວ່າເປັນຫຍັງ ຜູ້ຄົນຈຶ່ງມີຄວາມຮູ້ສຶກວ່າ ເຂົາເຈົ້າບໍ່ມີທາງ
ເລືອກ ແຕ່ຕ້ອງໄດ້ຫລົບໜີ ຈາກປະເທດຂອງເຂົາເຈົ້າ ແລະອອກເດີນທາງທີ່ເປັນອັນ
ຕະລາຍແບບນັ້ນ.”
ທ່ານນາງ Richard ກຳລັງຢູ່ທີ່ປະເທດໄທເພື່ອເຂົ້າຮວມປະຊຸມນຶ່ງມື້ກັບບັນດາ ປະເທດ
ໃນເຂດເອເຊຍຕາເວັນອອກສຽງໃຕ້ແລະກຸ່ມປົກປ້ອງສິດທິມະນຸດ ທີ່ໄດ້ເລີ້ມຂື້ນໃນວັນ
ສຸກມື້ນີ້ ອັນເປັນພາກສ່ວນນຶ່ງໃນການດຳເນີນຄວາມພະຍາຍາມ ຢ່າງເປັນຂະບວນເພື່ອ
ແກ້ໄຂບັນຫາອົບພະຍົບທາງເຮືອຢູ່ໃນທະເລ Andaman ແລະອ່າວ Bengal.
ຮອງນາຍົກລັດຖະມົນຕີໄທ ທ່ານທະນະສັກ ປະຕິມາປຣະກອນໄດ້ຮຽກຮ້ອງໃຫ້ ທຸກໆ
ປະເທດ ແລະກຸ່ມຕ່າງໆຊອກຫາຊ່ອງທາງ ເພື່ອຫລີກລ່ຽງບໍ່ໃຫ້ວິກິດການ ດ້ານມະນຸດ
ສະທຳເພີ້ມທະວີຄວາມຮ້າຍແຮງຂຶ້ນຕື່ມ.
ທ່ານທະນະສັກ ກ່າວວ່າ “ກ່ອນອື່ນໝົດ ແມ່ນການແກ້ໄຂໃນທັນທີຕໍ່ສະຖານະການດ້ານ
ມະນຸດສະທຳໂດຍ ກ່ຽວກັບພວກອົບພະຍົບທາງເຮືອທີ່ຕົກຄ້າງຢູ່ກາງ ທະເລ. ສອງມາ
ແມ່ນເພື່ອປາບປາມບັນຫາ ທີ່ມີມາດົນນານ ໃນການລັກລອບ ແລະການຄ້າມະນຸດ ເພື່ອ
ປ້ອງບໍ່ໃຫ້ການເຄື່ອນໄຫວທີ່ຜິດປົກກະຕິດັ່ງກ່າວຮ້າຍ ແຮງຂຶ້ນຕື່ມ. ສາມມາ ແມ່ນເພື່ອ
ແກ້ໄຂສາເຫດຮາກເຫງົ້າຕົ້ນຕໍ.”
ທ່ານ William Lucy ຜູ້ອຳນວຍການຍົກຍ້າຍຖິ່ນຖານສາກົນຫລື IOM ກ່າວວ່າ ບາດ
ກ້າວອັນຮີບດ່ວນທີ່ສຸດ ທີ່ຕ້ອງໄດ້ເຮັດແມ່ນການນຳເອົາພວກອົບພະຍົບ ປະມານ 3,900
ທີ່ຕົກຄ້າງຢູ່ກາງທະເລ ເຂົ້າມາຂຶ້ນຝັ່ງ. ທ່ານກ່າວວ່າ ທ່ານຫວັງວ່າກອງປະຊຸມຈະນຳໄປ
ສູ່ການເອົາບາດກ້າວໜັກແໜ້ນ ເພື່ອແກ້ໄຂບັນຫາອົບພະຍົບທາງເຮຶຶອ.
ແຕ່ທ່ານໄດ້ປະຕິເສດບໍ່ຍອມຕິຕຽນມຽນມາກ່ຽວກັບນະໂຍບາຍທີ່ພວກນັກເຄື່ອນໄຫວ
ກ່າວວ່າ ເຮັດໃຫ້ສະຖານະການຮ້າຍແຮງຂຶ້ນຕື່ມນັ້ນ.
