ລິ້ງ ສຳຫລັບເຂົ້າຫາ

ວັນພຸດ, 28 ກັນຍາ 2022

ໃນທົດສະວັດ ແຫ່ງຄວາມເຊື່ອມໂຊມ ໃນທະວີພາຄີ ຈະມີຄວາມໝາຍຢ່າງໃດຕໍ່ຈີນ ແລະອອສເຕຣເລຍ ໃນອະນາຄົດ?


ຍານພາຫະນະໂຈມຕີທັງທາງນໍ້າ ແລະທາງບົກຂອງທະຫານເຮືອສະຫະລັດ ອອກຈາກຊັ້ນດາດຟ້າຂອງເຮືອກໍາປັ່ນຂົນສົ່ງທັງທາງນໍ້າ ແລະທາງບົກ USS ກຣີນເບ, ໃນລະຫວ່າງ ຕາລິສແມນ ຊາເບຣ ປີ 2019, ເຊິ່ງເປັນການຝຶກອົບຮົມໃນທຸກໆສອງປີຂອງສະຫະລັດ ແລະອອສເຕຣເລຍ ຢູ່ນອກແຄມຝັ່ງໃກ້ກັບເມືອງໂບເວັນ, ອອສເຕຣເລຍ, ທີ 22 ກໍລະກົດ ປີ 2019.

ປະເທດຈີນ ກໍາລັງຈັບຕາເບິ່ງຄວາມສາມາດທາງດ້ານທະຫານທີ່ມີເພີ້ມຂຶ້ນຂອງ ອອສເຕຣເລຍດ້ວຍຄວາມກັງວົນໃຈ.

“ໃນຂະນະທີ່ອອສເຕຣເລຍ ວາງໂຕອອກຫ່າງຈາກຈີນ, ຈີນຮູ້ສຶກວ່າ ອອສເຕຣເລຍມີຄວາມໃກ້ຊິດກັບສະຫະລັດຫຼາຍຂຶ້ນ, ດັ່ງນັ້ນ ຄວາມຮູ້ສຶກ ເໝືອນດັ່ງໝາ ກໍາລັງວິ້ງເຕັ້ນນີ້ຈະປາກົດອອກມາອີກ,” ທ່ານໂອ ອີ ສຸນ (Oh Ei Sun) ນັກຊ່ຽວຊານອະວຸໂສແຫ່ງສະຖາບັນຄວາມສໍາພັນລະຫວ່າງຊາດຂອງສິງກະໂປ ໄດ້ກ່າວ. ໝາແລ່ນ ໝາຍເຖິງທາດທີ່ກໍາລັງຕິດຕາມ.

ໃນຊ່ວງທົດສະວັດທີ່ຜ່ານມາ, ອອສເຕຣເລຍໄດ້ມີການເພີ້ມກອງກໍາລັງທະຫານຂອງຕົນ. ຈີນມີຄວາມກັງວົນເປັນຢ່າງຍິ່ງວ່າ ອອສເຕຣເລຍ ຈະຮ່ວມມືກັບສະຫະລັດ ຜູ້ເຊິ່ງມີກອງທັບທີ່ເຂັ້ມແຂງທີ່ສຸດໃນໂລກ, ເພື່ອກວດສອບການແຜ່ຂະຫຍາຍຂອງກອງທັບເຮືອຈີນ, ອີງຕາມການລາຍງານຂອງພວກນັກຊ່ຽວຊານ.

ຄວາມສໍາພັນລະຫວ່າງຈີນ ແລະອອສເຕຣເລຍຊຶ່ງຄັ້ງນຶ່ງເຄີຍຈະເລີນງອກງາມນັ້ນ ພົບກັບຄວາມຫຍຸ້ງຍາກແລ້ວ ແລະໃນອາທິດແລ້ວໃນປະສົບກັບອີກບັນຫານຶ່ງ ເມື່ອອອສເຕຣເລຍ, ສະຫະລັດ ແລະສະຫະລາດຊະອານາຈັກອັງກິດ ໄດ້ເຊັນສັນຍາການເປັນພາຄີດ້ານຄວາມໝັ້ນຄົງສາມຝ່າຍ. ເຊິ່ງຂໍ້ຕົກລົງດັ່ງກ່າວຮ້ອງວ່າ AUKUS, ຈະອະນຸຍາດໃຫ້ແບ່ງປັນຄວາມກ້າວໜ້າດ້ານເທັກໂນໂລຈີທາງທະຫານ ແລະມອບເຮືອດໍານໍ້າພະລັງງານນິວເຄລຍ 8 ລໍາ ໃຫ້ແກ່ອອສເຕຣເລຍນໍາດ້ວຍ.

ຂໍ້ຕົກລົງ AUKUS ເປັນເຫດການຫຼ້າສຸດ ທີ່ກະທົບໃສ່ຄວາມສໍາພັນຂອງຈີນແລະອອສເຕຣເລຍໃຫ້ເຊື່ອມໂຊມລົງ. ນັກວິຊາການໄດ້ຊີ້ໄປທີ່ນາຍົກລັດຖະມົນຕີສາມຄົນທີ່ຈີນບໍ່ໄວ້ໃຈ ໄດ້ຮັບເລືອກໃນອອສເຕຣເລຍ ຕັ້ງແຕ່ປີ 2013, ປະກອບກັບທີ່ແຄນເບີຣາຄັດຄ້ານຜົນປະໂຫຍດຂອງຈີນພາຍໃນປະເທດ ເຊິ່ງຈີນໄດ້ມອງຫາເຄື່ອງສະໜອງອັນມີຄຸນຄ່າເຊັ່ນ ແຮ່ເຫຼັກ ແລະຖ່ານຫິນ.

“ຂ້າພະເຈົ້າຄິດວ່າ ມັນເປັນການບັນຈົບກັນຂອງປັດໄຈສອງສາມປະການນີ້ ເຊິ່ງເຮັດໃຫ້ຄວາມສໍາພັນລະຫວ່າງຈີນ ແລະອອສເຕຣເລຍຊຸດໂຊມລົງ,” ທ່ານໂອ ໄດ້ກ່າວ. “ນີ້ ອາດຈະມີການປະເຊີນໜ້າກັນລະຫວ່າງກໍາປັ່ນຂອງອອສເຕຣເລຍ ແລະຈີນ, ສົມມຸດວ່າ ຢູ່ໃນທະເລຈີນໃຕ້, ເຊິ່ງແນ່ນອນວ່າ ຈະເຮັດໃຫ້ຄວາມສໍາພັນນັ້ນ ຊຸດໂຊມໄປເລື້ອຍໆ.”

ຂໍ້ຂັດແຍ້ງກ່ຽວກັບຊັບພະຍາກອນທໍາມະຊາດຂອງອອສເຕຣເລຍອັນເປັນທີ່ຕ້ອງການນັ້ນ, ການສະໜັບສະໜຸນທາງທະຫານໂດຍສະຫະລັດ ໃນພູມິພາກເອເຊຍປາຊີຟິກ ແລະບັນດາຜູ້ນໍາທາງການເມືອງທີ່ມີຫົວອະນຸລັກນິຍົມໃນແຄນເບີຣາ ກໍາລັງກໍ່ໃຫ້ເກີດການຖົດຖອຍລົງໃນຄວາມສໍາພັນກັບຈີນ, ອີງຕາມຄຳເວົ້າຂອງຜູ້ສັງເກດການຂອງສອງປະເທດ.

ອ່ານຂ່າວນີ້ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG