ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ສະຫະລັດ ແລະ ຈີນ ຍັງຄົງຂ້ອງຄາກັບກຸ່ມຮາມາສ ໃນຄວາມພະຍາຍາມສ້າງສັນຕິພາບ ໃນພາກຕາເວັນອອກກາງ


ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ, ຊ້າຍ, ແລະ ປະທານາທິບໍດີອິສຣາແອລ ທ່ານອີແຊັກ ເຮີຊັອກ ໂອ້ລົມກັນຢູ່ເມືອງ ເທລ ລະວີບ, ອິສຣາແອລ, ວັນທີ 1 ພຶດສະພາ 2024.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ, ຊ້າຍ, ແລະ ປະທານາທິບໍດີອິສຣາແອລ ທ່ານອີແຊັກ ເຮີຊັອກ ໂອ້ລົມກັນຢູ່ເມືອງ ເທລ ລະວີບ, ອິສຣາແອລ, ວັນທີ 1 ພຶດສະພາ 2024.

ຄວາມພະຍາຍາມຂອງ ສະຫະລັດ ແລະ ອິສຣາແອລ ໃນການແຍກກຸ່ມຮາມາສທາງດ້ານການທູດນັ້ນ ຂັດແຍ້ງກັບຄວາມເປັນຈິງທີ່ວ່າ ການຢຸດຍິງ ແລະການປົດປ່ອຍໂຕປະກັນຊາວອິສຣາແອລ 129 ຄົນນັ້ນ ບໍ່ສາມາດບັນລຸຜົນສໍາເລັດໄດ້ ໂດຍປາສະຈາກການພົວພັນກັບກຸ່ມທີ່ຮັບຜິດຊອບຕໍ່ເຫດການສັງຫານໝູ່ປະມານ 1,200 ຄົນ ໃນວັນທີ 7 ຕຸລາ ທີ່ຜ່ານມາ.

ນາຍົກລັດຖະມົນຕີອິສຣາແອລ ທ່ານເບັນຈາມິນ ເນຕັນຢາຮູ, ເຊິ່ງຢືນຄຽງຂ້າງ ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໃນທ້າຍເດືອນຕຸລາ, ກ່າວວ່າ ກຸ່ມຮາມາສ “ຈະຕ້ອງຖືກໂຍນອອກຈາກປະຊາຄົມຂອງບັນດາປະເທດຕ່າງໆ. ບໍ່ຄວນມີຜູ້ນໍາຄົນໃດພົບປະກັບພວກເຂົາ. ບໍ່​ຄວນມີ​ປະ​ເທດ​ໃດ ໃຫ້ການ​ຄຸ້ມ​ຄອງພວກ​ເຂົາ. ແລະຜູ້ໃດທີ່ປະຕິບັດການດັ່ງກ່າວນັ້ນ ຄວນໄດ້ຮັບການລົງໂທດ.”

ແຕ່ເກືອບປະມານ 7 ​ເດືອນ​ຕໍ່​ມາ, ບັນດາ​ຜູ້ນຳ​ກຸ່ມຮາມາສ ກໍບໍ່​ໄດ້​ຖືກ​ກີດກັ້ນ ​ແລະ ບໍ່ມີ​ປະ​ເທດໃດ​ທີ່​ພົວພັນ​ກັບ​ພວກເຂົາ​ ປະ​ເຊີນ​ໜ້າ​ກັບ​ການ​ລົງ​ໂທດຕ່າງໆ”.

ໃນອາທິດ​ແລ້ວ​ນີ້, ບັນດາຜູ້ຕາງໜ້າ​ຂອງ​ກຸ່ມຮາມາສ ​ໄດ້​ໄປ​ນະຄອນຫຼວງ​ປັກ​ກິ່ງ ​ເພື່ອຫາລື​ກ່ຽວ​ກັບ​ການ​ປອງ​ດອງກັບກຸ່ມ ຟາທາ (Fatah) ເຊິ່ງ​ເປັນ​ກຸ່ມ​ປາ​ແລັ​ສ​ໄຕນ໌​ອີກ​ຝ່າຍ​ນຶ່ງ. ນຶ່ງອາທິດກ່ອນໜ້ານັ້ນ, ຜູ້ນຳຂອງກຸ່ມຮາມາສ ທ່ານອິສເມລ ຮານີເຢ (Ismail Haniyeh) ໄດ້ພົບປະກັບປະທານາທິບໍດີເທີກີ ທ່ານຕາຍຢິບ ເອີດວານ (Tayyip Erdogan) ຢູ່ນະຄອນຫຼວງອິສຕັນບູລ.

ສະມາຊິກ​ສະພາ​ອາວຸ​ໂສທີ່ບໍ່ປະຈຳການ ຢູ່​ໃນ​ສະພາ​ມະຫາ​ສະໝຸດ​ແອັດແລນ​ຕິກ ຂຽນ​ຫາ VOA ວ່າ ຈຸດປະສົງ​ ທີ່​ໄດ້​ກ່າວ​ຊໍ້າແລ້ວຊໍ້າອີກ ຂອງ​ອິສຣາ​ແອລ ຄືການ​ກຳຈັດ​ກຸ່ມ​ຮາ​ມາ​ສ​ຢ່າງສົມບູນ, ນັ້ນ “​ແມ່ນ​ເປົ້າ​ໝາຍ​ທີ່ຍາກລໍາບາກ,” ທ່ານອາເມັດ ຟູເອດ ອາລຄາຕີບ (Ahmed Fouad Alkhatib).

ທ່ານນາງຊາຣາ ພາກິນສັນ (Sarah Parkinson), ສາດສະດາຈານດ້ານວິຊາການສຶກສາສາກົນ ຢູ່ທີ່ມະຫາວິທະຍາໄລຈອນຮັອບກິນສ໌ ກ່າວວ່າ “ມັນບໍ່ແມ່ເປົ້າໝາຍທາງທະຫານທີ່ສາມາດບັນລຸໄດ້.”

​ແນວ​ໃດ​ກໍ​ດີ, ການ​ເຮັດ​ໃຫ້​ກຸ່ມຮາມາສອ່ອນ​ແອ​ລົງ​ເຖິງ​ຈຸດ​ທີ່​ຈະເຕັ້ມໃຈຍອມຮັບວິທີແກ້ໄຂ​ບັນຫາທາງ​ການ​ເມືອງ ທີ່ອິສຣາແອລ​ຍອມຮັບໄດ້ນັ້ນ ສາມາດເຮັດໄດ້, ອີງຕາມການກ່າວໂດຍນັກ​ຊ່ຽວຊານ​ບາງ​ຄົນ​.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG