ການສອບສວນຂອງບັນດາສະມາຊິກສະພາລັດຖະບານກາງ ໃນອອສເຕຣເລຍ ກໍາລັງກວດກາເບິ່ງໄພອັນຕະລາຍຈາກມົດແດງໄຟທີ່ເປັນສາຍພັນມາຈາກແຫ່ງອື່ນຂອງໂລກ. ບັນດາຜູ້ຊ່ຽວຊານກ່າວວ່າ ແມງໄມ້ທີ່ເປັນໄພຮຸກຮານ ສາມາດສັງຫານຄົນ ພ້ອມທັງສັດລ້ຽງ ແລະອາດຈະເປັນໄພອັນຕະລາຍຕໍ່ປະເທດອອສເຕຣເລຍ ຫຼາຍກ່ວາຝູງກະຕ່າຍ, ຄັນຄາກອ້ອຍ, ໝາຈອກ, ອູດ, ໝາປ່າ ແລະແມວປ່າ ລວມກັນ. ບັນດາສະມາຊິກສະພາ ໄດ້ຈັດກອງປະຊຸມທົ່ວໄປຢູ່ນະຄອນຫຼວງແຄນເບີຣາ ໃນວັນຈັນວານນີ້.
ມົດແດງໄຟ ມີຖິ່ນກຳເນີດຢູ່ໃນທະວີບອາເມລິກາໃຕ້ ແລະຄິດວ່າ ອາດຈະເຂົ້າມາໃນອອສເຕຣເລຍໂດຍຕູ້ຂົນສົ່ງຄອນເທັນເນີ້. ພວກມັນຖືກພົບຄັ້ງທຳອິດໃນນະຄອນບຣິສແບນ, ປະເທດອອສເຕຣເລຍ ໃນປີ 2001 ແຕ່ອາດຈະບໍ່ຖືກກວດພົບຢູ່ໃນປະເທດເປັນເວລາຫຼາຍປີ.
ພວກມັນໂຈມຕີແບບເປັນຝູງ. ບັນດາຜູ້ຊ່ຽວຊານກ່າວວ່າ ພວກມັນເປັນອັນຕະລາຍຕໍ່ຄົນ, ຕໍ່ສັດລ້ຽງໃນເຮືອນ, ຕໍ່ສັດລ້ຽງທົ່ວໄປ ແລະຕໍ່ສັດປ່າ. ມົດ ຈະລັອກຄາງກະໄຕຂອງພວກມັນໃສ່ຜິວໜັງຂອງຜູ້ເຄາະຮ້າຍ ແລ້ວປ່ອຍພິດຜ່ານປາຍແຫຼມຈາກໜ້າທ້ອງຂອງພວກມັນ. ການກັດຂອງພວກມັນ ເຮັດໃຫ້ເກີດອາການແສບຮ້ອນ, ເຊິ່ງເຮັດໃຫ້ມົດດັ່ງກ່າວນີ້ ມີຊື່ສຽງທີ່ເປັນຕາໜ້າຢ້ານຫຼາຍ.
ການສືບສວນຂອງລັດຖະສະພາໂດຍຄະນະກໍາມະການຮັບຜິດຊອບກິດຈະການຊົນນະບົດ ແລະພາກພື້ນ ແລະທີ່ອ້າງອີງການຂົນສົ່ງ ໃນນະຄອນຫຼວງແຄນເບີຣາ ກໍາລັງດໍາເນີນການສືບສວນກ່ຽວກັບຜົນກະທົບຕໍ່ສຸຂະພາບ, ຕໍ່ການກະສິກໍາ ແລະຕໍ່ສິ່ງແວດລ້ອມຂອງພວກເຂົາເຈົ້າ.
ມີຄວາມຂັດແຍ້ງກ່ຽວກັບຜົນກະທົບຂອງຄວາມພະຍາຍາມ ເພື່ອທໍາລາຍອານານິຄົມຂອງມົດເຫຼົ່ານັ້ນ.
ລັດຖະບານຂອງລັດຄວີນສ໌ແລນ ກ່າວວ່າ ໂຄງການຕ່າງໆໃນການກໍາຈັດມົດຂອງຕົນ ແມ່ນ "ຊັ້ນນຳຂອງໂລກ." ເຖິງແມ່ນບັນດານັກວິຈານໄດ້ຢືນຢັນວ່າ ອອສເຕຣເລຍ ໄດ້ຈັດການກັບໄພຂົ່ມຂູ່ຢ່າງຜິດພາດກໍຕາມ. ສະພາກ່ຽວກັບການຮຸກຮານຂອງສັດສາຍພັນມາຈາກແຫ່ງອື່ນຂອງໂລກ, ເຊິ່ງເປັນອົງການສິ່ງແວດລ້ອມທີ່ບໍ່ຂຶ້ນກັບລັດຖະບານ, ຢືນຢັນວ່າ ເຈົ້າໜ້າທີ່ອອສເຕຣເລຍ “ໄດ້ປະເມີນພວກມົດແດງໄຟຕ່ຳເກີນໄປ ມາເປັນເວລາ 20 ປີແລ້ວ ແລະບໍ່ມີການສະໜອງທຶນໃຫ້ແກ່ພວກເຮົາ ເພື່ອຮັບຜິດຊອບຕໍ່ພວກມັນ.”
ທ່ານນາງປາມ ສເວັບຊັນ (Pam Swepson), ອະດີດຜູ້ປະສານງານຊຸມຊົນ ແລະເປັນເຈົ້າໜ້າທີ່ນະໂຍບາຍຢູ່ໃນໂຄງການກໍາຈັດມົດແດງໄຟແຫ່ງຊາດ.
ທ່ານນາງກ່າວຕໍ່ສະຖານີໂທລະພາບຂອງອອສເຕຣເລຍ ວ່າ ພວກມົດທັງຫຼາຍນີ້ ຮ້າຍກາດທີ່ສຸດເລີຍ.
ທ່ານນາງ ສເວັບຊັນ ກ່າວວ່າ:
“ພວກມັນເປັນນຶ່ງໃນສາຍພັນທີ່ຮຮ້າຍກາດທີ່ສຸດໃນໂລກ. ພວກມັນສາມາດຍ່າງ, ສາມາດບິນ, ແລະສາມາດລອຍນໍ້າໄດ້. ພວກມັນບໍ່ເຄີຍໄດ້ຮັບການກໍາຈັດອອກຈາກປະເທດໃດໆທີ່ພວກມັນບຸກລຸກເຂົ້າໄປເລີຍ. ຖ້າລູກນ້ອຍຕົກເຂົ້າໄປໃນຮັງຂອງມັນ, ເຊິ່ງເບິ່ງຄືວ່າ ເປັນກອງຂີ້ຝຸ່ນ, ພວກມົດເຫຼົ່ານັ້ນ ຈະຫຸ້ມເຂົ້າມາຮຸກຮານ ແລະທັງກັດທັງຕອດຊໍ້າແລ້ວຊໍ້າອີກ, ແລະຖ້າໃຜຜູ້ນຶ່ງຫາກມີອາການພູມແພ້ຕໍ່ການຕອດຂອງພວກມັນ, ຜູ້ຄົນເຫຼົ່ານັ້ນ ສາມາດເຂົ້າສູ່ຂັ້ນແພ້ຢ່າງຮຸນແຮງ ແລະເສຍຊີວິດໄດ້.”
ການພິຈາລະນາຮັບຟັງຄວາມເຫັນຂອງລັດຖະບານກາງ ໃນວັນຈັນ ຢູ່ນະຄອນຫຼວງແຄນເບີຣາ ເຊິ່ງລວມມີການຍື່ນຄຳສະເຫນີຈາກສະຫະພັນຊາວນາແຫ່ງຊາດຂອງອອສເຕຣເລຍ, ບັນດານັກວິທະຍາສາດຂອງລັດຖະບານ ແລະບັນດາຜູ້ຕາງຫນ້າຈາກພະແນກກະສິກໍາ, ການປະມົງ ແລະປ່າໄມ້. ການພິຈາລະນາຮັບຟັງຄວາມເຫັນສອງຄັ້ງໃນກ່ອນໜ້ານີ້ ໄດ້ຖືກຈັດຂຶ້ນຢູ່ພາກຕາເວັນອອກຂອງອອສເຕຣເລຍ.
ບັນດາສະມາຊິກສະພາ ຈະລາຍງານຜົນການຄົ້ນພົບຂອງພວກເຂົາເຈົ້າພາຍໃນວັນທີ 18 ເມສາ ນີ້.
ອອສເຕຣເລຍ ໄດ້ມີປະສົບການທີ່ເປັນໄພຫາຍະນະ ໃນການນໍາເຂົ້າພວກຕົ້ນດອກໄມ້ ແລະສັດປ່າຈໍານວນນຶ່ງ.
ໂຄງການກໍາຈັດມົດແດງໄຟແຫ່ງຊາດໄດ້ເຕືອນວ່າ "ມົດແດງໄຟ ມີປະສິດທິພາບໃນການສ້າງຄວາມເສຍຫາຍໃນແຕ່ລະປີຫຼາຍກວ່າ ພວກສັດຕູພືດທີ່ຮ້າຍແຮງລວມກັນທັງໝົດເຊັ່ນ: ແມວປ່າ, ໝາປ່າ, ໝາຈອກ, ອູດ, ກະຕ່າຍ ແລະຂີ້ຄັນຄາກອ້ອຍ."
ພວກປາທີ່ເປັນສາຍພັນ ແລະຫຍ້າສາຍພັນຕ່າງໆທີ່ມາຈາກທ້ອງຖິ່ນອື່ນ ຍັງເຮັດໃຫ້ເກີດຄວາມເສຍຫາຍຕໍ່ສິ່ງແວດລ້ອມຢ່າງໃຫຍ່ຫຼວງ.
ບັນດາຜູ້ຊ່ຽວຊານກ່າວວ່າ ມົດແດງໄຟຂະຫຍາຍອານາເຂດແດນຂອງມັນ ໃນອັນດາປະມານ 50 ຫາ 80 ກິໂລແມັດຕໍ່ປີຢູ່ໃນຈີນ ແລະ ສະຫະລັດ.
ຟໍຣັມສະແດງຄວາມຄິດເຫັນ