ສະຫະລັດ ແລະ ອົງການ NATO ໄດ້ມີປະຕິກິລິຍາ ໂດຍສະແດງ ຄວາມເປັນຫ່ວງຕໍ່ລາຍງານ ທະຫານຣັດເຊຍເຂົ້າໄປໃນຊີເຣຍ ເພີ່ມຫຼາຍຂຶ້ນ.
ເຈົ້າໜ້າທີ່ອະວຸໂສກະຊວງປ້ອງກັນປະເທດ ສະຫະລັດ ຄົນໜຶ່ງ ໄດ້ກ່າວຕໍ່ວີໂອເອວ່າ ຣັດເຊຍ ໄດ້ຂົນສົ່ງສຳພາລະຂອງທະຫານ ທາງອາກາດໄປ ຊີເຣຍ, ໂດຍເອີ້ນກິດຈະກຳດັ່ງກ່າວວ່າ “ບໍ່ຊ່ວຍເຫລືອຫຍັງເລີຍ.”
ໂຄສົກກະຊວງການຕ່າງປະເທດ ທ່ານ John Kirby ໄດ້ກ່າວຕໍ່ບັນດານັກຂ່າວວ່າ ທ່ານຍັງ ບໍ່ທັນໄດ້ຮັບຢືນຢັນ ເຖິງການເສີມກຳລັງ ຂອງຣັດເຊຍ, ແຕ່ວ່າ “ຈຸດປະສົງຂອງຣັດເຊຍ ຢູ່ບ່ອນນີ້ແມ່ນຍັງບໍ່ກະຈ່າງແຈ້ງ.” ທ່ານໄດ້ກ່າວວ່າ ລັດຖະມົນຕີການຕ່າງປະເທດ ທ່ານ John Kerry ໄດ້ປຶກສາຫາລື ກ່ຽວກັບບັນຫານີ້ ທາງໂທລະສັບ ກັບ ລັດຖະມົນຕີການຕ່າງປະເທດ ຣັດເຊຍ ທ່ານ Sergei Lavrov.
ທ່ານ Kirby ໄດ້ກ່າວວ່າ “ທ່ານໄດ້ກ່າວຢ້ຳເຖິງຄວາມເປັນຫ່ວງຂອງພວກເຮົາ ກ່ຽວກັບ ລາຍງານພວກນີ້ ເຖິງກິດຈະກຳທາງທະຫານຂອງ ຣັດເຊຍ ຫຼື ການເສີມກຳລັງ, ໃນ ຊີເຣຍ ຖ້າທ່ານຈະເວົ້າ ແລະໄດ້ສະແດງໃຫ້ເຫັນຢ່າງຈະແຈ້ງ ເຖິງທັດສະນະຂອງພວກເຮົາວ່າ ຖ້າແມ່ນ ຄວາມຈິງ ແລະໄດ້ຮັບການພິສູດ,ລາຍງານດັ່ງກ່າວນັ້ນອາດຈະນຳໄປສູ່ການເກີດຄວາມຮຸນແຮງຍິ່ງຂຶ້ນ ແລະຫຼາຍຂຶ້ນ, ແມ່ນກະທັ້ງມີຄວາມບໍ່ ໝັ້ນຄົງເພີ່ມຂຶ້ນ ໃນປະເທດ ຊີເຣຍ.”
ໂຄສົກທຳນຽບຂາວ ທ່ານ Eric Schultz ໄດ້ສະທ້ອນໃຫ້ເຫັນ ເຖິງຄວາມເປັນຫ່ວງດັ່ງກ່າວ ໃນຂໍ້ຄວາມຂອງທ່ານ ຕໍ່ບັນດານັກຂ່າວໃນວັນພຸດວານນີ້.
ທ່ານ Schultz ໄດ້ກ່າວວ່າ “ພວກເຮົາໄດ້ສະແດງໃຫ້ເຫັນຢ່າງກະຈ່າງແຈ້ງແລ້ວວ່າ ມັນຈະເປັນສິ່ງທີ່ບໍ່ຢູ່ພາຍໃຕ້ສາມັນສຳນຶກ ທີ່ຝ່າຍໃດກໍຕາມ ລວມທັງຣັດເຊຍ ທີ່ຈະ ໃຫ້ການສະໜັບສະໜູນ ຕໍ່ລະບອບການ ປົກຄອງຂອງທ່ານ Assad.”
ໃນນະຄອນຫຼວງ Prague, ເລຂາທິການໃຫຍ່ຂອງອົງການ NATO ທ່ານ Jens Stoltenberg ໄດ້ສະແດງຄວາມເປັນຫ່ວງທີ່ຄ້າຍຄືກັນກ່ຽວກັບ ການເຄື່ອນກຳລັງທະຫານ ແລະ ເຮືອບິນຮົບຂອງ ຣັດເຊຍ ເຂົ້າໄປໃນ ຊີເຣຍ ດັ່ງທີ່ມີລາຍງານໄປນັ້ນ.
ທ່ານ Stoltenberg ໄດ້ກ່າວວ່າ “ການກະທຳດັ່ງກ່າວນັ້ນ ຈະບໍ່ປະກອບສ່ວນຫຍັງຕໍ່ການແກ້ໄຂບັນຫາ,” “ຂ້າພະເຈົ້າຄິດວ່າມັນເປັນເລື່ອງສຳຄັນທີ່ຈະສະໜັບສະໜູນ ທຸກໆຄວາມພະຍາມເພື່ອຊອກຫາທາງແກ້ໄຂທາງດ້ານການເມືອງຕໍ່ຄວາມຂັດແຍ້ງໃນ ຊີເຣຍ ໃນຕອນນີ້.”
ໂຄສົກກະຊວງການຕ່າງປະເທດຂອງ ຣັດເຊຍ ທ່ານນາງ Maria Zakharova ໄດ້ກ່າວໃນຖະແຫຼງການໃນວັນພຸດວານນີ້ວ່າ “ບັນດາຜູ້ຊ່ຽວຊານທະຫານ ຣັດເຊຍ” ແມ່ນຢູ່ໃນ
ຊີເຣຍ ເພື່ອຊ່ວຍເຫຼືອທະຫານ ຊີເຣຍໃຫ້ມີຄວາມຊຳນານໃນການໃຊ້ອາວຸດ ແລະ ອຸປະກອນອື່ນໆຂອງ ຣັດເຊຍ.
