ກອງທັບປາກີສຖານກ່າວວ່າ ຕົນປະສົບຜົນສໍາເລັດໃນການຍິງທົດລອງລູກສອນໄຟ Shaheen-1 ທີ່ ປັບປຸງໃໝ່ເມື່ອ ວັນພຸດມື້ນີ້. ລູກສອນໄຟ Shaheen-1 ສາມາດທໍາລາຍເປົ້າໝາຍຕ່າງໆໃນອິນເດຍໄດ້ດ້ວຍຫົວລະເບີດນີວເຄລຍ ແລະລຸ້ນທີ່ຖືກປັບປຸງໃຫ້ດີຂຶ້ນດັ່ງກ່າວນີ້ ເຂົ້າໃຈວ່າ ຈະສາມາດຍິງໄດ້ໃນລັດສະໝີທີ່ໄກກວ່າເກົ່າ.
ການລົດລອງຍິງລູກສອນໄຟດັ່ງກ່າວນີ້ ແມ່ນມີຂຶ້ນບໍ່ເຖິງນຶ່ງອາທິດຫລັງຈາກອິນເດຍກ່າວອ້າງວ່າ ຕົນໄດ້ທົດລອງລູກສອນໄຟລຸ້ນໃໝ່ຂອງຕົນຢ່າງສໍາເລັດຜົນທີ່ສາມາດຕິດຫົວລະເບີດນີວເຄລຍໄປໄດ້ໄກເຖິງປັກກິ່ງ ບັນດາເຈົ້າໜ້າທີ່ອິນເດຍກ່າວວ່າ ການທົດລອງຍິງລູກໄຟດັ່ງກ່າວນີ້ ສະແດງໃຫ້ວ່າຕົນຖືກຈັດເຂົ້າຢູ່ໃນລະດັບດຽວກັນກັບປະເທດມະຫາອໍານາດລູກສອນໄຟຂອງໂລກແລ້ວ.
ລູກສອນໄຟ Agni-V ຂອງອິນເດຍ ມີຄວາມສາມາດຍິງໄດ້ໄກ 5,000 ກິໂລແມັດ ແລະຖືກຂະໜານນາມວ່າ “ເປັນການກ້າວໜ້າທີ່ສຳຄັນ” ໃນສະມັດຖະພາບ ດ້ານຍຸດທະສາດຂອງອິນເດຍ ທີ່ສາມາດຍິງຫົວລະເບີດນີວເຄລຍໄປໄດ້ໄກເຖິງນະຄອນຫລວງປັກກິ່ງຂອງຈີນ ພ້ອມທັງນະຄອນ Shanghai ຫົວເມືອງສຳຄັນຂອງຈີນນັ້ນນໍາ.
ໜັງສືພິມ Global Times ຂອງພັກຄອມມີວນີສຈີນໄດ້ຕອບໂຕ້ຕໍ່ການທົດລອງຍິງລູກສອນໄຟດັ່ງກ່າວຂອງອິນເດຍ ດ້ວຍການເຕືອນວ່າອິນເດຍແມ່ນບໍ່ມີໂອກາດເລີຍໃນການແຂ່ງຂັນ ກັນດ້ານອາວຸດກັບຈີນ ໃນອະ
ນາຄົດອັນໃກ້ໆນີ້ໄດ້.
ທ່ານ Kapil Kak ນັກວິເຄາະດ້ານປ້ອງກັນປະເທດອິນເດຍ ໄດ້ເວົ້າໄວ້ວ່າ ອິນເດຍມີຄວາມເປັນຫ່ວງຫລາຍຂຶ້ນກ່ຽວກັບການຮ່ວມມືລະຫວ່າງຈີນ ແລະປາກີສຖານ ທີ່ອາດເປັນໄປໄດ້ວ່າ ຈະແນເປົ້າໃສ່ອິນເດຍນັ້ນ ຊຶ່ງໃນກໍລະນີນີ້ ອິນເດຍຈະຕ້ອງຕຽມຮັບມືກັບສົງຄາມຈາກສອງປະເທດນີ້ໄວ້ໃຫ້ດີ.
