ເອກອັກຄະລັດຖະທູດສະຫະລັດ ປະຈຳສະຫະປະຊາຊາດ ຈະເດີນທາງໄປຍັງຊາຍແດນເກົາຫລີເໜືອ ທີ່ເຕັມໄປດ້ວຍອາວຸດໜັກ ແລະພົບປະກັບບັນດາຜູ້ໂຕນໜີຈາກເກົາຫລີເໜືອ ຢູ່ໃນເກົາຫລີໃຕ້, ຫ້ອງການຂອງທ່ານນາງ ກ່າວໃນວັນຈັນວານນີ້, ທ່າມກາງຄວາມພະຍາຍາມທີ່ຫຼົ້ມແຫຼວຂອງສະຫະປະຊາຊາດ ໃນການຮັບຮອງການບັງຄັບໃຊ້ມາດຕະການລົງໂທດຕໍ່ເກົາຫຼີເໜືອ, ອີງຕາມອົງການຂ່າວຣອຍເຕີສ໌.
ການເດີນທາງຂອງ ເອກອັກຄະລັດຖະທູດ ທ່ານນາງ ລິນດາ ໂທມັສ-ກຣີນຟີລດ໌ (Linda Thomas-Greenfield) ທີ່ກຳນົດໄວ້ແຕ່ວັນທີ 14 ຫາ 20 ເມສາ, ມີຂຶ້ນຫຼັງຈາກ ຣັດເຊຍ ປະຕິເສດການຕໍ່ອາຍຸປະຈຳປີຂອງຄະນະຊ່ຽວຊານຫຼາຍຝ່າຍ ເຊິ່ງໃນຕະຫຼອດ 15 ປີຜ່ານມາ ໄດ້ເຮັດວຽກກ່ຽວກັບການຈັດຕັ້ງປະຕິບັດມາດຕະການລົງໂທດຂອງສະຫະປະຊາຊາດ ທີ່ມີຈຸດປະສົງເພື່ອຄວບຄຸມໂຄງການນິວເຄລຍ ແລະຂີປະນາວຸດຂອງເກົາຫຼີເໜືອ.
ວໍຊິງຕັນ, ໂຊລ ແລະ ໂຕກຽວ ໄດ້ຕຳໜິການຢັບຢັ້ງຂອງມົສກູ ແລະການງົດອອກຄວາມເຫັນຂອງຈີນ, ເຊິ່ງບັນດາຜູ້ຊ່ຽວຊານກ່າວວ່າ ຈະທຳລາຍການບັງຄັບໃຊ້ມາດຕະການລົງໂທດ, ໂດຍທູດພິເສດຂອງເກົາຫຼີໃຕ້ຄົນນຶ່ງ ໄດ້ປຽບທຽບມັນເປັນ “ການທຳລາຍກ້ອງວົງຈອນປິດ ເພື່ອຫຼີກລ້ຽງການຖືກຈັບໄດ້ໃນຂະນະກຳລັງກະທຳຜິດ”.
ການເດີນທາງຂອງທ່ານນາງ ໂທມັສ-ກຣີນຟີລດ໌ (Thomas-Greenfield), ເຊິ່ງລວມທັງການຢຸດແວ່ໃນຍີ່ປຸ່ນ, ມີຈຸດປະສົງເພື່ອພັດທະນາການຮ່ວມມືສອງຝ່າຍ ແລະສາມຝ່າຍ ກ່ຽວກັບມາດຕະການລົງໂທດ ແລະເກີນກວ່ານັ້ນ, ໂຄສົກຂອງຄະນະປະຕິບັດງານສະຫະລັດ ປະຈຳອົງການສະຫະປະຊາຊາດທ່ານ ເນຕ ແອແວນສ໌ (Nate Evans) ກ່າວ.
ປັດຈຸບັນ, ທັງເກົາຫຼີໃຕ້ ແລະຍີ່ປຸ່ນ ແມ່ນເປັນສະມາຊິກຂອງສະພາຄວາມໝັ້ນຄົງ.
"ໃນທັງສອງປະເທດ, ເອກອັກຄະລັດຖະທູດ ໂທມັສ-ກຣີນຟີລສ໌ (Thomas-Greenfield) ຈະປຶກສາຫາລື ກ່ຽວກັບຂັ້ນຕອນຕໍ່ໄປ ເພື່ອຮັບປະກັນການສືບຕໍ່ຂອງການລາຍງານແບບເອກະລາດ ແລະຖືກຕ້ອງ ກ່ຽວກັບກິດຈະກຳການແຜ່ຜາຍອາວຸດຢ່າງຕໍ່ເນື່ອງ ແລະການຫຼີກລ້ຽງມາດຕະການລົງໂທດຂອງ ສປປ. ເກົາຫຼີ ຫຼື ສາທາລະນະລັດ ປະຊາທິປະໄຕ ປະຊາຊົນ ເກົາຫຼີ.
ຟໍຣັມສະແດງຄວາມຄິດເຫັນ