ລິ້ງ ສຳຫລັບເຂົ້າຫາ

ວັນສຸກ, ໒໔ ພຶດສະພາ ໒໐໒໔

ພວກປະທ້ວງ ຢູ່ທົ່ວໂລກ ສະໜັບສະໜຸນ ພວກເດີນຂະບວນ ຢູ່ໃນສະຫະລັດ


ພວກປະທ້ວງເດີນຂະບວນໄປຍັງຈະຕຸລັດ Trafalgar ໃນໃຈກາງລອນດອນ ເມື່ອວັນທີ 31 ພຶດສະພາ ປີ 2020 ເພື່ອສະໜັບສະໜຸນ ການເດີນຂະບວນຢູ່ສະຫະລັດ.
ພວກປະທ້ວງເດີນຂະບວນໄປຍັງຈະຕຸລັດ Trafalgar ໃນໃຈກາງລອນດອນ ເມື່ອວັນທີ 31 ພຶດສະພາ ປີ 2020 ເພື່ອສະໜັບສະໜຸນ ການເດີນຂະບວນຢູ່ສະຫະລັດ.

ການເສຍຊີວິດໃນວີິດີໂອທີ່ສ້າງຄວາມຕື່ນຕົກໃຈຂອງທ້າວຈອຣ໌ຈ ຟລອຍດ໌ ຄົນອາເມຣິກັນເຊື້ອສາຍອາຟຣິກາ ໄດ້ດຶງດູດເອົາຄວາມສົນໃຈຂອງປະຊາຊົນຈາກທົ່ວໂລກ.

ການເດີນຂະບວນປະທ້ວງຕໍ່ຕ້ານສະຫະລັດ ເພື່ອສະແດງຄວາມບໍ່ພໍໃຈກ່ຽວກັບການເສຍຊີິວິດຂອງຊາຍຄົນນີ້ ໄດ້ມີຂຶ້ນຢູ່ຕາມນະຄອນຫຼວງຂອງປະເທດຕາເວັນຕົກຫຼາຍແຫ່ງ ໃນວັນອາທິດວານນີ້ ແລະໜັງສືພິມຕ່າງໆໄດ້ພາດຫົວຂໍ້ຂ່າວຕ້ອງຕິຕໍ່ຕຳຫຼວດອາເມຣິກັນກ່ຽວກັບເຫດການທີ່ເກີດຂຶ້ນເມື່ອອາທິດແລ້ວທີ່ນະຄອນມິນນີອາໂປລິສ.

ທ້າວຈອຣ໌ຈ ຟລອຍດ໌ ຊຶ່ງເປັນຄົນອາເມຣິກັນເຊື້ອສາຍອາຟຣິກາ ໄດ້ເສຍຊີວິດໃນຂະນະທີ່ຕຳຫຼວດ Derek Chauvin ໄດ້ເອົາຫົວເຂົ່າຂອງລາວເຕັງໃສ່ກ້ານຄໍດ້ານຫຼັງຂອງຜູ້ກ່ຽວ ດົນກວ່າ 8 ນາທີ ໃນຂະນະທີ່ທ້າວຟລອຍດ໌ຮ້ອງອອກມາຊ້ຳແລ້ວຊ້ຳອີກວ່າ ລາວຫາຍໃຈບໍ່ໄດ້. ເຫດການດັ່ງກ່າວແມ່ນໄດ້ຖືກບັນທຶກໄວ້ໂດຍວິດີໂອ.

ພວກປະທ້ວງຫຼາຍໆພັນຄົນໄດ້ໂຮມຊຸມນຸມກັນຢູ່ໃນເຂດໃຈກາງນະຄອນຫຼວງລອນດອນ ເພື່ອສະແດງການສະໜັບສະໜຸນຕໍ່ການເດີນຂະບວນປະທ້ວງຢູ່ໃນສະຫະລັດທີ່ໄດ້ມີຂຶ້ນຢູ່ໃນຫຼາຍສິບຫົວເມືອງທົ່ວປະເທດໃນໄລຍະ 5 ມື້ທີ່ຜ່ານມາເພື່ອປະນາມ ການກະທຳຂອງຕຳຫຼວດ. ການກໍ່ຄວາມຮຸນແຮງ ທີ່ຮ້າຍແຮງທີ່ສຸດໃນຮອບຫຼາຍໆທົດສະວັດໄດ້ລະເບີດຂຶ້ນ ໂດຍມີການຈູດເຜົາລົດຕຳຫຼວດ ແລະຕຶກໂຮງການລັດຖະບານ ບຸກເຂົ້າໄປລັກເອົາເຄື່ອງຂອງຢູ່ຕາມຫ້າງຮ້ານແລະທຳລາຍໜ້າຕາຂອງອະນຸສາວະລີຕ່າງໆ.

ພວກປະທ້ວງຢູ່ອັງກິດ ໄດ້ພາກັນຮ້ອງໂຮຂຶ້ນວ່າ “ບໍ່ມີຄວາມຍຸຕິທຳ ບໍ່ມີຄວາມສະຫງົບ” ແລະກໍພາກັນຍໍປ້າຍຄຳຂວັນທີ່ຂຽນວ່າ “ຍັງຈະມີອີກຫຼາຍປານໃດ.”

ສ່ວນພວກປະທ້ວງຢູ່ເດນມາກ ພາກັນເດີນຂະບວນໄປຍັງສະຖານທູດສະຫະລັດ ທີ່ນະຄອນໂກເປັນເຮເກັນຖືປ້າຍຄຳຂວັນທີ່ຂຽນວ່າ “ຢຸດເຊົາການສັງຫານຄົນຜິວດຳ.” ຢູ່ປະເທດເຢຍຣະມັນ ພວກປະທ້ວງພາກັນຖືປ້າຍຄຳຂວັນ ທີ່ຂຽນວ່າ “ຈົ່ງໃຫ້ພວກຕຳຫຼວດເປັນຜູ້ຮັບຜິດຊອບ” ແລະ “ຜູ້ໃດທ່ານຈະໂທໄປຫາເວລາຕຳຫຼວດເປັນຄາດຕະກອນ.”

ໜັງສືພິມ Bild ຊຶ່ງເປັນໜັງສືພິມທີ່ຂາຍດີທີ່ສຸດໃນເຢຍຣະມັນໄດ້ພາດຫົວຂໍ້ຂ່າວແບບທ້າທາຍໃນວັນອາທິດວານນີ້ວ່າ “ຕຳຫຼວດຄາດຕະກອນຄົນນີ້ ພວມຈູດເຜົາອາເມຣິກາ” ດ້ວຍລູກສອນທີ່ຊີ້ໄປຫາຮູບຂອງທ້າວ Chauvin ທີ່ໄດ້ຖືກປົດອອກຈາກໜ້າທີ່ແລະຖືກກ່າວຫາວ່າເປັນຄາດຕະກອນລະດັບສາມແລະລະດັບສອງ ຫຼື third-degree murder ແລະ second degree manslaughter ນັ້ນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG