ລິ້ງ ສຳຫລັບເຂົ້າຫາ

ບັນດາກຸ່ມຊ່ວຍເຫລືອ ຮ້ອງຂໍຄວາມຊ່ວຍເຫລືອ ໃຫ້ຜູ້ປະສົບໄພ​ນ້ຳ​ຖ້ວມ​ ຢູ່ລາວ ແລະປະເທດເພື່ອນບ້ານ

  • Ron Corben

ນໍ້າຖ້ວມ ຢູ່ຈັງຫວັດປຣາຈີນບຸລີ ປະເທດໄທ ເມື່ອວັນທີ 1 ຕຸລາ ເມື່ອອາທິດຜ່ານມາ.
ໄພ​ນໍ້າ​ຖ້ວມ​ໃນ​ລະດູມໍ​ລະ​ສຸມ ຢູ່​ທົ່ວ​ເອ​ເຊຍ​ຕາ​ເວັນອອກສຽງ​
ໃຕ້ ​ໄດ້ສົ່ງຜົນ​ກະທົບຕໍ່​ປະຊາຊົນ ຫລາຍ​ກວ່າ 3 ລ້ານ​ຄົນ
​ແລະ​ໄດ້​ເອົາ​ຊີວິດໄປ​ແລ້ວ ຢ່າງ​ໜ້ອຍ 100 ຄົນ ຊຶ່ງສ່ວນ​ໃຫຍ່
ແມ່ນຢູ່​ໃນ ຫວຽດນາມ ລາວ ​ແລະ ​ໄທ.


ບັນດາອົງການ​ຊ່ວຍ​ເຫລືອ ​ກ່າວ​ວ່າ ​ນອກ​ນັ້ນ​ແລ້ວ 4 ແຂວງ​
ພາກ​ກາງຂອງ​ຫວຽດນາມ​ ອັນ​ມີ​ແຂວງ Ha Tinh, Quang
Tri, Nghe An ​ແລະ Thanh Hoa ທີ່​ໄດ້​ປະສົບ​ກັບ​ໄພ​ນໍ້າ​
ຖ້ວມ​ຢ່າງ​ໜັກ ເວ​ລາ​ນີ້ກໍຍັງ​ກໍາລັງພະຍາຍາມຟື້ນໂຕຄືນຈາກ​
ໄຕ້​ຝຸ່​ນ Wutip ທີ່​ໄດ້ຖະຫລົ່ມ​ເຂົ້າຝັ່ງ ​ໃນ​ກາງ​ອາທິດ​ແລ້ວ​ນີ້.

ອົງການ World Vision ​ແລະ​ສະມາພັນສາກົນ ຂອງ​ສະພາ​ກາ​ແດງ​ ​ແລະ ສະມາຄົມ
ສ້ຽວ​ເດືອນ​ແດງ ​ເອີ້ນ​ຫຍໍ້​ວ່າ IFRC ນັ້ນ ໄດ້ພາກັນ​ເລີ້ມຮ້ອງຂໍ​ເອົາ ການ​ຊ່ວຍ​ເຫລືອ
​ໃຫ້​ແກ່​ຜູ້​ໄດ້​ຮັບ​ເຄາະ​ຮ້າຍ​ຈາກໄພ​ນໍ້າ​ຖ້ວມ.

ທ່ານ​ນາງ Kate Roux ປະ​ຈໍາ ຫ້ອງການ​ເອ​ເຊຍ​ຕາ​ເວັນອອກສຽງ​ໃຕ້​ຂອງອົງການ
IFRC ກ່າວ​ວ່າ ​ໄດ້​ມີ​ການ​ເສຍ​ຫາຍ​ຢ່າງ​ໜັກ​ແລະ​ແຜ່​ກວ້າງ ​ແລະ​ການຮ້ອງຂໍ​ຄວາມ
​ຊ່ວຍ​ເຫລືອ ​ແມ່ນ​ສໍາລັບ​ທັງ​ຄວາມ​ຕ້ອງການ​ສະ​ເພາະ​ໜ້າ ​ຫລື​ໃນທັນທີ ​ກັບ​ທັງສໍາ
​ລັບການ​ຟື້ນ​ໂຕ​ຄືນໃນ​ໄລຍະ​ຍາວ​ ​ຂອງບັນດາ​ປະຊາ​ຄົມ ທີ່​ປະສົບ​ໄພ​ນໍ້າ​ຖ້ວມ​ນັ້ນ.
ທ່ານ​ນາງ​ກ່າວ​ວ່າ:

“ມີປະຊາຊົນ​ຫລາຍ​ກ່ວາ 100,000 ຄົນ ຢູ່​ໃນປະມານ​ສີ່​ແຂວງ ທີ່ໄດ້ຖືກ
​ຍົກຍ້າຍ​ອອກ​ໄປ ກ່ອນ​ໜ້າພາຍຸ​ໄຕ້​ຝຸ່ນ. ​ບ້ານ​ເຮືອນຫລາຍ​ກວ່າ 150,000
ຫລັງ​ ໄດ້​ຮັບ​ຄວາມ​ເສຍ​ຫາຍ ຫລື​ພັງ​ລົງ. ຫລາຍໆຄົນກໍາ​ລັງ​ພັກ​ເຊົາ​ຢູ່​ກັບ
ໝູ່​ເພື່ອນ ​ແລະ​ບັນດາເພື່ອນ​ບ້ານ. ​ເພາະສະ​ນັ້ນ ຄວາມ​ຕ້ອງການ​ທີ່ສະພາ
ກາ​ແດງ​ຂອງ​ຫວຽດນາມໄດ້​ຕີ​ລາຄາ​ໄປ​ນັ້ນ ​ຈຶ່ງ​ມີ​ຈໍານວນ​ຫລວງຫລາຍສົມ
ຄວນ ​ແລະພວກ​ເຮົາກໍຢາກຈະມີ​ຄວາມ​ສາມາດ ທີ່​ຈະ​ສະໜອງ​ການ​ຊ່ວຍ​
ເຫລືອ​ໃນ​ໄລ​ຍະ​ຍາວ ໃຫ້ແກ່ບັນດາ​ຄອບຄົວທີ່​ຕ້ອງການຄວາມຊ່ວຍ​ເຫລືອ
ໃນທັນ​ທີ ​ແລະ​ໃນ​ໄລຍະ​ຍາວນັ້ນ​ນໍາ.”


ສ່ວນໄພນໍ້າ​ຖ້​ວມຢູ່​ໃນ​ປະ​ເທດລາວນັ້ນ ກໍ​ມີ​ລາຍ​ງານ​ວ່າ​ຮ້າຍ​ແຮງ​ທີ່​ສຸດ​ໃນ​ຮອບ 35 ປີ
ແລະ​ໄດ້ເຮັດ​ໃຫ້ 20 ຄົນເສຍ​ຊີວິດ ​ແລະຫລາຍ​ກວ່າ 350,000 ຄົນ​ມີ​ຄວາມ​ຕ້ອງການ
​ສະບຽງອາຫານ​ສຸກ​ເສີນ ນໍ້າ​ດື່ມ ​ແລະ​ຢູກຢາ.

ໄພນໍ້າຖ້ວມ ຢູ່ແຂວງສະລະວັນ
ໄພນໍ້າຖ້ວມ ຢູ່ແຂວງສະລະວັນ

ອົງການ World Vision ກ່າວ​ວ່າ ຕົນ​ໄດ້​ສະໜອງຕອບ
ຕໍ່ການ​ຮ້ອງ​ຂໍຄວາມ​ຊ່ວຍເຫລືອຈາກແຂວງ​ຈໍາປາ​ສັກ
​ໃນພາກ​ໃຕ້​ຂອງ​ລາວ ບ່ອນ​ທີ່ 56 ໝູ່​ບ້ານ ອັນ​ເປັນ​ບ່ອນ
​ຢູ່​ອາ​ໄສຂອງ 53,000 ຄົນ​ໄດ້​ຖືກ​ນໍ້າ​ຖ້ວມ. ມີລາຍ​ງານ​
ວ່າ ຫລາຍໆ​ຄົນ​ໄດ້​ຕົກ​ຄ້າງຢູ່​ກາງ​ນໍ້າຖ້ວມ ​ກະ​ຕຸ້ນໃຫ້​
ມີ​ການ​ຮ້ອງ​ຂໍການ​ຊ່ວຍ​ເຫລືອ​ສຸກ​ເສີນດ້ານ​ອາຫານ
ທ່າ​ມກາງສະພາວະຂອງການ​ໝົດ​ຫົນທາງ​ຈະ​ເຮັດ.

ທ່ານ​ນາງ Kate Roux ຈາກ​ອົງການ IFRC ກ່າວ​ວ່າ
ສະຖານະພາບການເປັນປະ​ເທດ​ທີ່ດ້ອຍພັດທະນາ​ຂອງ​ລາວ​ນັ້ນ ໝາຍ​ຄວາມ​ວ່າ
ບັນດາປະຊາຄົມ​ຢູ່​ທີ່​ນັ້ນ ແມ່ນ​ອ່ອນ​ແອ​ຕໍ່​ຜົນ​ກະທົບ​ຈາກ​ໄພ​ນໍ້າ​ຖ້ວມຫລາຍກວ່າ
ຢູ່​ປະ​ເທດອື່ນໆ.

“ສ່ວນໃຫຍ່​ແລ້ວຢູ່ພາກໃຕ້ ແຕ່ວ່າ ມີຫລາຍກວ່າ 220,000 ຄົນໄດ້ຮັບຜົນ
ກະທົບ ແລະ​ໃນ​ຖານະ​ທີ່​ເປັນ​ປະ​ເທດ​ທີ່ມີລາຍໄດ້ຕໍ່າ ​ແລະ​ອ່ອນ​ແອຫລາຍ
ກ່ວາປະ​ເທດ​ອື່ນ​ໃດ​ໃນ​ຂົງ​ເຂດ ຄວາມເປັນຫ່ວງຈຶ່ງ​ມີ​ຫລາຍ. ເພາະສະນັ້ນ
ສະພາກາແດງລາວ ແລະພາຄີຂອງເຂົາເຈົ້າ… ແນ່ນອນວ່າ ພວກເຂົາເຈົ້າ
ກໍາລັງພາກັນ ດິ້ນຮົນພະຍາຍາມຫາ​ທາງ​ຕອບ​ສະໜອງຄວາມຕ້ອງການ​
ເຫລົ່າ​ນັ້ນ ຊຶ່ງຄວາມ ຕ້ອງການສະ​ເພາະ​ໜ້າ ​ໃນທັນທີນີ້ ກໍຄື ​ເຂົ້າປາອາ
ຫານ ນໍ້າດື່ມສະອາດ ຢາ ປົວພະຍາດ ການຮັກສາສຸຂະພາບ ອັນເປັນ
ຄວາມຕ້ອງການຂັ້ນພື້ນຖານທັງ​ນັ້ນ. ບາດ​ແລ້ວ ພວກເຮົາກໍຈະຮ້ອງ​ຂໍ​ເອົາ​ການສະໜັບສະໜຸນໄລຍະຍາວ.”


ຢູ່​ກໍາປູ​ເຈຍ​ນັ້ນ ລາຍງານ​ເມື່ອວັນເສົາຜ່ານ​ມາ ຈາກຄະນະກໍາມະການຮັບ​ມື​ກັບ
​ໄພ​ຫາ​ຍະ​ນະແຫ່ງຊາດຂອງກໍາປູເຈຍ ບອກວ່າ ຈໍານວນຜູ້ເສຍຊີວິດຍ້ອນໄພນໍ້າ
ຖ້ວມຢູ່ທີ່ນັ້ນ ໄດ້​ເພີ້​ມຂື້ນ ເຖິງ 39 ຄົນ​ແລ້ວ.

ນໍ້າຖ້ວມວັດແຫ່ງນຶ່ງ ຢູ່ກໍາປູເຈຍ.
ນໍ້າຖ້ວມວັດແຫ່ງນຶ່ງ ຢູ່ກໍາປູເຈຍ.

ບັນດາເຈົ້າໜ້າທີ່ກໍາປູເຈຍ ກ່າວວ່າ ໄພນໍ້າຖ້ວມໄດ້ທໍາລາຍ
ຜົນລະປູກຢ່າງ​ຮາບຄາບສ້າງຄວາມເສຍຫາຍ​ໃຫ້ທົ່ງ​ໄຮ່ທົ່ງນາ​
ແລະຜົນລະປູກອື່ນໆ ​ໃນ​ພື້ນ​ທີ່​ຫລາຍກວ່າ 100,000 ເຮັກຕາ.
ມີລາຍງານວ່າ ໂຮງຮຽນແລະວັດວາອາຮາມ ຫລາຍຮ້ອຍຫລັງ
ພ້ອມ​ທັງສູນກາງປິ່ນປົວສຸຂະພາບ ຫລາຍສິບແຫ່ງຢູ່ໃນຂົງ
ເຂດຖືກເສຍຫາຍ. ຫລາຍກວ່າ 130,000 ຄອບຄົວ ​ຮູ້ສຶກ​ເຖິງ
ຜົນກະທົບຈາກໄພນໍ້າຖ້ວມ ຢູ່ທົ່ວປະເທດ.

ຢູ່ໃນປະເທດໄທ ທີ່ຍັງຖືກຫລອກຫລອນ​ໂດຍຄວາມຊົງຈໍາ
ກ່ຽວ​ກັບໄພນໍ້າຖ້ວມຮ້າຍແຮງ ເມື່ອສອງປີກ່ອນນັ້ນ ຢ່າງໜ້ອຍ 30 ຄົນໄດ້ເສຍຊີວິດ
ແລະ 3 ລ້ານຄົນໄດ້ຮັບຜົນກະທົບ. ໄພນໍ້າຖ້ວມ​ເຫລົ່າ​ນີ້ໄດ້ເກີດຂື້ນ ຫລັງຈາກມີການ
ຕັກເຕືອນເປັນປະຈໍາຢູ່​ຕໍ່​ມາ ຈາກພວກນັກວິທະຍາສາດດ້ານການປ່ຽນແປງຂອງດິນ
ຟ້າອາກາດກ່ຽວ​ກັບຄວາມ​ຖີ່​ຂຶ້ນ ​ແລະ​ຮ້າຍແຮງຂື້ນ ຂອງພາຍຸປະ​ຈໍາ​ລະດູ​ການ​ນັ້ນ.

ຫ້ອງການຫລຸດຜ່ອນການສ່ຽງໄພຕໍ່​ໄພພິບັດຂອງອົງການສະຫະປະຊາຊາດ ເອີ້ນ​ຫຍໍ້
​ວ່າ UNISDR ໄດ້ຮຽກຮ້ອງໃຫ້ລັດຖະບານທັງຫລາຍ ຮັບເອົານະໂຍບາຍສອງ​ດ້ານ
ຄື​ໃນດ້ານຫລຸດຜ່ອນຕໍ່ການສ່ຽງໄພ ​ແລະສະໜອງ​ງົບປະມານ​ສໍາລັບ​ການ​ຊ່ວຍ​ເຫລືອ
ສຸກເສີນຫລາຍຂື້ນ. ຫ້ອງການ UNISDR ກ່າວວ່າການລົງທຶນ​ເພີ້​ມຂຶ້ນ​ໃສ່​ການຫລຸດ
ຜ່ອນການສ່ຽງຕໍ່ໄພທໍາ​ມະ​ຊາດນັ້ນ ສາມາດນໍາໄປສູ່ການ​ໃຊ້​ຈ່າຍ​ທີ່ຖືກລົງ ແລະຮັກ
ສາຊີວິດປະຊາຊົນ​ໄວ້​ໄດ້.


XS
SM
MD
LG