ອົງການອະນາໄມໂລກ ແລະພວກເຈົ້າໜ້າທີ່ການແພດ ພາກັນສະຫຼອງຄວາມກ້າວໜ້າ
ໃນການຮັບມືກັບພະຍາດໄຂ້ຍຸງຫຼືມາເລເຣຍໃນເຂດເອເຊຍຕາເວັນອອກສຽງໃຕ້ ແຕ່
ຄວາມຢ້ານກົວ ກ່ຽວກັບເຊື້ອພະຍາດທີ່ຕ້ານຢາ ຍັງມີຢູ່ຕໍ່ມາ. Ron Corben ນັກຂ່າວ
ວີໂອເອມີລາຍງານກ່ຽວກັບເລື່ອງນີ້ ຊຶ່ງວັນນະສອນ ຈະນຳເອົາລາຍລະອຽດມາສະເໜີ
ທ່ານໃນອັນດັບຕໍ່ໄປ.
ການສະແດງຄອນເສີດ ເພື່ອປຸກລະດົມໃນຂົງເຂດລຸ່ມແມ່ນ້ຳຂອງຫຼື GMS ທີ່ຈະ
ຫຼຸດຜ່ອນ ຜົນກະທົບຂອງໂຣກມາເລເຣຍ ລົງຢ່າງຫຼວງຫຼາຍນັ້ນ ໄດ້ພາໃຫ້ມີຄວາມ
ຫວັງກ່ຽວກັບເປົ້າໝາຍທີ່ສຳຄັນໃນການລຶບລ້າງໂຣກດັ່ງກ່າວ ໃຫ້ໝົດໄປຈາກ
ຂົງເຂດ ອາດຈະສາມາດບັນລຸໄດ້.
ທ່ານ Deyer Gobinath ເຈົ້າໜ້າທີ່ທາງດ້ານເທັກນິກກ່ຽວກັບໂຣກມາລາເຣຍຂອງອົງການອະນາໄມໂລກ ໃນປະເທດໄທໄດ້ກ່າວວ່າ ທັດສະນະໂດຍທົ່ວໄປແລ້ວແມ່ນເປັນໄປໃນທາງ
ບວກ ກ່ຽວກັບຮູບແບບ ທີ່ຮ້າຍແຮງຂອງໂຣກມາເລເຣຍ ໃນທົ່ວຂົງເຂດ ພາຍໃນທົດສະວັດ
ໜ້ານີ້.
ທ່ານ Gobinath ກ່າວວ່າ ເປົ້າໝາຍກໍແມ່ນວ່າ ໃຫ້ເກືອບທຸກປະເທດໃນຂົງເຂດລຸ່ມ
ແມ່ຂອງ ພະຍາຍາມ ແລະລຶບລ້າງ ໂຣກມາເລເຣຍ falciparium ຊຶ່ງເປັນຊະນິດທີ່
ເປັນອັນຕະລາຍຮ້າຍແຮງສຸດ ພາຍໃນປີ 2025 ແລະ ຫຼັງຈາກນັ້ນພາຍໃນປີ 2030
ໂດຍພື້ນຖານແລ້ວ ແມ່ນໃຫ້ລຶບລ້າງທຸກໆຮູບແບບແລະທຸກໆສາຍພັນຂອງມາລາເຣຍ.
ໃນປີ 2015 ບັນດາຜູ້ນຳອົງການອະນາໄມໂລກ ໄດ້ກ່າວວ່າ ມີ 14 ລ້ານກໍລະນີຂອງ
ໂຣກມາລາເຣຍ ໃນທົ່ວເຂດເອເຊຍອາຄະເນ ທີ່ຍັງຜົນ ໃຫ້ມີຜູ້ເສຍຊີວິດເຖິງ 26 ພັນ
ຄົນ. ຢູ່ໃນທົ່ວໂລກ ໃນປີດຽວກັນນີ້ ອົງການອະນາໄມໂລກ ລາຍງານວ່າ ມີການເສຍ
ຊີວິດປະມານ 438 ພັນຄົນ ຊຶ່ງສ່ວນໃຫຍ່ ແມ່ນຢູ່ໃນອາຟຣິກາ ແລະກໍໄດ້ເຕືອນວ່າ
ປະຊາຊົນ3 ພັນ 2 ຮ້ອຍລ້ານຄົນ ເກືອບວ່າເຄິງນຶ່ງຂອງປະຊາກອນໂລກທີ່ປະເຊີນກັບ
ຄວາມສ່ຽງຈາກຕິດໂຣກຮ້າຍນີ້.
ການປຸກລະດົມໃນເຂດເອເຊຍອາຄະເນ ທີ່ກວມເອົາ ມຽນມາ ລາວ ໄທ ກຳປູເຈຍ
ແລະຫວຽດນາມນັ້ນ ຕ່າງກໍມີລາຍງານທີ່ສອດຄ່ອງກັນວ່າ ອັດຕາການເສຍຊີວິດ
ໄດ້ຫຼຸດລົງ ເກືອບວ່າ 49 ເປີເຊັນ ນັບຕັ້ງແຕ່ ປີ 2000 ເປັນຕົ້ນມາ.
ປະຊາຊົນ ທີ່ມີຄວາມຫຼໍ່ແຫຼມສຸດຈາກການຕິດໂຣກທີ່ເກີດຈາກພວກຍຸງດັ່ງກ່າວ
ສ່ວນໃຫຍ່ແມ່ນຢູ່ໃນຂົງເຂດຊາຍແດນ ທີ່ຫ່າງໄກສອກຫຼີກໂດດດ່ຽວຈາກໂຄງລ່າງ
ພື້ນຖານແລະການສະໜັບສະໜຸນທາງການແພດ.
ຂົງເຂດທີ່ສຳຄັນຕ່າງໆທີ່ມີຄວາມເປັນຫ່ວງ ກໍແມ່ນ ລະຫວ່າງປະເທດໄທ ຕິດກັບ
ມຽນມາ ແລະໃນກຳປູເຈຍ.
ແຕ່ ທ່ານ Saw Nay Htoo ຜູ້ອຳນວຍການ ຂອງສະມາຄົມການແພດມຽນມາ
ໄດ້ກ່າວວ່າ ການປະສານງານລະຫວ່າງເຈົ້າໜ້າທີ່ການແພດ ແລະປະຊາຄົມໃນເຂດ
ທ້ອງຖິ່ນ ແມ່ນເປັນໄປໃນທາງບວກ ເພື່ອຫຼຸດຜ່ອນຜົນກະທົບຂອງໂຣກມາເລເຣຍ.
ການຕໍ່ສູ້ຕ້ານໂຣກມາລາເຣຍ ສ່ວນໃຫຍ່ແລ້ວ ແມ່ນອີງຕາມ ການປິ່ນປົວທີ່ໃຊ້ຢາ
ທີ່ມີພື້ນຖານ Artemisinin ປະສົມປະສານກັນ ຫຼື ACT ທີ່ເປັນຢາຕົວຫຼັກ ໃນການ
ຮັບມືກັບໂຣກນີ້.
ທ່ານ Gobinath ຈາກອົງການອະນາໄມໂລກ ກ່າວວ່າ ໂຄງລ່າງພື້ນຖານການແພດ
ໃນປະເທດໄທ ແລະການໃຫ້ທຶນສະໜັບສະໜຸນໄດ້ມີສ່ວນໃນການເຮັດໃຫ້ກໍລະນີ
ຂອງໂຣກດັ່ງກ່າວຫລຸດລົງ.
ທ່ານໄດ້ບອກກັບ VOA ວ່າ “ໃນກໍລະນີໂຣກມາເລເຣຍ ໃນປະເທດໄທນັ້ນ ແມ່ນຖືວ່າ
ເປັນການຫຼຸດລົງຢ່າງສຳຄັນ ແລະຫຼຸດລົງຢ່າງຕໍ່ເນື່ອງ ຫຼຸດລົງໃນກໍລະນີທີ່ຢືນຢັນວ່າ
ເປັນໂຣກມາເລເຣຍ. ໃນຮອບ 10 ປີທີ່ຜ່ານມານີ້ ມີປະມານ 30 ພັນກໍລະນີ ໃນປີ
2012 ຫາ ປີ 2015 ແມ່ນມີ 19 ພັນ ຫາ 20 ພັນກໍລະນີ ສະນັ້ນ ກໍລະນີທີ່ຢືນຢັນ
ວ່າ ເປັນໂຣກມາເລເຣຍ ມັນຄ່ອຍຫຼຸດລົງຢ່າງຕໍ່ເນື່ອງຢ່າງສະໝ່ຳສະເໝີ.”
ແຕ່ທ່ານ ໄດ້ກ່າວວ່າ ຖ້າຫາກຈະໃຫ້ ມັນຍືນຍົງໄດ້ ແມ່ນຈຳເປັນຈະຕ້ອງໄດ້ສືບຕໍ່
“ການຕັດສິນໃຈທາງດ້ານການເມືອງ ແລະມີຄວາມໝັ້ນໝາຍນຳ.”
ເຈົ້າໜ້າທີ່ຂອງອົງການອະນາໄມໂລກ ໄດ້ກ່າວວ່າ ຈຳເປັນຈະຕ້ອງໄດ້ເພັ່ງເລັງຄວາມ
ສົນໃຈ ໃສ່ພວກແຮງງານຕາມລະດູການ ທີ່ໄດ້ເຄື່ອນຍ້າຍຂ້າມຊາຍແດນໄປມາ.
ເຈົ້າໜ້າທີ່ການແພດຂອງປະເທດໄທ ໄດ້ເອົາບາດກ້າວຫຼາຍຢ່າງ ໃຫ້ພວກແຮງງານ
ຕາມລະດູການທີ່ສ່ຽງຕໍ່ໂຣກມາເລເຣຍ ຊຶ່ງສ່ວນໃຫຍ່ເປັນຂົງເຂດຊາຍແດນທີ່ສອກ
ຫລີກຕ່າງໆ ເຂົ້າເຖິງການແພດ.
ແຕ່ທ່ານນາງ Maria Dorina Bustos ເຈົ້າໜ້າທີ່ເທັກນິກຂອງອົງການອະນາໄມ
ໂລກ ທີ່ຮັບຜິດຊອບໃນການສິ້ງຊອມເບິ່ງພວກສາຍພັນມາເລເຣຍທີ່ດື້ຢາໃນທົ່ວ 18
ປະເທດໃນແຖບເອເຊຍປາຊິຟິກ ກ່າວວ່າ ບັນຫາທ້າທາຍ ແມ່ນຍັງມີຢູ່.
ທ່ານນາງ Dorina Bustos ໄດ້ກ່າວວ່າ “ຂົງເຂດດັ່ງກ່າວແມ່ນມີໂຣກມາເລເຣຍ
ທີ່ດື້ຢາກຳລັງແຜ່ລະບາດຢູ່. ທ່ານນາງກ່າວຕໍ່ວີໂອເອວ່າ “ໃນບໍລິເວນຊາຍແດນ
ໄທຕິດ ກັບກຳປູເຈຍ ຫຼືໄທ ຕິດກັບມຽນມາ ທ່ານຈຳເປັນຕ້ອງໄດ້ຄິດ ກ່ຽວກັບຊາຍ
ແດນໄທ ຕິດກັບ ລາວ ເພາະວ່າ ທາງພາກໃຕ້ຂອງລາວ ສາຍພັນທີ່ດື້ຢາ ແມ່ນມີຫຼັກ
ຖານທີ່ໄດ້ເກັບກຳບັນທຶກ ແລະມັນກໍຢູ່ທີ່ນັ້ນ. ແລະສິ່ງທີ່ໜ້າຕື່ນຕົກໃຈກວ່ານັ້ນ
ກໍແມ່ນມັນເກີດຂຶ້ນໃນເຂດກຳປູເຈຍ.”
ທ່ານນາງ ໄດ້ກ່າວວ່າ ມັນມີຄວາມຈຳເປັນ ທີ່ຈະສິ້ງຊອມເບິ່ງສູນກາງທີ່ມີຊຸມຊົນອາໄສ
ຢູ່ເປັນຈຳນວນຫຼວງຫຼາຍ ໂດຍສະເພາະໃນອິນເດຍແລະອາຟຣິກາເພື່ອຄ້ຳປະກັນການ
ປິ່ນປົວທີ່ໄດ້ຮັບຜົນ ແລະຫຼີກລ້ຽງບັນຫາ ຂອງການນຳໃຊ້ຢາປອມ.
ການໃຫ້ຂໍ້ສັງເກດທີ່ເປັນໄປໃນທາງບວກ ກໍແມ່ນການລົງທຶນແລະການຄົ້ນຄວ້າທີ່ຍັງ
ດຳເນີນຢູ່ຕໍ່ມາ ເພື່ອຊອກຫາຢາຊະນິດໃໝ່ ທີ່ຮວມທັງ ການຕັ້ງໜ້າຕັ້ງຕາຂອງບໍລິສັດ
ຜະລິດຢາທີ່ສຳຄັນຕ່າງໆ.
ທ່ານນາງກ່າວມ້ວນທ້າຍວ່າ “ມັນແມ່ນໃນບ່ອນນີ້ ໃນຂົງເຂດລຸ່ມແມ່ນ້ຳຂອງ
ທີ່ພວກເຮົາມີບັນຫາແທ້. ກຳປູເຈຍ ຕາມຊາຍແດນທີ່ຕິດກັບໄທ, ຕາມຊາຍແດນ
ຂອງໄທທີ່ຕິດກັບລາວແລະຊາຍແດນ ກຳປູເຈຍ ຕິດກັບຫວຽດນາມ ໂດຍສະເພາະ
ແລ້ວແມ່ນໃນຂົງເຂດລຸ່ມແມ່ນ້ຳຂອງ. ສຳຫຼັບມາເລເຊຍ ຟິລິບປີນ ອິນໂດເນເຊຍ
ໝູ່ເກາະ Solomon,Vanuatu ແລະແມ່ນກະທັງ ອິນເດຍ ບັງກລາແດັສ ແລະ
ເນປານ ການປິ່ນປົວແບບ ACT ທີ່ມີຢາ Artemisinin ເປັນພື້ນຖານນັ້ນຕ່າງ
ກໍໄດ້ຜົນຢ່າງດີເລີດ.”
