ເປັນເວລາ 3 ປີລຽນຕິດ ເຂົ້າທີນຶ່ງຂອງກຳປູເຈຍ ໄດ້ຖືກເລືອກໃຫ້ເປັນເຂົ້າທີ່ດີທີ່ສຸດຂອງໂລກ ຢູ່ກອງປະຊຸມວ່າດ້ວຍເຂົ້າຂອງໂລກ. ການໄດ້ຮັບລາງວັນດັ່ງກ່າວ ທີ່ໄດ້ຮ່ວມກັນກັບໄທໃນປີນີ້ ມີຂຶ້ນໃນຂະນະທີ່ກຳປູເຈຍກຳລັງຫາທາງຊຸກຍູ້ ການສົ່ງອອກເຂົ້າຂອງຕົນ ໃຫ້ເປັນຊ່ອງທາງນຶ່ງ ໃນການເພີ້ມທະວີລາຍຮັບຂຶ້ນ ສຳລັບພວກກະເສດຕະກອນປູກເຂົ້າ ທີ່ທຸກຍາກຂອງຕົນ. Robert Carmichael ຜູ້ສື່ຂ່າວວີໂອເອ ມີລາຍງານຈາກນະຄອນຫຼວງພະນົມເປັນ ຊຶ່ງສິງຈະນຳມາສະເໜີທ່ານຕໍ່ໄປ…
ເບິ່ງວີດີໂອ ລາຍງານນີ້ ເປັນພາສາລາວ:
ເຖິງແມ່ນກຳປູເຈຍ ຈະມີສ່ວນແບ່ງພຽງນ້ອຍໆ ໃນຕະຫລາດ ເຂົ້າຂອງໂລກ ໂດຍໄດ້ຜະລິດເຂົ້າພຽງແຕ່ 1 ເປີເຊັນຂອງປະລິມານເຂົ້າທັງໝົດຂອງໂລກໃນປີ 2012 ນັ້ນກໍຕາມ ແຕ່ລາງວັນສຳລັບເຂົ້າ ພັນຫອມ ລຳດວນ ຂອງກຳປູເຈຍ ກໍໜ້າຈະຊ່ອຍສົ່ງເສີມການສົ່ງອອກເຂົ້າຂອງປະເທດ.
ອຸດສາຫະກຳເຂົ້າ ເຖິງແມ່ນມີຂະໜາດນ້ອຍໆ ແລະບໍ່ມີປະສິດທິຜົນ ກໍຕາມ ແຕ່ກໍຍັງ
ຄົງເປັນລູກກະແຈສຳຄັນຕໍ່ເສດຖະກິດຂອງກຳປູເຈຍ. ຊາວກຳປູເຈຍສ່ວນຫຼາຍ ພາກັນ
ຢູ່ລອດ ສ່ວນນຶ່ງກໍຍ້ອນການປູກເຂົ້າໃນດິນດອນຕ່ອນນ້ອຍໆ.
ການຂາດປະສິດທິພາບໃນຫລາຍໆດ້ານ ໝາຍເຖິງວ່າ ຊາວນາກຳປູເຈຍຕ້ອງສົ່ງເຂົ້າເປືອກ ຈຳນວນຫລວງຫລາຍ ໄປຂາຍໃນປະເທດເພື່ອນບ້ານ ເຊັ່ນໄທແລະຫວຽດນາມ ບ່ອນທີ່ເຂົາເຈົ້າໄດ້ລາຄາສູງກວ່າ.
ທ່ານ Sok Puthyvuth ເປັນປະທານສະຫະພັນເຂົ້າກຳປູເຈຍ ຊຶ່ງ ຕາງໜ້າພວກຊາວນາທັງໝົດ ໃນວັງການອຸດສາຫະກຳເຂົ້າ.
ທ່ານໂຊກ ພຸດທິວຸດ ກ່າວວ່າ “ພວກເຮົາຕ້ອງການພັນເຂົ້າທີ່ດີກວ່ານີ້ ພວກເຮົາຕ້ອງການວິທີການເກັບກ່ຽວທີ່ດີຂຶ້ນ ພວກເຮົາຕ້ອງການສາງເກັບມ້ຽນເຂົ້າທີ່ດີ
ຂຶ້ນ ພວກເຮົາຕ້ອງການລະບົບການບຳລຸງ ລຳລຽງຂົ່ນສົ່ງທີ່ດີຂຶ້ນ ແລະພາກ
ສ່ວນສົ່ງອອກຂອງພວກເຮົາກໍຕ້ອງຕີກາ ໝາຍເຂົ້າກຳປູເຈຍວ່າ ເປັນນຶ່ງໃນ
ບັນດາເຂົ້າຊັ້ນນຳຂອງໂລກເຊັ່ນກັນ.”
ເປົ້າໝາຍຂອງກຳປູເຈຍແມ່ນ ສົ່ງອອກເຂົ້າສານ 1 ລ້ານໂຕນ ພາຍໃນປີ 2015 ປີໜ້າ
ນີ້. ມາຮອດປັດຈຸບັນໃນປີນີ້ ກຳປູເຈຍສົ່ງອອກເຂົ້າໄປຂາຍໃນຕ່າງປະເທດ ປະມານ 4
ແສນໂຕນ ສ່ວນໃຫຍ່ແມ່ນສົ່ງໄປຍັງສະຫະພາບຢູໂຣບ.
ຟັງລາຍງານເລື້ອງນີ້ ເປັນພາສາອັງກິດຊ້າ:
ຮອງນາຍົກລັດຖະມົນຕີກຳປູເຈຍ ທ່ານ Keat Chhon ກ່າວວ່າ ການສົ່ງເສີມລາຍຮັບ
ຂອງພວກກະສິກອນ ຍັງຄົງເປັນເປົ້າໝາຍສຳຄັນຂອງຄວາມພະຍາຍາມຂອງລັດຖະ
ບານ ເພື່ອປັບປຸງອຸດສາຫະກຳເຂົ້າໃຫ້ດີຂຶ້ນນັ້ນ.
ທ່ານ Keat Chhon ກ່າວວ່າ “ຂ້າພະເຈົ້າຢາກກ່າວເນັ້ນວ່າ ຈຸດປະສົງຂອງ
ນະໂຍບາຍເຂົ້າ ແມ່ນເພື່ອລົດຜ່ອນຄວາມທຸກຈົນລົງ ເພື່ອຮັບປະກັນໃຫ້
ປະຊາຊົນໃນເຂດຊົນນະບົດຕ່າງໆ ມີລາຍຮັບຫຼາຍຂຶ້ນ ແລະເພື່ອລົດຜ່ອນ
ຊ່ອງຫວ່າງໃນການພັດທະນາລະຫວ່າງຂົງເຂດ ຊົນນະບົດ ແລະເຂດພາຍ
ໃນໂຕເມືອງ ລົງ.”
ເພື່ອຊ່ອຍພັດທະນາອຸດສາຫະກຳເຂົ້າຂອງກຳປູເຈຍ ຈີນໃຫ້ເງິນກູ້ຢືມຈຳນວນ 300
ລ້ານດອນລາ ເພື່ອນຳໃຊ້ໃນການປັບປຸງສາງເກັບມ້ຽນເຂົ້າໃຫ້ດີຂຶ້ນ.
ແນວໃດກໍຕາມ ທ່ານ David Van ຜູ້ສົ່ງອອກເຂົ້າລາຍນຶ່ງ ກ່າວວ່າ ແຕ່ບັນຫາທີ່ມີມາ
ຕັ້ງແຕ່ດົນນານ ຍັງຄົງມີຢູ່ ຮວມທັງຄ່າໄຟຟ້າສູງ ແລະການຂາດແຄນເມັດພັນເຂົ້າທີ່ມີ
ຄຸນນະພາບ. ນອກນີ້ແລ້ວ ທ່ານ Van ຢາກໃຫ້ມີຍີ່ຫໍ້ທີ່ດີກວ່າເກົ່າ ສຳລັບພັນເຂົ້າທີ່ໄດ້
ຮັບລາງວັນນັ້ນ ຊຶ່ງປັດຈຸບັນນີ້ ມີຊື່ໃນທ້ອງຕະຫຼາດວ່າ “ເຂົ້າຫອມມະລິກຳປູເຈຍ”
ຊຶ່ງແມ່ນໃກ້ຄຽງກັນໂພດ ກັບພັນເຂົ້າຫອມມະລິຂອງໄທ.
ທ່ານ David Van ກ່າວວ່າ “ພວກເຮົາຕ້ອງສະແດງໃຫ້ເຫັນຄວາມແຕກຕ່າງກັນ
ລະຫວ່າງຜົນຜະລິດເຂົ້າຂອງເຮົາ ກັບຂອງປະເທດຄູ່ແຂ່ງເພື່ອນບ້ານ. ບໍ່ດັ່ງນັ້ນ
ແລ້ວ ເຂົ້າຂອງພວກເຮົາກໍຈະສືບຕໍ່ຖືກສົມທຽບ ໂດຍອັດຕະໂນມັດກັບເຂົ້າຂອງ
ປະເທດເພື່ອນບ້ານທີ່ແຂ່ງຂັນກັບເຮົານັ້ນ. ຖ້າເວົ້າເລື້ອງເຂົ້າຫອມມະລິ ພວກ
ເຮົາກໍມີພັນນຶ່ງ ທີ່ໄດ້ຮັບລາງວັນເປັນເຂົ້າດີເດັ່ນຂອງໂລກຢ່າງລຽນຕິດ ຊຶ່ງກໍຄື
ເຂົ້າຫອມພັນລຳດວນນັ້ນ. ສະນັ້ນ ມັນອາດຈະເປັນເວລາທີ່ດີທີ່ສຸດແລ້ວ ທີ່
ພວກເຮົາຄວນພັດທະນາ ການຕັ້ງຍີ່ຫໍ້ທີ່ດີໆ ອີງຕາມເຂົ້າພັນລຳດວນນັ້ນ.”
ແຕ່ກໍຍັງມີການທ້າທາຍຢູ່ ຊຶ່ງກໍຄື ເຂົ້າຂອງໄທທີ່ມີສະສົມໄວ້ຢ່າງຫຼວງຫຼາຍ ຍ້ອນໂຄງ
ການຈຳນຳເຂົ້ານັ້ນ ໄດ້ເຮັດໃຫ້ລາຄາເຂົ້າຕົກຕໍ່າລົງ ຊຶ່ງເຮັດຍາກທີ່ຈະແຂ່ງຂັນກັບໄທໄດ້. ໃນຂະນະດຽວກັນ ຫລາຍໆປະເທດ ເຊັ່ນມຽນມາ ກໍຢາກຈະເພີ້ມທະວີການສົ່ງອອກ
ເຂົ້າຂອງຕົນເຊັ່ນກັນ.
ແຕ່ເຖິງແມ່ນກຳປູເຈຍບໍ່ສາມາດບັນລຸເປົ້າໝາຍຂອງຕົນ ໃນການຜະລິດເຂົ້າເພື່ອສົ່ງອອກ
ໃຫ້ໄດ້ 1 ລ້ານໂຕນຕໍ່ປີ ໃນປີຕໍ່ໜ້ານີ້ກໍຕາມແຕ່ເຂົ້າທີ່ໄດ້ຮັບລາງວັນຂອງກຳປູເຈຍ ກໍໜ້າ
ຈະໄດ້ຮັບຄວາມນິຍົມ ແລະໄດ້ຮັບການບໍລິໂພກຫຼາຍຂຶ້ນໃນທົ່ວໂລກ ຊຶ່ງນັ້ນກໍຈະຍົກສູງ
ລາຍຮັບຂອງພວກເຈົ້າຂອງໂຮງສີເຂົ້າ ຂອງພວກສົ່ງອອກ ແລະພວກຊາວນາປູກເຂົ້າທີ່
ທຸກຍາກຂອງກຳປູເຈຍ ຫຼາຍໆລ້ານຄົນນັ້ນ.
