ຜູ້ນຳຝ່າຍຄ້ານຂອງມຽນມາ ທ່ານນາງ Aung San Suu Kyi
ໄດ້ພົບປະກັບ ທ່ານ Xi Jingping ປະທານປະເທດຈີນ
ໃນຂະນະທີ່ທ່ານນາງ ຊຶ່ງເປັນສັນຍາລັກຂອງຜູ້ນຳປະຊາທິ
ປະໄຕ ສືບຕໍ່ການຢ້ຽມຢາມຈີນ.
ຜູ້ນຳທັງສອງທ່ານໄດ້ພົບປະກັນໃນວັນພະຫັດມື້ນີ້ ໃນຫໍປະຊຸມ
ສາລາປະຊາຊົນ ໃນນະຄອນປັກກິ່ງ ອິງຕາມລາຍງານອົງການ
ຂ່າວຊິນຫົວ ຊຶ່ງບໍ່ໄດ້ໃຫ້ລາຍລະອຽດຫຍັງເພີ້ມຕື່ມ.
ທ່ານນາງ Aung San Suu Kyi ໄດ້ເລີ້ມທຳການຢ້ຽມຢາມຈີນ ເປັນຄັ້ງທຳອິດຂອງທ່ານນາງ ໃນວັນພຸດວານນີ້ ໂດຍມີເປົ້າໝາຍເພື່ອສົ່ງເສີມສາຍພົວພັນທາງການທູດສອງຝ່າຍ ທີ່ໄດ້ທົດສອບອັນເປັນຜົນເນື່ອງມາຈາກການປະຕິຮູບປະຊາທິປະໄຕໃນປະເທດຂອງທ່ານນາງ.
ຈີນເປັນພັນທະມິດທີ່ສຳຄັນກັບອະດີດພວກຜູ້ນຳທະຫານທີ່ປົກຄອງມຽນມາ ທີ່ໄດ້ກັກບໍລິເວນທ່ານນາງໃຫ້ຢູ່ກັບບ້ານເປັນເວລາຫຼາຍໆປີນັ້ນ ຈົນຮອດປີ 2010 ທ່ານນາງຈຶ່ງໄດ້ຖືກປ່ອຍ.
ທ່ານນາງ ແມ່ນເປັນຕົວແທນຄົນສຳຄັນຂອງພັກຝ່າຍຄ້ານ ແລະເປັນຜູ້ນຳຂອງພັກສັນນິ ບາດແຫ່ງຊາດເພື່ອປະຊາທິປະໄຕ ຫລື NLD ຊຶ່ງຄາດໝາຍວ່າຈະເປັນພັກທີ່ໄດ້ຮັບ
ອຳນາດຫຼາຍຂຶ້ນ ໃນການເລືອກຕັ້ງຄັ້ງໜ້າ ໃນທ້າຍປີນີ້.
ສາຍພົວພັນທາງດ້ານເສດຖະກິດລະຫວ່າງມຽນມາກັບຈີນນັ້ນ ແມ່ນມີຄວາມທ້າທາຍ ນັບຕັ້ງແຕ່ ລັດຖະບານທະຫານໄດ້ມອບອຳນາດ ໃຫ້ທາງລັດຖະບານພົນລະເຮືອນໃນປີ 2010 ແລະກໍໄດ້ເລີ້ມທຳການປະຕິຮູບທາງດ້ານປະຊາທິປະໄຕມາຫຼາຍໆບັ້ນແລ້ວ ຢ່າງຕໍ່ເນື່ອງ.
ໃນການຕອບຮັບດັ່ງກ່າວນີ້ ສະຫະລັດ ແລະຢູໂຣບ ແມ່ນໄດ້ເລີ້ມຜ່ອນຜັນການລົງໂທດຕໍ່ມຽນມາ ແລະນັບແຕ່ນັ້ນມາປະເທດດັ່ງກ່າວ ກໍມີການຫຼັ່ງໄຫຼໃນການລົງທຶນຈາກບັນດາປະເທດຕາເວັນຕົກເຂົ້າໄປໃນມຽນມາຢ່າງວ່ອງໄວ.
