ໃນລະຫວ່າງສົງຄາມໂລກຄັ້ງທີສອງ ກອງທະຫານຍີ່ປຸ່ນ ແລະ
ອາເມຣິກັນ ໄດ້ສູ້ລົບເພື່ອຍາດແຍ່ງເອົາເກາະຍຸດທະສາດ
Palawan ຂອງຟິລິບປິນເພື່ອຮັກສາການຄວບຄຸມທະເລຈີນ
ໃຕ້. ເຈັດສິບປີຕໍ່ມາ ເກາະດັ່ງກ່າວຂອງຟິລິບປິນ ອາດຈະກັບ
ຄືນມາມີບົດບາດໃນດ້ານຍຸດທະສາດສຳຄັນໃໝ່ອີກ. ນັກຂ່າວ
ວີໂອເອ Li Bao ໄດ້ເດີນທາງໄປ ເກາະ Palawan ແລະສົ່ງ
ລາຍງານເລື້ອງນີ້ມາ ຊຶ່ງ ກິ່ງສະຫວັນ ຈະນຳມາສະເໜີທ່ານ.
ຢູ່ທີ່ເມຶືອງ Puerto Princesa ຊຶ່ງເປັນນະຄອນຫຼວງຂອງແຂວງ Palawan ຄຳເວົ້າແລະບັນດາຮູບພາບຕ່າງໆທີ່ຄ້າຍ Plaza Cuartel ຊຶ່ງເປັນທີ່ຕັ້ງຂອງປ້ອມທະຫານເກົ່າ ແມ່ນ
ມີປະຫວັດໃນການສູ້ລົບຢ່າງ ນອງເລືອດມາແລ້ວລະຫວ່າງທະຫານຍີ່ປຸ່ນແລະອາເມຣິກັນ ໃນສະໄໝ ສົງຄາມ ເພື່ອເຂົ້າຄວບຄຸມເກາະຍຸດທະສາດດັ່ງກ່າວຂອງຟິລິບປິນ.
ເກາະ Palawan ອາດກາຍມາເປັນຈຸດຍຸດທະສາດ ທີ່ສຳຄັນອີກຄັ້ງໜຶ່ງ.
ນັບແຕ່ປີ 2013 ເປັນຕົ້ນມາ ຈີນ ໄດ້ພົວພັນ ໃນການຖົມເກາະດອນ ແລະກິດຈະການທາງທະຫານ ຢູ່ໃນເຂດນ່ານນໍ້າອ້ອມແອ້ມ ບັນດາໝູ່ເກາະ Spratly ທີ່ແຈກຢາຍກັນຢູ່ປະ
ມານ 100 ຫາ 200 ໄມທະເລໄປທາງພາກຕາເວັນຕົກຂອງເກາະ Palawan.
ສະຫະລັດ ຊຶ່ງເປັນພັນທະມິດມາເປັນເວລາດົນນານ ຂອງຟິລິບປິນ ໄດ້ຕິຕຽນການປະຕິ
ບັດຂອງຈີນ ແລະໄດ້ສົ່ງເຮືອບິນທະຫານ ແລະກຳປັ່ນລົບ ເຂົ້າໄປໃກ້ໆກັບບັນດາເກາະ
ທຽມ ເພື່ອເປັນການສະໜັບສະໜູນຕໍ່ສິດເສລີພາບຂອງການເດີນເຮືອ. ແຕ່ວ່າ ບົດບາດ
ຂອງສະ ຫະລັດໃນເລື້ອງດັ່ງກ່າວ ໄດ້ກໍ່ໃຫ້ເກີດ ມີການອະພິປາຍ ຢູ່ທີ່ເກາະ Palawan.
ນາງ Rizamae Balcueba ທີ່ຈົບມະຫາວິທະຍາໄລ ກ່າວວ່າ “ຂ້າ ພະເຈົ້າຄິດວ່າ ພວກ
ເຮົາຕ້ອງການອາເມຣິກັນ ເພາະວ່າ ເຂົາເຈົ້າຈະຊ່ວຍພວກເຮົາ ຕໍ່ສູ້ເພື່ອປະເທດຂອງເຮົາເພື່ອດິນແດນຂອງເຮົາ.”
ອີງຕາມຂໍ້ຕົກລົງ ທີ່ລົງນາມໂດຍສອງຝ່່າຍໃນປີ 2014 ລັດຖະບານຟິບິບປິນ ຈະທຳການ
ສ້ອມແປງແລະຂະຫຍາຍຄ້າຍທະຫານ ໃນທົ່ວປະເທດ ເພື່ອໃຫ້ກຳປັ່ນ ແລະເຮືອບິນ ສະຫະລັດໃຊ້. ເຖິງແມ່ນວ່າ ຄວາມຖືກຕ້ອງຕາມກົດໝາຍ ຂອງຂໍ້ຕົກລົງ ຍັງຈະຕ້ອງໄດ້
ຢືນຢັນໂດຍສານສູງສຸດຂອງຟິລິບປິນກໍຕາມ ແຕ່ວຽກງານຈຳນວນໜຶ່ງ ໃນການຂະຫຍາ
ຍຄ້າຍທະຫານເຫລົ່ານີ້ໄດ້ເລີ້ມຂຶ້ນແລ້ວ.
ໂຄງການຂະຫຍາຍທາງແລ່ນຂະໜາດໃຫຍ່ ກຳລັງດຳເນີນຢູ່ທີ່ເດີ່ນເຮືອບິນ Puerto
Princess ທີ່ແບ່ງກັນໃຊ້ລະຫວ່າງເຮືອບິນພົນລະເຮືອນ ແລະກຳລັງທັບອາກາດ ໃນ
ທ້ອງຖິ່ນຂອງຟິລິບປິນ. ຢູ່ທີ່ອ່າວ Ulugan ຊຶ່ງຕັ້ງຢູ່ທາງເໜືອຂອງເມືອງ ບັນດາເຈົ້າໜ້າ
ທີ່ກຳລັງວາງແຜນກໍ່ສ້າງທ່າເຮືອນໍ້າເລິກຂອງທະຫານ.
ແຕ່ບໍ່ແມ່ນທຸກໆຄົນເຊື່ອວ່າ ການຮ່ວມມືທາງທະຫານນີ້ ເປັນຂໍ້ຕົກລົງທີ່ດີ. ຊາວປະມົງ
ຈຳນວນໜຶ່ງ ພາກັນມີຄວາມເປັນຫ່ວງວ່າ ກຳປັ່ນລົບ ທີ່ອາດມີຈຳນວນເພີ້ມຂຶ້ນ ຈະເປັນ
ຜົນກະທົບຕໍ່ຊີວິດການຫາປາປະຈຳວັນຂອງເຂົາເຈົ້າ.
ທ່ານ Ceasar Ventura ທີ່ປຶກສາດ້ານເສດຖະກິດ ແກ່ລັດຖະບານຂອງແຂວງ ຍັງມີ
ຄວາມເປັນຫ່ວງກ່ຽວກັບການມາເຖິງ ຂອງທະຫານສະຫະລັດທີ່ອາດຈະດຶງດູດຄວາມສົນ
ໃຈໂດຍພວກຫົວຮຸນແຮງມຸສລິມ.
ທ່ານ Ventura ກ່າວວ່າ “ກິດຈະການກໍ່ການຮ້າຍ ອາດຈະເພີ້ມຂື້ນ ເວລາ ທະຫານອາເມຣິກັນ ມາຢູ່ທີ່ນີ້.”
ສ່ວນທ່ານ Eugenio B. Bito-Onon ເຈົ້າເມືອງໆ Kalayaan ກ່າວວ່າ ສິ່ງທີ່ດີ ແມ່ນມີ
ຫລາຍກວ່າ ສິ່ງທີ່ບໍ່ດີ.
ທ່ານເວົ້າວ່າ “ນັບແຕ່ກຳລັງທະຫານຂອງພວກເຮົາ ແລະກະຊວງປ້ອງກັນປະເທດ ຂອງພວກເຮົາບໍ່ຂ່ອຍແຂງແຮງປານໃດ ແລະເຖິງຢ່າງໃດກໍດີ ພວກເຮົາກໍມີຂໍ້ຕົກລົງໃນດ້ານ
ປ້ອງກັນປະເທດຮ່ວມກັນ ເພາະສະນັ້ນ ຂ້າພະເຈົ້າຈຶ່ງບໍ່ຄັດຄ້ານ ຕໍ່ການມີໜ້າຂອງອາ
ເມຣິກັນຢູ່ທີ່ນີ້ ໂດຍສະເພາະ ຊ່ວຍໃຫ້ພວກເຮົາ ພັດທະນາໃນດ້ານປ້ອງກັນປະເທດ
ຂອງ ພວກເຮົາ.”
ເຈົ້າໜ້າທີ່ສະຫະລັດຄົນໜຶ່ງ ຢູ່ໃນຟິລິບປິນ ບໍ່ໄດ້ໃຫ້ການຢືນຢັນກ່ຽວ ກັບການໃຊ້ເກາະ
Palawan ໃນການປະຕິບັດງານທາງທະຫານໃນອະນາຄົດ ຢູ່ທະເລຈີນໃຕ້. ເຖິງຢ່າງ
ໃດກໍດີ ທະຫານສະຫະລັດ ມາທີ່ນີ້ທຸກໆປີ ເພື່ອຮ່ວມການຊ້ອມລົບທາງທະຫານ ກັບກອງ
ທັບຟິລິບປີນ.
