ໃນການອອກຖະແຫຼງການພ້ອມໆກັນນັ້ນ ທ່ານໄມຄ໌ ພອມພຽວ ລັດຖະມົນຕີກະຊວງການຕ່າງປະເທດສະຫະລັດ ແລະກຸ່ມຕາລີບານໄດ້ປະກາດໃນວັນສຸກວານນີ້ວ່າ ຂໍ້ຕົກລົງລະຫວ່າງສະຫະລັດ ກັບກຸ່ມຕາລີບານ ຈະມີການລົງນາມກັນໃນວັນທີ 29 ກຸມພາຈະມານີ້ ເພື່ອແຜ້ວທາງໄປສູ່ການຍຸຕິສົງຄາມທີ່ຍາວນານທີ່ສຸດໃນປະຫວັດສາດຂອງສະຫະລັດ.
ຂໍ້ຕົກລົງສະບັບນີ້ໄດ້ຮຽກຮ້ອງໃຫ້ມີການຖອນກຳລັງທະຫານສະຫະລັດເປັນໄລຍະໆ ອອກຈາກອັຟການິສຖານ ເພື່ອເປັນການຕອບແທນກຸ່ມຕາລີບານໄດ້ໃຫ້ການຄ້ຳປະກັນວ່າ ດິນແດນອັຟການິສຖານ ຈະບໍ່ຖືກນຳໃຊ້ໂດຍພວກກໍ່ການຮ້າຍແລະຕົນຈະປະກອບສ່ວນເຂົ້າຮ່ວມໃນຂັ້ນຕອນການສ້າງຄວາມປອງດອງຊາດ ກັບຊາວອັຟການິສຖານກຸ່ມອື່ນໆ.
ຖະແຫຼງການຂອງທ່ານພອມພຽວກ່າວວ່າ “ການເຈລະຈາລະຫວ່າງພັກຝ່າຍໃນອັຟການິສຖານ ຈະເລີ້ມຂຶ້ນໃນໄວໆບໍ່ດົນຫຼັງຈາກນັ້ນ ແລະຈະສືບສານຕໍ່ບາດກ້າວຂັ້ນພື້ນຖານນີ້ ເພື່ອນຳໄປສູ່ການຢຸດຍິງໃນຂອບເຂດທີ່ກວ້າງຂວາງແລະຢ່າງເປັນການຖາວອນ ພ້ອມທັງແຜນທີ່ຂອງອະນາຄົດທາງການເມືອງສຳລັບປະຊາຊົນຊາວອັຟການິສຖານ.”
ພິທີລົງນາມ ຈະມີຂຶ້ນຫຼັງຈາກໄດ້ມີການຫຼຸດຜ່ອນຄວາມຮຸນແຮງ ເປັນເວລາ 7 ມື້ ຊຶ່ງຈະເລີ້ມຕົ້ນຂຶ້ນໃນຕອນທ່ຽງຄືນວັນເສົາທີ 22 ກຸມພາມື້ນີ້ ຕາມເວລາໃນທ້ອງຖິ່ນ ຊຶ່ງຈະມີການສັງເກດການຈາກທຸກຝ່າຍທີ່ຢູ່ໃນບັນຫາຂັດແຍ້ງ. ທຸກໆຝ່າຍ ທັງກຳລັງສະຫະລັດ ກຸ່ມຕາລີບານ ແລະກຳລັງຮັກສາຄວາມສະຫງົບອັຟການິສຖານ ຕ່າງກໍໄດ້ສະແດງໃຫ້ເຫັນຢ່າງຈະແຈ້ງວ່າ ຕົນມີສິດທີ່ຈະຕອບໂຕ້ຄືນຕໍ່ການໂຈມຕີ.
ໄລຍະດັ່ງກ່າວແມ່ນເຊື່ອກັນວ່າມີໜ້າທີ່ເປັນມາດຕະການເພື່ອສ້າງຄວາມໄວ້ເນື້ອເຊື່ອໃຈ ພ້ອມທັງເປັນເຄື່ອງວັດແທກເບິ່ງວ່າກຸ່ມຕາລີບານເປັນຜູ້ຄວບຄຸມກຳລັງສູ້ລົບຂອງຕົນໄດ້ໂດຍເຕັມຫຼືບໍ່.
ຖະແຫຼງການຂອງກຸ່ມຕາລີບານກ່າວວ່າ “ທັງສອງຝ່າຍ ໃນເວລານີ້ ຈະສ້າງໃຫ້ເກີດສະຖານະການທີ່ເໝາະສົມທາງດ້ານຄວາມໝັ້ນຄົງ ກ່ອນການລົງນາມໃນຂໍ້ຕົກລົງ ຊຶ່ງໄດ້ມີການເຊື້ອເຊີນພວກຜູ້ຕາງໜ້າອະວຸໂສຈາກບັນດາປະເທດແລະອົງການຈັດຕັ້ງຈຳນວນນຶ່ງ ໄປຮ່ວມໃນພິທີລົງນາມ.”
ພິທີລົງນາມດັ່ງກ່າວຈະຈັດຂຶ້ນທີ່ນະຄອນຫຼວງໂດຮາ ຂອງປະເທດກາຕ້າ ບ່ອນທີ່ກຸ່ມຕາລີບານມີຫ້ອງການຜູ້ຕາງໜ້າຢ່າງເປັນທາງການມາໄດ້ຫຼາຍໆປີແລ້ວນັ້ນ ແລະບ່ອນທີ່ທັງສອງຝ່າຍໄດ້ທຳການເຈລະຈາກັນມາຢ່າງຂຸ້ນຂ້ຽວເປັນເວລາ 18 ເດືອນ.
ໃນໄລຍະທຳອິດນັ້ນ ຄາດວ່າສະຫະລັດຈະຫລຸດກຳລັງທະຫານຂອງຕົນລົງຈາກລະດັບປັດຈຸບັນ 13,000 ຄົນ ມາເປັນ 8,600 ຄົນ. ທ່ານບາແນັດ ຣູບິນ ນັກຊ່ຽວຊານແຖວໜ້າກ່ຽວກັບເລື້ອງອັຟການິສຖານທີ່ໃຫ້ຄຳແນະນຳແກ່ລັດຖະບານສະຫະລັດໃນດ້ານນະໂຍບາຍຢູ່ໃນປະເທດດັ່ງກ່າວເວົ້າວ່າ ການຖອນກຳລັງທະຫານອາເມຣິກັນທັງໝົດ ຈະເຊື່ອມໂຍງໃສ່ກັບເຫດການທີ່ເກີດຂຶ້ນຢູ່ທີ່ນັ້ນ.
