ໃນລາຍການຊີວິດຊາວລາວຂອງ ວີໂອເອ ມື້ນີ້ ເຮົາຈະສະເໜີການສຳພາດ ກັບຍານາງ ອະໂນມາ ຕຸລາກຸນ ທະນາຍຄວາມເຢຍຣະມັນເຊື້ອສາຍລາວ. ນາງໄດ້ຕິດຕາມຄອບຄົວ ເຂົ້າໄປຕັ້ງຖິ່ນຖານ ຢູ່ໃນປະເທດເຢຍຣະມັນ ໃນ ກາງປີ 1970. ເວລານັ້ນ ອະໂນມາ ມີ ອາຍຸໄດ້ສີ່ປີ ນາງໄດ້ເຕີບໃຫຍ່ໄດ້ຮັບ ການສຶກສາຢູ່ໃນລະບົບຂອງເຢຍຣະມັນ ປາກເວົ້າ ພາສາເຢຍຣະມັນໄດ້ຢ່າງ ຄອງແຄ້ວ ນອກນັ້ນຍັງບໍ່ລືມພາສາລາວ ແລະຮູ້ຈັກຂະນົບທຳນຽມວັດທະນະ ທຳລາວໄດ້ເປັນຢ່າງດີ. ສ່ວນວ່າຄວາມເປັນມາຂອງ ອະໂນມາ ເປັນຢ່າງໃດນັ້ນ ກິ່ງສະຫວັນ ຈະນຳເອົາມາສະເໜີທ່ານໃນອັນດັບຕໍ່ໄປ.
ສະບາຍດີທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວຂອງ ວີໂອເອ ມື້ນີ້ຂ້າພະເຈົ້າ ຈະນຳພາທ່ານໄປຢ້ຽມຢາມປະເທດເຢຍຣະມັນ ເພື່ອຖາມຂ່າວ ລູກຫລານເຢຍຣະມັນ ເຊື້ອສາຍລາວ ຍານາງອະໂນມາ ຕຸລາກຸນ ທະນາຍ ຄວາມການຄ້າທຸລະກິດເຢຍຣະມັນ ນາງເປັນລູກສາວທີ່ໜ້າຮັກຂອງ ທ່ານຄຳ ແກ້ວ ຂ້າຣາດຊະການແຫ່ງອະດີດພະລາຊາອານະຈັກລາວ ແລະຍານາງຂຶງໝໍ້ ຕຸລາກຸນ.
ໃນປີ 1979 ອະໂນມາ ມີອາຍຸໄດ້ພຽງແຕ່ສີ່ປີ ໄດ້ຕິດຕາມຄອບຄົວ ພ້ອມດ້ວຍບັນດາຊາວອົບພະຍົບລາວຫລາຍພັນຄົນ ເຂົ້າມາຕັ້ງຖິ່ນຖານ ຢູ່ໃນ ປະເທດເຢຍຣະມັນ. ຊາວອົບພະຍົບລາວເຫລົ່ານີ້ ກໍບໍ່ແຕກຕ່າງຫຽັງໄປຈາກ ພວກ ອົບພະຍົບຊາດອຶ່ນໆທົ່ວໂລກ ເຂົາເຈົ້າຕ້ອງໄດ້ເລີ້ມຕັ້ງຕົ້ນຊີວິດໃໝ່ ຈາກສູນຕ້ອງໄດ້ ຮຽນຮູ້ພາສາ ວັດທະນາທໍາ ແລະສິ່ງແວດລ້ອມໃໝ່ຕ່າງໆ.
ສິ່ງສຳຄັນທີ່ສຸດນັ້ນກໍຄືເຂົາເຈົ້າໄດ້ ຮັບສິດເສລີພາບຫລາຍໆຢ່າງເຊັນວ່າ ການປະກອບ ວິຊາອາຊີບ ໂດຍສະເພາະຢ່າງຍິ່ງ ແມ່ນໄດ້ຮັບການສຶກສາເທົ່າທ່ຽມກັນ ກັບປະຊາຊົນເຢຍຣະມັນທົ່ວໄປ. ໂອກາດດັ່ງກ່າວໄດ້ເປີດໃຫ້ແກ່ທຸກຄົນ ພຽງແຕ່ຜູ້ຊອກສະແຫວງຫາ ມີມານະອົດທົນເທົ່ານັ້ນຈ່ຶງຈະປະສົບກັບຜົນສຳເລັດໄດ້. ອະໂນມາ ແມ່ນຜູ້ນຶ່ງຢູ່ໃນບັນດາ ລູກຫລານເຊື້ອສາຍລາວ ທີ່ເກີດໃຫຍ່ຢູ່ນອກປະເທດ ແລະເປັນແມ່ຍິງເຢຍຣະມັນເຊື້ອ ສາຍລາວຄົນທຳອິດ ແລະຄົນດຽວໃນປັດຈຸບັນ ທີ່ເປັນທະນາຍຄວາມການຄ້າ.
ໃນປີ 1979 ເວລາ ອະໂນມາ ມາເຖິງປະເທດເຢຍຣະມັນ ນາງມີອາຍຸໄດ້ພຽງ ແຕ່ສີ່ປີ ເລີ້ມຕົ້ນເຂົ້າໂຮງຮຽນອະນຸບານ ແລະເຂົ້າຮຽນໃນຫລັກສູດເປັນພາສາ ເຢຍຣະມັນມາຕະຫລອດ. ແນ່ນອນ ອະໂນມາ ສາມາດປາກພາສາເຢຍຣະ ມັນໄດ້ຢ່າງຫລ່ຽນໄຫລ ພ້ອມດ້ວຍພາສາອັງກິດ ແລະຍັງສາມາດປາກເວົ້າພາສາລາວ ໄດ້ຢ່າງຄ່ອງແຄ້ວ ເພາະວ່າ ອະໂນມາ ໄດ້ຖືກລ້ຽງດູພາຍໃຕ້ການເບິ່ງແຍງແນະ ນຳ ຂອງພໍ່ແມ່ຜູ້ປົກຄອງ ທີ່ສິດສອນໃຫ້ຮູ້ຈັກຄະນົບທຳນຽມ ແລະການໃຊ້ພາສາລາວໃຫ້ເປັນທີເໝາະສົມ. ປັດຈຸບັນນີ້ ອະໂນມາ ຕັ້ງຖິ່ນຖານຢູ່ເມືອງ Duesseldors ຫ່າງຈາກນະຄອນ ຫລວງ Berlin 350 ກິໂລແມັດ ຊຶ່ງ ອະໂນມາ ໄດ້ກ່າວຕໍ່ ວີໂອເອ ດັ່ງນີ້
ອະໂນມາ ໄດ້ເລີ້ິມການສຶກສາຈາກຊັ້ນອະນຸບານ ຜ່ານຂັ້ນຕອນຕ່າງໆຈົນສຳເລັດດ້ານກົດໝາຍຈາກ ມະຫາວິທະຍາໄລ Hamburg ໃນປີ 2006 ປະເທດເຢຣະມັນຊຶ່ງອະໂນມາໄດ້ເລົ່າສູ່ ວີໂອເອ ຟັງວ່າ:
ປະເທດເຢຍຣະມັນ ຮວມຢູ່ໃນບັນດາປະເທດມະຫາອຳນາດ ໂດຍສະເພາະທາງດ້ານເສດຖະກິດ. ນອກຈາກນັ້ນແລ້ວ ຊາວເຢຍຣະມັນ ຍັງເປັນຄົນເອື້ອເຟຶ້ອເພື່ອແຜ່ ເປີດອ້ອມແຂນຮັບເອົາອົບພະຍົບຈາກທົ່ວໂລກ. ຊາວເຢຍຣະມັນ ໄດ້ໃຫ້ກຽດແກ່ອົບພະຍົບລາວເປັນຢ່າງດີ ເຂົາເຈົ້າເຫັນຄົນລາວວ່າເປັນຄົນດຸໝັ່ນ ອົດທົນ ແລະອ່ອນນ້ອມ ທີ່ແຕກຕ່າງໄປຈາກອົບພະຍົບທີ່ມາຈາກປະເທດອຶ່ນໆ ຊຶ່ງອະໂນມາ ໄດ້ໃຫ້ຂໍ້ຄິດເຫັນດັ່ງນີ້
ປັດຈຸບັນນີ້ ອະໂນມາ ມີອາຍຸໄດ້ 41 ປີ ເປັນນັກກົດໝາຍ ມີຄູ່ໝັ້ນເປັນຊາວເຢຍຣະມັນ ຊຶ່ງເປັນນັກວິຊາການດ້ານລາຍລະອຽດຂໍ້ມຸນ ຫລື Information Technology. ໃນສາຍຕາຂອງປະເພນີລາວແລ້ວ ຫລາຍໆທ່ານອາດເວົ້າວ່າ ເປັນຫຍັງບໍ່ສ້າງຄອບຄົວ ມີລູກມີເຕົ້າ. ແຕ່ນັ້ນບໍ່ແມ່ນແນວຄິດຂອງສັງຄົມຊີວິດ ສະໄໝໃໝ່ ແລະຂອງນັກວິຊາການທັງສອງທ່ານນີ້. ເຂົາເຈົ້າຕ້ອງເນັ້ນໜັກໃສ່ໜ້າທີ່ວຽກການເປັນເລື້ອງສຳຄັນ. ການທີ່ຈະຕັດສິນໃຈເອົາລູກ ແລະລ້ຽງລູກຢູ່ໃນຕ່າງປະເທດນັ້ນມີລາຄາແພງ ແລະມີຄວາມຮັບຜິດຊອບສູງຊຶ່ງ ອະໂນມາ ໄດ້ກ່າວເຖິງຄວາມຮູ້ສຶກທາງດ້ານສ່ວນຕົວກ່ຽວກັບເລື້ອງນີ້ວ່າ :
ປະຊາກອນຂອງບັນດາປະເທດພັດທະນາ ພາກັນເຮັດວຽກໜັກ ແລະໃຊ້ຊິວິດຢ່າງມວນຊື່ນໃນເວລາພັກຜ່ອນ ໂດຍສະເພາະພາກັນເດີນທາງໄປທ່ຽວໃນແຕ່ລະປີ ແລະນີ້ເປັນກຳໄລຊີວິດ. ອະໂນມາ ໄດ້ກ່າວມ້ວນທ້າຍຂອງການເດີນທາງໄປທ່ຽວປະຈຳປີສູ່ຟັງວ່າ
ຄະນະຈັດທຳລາຍການຂອງ ວີໂອເອ ພາກພາສາລາວ ຂໍສະແດງຄວາມຂອບໃຈເປັນຢ່າງສູງມາຍັງ ອະໂນມາ ຕຸລາກຸນ ທີ່ໄດ້ແບ່ງປັນຊີວິດການເປັນຢູ່ ແລະຜົນສຳເລັດຂອງພີ່ນ້ອງ ເຢຍຣະມັນເຊື້ອສາຍລາວ ຢູ່ໃນຕ່າງແດນໃຫ້ພວກ ເຮົາໄດ້ຮຽນຮູ້ນຳ.
