ລັດຖະບານຂອງປະທານາທິບໍດີສະຫະລັດ ທ່ານບາຣັກ ໂອບາມາ
ກຳລັງທຳການຕໍ່ສູ້ ທາງດ້ານກົດໝາຍ ແລະໂຕ້ຖຽງທາງດ້ານການ
ເມືອງຮອບໃໝ່ກ່ຽວກັບການເນລະເທດພວກຄົນເຂົ້າເມືອງຜິດກົດ
ໝາຍ.
ເຈົ້າໜ້າທີ່ທຳນຽບຂາວກ່າວວ່າ ຕົນຈະຮ້ອງຂໍໃຫ້ໂຈະຄຳສັ່ງຂອງ
ຜູ້ພິພາກສາ ທີ່ໃຫ້ຕ່າວປີ້ນ ການເຄື່ອນໄຫວ ຂອງຝ່າຍບໍລິຫານ
ໂດຍທ່ານໂອບາມາ ທີ່ອາດຈະໃຫ້ການປົກປ້ອງແກ່ພວກຄົນເຂົ້າ
ເມືອງຈຳນວນຫຼວງຫຼາຍຈາກການເອົາມາດຕະການທາງດ້ານກົດ
ໝາຍນັ້ນ.
ການໂຈະດັ່ງກ່າວນີ້ ຈະເຮັດໃຫ້ການເຄື່ອນໄຫວຂອງຝ່າຍບໍລິຫານ ຍັງມີຜົນບັງຄັບຢູ່ຈົນ ກວ່າບັນຫານີ້ໄດ້ມີຂໍອຸທອນໄປຍັງສານສູງ.
ທ່ານ Josh Earnest ໂຄສົກຂອງທຳນຽບຂາວ ກ່າວວ່າ ລັດຖະບານຄາດວ່າ ຈະໄດ້ຮັບ ການຂໍອຸທອນຍ້ອນວ່າມັນມີພື້ນຖານອັນແໜ້ນໜາທາງດ້ານກົດໝາຍສຳຫລັບປະທານາ ທິບໍດີທີ່ຈະເອົາບາດກ້າວຕ່າງໆ ທີ່ທ່ານໄດ້ປະກາດໄປເພື່ອປະຕິຮູບລະບົບຄົນເຂົ້າເມືອງ
ທີ່ເພພັງແລ້ວນັ້ນ.
ການເຄື່ອນໄຫວຂອງຝ່າຍບໍລິຫານແມ່ນບໍ່ຕ້ອງຜ່ານສະພາແລະໄດ້ສ້າງຄວາມໂມໂຫໃຫ້ ແກ່ສະມາຊິກສະພາພັກຣີພັບບລີກັນຈຳນວນຫຼວງຫຼາຍທີ່ໄດ້ນຳເອົາເລື່ອງນີ້ໄປຂຶ້ນສານ.
ໃນວັນອັງຄານຜ່ານມານີ້ ທຳນຽບຂາວກ່າວວ່າ ກະຊວງຍຸຕິທຳຈະປະຕິບັດຕາມແຕ່ກໍໄດ້
ຂໍອຸທອນຕໍ່ຄຳຕັດສິນໂດຍຜູ້ພິພາກສາຢູ່ລັດເທັກຊັສ ທີ່ໄດ້ສັ່ງໃຫ້ຂັດຂວາງປະທານາທິບໍ
ດີເປັນການຊົ່ວຄາວ ທີ່ໃຫ້ການປົກປ້ອງຕໍ່ພວກຄົນເຂົ້າເມືອງທີ່ບໍ່ມີເອກກະສານຫຼາຍເຖິງ
5 ລ້ານຄົນ ຈາກການຖືກເນລະເທດ.
ການຕັດສິນທີ່ວ່ານີ້ ມີຂຶ້ນທ່າມກາງການຕໍ່ສູ້ຖົກຖຽງກັນ ຢູ່ໃນລັດຖະສະພາກ່ຽວກັບການ ໃຫ້ເງິນສະໜັບສະໜຸນຕໍ່ກະຊວງຮັກສາຄວາມປອດໄພພາຍໃນຂອງສະຫະລັດທີ່ເປັນຜູ້
ດູແລລະບຽບການເລື່ອງຄົນເຂົ້າເມືອງ ແລະຄວບຄຸມເຂດຊາຍແດນ. ການໃຫ້ເງິນສະໜັບ ສະໜຸນຕໍ່ກະຊວງດັ່ງກ່າວ ມີກຳນົດຈະໝົດອາຍຸລົງໃນທ້າຍອາທິດໜ້ານີ້.
