ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ອອສເຕຣເລຍ ແລະ ຝຣັ່ງ ຈະສະໜອງລູກປືນໃຫຍ່ ໃຫ້ ຢູເຄຣນ


ລັດຖະມົນຕີການຕ່າງປະເທດ ອອສເຕຣເລຍ ທ່ານນາງ ເພັນນີ ວັອງ ຟັງລັດຖະມົນຕີປ້ອງກັນປະເທດ ອອສເຕຣເລຍ ທ່ານ ຣິເຈີດ ມາລສ໌ ກ່າວຄຳປາໄສໃນລະຫວ່າງກອງປະຊຸມຖະແຫຼງຂ່າວຮ່ວມ ຫຼັງຈາກກອງປະຊຸມຮ່ວມກັບຄູ່ຮ່ວມຕຳແໜ່ງຝຣັ່ງ, ນະຄອນຫຼວງ ປາຣີ, 30 ມັງກອນ 2023.
ລັດຖະມົນຕີການຕ່າງປະເທດ ອອສເຕຣເລຍ ທ່ານນາງ ເພັນນີ ວັອງ ຟັງລັດຖະມົນຕີປ້ອງກັນປະເທດ ອອສເຕຣເລຍ ທ່ານ ຣິເຈີດ ມາລສ໌ ກ່າວຄຳປາໄສໃນລະຫວ່າງກອງປະຊຸມຖະແຫຼງຂ່າວຮ່ວມ ຫຼັງຈາກກອງປະຊຸມຮ່ວມກັບຄູ່ຮ່ວມຕຳແໜ່ງຝຣັ່ງ, ນະຄອນຫຼວງ ປາຣີ, 30 ມັງກອນ 2023.

ຝ​ຣັ່ງ ແລະ ອອ​ສ​ເຕ​ຣ​ເລຍ ໄດ້​ຕົກ​ລົງ​ທີ່​ຈະ​ເຂົ້າ​ຮ່ວມກອງ​ກຳ​ລັງ​ເພື່ອ​ຜະ​ລິດ​ລູກ​ປືນ​ໃຫຍ່ຫຼາຍ​ພັນ​ລູກ ເພື່ອ​ຊ່ວຍ​ເຫຼືອ ຢູ​ເຄ​ຣນ ຂັບ​ໄລ່ກອງ​ກຳ​ລັງ ຣັດ​ເຊຍ ອອກ​ຈາກ​ປະ​ເທດ​ຂອງ​ເຂົາ​ເຈົ້າ. ລັດ​ຖະ​ມົນ​ຕີ​ປ້ອງ​ກັນ​ປະ​ເທດ ອອ​ສ​ເຕ​ຣ​ເລຍ ທ່ານ ຣິ​ເຈີດ ມາ​ລ​ສ໌ (Richard Marls) ແລະ ລັດ​ຖະ​ມົນ​ຕີ​ການ​ຕ່າງ​ປະ​ເທດ ທ່ານ​ນາງ ເພັນ​ນີ ວັອງ ແມ່ນ​ໄດ້​ເດີ​ນ​ທາງ​ໄປ​ທະ​ວີບ​ຢູ​ໂຣບ ສຳ​ລັບ​ການ​ເຈ​ລະ​ຈາ​ກັບ​ພັນ​ທະ​ມິດ​ທີ່​ສຳ​ຄັນ. ນັກ​ຂ່າວ​ວີ​ໂອ​ເອ ຟິ​ລ ເມີ​ເຊີ ມີ​ລາຍ​ງານ​ຈາກ​ນະ​ຄອນ ຊິດ​ນີ, ເຊິ່ງ ພຸດ​ທະ​ສອນ ຈະ​ນຳ​ລາຍ​ລະ​ອຽດ​ມາ​ສະ​ເໜີ​ທ່ານ​ໃນ​ອັນ​ດັບ​ຕໍ່​ໄປ.

ບັນ​ດາ​ເຈົ້າ​ໜ້າ​ທີ່ ຝ​ຣັ່ງ ແລະ ອອ​ສ​ເຕ​ຣ​ເລຍ ເວົ້າ​ວ່າ ລູກ​ປືນ​ໃຫຍ່ 155 ​ມມ ຫຼາຍ​ພັນ​ລູກ ຈະ​ຖືກ​ຜະ​ລິດ​ຮ່ວມ​ກັນ​ໂດຍ​ຜູ້​ສະ​ໜອງ​ອາ​ວຸດ ເນັກ​ສ​ເຕີ (Nexter) ຂອງ ຝ​ຣັ່ງ, ໃນ​ຂະ​ນະ​ທີ່ ອອ​ສ​ເຕ​ຣ​ເລຍ ຈະ​ສະ​ໜອງ​ດິນ​ປືນ​ໃຫ້. ການ​ສະ​ໜອງ​ຊຸດ​ທຳ​ອິດ​ແມ່ນ​ຄາດ​ວ່າ​ຈະ​ຖືກ​ສົ່ງ​ໃຫ້​ຢູ​ເຄ​ຣນ ພາຍ​ໃນ​ທ້າຍ​ເດືອນ​ເມ​ສານີ້.

ການ​ປະ​ກາດ​ດັ່ງ​ກ່າວ​ໄດ້​ມີ​ຂຶ້ນ​ໃນ​ວັນ​ຈັນ​ທີ່​ຜ່ານ​ມາ ໃນ​ກອງ​ປະ​ຊຸມ​ຖະ​ແຫຼງ​ຂ່າວ​ຮ່ວມ​ໃນ​ນະ​ຄອນຫຼວງ ປາ​ຣີ ໂດຍ​ລັດ​ຖະ​ມົນ​ຕີ​ປ້ອງ​ກັນ​ປະ​ເທດ ທ່ານ ເຊ​ບາ​ສ​ຕຽນ ເລີ​ກອກ​ນູ ແລະ ຄູ່​ຮ່ວມ​ຕຳ​ແໜ່ງຂອງ​ທ່ານ​ຈາກ ອອ​ສ​ເຕ​ຣ​ເລຍ ທ່ານ ຣິ​ເຈີດ ມາ​ລ​ສ໌.

ອອ​ສ​ເຕ​ຣ​ເລຍ ແມ່ນ​ຜູ້​ປະ​ກອບ​ສ່ວນ​ທີ່​ໃຫຍ່​ທີ່​ສຸດ ທີ່ບໍ່​ແມ່ນ​ສະ​ມາ​ຊິກ​ອົງ​ການ NATO ຕໍ່​ຄວາມ​ພະ​ຍາ​ຍາມ​ໃນ​ສົງ​ຄາມ​ຂອງ ຢູ​ເຄ​ຣນ.

ອອ​ສ​ເຕ​ຣ​ເລຍ ​ໄດ້​ສະ​ໜອງ​ລູກ​ສອນ​ໄຟ ແລະ ລົດ​ຫຸ້ມ​ເກາະ ລຳ​ລຽງ​ພົນ​ Bushmaster ໄປ​ໃຫ້. ກຸ່ມ​ເຈົ້າ​ໜ້າ​ທີ່ກອງ​ກຳ​ລັງ​ປ້ອງ​ກັນ​ປະ​ເທດ ອອ​ສ​ເຕ​ຣ​ເລຍ 70 ຄົນ ກໍ​ໄດ້​ໄປ​ປະ​ຈຳ​ການ​ໃນ​ອັງ​ກິດ ເພື່ອ​ຊ່ວຍ​ຝຶກ​ຊ້ອ​ມ​ໃຫ້​ກອງ​ທະ​ຫານ ຢູ​ເຄ​ຣນ.

ອອ​ສ​ເຕ​ຣ​ເລຍ ກໍ​ຍັງ​ໄດ້​ວາງ​ມາດ​ຕະ​ການ​ລົງ​ໂທດ​ຢ່າງກວ້າງ​ຂວາງ​ຕໍ່ ຣັດ​ເຊຍ, ເຊິ່ງ​ແມ່ນ​ຮ້າຍ​ແຮງ​ທີ່​ສຸດ ເທົ່າ​ທີ່​ລັດ​ຖະ​ບານ ແຄນ​ເບີ​ຣາ ເຄີຍ​ກຳ​ນົດ​ຕໍ່​ລັດ​ຖະ​ບານ​ຕ່າງ​ປະ​ເທດ.

ທ່ານ ມາ​ລ​ສ໌ ໄດ້​ກ່າວ​ຕໍ່​ບັນ​ດາ​ນັກ​ຂ່າວວ່າ ປາ​ຣີ ແລະ ແຄ​ນ​ເບີ​ຣາ ແມ່ນ​ກຳ​ລັງ​ຢືນ​ຮ່ວມ​ມື​ສາ​ມັກ​ຄີ​ກັນ​ກັບ ຢູ​ເຄ​ຣນ.

ທ່ານ ມາ​ລ​ສ໌ ໄດ້​ກ່າວ​ວ່າ “ພວກ​ເຮົາ​ຢາກ​ດຳ​ເນີນ​ການ​ຮ່ວມ​ກັນ ເພື່ອ​ສະ​ແດງ​ໃຫ້​ເຫັນ ກ່ຽວ​ກັບ ວ່າ​ມັນ​ສຳ​ຄັນ​ແນວ​ໃດ​ສຳ​ລັບ ອອ​ສ​ເຕ​ຣ​ເລຍ ແລະ ຝ​ຣັ່ງ ກ່ຽວ​ກັບ​ການ​ສະ​ໜັບ​ສະ​ໜູນ ຢູ​ເຄ​ຣນ ໃນ​ຄວາມ​ຂັດ​ແຍ້ງ​ປັດ​ຈຸ​ບັນ​ນີ້. ພວກ​ເຮົາ​ທັງ​ສອງ​ໄດ້​ສະ​ໜັ​ບ​ສະ​ໜູນ ຢູ​ເຄ​ຣນ ໃນ​ວິ​ທີ​ອື່ນ​ຕ່າງ​ຫາກ, ແຕ່​ພວກ​ເຮົາ​ຢາກ​ເຮັດ​ໃຫ້​ມັນ​ຈະ​ແຈ້ງ​ຢ່າງ​ແທ້​ຈິງວ່າ ອອ​ສ​ເຕ​ຣ​ເລຍ ແລະ ຝ​ຣັ່ງ ແມ່ນ​ຢືນ​ຄຽງ​ຂ້າງ​ກັນ​ໃນ​ການ​ສະ​ໜັບ​ສະ​ໜູນ ຢູ​ເຄ​ຣນ ຕໍ່​ການ​ຮຸກ​ຮານ​ຂອງ ຣັດ​ເຊຍ ນີ້.”

ພ້ອມ​ກັນ​ນັ້ນ​ໃນ​ການ​ເຂົ້າ​ຮ່ວມກອງ​ປະ​ຊຸມ​ລາຍ​ງານ​ຕໍ່​ສື່ມວ​ນ​ຊົນ​ໃນ​ນະ​ຄອນຫຼວງ ປາ​ຣີ ແມ່ນ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ທ່ານ​ນາງ ແຄ​ເທີ​ຣີນ ຄາ​ລົນ​ນາ ແລະ ລັດ​ຖະ​ມົນ​ຕີ​ການ​ຕ່າງ​ປະ​ເທດ ອອ​ສ​ເຕ​ຣ​ເລຍ ທ່ານ​ນາງ ເພັນ​ນີ ວັອງ.

ໃນ​ຂະ​ນະ​ທີ່​ການ​ສະ​ໜັບ​ສະ​ໜູນ​ສຳ​ລັບ​ຄວາ​ມ​ພະ​ຍາ​ຍາມ​ຂອງ ຢູ​ເຄ​ຣນ ເພື່ອ​ຂັບ​ໄລ່​ການ​ບຸກ​ລຸກ​ຂອງ ຣັດ​ເຊຍ ໄດ້​ຄອບ​ງຳ​ການ​ເຈ​ລະ​ຈາ​ສອງ​ຝ່າຍ​ນັ້ນ, ລັດ​ຖະ​ບານ ປາ​ຣີ ແລະ ແຄ​ນ​ເບີ​ຣາ ກໍ​ໄດ້​ພະ​ຍາ​ຍາມ​ທີ່​ຈະຫຼຸດ​ຜ່ອນ​ຄວາມ​ເຄັ່ງ​ຕຶງ​ສາຍ​ພົວ​ພັນ​ທາງ​ການ​ທູດ.

ສາຍ​ພົວ​ພັນ​ລະ​ຫວ່າງ​ສອງ​ປະ​ເທດ​ດັ່ງ​ກ່າວ​ ໄດ້​ຖືກ​ກະ​ທົບ​ຢ່າງ​ຮຸນ​ແຮງ ​ໃນ​ປີ 2021 ເວ​ລາລັດ​ຖະ​ບານ ແຄນ​ເບີ​ຣາ ໄດ້​ຍົກ​ເລີກ​ສັນ​ຍາ​ເຮືອ​ດຳ​ນ້ຳ​ຂອງ ຝ​ຣັ່ງ ມາເອົາ​ເຮືອ​ດຳ​ນ້ຳ​ພະ​ລັງ​ງານ​ນິວ​ເຄ​ລຍ ຂອງ ອາ​ເມ​ຣິ​ກາ, ພ້ອມ​ກັບ​ການ​ເຂົ້າ​ຮ່ວມ​ພັນ​ທະ​ມິດ ​ດ້ານ​ຄວາມ​ປອດ​ໄພ​ສາມ​ຝ່າຍ​ກັບ ຝ​ຣັ່ງ ແລະ ອັງ​ກິດ ເຊິ່ງ​ຮູ້​ຈັກ​ກັນ​ໃນ​ຊື່ AUKUS.

ທ່ານ ມາ​ລ​ສ໌ ແລະ ທ່ານ​ນາງ ວັອງ ກໍ​ຍັງ​ມີ​ກຳ​ນົດ​ທີ່​ຈະ​ຈັດ​ການ​ເຈ​ລະ​ຈາ​ໃນ​ອາ​ທິດນີ້​ກັບ​ບັນ​ດາ​ລັດ​ຖະ​ມົນ​ຕີ​ລັດ​ຖະ​ບານ ອັງ​ກິດ.

ອ່ານລາຍງານນີ້ເປັນພາສາອັງກິດ

XS
SM
MD
LG