ພວກນັກວິທະຍາສາດສາມາດດັບສູນຍຸງທີ່ມີຈຳນວນຫລາຍ ຢູ່ໃນຫ້ອງທົດລອງໄດ້
ໂດຍໃຊ້ການຕັດຕໍ່ພັນທຸກຳທີ່ເອີ້ນວ່າ ການພັກດັນທາງພັນທຸກຳ. ວິທີການດັ່ງກ່າວ
ແມ່ນປ້ອງກັນບໍ່ໃຫ້ຍຸງໂຕແມ່ ແຜ່ພັນແລະເຮັດໃຫ້ຍຸງທັງໝົດສູນຫາຍໄປ. ພວກນັກ
ວິທະຍາສາດຫວັງວ່າ ວິທີການດັ່ງກ່າວຈະສາມາດປ່ຽນຈາກການ ໃຊ້ຢູ່ໃນຫ້ອງທົດ
ລອງ ໄປໃຊ້ຢູ່ໃນໂລກຂ້າງນອກຕົວຈິງໄດ້ ເພື່ອຈະດັບສູນຍຸງ ທີ່ມີຈຳນວນຫລວງ
ຫລາຍ ທີ່ນຳເອົາພະຍາດ ເຊັ່ນໄຂ້ມາເລເຣຍ ຫລືໄຂ້ຍຸງໄປແຜ່ຜາຍນັ້ນ ດັ່ງທີ່ເຮັນຣີ
ຣີດຈ໌ແວລ (Henry Ridgwell) ນັກຂ່າວວີໂອເອໄດ້ ລາຍງານມາ ຊຶ່ງບົວສະຫວັນ
ຈະນຳເອົາລາຍລະອຽດ ກ່ຽວກັບເລື້ອງນີ້ ມາສະເໜີທ່ານ ໃນອັນດັບຕໍ່ໄປ.
ຍຸງໄດ້ນຳເອົາພະຍາດໄຂ້ມາເລເຣຍ ໄປແຜ່ຜາຍ ທີ່ເຮັດໃຫ້ປະມານ 429,000 ຄົນເສຍ
ຊີວິດໃນແຕ່ລະປີ, ຊຶ່ງໃນນັ້ນລວມມີ ເດັກນ້ອຍຫລາຍຄົນ. ສະນັ້ນ ວິທີການດັບສູນຍຸງ
ແບບໃໝ່ນີ້ ແມ່ນເຮັດໃຫ້ຄົນມີຄວາມສົນໃຈຫລາຍ.
ພວກນັກວິທະຍາສາດຈາກມະຫາວິທະຍາໄລລອນດອນ ສາມາດທີ່ຈະດັບສູນຍຸງທີ່ແຜ່
ພັນໄດ້ ຢູ່ໃນຫ້ອງທົດລອງ ໂດຍໃຊ້ວິທີການພັກດັນທາງພັນທຸກຳ. ສາດສະດາຈານ
ແອນເດຣຍ ຄຣິສແຊນຕີ ທີ່ເປັນຜູ້ຮ່ວມນຳພາການຄົ້ນຄວ້າດັ່ງກ່າວໃຫ້ຄຳເຫັນວ່າ:
"ວິທີການພັກດັນທາງພັນທຸກຳນີ້ ເປັນການແກ້ໄຂບັນຫາທາງເຕັກນິກ ທີ່ເຮັດໃຫ້ສາມາດ
ດັດແກ້ພັນທຸກຳ ທີ່ຈະແຜ່ຜາຍຈາກຍຸງສອງ ສາມໂຕ ໄປຫາຍຸງທັງໝົດ ທຸກໂຕໄດ້."
ການດັດແກ້ດັ່ງກ່າວ ແມ່ນກ່ຽວພັນກັບການສະກັດກັ້ນ ພັນທຸກຳ ທີ່ກໍານົດການ ພັດທະນາ
ການດ້ານການປະສົມພັນຂອງຍຸງໄດ້.
ສາດສະດາຈານຄຣິສແຊນຕີ ອະທິບາຍວ່າ "ສະນັ້ນ ການເຮັດແບບນີ້ ຍຸງໂຕແມ່ ທີ່ມີພັນ
ທຸກຳ, ຖ້າເຮົາທຳລາຍພັນທຸກຳນີ້ແລ້ວ ມັນກໍຈະບໍ່ສາມາດ ພັດທະນາເຕີບໂຕເປັນຍຸງໂຕ
ແມ່ໄດ້, ແຕ່ [ໃນທາງກົງກັນຂ້າມ] ມັນພັດທະນາໃຫ້ກາຍເປັນຍຸງໂຕຜູ້ສ່ວນນຶ່ງ ແລະໂຕ
ແມ່ສ່ວນນຶ່ງ ຊຶ່ງພວກເຮົາເອີ້ນກັນວ່າ ‘ກະເທີຍ’. ຍຸງແຕ່ລະໂຕພວກນີ້ ບໍ່ສາມາດກັດໄດ້
ຊຶ່ງເປັນການດີຫລາຍ, ບໍ່ສາມາດອອກໄຂ່, ແລະເພາະສະນັ້ນ ມັນກໍບໍ່ສາມາດແຜ່ພັນໄດ້."
ການທີ່ບໍ່ສາມາດແຜ່ພັນໄດ້ນັ້ນ ແມ່ນແຜ່ຜາຍໄປຫາຍຸງຫລາຍໂຕ ແລະຍຸງທັງໝົດກໍຈະ
ສູນພັນໄປພາຍໃນ 11 ລຸ້ນຂອງຍຸງ. ຄຳຖາມໃຫຍ່ໆ ກໍຄືວ່າ ຜົນສຳເລັດອັນນັ້ນ ສາມາດ
ທີ່ຈະເອົາໄປນຳໃຊ້ ຢູ່ນອກຫ້ອງທົດລອງໄດ້ຫລືບໍ່. ສາດ ສະດາຈານຄຣິສແຊນຕີ ກ່າວ
ເພີ້ມອີກວ່າ "ພວກເຮົາໄດ້ເຮັດແນວນັ້ນ ແລ້ວ, ພວກເຮົາໄດ້ຍ້າຍຍຸງ ອອກໄປໄວ້ບ່ອນທີ່
ມີຕາໜ່າງກັ້ນໄວ້ ໂດຍເຮັດໃຫ້ມັນເປັນຄືກັນກັບສະພາບແວດລ້ອມຂອງເຂດອາກາດ
ຮ້ອນຢ່າງສິ້ນເຊີງເລີຍ. ສະນັ້ນ ພາຍຫລັງ ທີ່ໄດ້ສໍາເລັດການເຮັດແບບນີ້ແລ້ວ, ໄລຍະນີ້
ກໍຍັງເປັນຊ່ວງທີ່ສໍາ ຄັນໃນການເກັບກໍາ ເອົາຂໍ້ມູນ ເພື່ອຈຸດປະສົງໃນການສ້າງກົດລະ
ບຽບ ເຊັ່ນ ລະບຽບ ກ່ຽວກັບຄວາມປອດໄພ, ສະຖຽນລະພາບ, ຄວາມສາມາດຂອງການ
ພັກດັນ ທາງພັນທຸກໍາ ເພື່ອຈະກ້າວໄປຫາຍຸງສາຍພັນຕ່າງໆ.”
ພວກນັກວິທະຍາສາດ ເວົ້າອີກວ່າ ການໃຫ້ການຄໍ້າປະກັນຕໍ່ປະຊາຊົນກ່ຽວກັບວິທີການທີ່
ມີອິດທິພົນສູງນີ້ ແມ່ນມີຜົນສູງເໜືອສິ່ງໃດທັງໝົດ. ມີການຄາດ ຫວັງວ່າ ວິທີການພັກດັນ
ທາງພັນທຸກໍານີ້ ຈະສາມາດນໍາອອກໄປທົດລອງໃຊ້ ຢູ່ໃນບ່ອນໂລ່ງເປີດແປນ ໄດ້ພາຍໃນ
5 ຫາ 10 ປີ ຂ້າງໜ້າ.
ເຄື່ອງມືໃໝ່ທີ່ໃຊ້ເພື່ອຕ້ານກັບໄຂ້ມາເລເຣຍ ແມ່ນມີຄວາມຕ້ອງການຢ່າງຮີບດ່ວນຫລາຍ
ໃນຂະນະທີ່ອົງການອະນາໄມໂລກເວົ້າວ່າ ຄວາມກ້າວໜ້າຂອງໂລກໃນການຕ້ານພະ
ຍາດດັ່ງກ່າວ ກໍາລັງຢຸດສະງັກລົງ.
