ສປຊ ລະບຸວ່າ ການປູກຝິ່ນ ​ໃນ​ມຽນມາ ຍັງ​​ສືບ​ຕໍ່​​ເພີ່ມ​ຂຶ້ນ

ອົງການ​ສະຫະ​ປະຊາ​ຊາດ​ກ່າວ​ວ່າ ການ​ຜະ​ລິດ​ຢາຝິ່ນ​ໃນ​ມຽນ
ມາ ຍັງສືບ​ຕໍ່ເພີ່ມ​ຂຶ້ນ ​ໃນ​ປີ 2013 ​ນີ້ ​ເຫດຜົນສ່ວນ​ນຶ່ງກໍ​ຄື​ວ່າ
ພວກ​ຊາວໄຮ່ປູກຝິ່ນ​ມີ​ທາງ​ເລືອກ​ໜ້ອຍ​ຫລາຍ ສໍາລັບ​ການ​
ຫາ​ລ້ຽງຊີບດ້ວຍ​ວິທີອື່ນ​ນັ້ນ.

ລາຍ​ງານ​ປະ​ຈໍາປີຂອງຫ້ອງການຢາ​ເສ​ບຕິດແລະ​ອາຊະ​ຍະ​ກໍາ
ຂອງສະຫະ​ປະຊາ​ຊາດ ​ລາຍ​ງານ​ວ່າ ຄວາມ​ຮຽກຮ້ອງ​ຕ້ອງການ​
ຢາ​ເສ​ບຕິດທີ່​ຜິດ​ກົດໝາຍ​ພວກ​ນີ້​ ທີ່​ມີ​ເພີ້​ມຂຶ້ນ​ນັບ​ມື້​ຢູ່ໃນ​ເອ​ເຊຍ
​ນັ້ນ ກໍ​ໄດ້​ມີ​ສ່ວນ​ຊ່ວຍ​ໃນ​ການ​ເຮັດ​ໃຫ້ການ​ປູກ​ຝິ່ນ​ໃນ​ມຽນມາ
ສູງ​ຂຶ້ນເຖິງ 26 ສ່ວນ​ຮ້ອຍ ຈາກ​ລະດັບ​ຂອງ​ປີ​ກາຍ​ນີ້.

ຮວມທັງ​ໝົດ​ແລ້ວ ມຽນມາ​ແມ່ນ​ໄດ້​ຜະ​ລິດ​ຝິ່ນ​ ​ປະມານ​ 870 ​ໂຕນ ​ໃນ​ປີ 2013 ນີ້ ຊຶ່ງເປັນ​
ຈໍານວນ​ທີ່​ຫຼາຍ​ທີ່​ສຸດ ນັບ​ຕັ້ງ​ແຕ່ສະຫະ​ປະຊາ​ຊາດ​ໄດ້​ເລີ່​ມ​ເກັບກໍາ​ສະຖິຕິ ​ໃນ​ປີ 2002 ​
ເປັນ​ຕົ້ນ​ມາ​ນັ້ນ.

ມຽນມາ​ເປັນ​ປະ​ເທດ ​ອັນ​ດັບ 2 ຮອງ​ຈາກອັຟກາ​ນີສຖານ ທີ່​ປູກຝິ່ນຫຼາຍທີ່​ສຸດ ຊຶ່ງ​ເປັນ
ເຄື່ອງ​ປະກອບອັນ​ສໍາຄັນ​ ​ໃນ​ການຜະ​ລິດຢາ ​ເຮ​ໂຮ​ອີນ​ແລະຢາ​ເສ​ບຕິດຜິດ​ກົດໝາຍ​
ຢ່າງ​ອື່ນໆ​ອີກ.

​ໃນ​ປີ 1999 ​ມຽນມາ​ໄດ້​ໃຫ້​ຄໍາ​ໝັ້ນ​ສັນຍາ​ວ່າ ​ຈະ​ລົບ​ລ້າງ​ການປູກຝິ່ນ​ໃຫ້​ໝົດ​ໄປພາຍ​ໃນ
​ປີ 2014 ​ຫາກ​ແຕ່ວ່າການປູກຝິ່ນ ​ໄດ້​ເພີ່ມ​ຂຶ້ນ​ໃນແຕ່ລະ​ປີ ນັບ​ຕັ້ງ​ແຕ່ປີ 2006 ມາ.

​ສະຫະ​ປະຊາ​ຊາດ​ກ່າວ​ວ່າ ຄວາມ​ພະຍາຍາມ​ຂອງ​ລັດຖະບານ​ທີ່​ຈະ​ທໍາລາຍ​ຜົນລະປູກ
ຕົ້ນ​ຝິ່ນ​ທີ່​ວ່າ​ນີ້ ບໍ່​ໄດ້​ຊ່ວຍ​ແກ້​ໄຂ​ບັນຫາທາງ​ການ​ເມືອງ​ແລະເສດຖະກິດ ອັນ​ເປັນສາ​ເຫດ​
ພື້ນຖານທີ່​ພາ​ໃຫ້​ ຊາວມຽນມາ​ພາກັນ​ປູກ​ຝິ່ນ​ນັ້ນ.

ລາຍ​ງານ​ຍັງ​ກ່າວ​ອີກ​ວ່າ ​ເງິນ​ທີ່​ໄດ້​ມາ​ຈາກ​ການປູກ​ຝິ່ນນັ້ນ​ ເປັນ​ປັດ​ໃຈ​ທີ່​ສໍາຄັນສໍາ​ຫຼັບ​
ຄອ​ບຄົວ ຂອງ​ພວກ​ຊາວ​ໄຮ່ຊາວນາຢູ່​ໃນມຽນມາ ຊຶ່ງ​ເປັນ​ປະ​ເທດ​ທີ່​ທຸກ​ຈົນ​ທີ່​ສຸດ​ ໃນ​ຂົງ
​ເຂດ​ເອ​ເຊຍ​ອາຄະ​ເນ. ສ່ວນ​ຜົນລະປູກອື່ນ​ໆ ເຊັ່ນ​ເຂົ້າ​ນັ້ນ ​ແມ່ນ​ນໍາ​ລາຍ​ໄດ້​ເຂົ້າ​ສູ່​ຄອບ
ຄົວ​ນັ້ນ​ພຽງ​ແຕ່​ສ້ຽວ​ນຶ່ງ​ເທົ່າ​ນັ້ນ.