ນາຍົກລັດຖະມົນຕີອອສເຕຣເລຍ ທ່ານແອນໂທນີ ອາລບານີສ ເດີນທາງມາເຖິງ ສະຫະລັດ ໃນວັນຈັນວານນີ້ ເພື່ອຢ້ຽມຢາມເປັນເວລາ 4 ມື້, ໂດຍຫວັງວ່າ ຈະມີຄວາມຄືບໜ້າໃນຂໍ້ຕົກລົງເຮືອດຳນ້ຳນິວເຄລຍ ອໍກັສ (AUKUS). ຟີລ ເມີເຊີ ມີລາຍງານຈາກນະຄອນຊິດນີ, ຊຶ່ງ ທິບສຸດາ ມີລາຍລະອຽດມາສະເໜີທ່ານ.
ສາຍພົວພັນທາງດ້ານຄວາມໝັ້ນຄົງຢ່າງເປັນທາງການຂອງ ອອສເຕຣເລຍ ກັບ ສະຫະລັດ ມີມາແຕ່ຕົ້ນຊຸມປີ 1950.
ນາຍົກລັດຖະມົນຕີ ທ່ານແອນໂທນີ ອາລບານີສ ກ່າວຕໍ່ພວກນັກຂ່າວ ໃນນະຄອນຫຼວງແຄນເບີຣາ ໃນວັນຈັນວານນີ້ວ່າ "ພັນທະມິດລະຫວ່າງ ອອສເຕຣເລຍ ແລະ ສະຫະລັດ ແມ່ນແກນສໍາຄັນດ້ານນະໂຍບາຍການຕ່າງປະເທດຂອງອອສເຕຣເລຍ."
ການຢ້ຽມຢາມ ສະຫະລັດ ຢ່າງເປັນທາງການຂອງທ່ານ ຈະປະກອບດ້ວຍການພົບປະຄັ້ງທີ 9 ຂອງ ທ່ານອາລບານີສ ກັບປະທານາທິບໍດີ ໂຈ ໄບເດັນ ໃນໄລຍະ 16 ເດືອນທີ່ຜ່ານມາ.
ນາຍົກລັດຖະມົນຕີອອສເຕຣເລຍກ່າວວ່າ ທ່ານຈະຈັດການຈະເຈລະຈາຫາລືກັບບັນດາສະມາຊິກສະພາສູງສະຫະລັດ ກ່ຽວກັບກົດໝາຍທີ່ຈຳເປັນເພື່ອຮັບປະກັນຄວາມກ້າວໜ້າຂອງກຸ່ມພັນທະມິດ AUKUS. ອົງການຂ່າວຂອງອອສເຕເລຍລາຍງານວ່າ ສະມາຊິກສະພາສະຫະລັດຈໍານວນນຶ່ງ ມີຄວາມກັງວົນຢ່າງຫຼວງຫຼາຍກ່ຽວກັບຂໍ້ຕົກລົງດັ່ງກ່າວ.
ສັນຍາ AUKUS ແມ່ນຂໍ້ຕົກລົງສາມຝ່າຍທີ່ໄດ້ປະກາດໃນເດືອນກັນຍາ ປີ 2021 ກັບສະຫະລັດ ແລະ ອັງກິດ ເຊິ່ງຈະເຮັດໃຫ້ ອອສເຕຣເລຍ ເຂົ້າເຖິງເຮືອດຳນ້ຳພະລັງງານນິວເຄລຍໄດ້ເປັນຄັ້ງທຳອິດ. ມີການຄາດການວ່າ ຂໍ້ຕົກລົງດັ່ງກ່າວ ສາມາດເຮັດໃຫ້ຄ່າໃຊ້ຈ່າຍຂອງ ອອສເຕຣເລຍ ສູງເຖິງ 244 ຕື້ໂດລາ ແລະ ເຫັນໄດ້ຢ່າງກວ້າງຂວາງວ່າ ເປັນການຕໍ່ຕ້ານການເພີ້ມຂຶ້ນທາງດ້ານອິດທິພົນຂອງ ຈີນ ຢູ່ໃນຂົງເຂດອິນໂດ-ປາຊີຟິກ.
ທ່ານແຄວິນ ຣາດ (Kevin Rudd) ເຊິ່ງເປັນເອກອັກຄະລັດຖະທູດ ອອສເຕຣເລຍ ປະຈຳສະຫະລັດ ແລະ ເປັນອະດີດນາຍົກລັດຖະມົນຕີ.
ທ່ານກ່າວຕໍ່ສະຖານີໂທລະພາບຂອງອອສເຕຣເລຍ ໃນວັນຈັນວານນີ້ວ່າ ການເປັນພາຄີ AUKUS ຈະເປັນພາກສ່ວນສຳຄັນໃນການຢ້ຽມຢາມ ວໍຊິງຕັນ ຂອງ ທ່ານອາລບານີສ, ພ້ອມດ້ວຍການເຈລະຈາກ່ຽວກັບພະລັງງານທີ່ສະອາດ.
ທ່ານຣາດ ກ່າວວ່າ:
"ເຮັດໃຫ້ໝັ້ນໃຈວ່າ ທຸກໆກົດໝາຍຂອງ AUKUS ທີ່ກ່ຽວຂ້ອງ ຈະໄປໃນຊ່ອງທາງທີ່ປະສົບຜົນສໍາເລັດຂອງຕົນ ໂດຍຜ່ານລັດຖະສະພາສະຫະລັດ. ອັນທີສອງ, ເປີດກວ້າງການພົວພັນທາງດ້ານເສດຖະກິດ ໃນດ້ານເທັກໂນໂລຈີຂໍ້ມູນຂ່າວສານ, ເທັກໂນໂລຈີທາງດ້ານຄວາມໝັ້ນຄົງ ແລະເທັກໂນໂລຈີດ້ານພະລັງງານທີ່ສະອາດ ແລະອີກຄັ້ງນຶ່ງ ເພື່ອຍົກລະດັບດ້ານພະລັງງານທີ່ສະອາດຂອງພວກເຮົາໃຫ້ໝັ້ນແກ່ນ ແລະການດໍາເນີນງານໃໝ່ຮ່ວມກັນ ກ່ຽວກັບແຮ່ທາດທີ່ສຳຄັນຍິ່ງ.”
ກ່ອນໜ້ານັ້ນ ຈີນໄດ້ວິຈານຕໍ່ຂໍ້ຕົກລົງ AUKUS, ໂດຍກ່າວຫາ ສະຫະລັດ, ອັງກິດ ແລະ ອອສເຕຣເລຍ ວ່າ “ເດີນໄປຕາມເສັ້ນທາງທີ່ອັນຕະລາຍ ເພື່ອຜົນປະໂຫຍດທາງການເມືອງທີ່ເຫັນແກ່ຕົວຂອງພວກເຂົາ…ໂດຍບໍ່ສົນໃຈຕໍ່ຄວາມກັງວົນຂອງປະຊາຄົມນານາຊາດ.”
ໃນວັນອາທິດແລ້ວນີ້, ທ່ານອາລບານີສ ຢືນຢັນວ່າ ທ່ານຈະໄປຢ້ຽມຢາມປັກກິ່ງໃນຕົ້ນເດືອນພະຈິກ ເພື່ອພົບປະກັບປະທານປະເທດຈີນ ທ່ານສີ ຈິ້ນຜິງ. ຍ້ອນຂໍ້ພິພາດກ່ຽວກັບການສົ່ງອອກເຫຼົ້າວາຍຂອງ ອອສເຕຣເລຍ ຢູ່ອົງການການຄ້າໂລກ ຈຶ່ງໄດ້ຖືກລະງັບ ເນື່ອງຈາກທັງສອງປະເທດພະຍາຍາມຫຼຸດຜ່ອນຄວາມເຄັ່ງຕຶງທາງດ້ານການຄ້າ ແລະຄວາມເຄັ່ງຕຶງທາງດ້ານການທູດ ທີ່ແກ່ຍາວມາດົນນານ.
ຈີນໄດ້ຕົກລົງທີ່ຈະທົບທວນຄືນກ່ຽວກັບການເກັບພາສີນຳເຂົ້າເຫຼົ້າວາຍຂອງອອສເຕຣເລຍ. ໃນທາງດຽວກັນ, ລັດຖະບານໃນນະຄອນຫຼວງແຄນເບີຣາ ກໍາລັງລະງັບການດໍາເນີນງານຂອງຕົນຢູ່ໃນອົງການ WTO. ການເກັບພາສີໄດ້ຖືກກໍານົດຂຶ້ນໃນປີ 2020 ເນື່ອງຈາກການພົວພັນລະຫວ່າງສອງປະເທດ ຊຸດໂຊມລົງຢ່າງໄວວາ ກ່ຽວກັບຂໍ້ພິພາດທາງດ້ານພູມສາດການເມືອງຕ່າງໆ. ຂໍ້ຈໍາກັດຕໍ່ສິນຄ້າອື່ນໆຂອງອອສເຕຣເລຍ, ລວມທັງເຂົ້າບາເລ່, ກໍໄດ້ຖືກຍົກເລີກໄປ. ທ່ານອາລບານີສ ໄດ້ໃຊ້ວິທີການປະເຊີນຫນ້າກັບຈີນ ຫນ້ອຍລົງກວ່າ ລັດຖະບານອະນຸລັກນິຍົມໃນເມື່ອກ່ອນ ທີ່ທ່ານເອົາຊະນະການເລືອກຕັ້ງໃນປີແລ້ວນີ້.
ຢູ່ນະຄອນຫຼວງ ວໍຊິງຕັນ ໃນອາທິດນີ້, ທ່ານອາລບານີສ ຈະເຂົ້າຮ່ວມໃນງານລ້ຽງອາຫານຄ່ຳຢ່າງເປັນທາງການ ແລະຮ່ວມກອງປະຊຸມຢູ່ທີ່ຫ້ອງການຮູບໄຂ່ຂອງທຳນຽບຂາວ ກັບປະທານາທິບໍດີ ໄບເດັນ.
