ລິ້ງ ສຳຫລັບເຂົ້າຫາ

ວັນອາທິດ, ໒໑ ເມສາ ໒໐໒໔

ຜູ້ນຳຂອງອັງກິດ ມີຄວາມຫວັງ ໄປໃນແງ່ດີ ກ່ຽວກັບການຍົກເລີກ ຂໍ້ຈຳກັດຕໍ່ໂຄວິດ-19


ນາຍົກລັດຖະມົນຕີອັງກິດ ທ່ານບໍຣິສ ຈອນສັນ ເຂົ້າໄປນັ່ງເບິ່ງ ຢູ່ໃນຫ້ອງຮຽນ ທີ່ໂຮງຮຽນ Sedgehill ໃນເມືອງ Lewisham ທາງພາກຕາເວັນອອກສຽງໃຕ້ຂອງລອນດອນ ເມື່ອວັນທີ 23 ກຸມພາ 2021.
ນາຍົກລັດຖະມົນຕີອັງກິດ ທ່ານບໍຣິສ ຈອນສັນ ເຂົ້າໄປນັ່ງເບິ່ງ ຢູ່ໃນຫ້ອງຮຽນ ທີ່ໂຮງຮຽນ Sedgehill ໃນເມືອງ Lewisham ທາງພາກຕາເວັນອອກສຽງໃຕ້ຂອງລອນດອນ ເມື່ອວັນທີ 23 ກຸມພາ 2021.

ນາຍົກລັດຖະມົນຕີອັງກິດ ທ່ານບໍຣິສ ຈອນສັນ ກ່າວໃນວັນອັງຄານນີ້ວ່າ ທ່ານມີຄວາມຫວັງໄປໃນແງ່ດີ ທີ່ວ່າຂໍ້ຈຳກັດຮັດແຄບຕ່າງໆກ່ຽວກັບໂຄວິດ-19 ຢູ່ໃນປະເທດອັງກິດ ຈະສິ້ນສຸດລົງໃນວັນທີ 21 ມິຖຸນານີ້.

ທ່ານຈອນສັນໃຫ້ຄວາມເຫັນດັ່ງກ່າວ ຂະນະທີ່ທ່ານໄປຢ້ຽມຢາມໂຮງຮຽນແຫ່ງນຶ່ງທີ່ຕັ້ງຢູ່ທາງໃຕ້ນະຄອນຫຼວງລອນດອນ ເພື່ອເວົ້າເຖິງຄວາມຫວັງໃນການທີ່ຈະເປີດໂຮງຮຽນຄືນທັງໝົດພາຍໃນວັນທີ 8 ມີນາ ອັນເປັນພາກສ່ວນນຶ່ງຂອງ “ແຜນທີ່” ໃນການຍົກເລີກຂໍ້ຈຳກັດຮັດແຄບແລະຍຸຕິການການຈຳກັດບໍລິເວນຫຼືປິດເມືອງ ທີ່ທ່ານໄດ້ເວົ້າເຖິງເມື່ອວັນຈັນຜ່ານມານີ້.

ທ່ານຈອນສັນກ່າວຕໍ່ພວກນັກຂ່າວວ່າ ບໍ່ມີຫຍັງຄ້ຳປະກັນໄດ້ ແລະລັດຖະບານຂອງທ່ານຈະສືບຕໍ່ປະຕິບັດຕາມຄຳແນະນຳຕ່າງໆ ໃນແຕ່ລະຂັ້ນຕອນ.

ແຕ່ຂະນະດຽວກັນ ທ່ານກໍກ່າວວ່າ ຍ້ອນ “ວິທະຍາສາດໄດ້ມອບເສັ້ນທາງເພື່ອສ້າງຕັ້ງການຄຸ້ມຄອງໃຫ້ແກ່ປະຊາຊົນຂອງພວກເຮົາດັ່ງນັ້ນພວກເຮົາຈຶ່ງສາມາດມອງເຫັນໄດ້ວ່າວັນທີ 21 ມິຖຸນາເປັນວັນທີ່ພວກເຮົາມີຄວາມຫວັງໄປໃນແງ່ດີ.”

ພາຍໃຕ້ແຜນການດັ່ງກ່າວ ທ່ານຈອນສັນໄດ້ເປີດເຜີຍໃຫ້ຮູ້ໃນວັນຈັນຜ່ານມານີ້ວ່າ ທຸລະກິດຈຳນວນນຶ່ງຍັງຈະປິດຕໍ່ໄປຈົນຮອດລະດູຮ້ອນ. ທ່ານຈອນສັນເວົ້າວ່າ ຄວາມລະມັດລະວັງແມ່ນເປັນເລື້ອງຈຳເປັນ ເພື່ອຄ້ຳປະກັນວ່າ ມັນຈະບໍ່ມີການຕ່າວປີ້ນຄືນ “ໃນເສັ້ນທາງດຽວໄປສູ່ອິດສະຫຼະພາບ.”

ທ່ານຈອນສັນກ່າວວ່າ ພວກເຂົາເຈົ້າຍັງມີຄວາມລະມັດລະວັງໃນການທົບທວນເບິ່ງຄວາມຄິດກ່ຽວກັບ “ການອອກໃບຢັ້ງຢືນ” ໃນການສັກຢາວັກຊີນ ຊຶ່ງພວກທີ່ໄດ້ຮັບການສັກຢາຄົບຖ້ວນແລ້ວ ອາດຈະໄດ້ຮັບເອກກະສານດັ່ງກ່າວ ທີ່ຈະອະນຸຍາດໃຫ້ພວກເຂົາເຈົ້າ ເຂົ້າໄປໃນໂຮງມະຫໍລະສົບ ໄນຄລັບ ຫຼືພິທີຕ່າງໆໄດ້.

ທ່ານກ່າວວ່າ ລັດຖະມົນຕີອະວຸໂສ ທ່ານໄກໂກ ໂກວ (Michael Gove) ຈະເປັນຫົວໜ້າໃນການທົບທວນ ເພື່ອອະພິປາຍກ່ຽວກັບຄຳຖາມ “ທາງດ້ານວິທະ ຍາສາດ ສິນທຳ ປະລັດຊະຍາ ຈັນຍາບັນ” ໃນການອອກໃບຢັ້ງຢືນກ່ຽວກັບຢາວັກຊີນ. ທ່ານກ່າວວ່າ ມັນເປັນເລື້ອງທີ່ສະຫລັບຊັບຊ້ອນ “ໃນບັນຫາທາງດ້ານຈັນຍາບັນ ທີ່ວ່າລັດຖະບານຄວນເອົາບົດບາດແບບໃດເພື່ອບັງຄັບໃຫ້ຜູ້ຄົນເຮັດໃນສິ່ງນັ້ນ” ຊຶ່ງອາດຈະເຮັດໃຫ້ລັດຖະບານມີການຈໍາແນກກີດກັນຕໍ່ຜູ້ຄົນ ບໍ່ວ່າດ້ວຍເຫດຜົນໃດໆ ທີ່ບໍ່ສາມາດໄດ້ຮັບຢາວັກຊີນ.

ນັບເປັນເວລາສອງເດືອນມາແລ້ວ ທີ່ອັງກິດ ໄດ້ຈັດໃຫ້ມີການສັກຢາວັກຊີນເຂັມທີນຶ່ງ ແກ່ນຶ່ງສ່ວນສີ່ສຳລັບປະຊາຊົນຂອງຕົນ ຊຶ່ງເປັນການສັກຢາທີ່ວ່ອງໄວທີ່ສຸດສຳລັບປະເທດທີ່ໃຫຍ່ໆ ເຮັດໃຫ້ເປັນກໍລະນີທົດສອບຂອງລັດຖະບານໃນທົ່ວໂລກ ໂດຍມີຄວາມຫວັງທີ່ຈະກັບຄືນກັບສູ່ສະພາບປົກກະຕິນັ້ນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG