ສະຫະລັດໄດ້ໃຊ້ເວລາສອງມື້ ຍົກເອົາບັນຫາຄວາມເປັນ ຫ່ວງດ້ານສິດທິມະນຸດ ຂຶ້ນມາໂອ້ລົມກັບຈີນ ຊຶ່ງມີໂຮມທັງເລື່ອງເສລີ ພາບທາງສາສະໜາ ສິດທິດ້ານແຮງງານ ເສລີພາບໃນການສະແດງ ຄວາມຄິດຄວາມເຫັນ ການປົກຄອງດ້ວຍຕົວບົດກົດໝາຍ ການຈຳ ແນກເຊື້ອຊາດຜິວພັນ ແລະ ການຮ່ວມມືແບບຫລາຍຝ່າຍ ເປັນຕົ້ນ ໃນກອງປະຊຸມທີ່ເອິ້ນວ່າ ການໂອ້ລົມສົນທະນາດ້ານສິດທິມະນຸດລະຫວ່າງ ສະຫະລັດແລະຈີນ ເທື່ອທຳອິດ ພາຍໃຕ້ລັດຖະບານໂອບາມາ ຊຶ່ງໄດ້ ມີການຕົກລົງກັນກ່ຽວກັບກອງປະຊຸມນີ້ ໃນຕອນທີ່ປະທານາທິບໍດີໂອບາມາ ພົບປະກັນກັບປະທານາທິບໍດີ ຈີນ ທ່ານຫູຈິນເຖົາ ທີ່ນະຄອນຫລວງປັກກິ່ງ ເມື່ອເດືອນພະຈິກ ປີ 2009 ນັ້ນ. ທ່ານ Michael Posner ລັດຖະມົນຕີຊ່ວຍວ່າການ ຕ່າງປະເທດ ສະຫະລັດ ຮັບຜິດ ຊອບກິດຈະການປະຊາທິປະໄຕ ສິດທິມະນຸດ ແລະແຮງງານ ໄດ້ເປັນຜູ້ນຳພາຄະນະຜູ້ແທນຂອງສະຫະລັດ ໃນກອງປະຊຸມຄັ້ງນີ້ ຊຶ່ງຖືວ່າ ເປັນກົນໄກສຳລັບໃຫ້ທັງສອງປະເທດ ໄດ້ສຸມຄວາມສົນໃຈໃສ່ຂົງເຂດ ຄວາມເປັນຫ່ວງດ້ານສະເພາະຕ່າງໆ ທີ່ພົວພັນກັບສິດທິມະນຸດ. ຄະນະຜູ້ແທນຂອງສອງປະເທດໄດ້ໃຊ້ເວລານຶ່ງມື້ ສົນທະນາກັນໃນ ກອງປະຊຸມຄົບຄະນະຫລາຍນັດ ຊຶ່ງແຕ່ລະນັດກໍໄດ້ຍົກເອົາບັນຫາທີ່ໂດດເດ່ນເລື່ອງໃດເລື່ອງນື່ງໂດຍສະເພາະ ຂື້ນມາເວົ້າ ແລະໃຊ້ເວລາ ອີກມື້ນຶ່ງນັ້ນ ພາກັນອອກໄປຢ້ຽມຢາມສະຖານທີ່ກ່ຽວຂ້ອງຕ່າງໆ.
ລັດຖະມົນຕີຊ່ວຍຕ່າງປະເທດ Posner ໄດ້ກ່າວເຖິງການສົນທະນາ ຫາລືກັນຄັ້ງນີ້ວ່າ “ເປັນໄປແບບເປີດເຜີຍ ກົງໄປກົງມາແລະແບບສ້າງ ສັນ” ໂດຍໃຫ້ຂໍ້ສັງເກດວ່າ ມີຫລາຍພາກສ່ວນທີ່ປະເທດທັງສອງ ບໍ່ເຫັນພ້ອມນຳກັນ. ຢ່າງໃດກໍຕາມ ທ່ານ Posner ກ່າວວ່າ “ມີ ຮ່ອງຮອຍຂອງ ຄວາມສຳພັນທີ່ແໜ້ນແຟ້ນຫລາຍຂື້ນ. ນັ້ນກໍຄືວ່າ ພວກ ເຮົາສາມາດທີ່ຈະສົນທະນາກັນ ກ່ຽວກັບຄວາມເຫັນແຕກຕ່າງກັນຂອງ ພວກເຮົາໄດ້ ໃນລັກສະນະທີ່ກົງໄປກົງມາ ແລະລະອຽດຖີ່ຖ້ວນ.”
ໃນການໃຫ້ສຳພາດຕໍ່ສື່ມວນຊົນ ລຸນຫລັງກອງປະຊຸມສົນທະນາກັນນັ້ນ ລັດຖະມົນຕີຊ່ວຍຕ່າງປະເທດ Posner ໄດ້ເນັ້ນເຖິງປະເດັນທີ່ສຳຄັນ ຂອງການສົນທະນາຫາລື ຫລາຍປະເດັນດ້ວຍກັນ ຊຶ່ງໂຮມທັງເສລີ ພາບໃນການສະແດງຄວາມຄິດຄວາມເຫັນ ໂດຍສະເພາະທາງອິນເຕີແນັທ ແລະບົດບາດຂອງພວກທະນາຍຄວາມ ທີ່ຕໍ່ສູ້ຄະດີເພື່ອຜົນປະໂຫຍດຂອງມະຫາຊົນ. ນອກນັ້ນແລ້ວ ທ່ານ Posner ຍັງໄດ້ຍົກ ເອົາກໍລະນີ ດ້ານສິດທິມະນຸດຂອງສ່ວນບຸກຄົນຂື້ນມາສົນທະນາ ໂຮມ ທັງກໍລະນີຂອງນັກຂຽນແລະນັກເຄຶ່ອນໄຫວ ຫລິວ ຊ້ຽວໂບ ແລະກໍລະນີຂອງ ທະນາຍຄວາມດ້ານສິດທິມະນຸດ ກາວ ຊີເຊິ່ງ. ທ່ານ Posner ລັດຖະມົນຕີຊ່ວຍຕ່າງປະເທດສະຫະລັດ ໄດ້ຖະແຫລງມາກ່ອນແລ້ວວ່າ “ມັນເປັນສິ່ງສຳຄັນ ທີ່ພວກເຮົາຈະຕ້ອງໄດ້ຍົກຂຶ້ນມາເວົ້າຊ້ຳແລ້ວຊ້ຳອີກແລະຢ່າງເປີດເຜີຍ ຄວາມເປັນຫ່ວງຂອງພວກເຮົາ ກ່ຽວກັບພວກ ນັກເຄຶ່ອນໄຫວດ້ານສິດທິມະນຸດ ທີ່ກຳລັງຖືກກົດຂີ່ຢູ່ໃນ ປະເທດຈີນນັ້ນ.
ສະຫະລັດແມ່ນມີຄວາມໝັ້ນໝາຍຕໍ່ການສົ່ງເສີມສິດທິມະນຸດຢູ່ໃນທົ່ວ ໂລກ ໂຮມທັງປະເທດຈີນນຳ. ທ່ານລັດຖະມົນຕີຊ່ວຍຕ່າງປະເທດ Posner ກ່າວຕື່ມວ່າ ທ່ານເຫັນວ່າ ກອງປະຊຸມສົນທະນາດ້ານສິດທິ ມະນຸດລະຫວ່າງສະຫະລັດແລະຈີນນັ້ນ ເປັນການປູພື້ນຖານ ສຳລັບໃຫ້ທ່ານໄດ້ສືບຕໍ່ທຳການສົນທະນາກັນກັບຝ່າຍຈີນ ແລະສຳລັບໃຫ້ກອງປະຊຸມເຫລົ່ານີ້ ກາຍມາເປັນແນວທາງທີ່ມີຂຶ້ນເປັນປະຈຳຫລາຍຂື້ນ ເພື່ອທີ່ພວກເຮົາຈະສາມາດ ແລກປ່ຽນຄວາມຄິດຄວາມເຫັນ ແລະ ຄວາມເປັນຫ່ວງຕ່າງໆ ລະຫວ່າງກັນແລະກັນ ແລະຊອກຫາຊ່ອງທາງ ເພື່ອຮ່ວມມືກັນ. ທ່ານພອສເນີໃຫ້ຂໍ້ສັງເກດເຊ່ນກັນວ່າ ສະຫະລັດ ແລະຈີນນັ້ນ ຈະສືບຕໍ່ທຳການປຶກສາຫາລືກັນດ້ານສິດທິມະນຸດຢ່າງ ເປັນປະຈຳ ແລະໃນລະດັບສູງ ໂດຍຜ່ານ ທາງການທູດດ້ານອື່ນໆນຳ.
