ລິ້ງ ສຳຫລັບເຂົ້າຫາ

ວັນອາທິດ, ໒໓ ມິຖຸນາ ໒໐໒໔

ມີການຕ້ອງຕິ ກ່ຽວກັບການຮັບມືກັບພະຍາດໝາກສຸກລີງຂອງ ສະຫະລັດ


ພະນັກງານການແພດ ກໍາລັງກຽມຢາວັກຊີນໝາກສຸກລີງ ຢູ່ທີ່ Test Positive Aware Network ເຊິ່ງເປັນຄລີນິກທີ່ບໍ່ຂຶ້ນກັບລັດຖະບານ ໃນນະຄອນຊິຄາໂກ, ເມື່ອວັນທີ 25 ກໍລະກົດ 2022.
ພະນັກງານການແພດ ກໍາລັງກຽມຢາວັກຊີນໝາກສຸກລີງ ຢູ່ທີ່ Test Positive Aware Network ເຊິ່ງເປັນຄລີນິກທີ່ບໍ່ຂຶ້ນກັບລັດຖະບານ ໃນນະຄອນຊິຄາໂກ, ເມື່ອວັນທີ 25 ກໍລະກົດ 2022.

ຈົນເຖິງຂະນະນີ້ ລະບົບສາທາລະນະສຸກທີ່ຮັບມືກັບການແຜ່ລະບາດຂອງພະຍາດໝາກສຸກລີງ ຫຼື monkeypox ຢູ່ໃນສະຫະລັດ ແມ່ນພົບກັບຄວາມລົ້ມແຫຼວໃນການປ້ອງກັນທີ່ສໍາຄັນກັບການແຜ່ລະບາດຂອງພະຍາດຢູ່ໃນຊຸມຊົນ, ເຊິ່ງນໍາໄປສູ່ການຮຽກຮ້ອງໃຫ້ມີການປະເມີນຜົນ ກ່ຽວກັບຍຸດທະສາດເພື່ອຈໍາກັດການແຜ່ລະບາດຂອງພະຍາດດັ່ງກ່າວ.

ນັບຕັ້ງແຕ່ມີລາຍງານກ່ຽວກັບຜູ້ທີ່ຕິດເຊື້ອຢູ່ໃນສະຫະລັດຄັ້ງທໍາອິດ ເມື່ອວັນທີ 17 ພຶດສະພາ, ຈໍານວນໂຕເລກຂອງຜູ້ທີ່ຕິດເຊື້ອເພີ້ມຂຶ້ນຢ່າງໄວວາມາເປັນ 5,000 ກໍລະນີ ໂດຍສ່ວນຫຼາຍແມ່ນພົບໃນຈໍານວນຜູ້ຊາຍທີ່ມີເພດສໍາພັນກັບຜູ້ຊາຍດ້ວຍກັນ.

ເຖິງແມ່ນວ່າການລາຍງານກ່ຽວກັບໂຕເລກຂອງກໍລະນີຕິດເຊື້ອ ຈະກະຈາຍໄປຕາມໜ່ວຍງານທີ່ແຕກຕ່າງກັນໃນທົ່ວປະເທດ, ເບິ່ງຄືວ່າ ສະຫະລັດມີຈໍານວນຜູ້ຕິດເຊື້ອຫຼາຍກວ່າ 25 ເປີເຊັນຂອງຈໍານວນກໍລະນີຢູ່ໃນທົ່ວໂລກ ທີ່ລະບຸໃນຊ່ວງການລະບາດຢູ່ປັດຈຸບັນນີ້, ເຊິ່ງອົງການອະນາໄມໂລກ ຫຼື WHO ໄດ້ລະບຸວ່າເປັນ “ພາວະສຸກເສີນທາງດ້ານສາທາລະນະສຸກທີ່ໜ້າເປັນຫ່ວງລະຫວ່າງປະເທດ.”

ບັນດາຜູ້ຊ່ຽວຊານທາງດ້ານໂຣກຕິດຕໍ່ ມີຄວາມຮູ້ສຶກຜິດຫວັງກັບສິ່ງທີ່ພວກເຂົາເຈົ້າເຫັນ ກ່ຽວກັບການຂາດຄວາມຕື່ນໂຕແບບຮີບດ່ວນຂອງໜວ່ຍງານຕ່າງໆທາງດ້ານສາທາລະນະສຸກຂອງສະຫະລັດ ໃນຊ່ວງອາທິດຕົ້ນໆຂອງການລະບາດຄັ້ງທໍາອິດ.

ທ່ານໝໍວາຟາ ເອລ-ຊາດຣ໌ (Wafaa El-Sadr), ຜູ້ກໍ່ຕັ້ງ ແລະຜູ້ອໍານວຍການຂອງ ICAP ແຫ່ງໂຮງຮຽນສາທາລະນະສຸກເມລແມນ ຢູ່ທີ່ມະຫາວິທະຍາໄລໂຄລໍາເບຍ ບອກກັບ VOA ວ່າ “ສິ່ງທີ່ຂ້າພະເຈົ້າໄດ້ຄາດຫວັງທີ່ຈະເຫັນນັ້ນ ຈະຕ້ອງມີການຮັບມືທີ່ມີລັກສະນະເຂັ້ມແຂງ ອີງຕາມບົດຮຽນພື້ນຖານທີ່ພວກເຮົາໄດ້ຮຽນຈາກການລະບາດຂອງພະຍາດໂຄວິດ-19, ເຊັ່ນດຽວກັບບົດຮຽນຕ່າງໆທີ່ພວກເຮົາໄດ້ຈາກການຮັບມືກັບພະຍາດ HIV.”

ທ່ານໝໍ ເອລ-ຊາດຣ໌ ກ່າວຕື່ມວ່າ “ເມື່ອພວກເຈົ້າປະເຊີນກັບການລະບາດ, ສິ່ງສໍາຄັນທີ່ສຸດຄື ພວກເຈົ້າຈະຕ້ອງລົງມືປະຕິບັດຢ່າງຮີບດ່ວນ, ພວກເຈົ້າຈໍາເປັນຕ້ອງລວບລວມກໍາລັງ, ພວກເຈົ້າຈໍາເປັນຕ້ອງລວມເອົາຄວາມສາມາດຕ່າງໆຂອງພວກເຈົ້າທັງໝົດທີ່ມີມາດໍາເນີນງານຮ່ວມກັນໃຫ້ໄວທີ່ສຸດ ເພື່ອໃຫ້ສາມາດດໍາເນີນການໃນສິ່ງທິ່ຈໍາເປັນ.”

ໃນການປະເຊີນກັບການຕໍາໜິຕິຕຽນຕ່າງໆໃນຊ່ວງທ້າຍຂອງເດືອນມິຖຸນາ, ທໍານຽບຂາວ ໄດ້ປະກາດໃນອັນທີ່ຮ້ອງວ່າ “ໄລຍະທໍາອິດ” ຂອງຍຸດທະສາດແຫ່ງຊາດກ່ຽວກັບຢາວັກຊີນສໍາລັບພະຍາດໝາກສຸກລີງ ເພື່ອ “ຊ່ວຍປ້ອງກັນການລະບາດຂອງພະຍາດໃນທັນທີ ໂດຍການແຈກຢາຍຢາວັກຊີນໃນທົ່ວປະເທດສໍາລັບຜູ້ທີ່ມີຄວາມສ່ຽງສູງ.” ຝ່າຍບໍລິຫານກ່າວວ່າ ພວກເຂົາເຈົ້າຈະ “ຈັດສັນຢາວັກຊີນໃຫ້ກັບຊຸມຊົນທີ່ໄດ້ຮັບຜົນກະທົບຫຼາຍທີ່ສຸດ ແລະບັນເທົາການລະບາດຂອງພະຍາດດັ່ງກ່າວໃຫ້ໄວທີ່ສຸດ.”

ອ່ານຂ່າວນີ້ເປັນພາສາອັງກິດ

XS
SM
MD
LG