ລິ້ງ ສຳຫລັບເຂົ້າຫາ

ເສດຖະກິດສະຫະລັດ ຂະຫຍາຍໂຕໄວ ເກີນຄາດໝາຍ (ວີ​ດີ​ໂອ)


ເສດຖະກິດ​ສະຫະລັດ​ ມີ​ການຂະຫຍາຍຕົວສູງ​ເຖິງ 4.1% ​
ໃນ​ຊ່ວງເດືອນກໍລະກົດ ຫາ​ເດືອນ​ກັນຍາ ຊຶ່ງ​ເປັນ​ການ​ຂະ
ຫຍາຍ​ຕົວ ທີ່​ເຂັ້ມ​ແຂງ​ກວ່າຄາດໝາຍ​ຂອງລັດຖະບານ ​
ໃນ​ຕອນ​ທໍາ​ອິດ​ນັ້ນ.

ກະຊວງ​ການ​ຄ້າ​ສະຫະລັດ ​ເວົ້າ​ເມື່ອ​ວັນ​ສຸກ​ວານ​ນີ້​ວ່າ ໃນ​
ໄຕ​ມາດ​ທີ່​ສາມນັ້ນ ການ​ໃຊ້​ຈ່າຍ​ຂອງ ພວກ​ອຸບປະ​ໂພ​ກບໍລິ
​ໂພ​ກ ທີ່ປະກອບ​ເປັນ 70 ​ເປີ​ເຊັນ​ຂອງ​ເສດຖະກິດ​ຂອງປະ​
ເທດ ​ໄດ້ເຕີບໂຕ​ໄວ​ຂຶ້ນ​ກວ່າ​ທີ່​ຄາດ​ກັນ​ໄວ້ ກ່ອນ​ໜ້າ​ນັ້ນ.
ກະຊວງ​ການ​ຄ້າເວົ້າ​ອີກ​ວ່າ ຄອບຄົວ​ຊາ​ວອາ​ເມ​ຣິກັນພາກັນ
ຊື້​ເຄຶ່ອງ​ໃຊ້​ລາຄາ​ແພງໆ ​ເຊັ່ນ​ຕູ້​ເຢັນ ​ແລະໃຊ້​ຈ່າຍ​ເງິນ​ຫຼາຍ
ຂຶ້ນ​ ​ໃນ​ເລື້​ອງການ​ບໍລິການປະ​ຈໍາ​ວັນ ເຊັ່ນ​ສຸຂະພາບ​ເປັນ​ຕົ້ນ.

​ອັດຕາ​ການ​ເຕີ​ບ​ໂຕ ໃນ​ຊ່ວງ​ເດືອນກໍລະກົດ ຫາ​ເດືອນກັນຍານັ້ນ ນັບ​ວ່າໄວ​ທີ່​ສຸດ​ ໃນ​
ຮອບ​ສອງ​ປີ ​ແລະ​ ​ເປັນການ​ເຕີ​ບ​ໂຕ​ໄວທີ່ສຸດຄັ້ງ​ທີ​ສອງ​ ນັບ​ຕັ້ງ​ສະພາວະ​ເສດຖະກິດ​
ຖອຍຫຼັງຢ່າງ​ຮ້າຍ​ແຮງ ​ທີ່​ເກີດ​ຂຶ້ນໃນ​ກາງ​ປີ 2009 ​ເປັນ​ຕົ້ນ​ມາ.

ກ່ອນ​ໜ້າ​ນີ້​ ລັດຖະບານ​ໄດ້​ປະ​ເມີນ ການ​ເຕີບ​ໂຕ​ໃນ​ໄຕ​ມາດ​ທີ່​ສາມ ວ່າຈ​ະຢູ່​ໃນ​ລະດັບ 3.6 ​ເປີ​ເຊັນ ຊຶ່ງ​ກໍສູງກ່ວາ​ອັດຕາ 2.5 ​ເປີ​ເຊັນ ຂອງ​ໄຕ​ມາດ ທີ່​ສອງນັ້ນ.

​ຍ້ອນ​ມີ​ການ​ເຕີບໂຕ​ທີ່​ສະໝໍ່າສະ​ເໝີ​ຂອງ​ປະ​ເທດ ທີ່​ເປັນ​ເສດຖະກິດ​ໃຫຍ່​ທີ່​ສຸດ​ຂອງ ໂລກ​ນັ້ນ ບັນດາ​ຜູ້​ກໍາໜົດ​ນະ​ໂຍບາຍປະ​ຈໍາ​ທະນາຄານ​ກາງ​ສະຫະລັດ ​ໃນ​ອາທິດ​ນີ້ ​ຈຶ່ງ​ໄດ້ເຫັນ​ພ້ອມ​ກັນ​ທີ່​ຈະ​ເລີ່​ມຜ່ອນ​ການ​ສະໜັບ ສະໜຸນ​ໂດຍ​ກົງ​ຕໍ່​ເສດ​ຖະກິດ​ອາ​ເມ​ຣິກັນ ນັ້ນລົງ. ​ເປັນ​ເວລາດົນ​ກ່ວານຶ່ງ​ປີ ມາ​ແລ້ວ ທີ່ທະນາຄານກາງ​ ໄດ້​ທຸ່ມ​ເງິນ​ຈໍານວນ 85 ພັນ​ລ້ານ​ໂດ​ລ່າຕໍ່​ເດືອນ​ ໃສ່​ໃນເສດຖະກິດ ດ້ວຍ​ການ​ຊື້ຫຼັກຊັບ ກໍ​ຄືເຮືອນ​ທີ່​ປະຊາ ຊົນ​ຢືມ​ເງິນ​ຈາກ​ທະນາຄານ​ເອກະ​ຊົນ​ໄປ​ຊື້​ນັ້ນ​ເອົາ​ໄວ້ ​ແຕ່​ຈະຕັດ​ຈໍານວນ​ດັ່ງກ່າວ​ລົງ ​ເປັນ 75 ພັນ​ລ້ານ​ໂດ​ລ່າ​ຕໍ່​ເດືອນ​ ​ເລີ່​ມຕົ້ນໃນ​ເດືອນ​ໜ້າ​ນີ້.

ນັບ​ຕັ້ງ​ແຕ່​ທະ​ນາ​ຄານ​ກາງ​ ໄດ້​ເລິ່ມຊື້ຫຼັກ​ຊັບ​ເປັນ​ຕົ້ນ​ມາ ສະຫະລັດ​ ແມ່ນ​ໄດ້​ເພີ່ມໜ້າ​ວຽກ​ຂື້ນ ​ເກືອບ​ສາມ​ລ້ານ​ໜ້າ​ວຽກ​ ໃນ​ຕະຫຼາດ​ແຮງ​ງານ​ຂອງ​ຕົນ ​ແລະ​ອັດຕາ​ການ​ວ່າງ​ງານ ​ໄດ້​ຕົກ​ຕໍ່າລົງ 7 ​ເປີ​ເຊັນ. ດັດຊະນີ​ຮຸ້ນ​ຢູ່​ຕະຫຼາດຮຸ້ນ​ທີ່​ນີວຢ໊ອກ ກໍ​ໄດ້​ຖີບ​ຂຶ້ນຢ່າງ ສະໝໍ່າສະ​ເໝີ​ສູ່ ​ລະດັບສູງ​ຢ່າງ​ເປັນ​ປະວັດ​ການ​.

​ວີ​ດີ​ໂອ​ກ່ຽວ​ກັບ ການ​ເຕີບ​ໂຕ​ຂອງ ຕະຫຼາດ​ຮຸ້ນ​ສະຫະລັດ:


XS
SM
MD
LG