ອົງການສະຫະປະຊາຊາດໄດ້ປະຕິເສດຕໍ່ການດຳເນີນຄວາມພະຍາຍາມຂອງກຸ່ມສະໜັບ ສະໜຸນພວກນັກຂ່າວທີ່ບໍ່ຫວັງຜົນກຳໄລທີ່ຢາກໄດ້ຮັບຖານະທີ່ປຶກສາ ຊຶ່ງຈະອຳນວຍໃຫ້ກຸ່ມດັ່ງກ່າວສາມາດເຂົ້າຮ່ວມກອງປະຊຸມຕ່າງໆຂອງສະຫະປະຊາຊາດໄດ້ຫຼາຍຂຶ້ນ.
ຄະນະກຳມະການປົກປ້ອງນັກຂ່າວ ຫລື CPJ ຊຶ່ງເຮັດວຽກ ເພື່ອຕໍ່ສູ້ໃຫ້ພວກນັກຂ່າວສາ ມາດລາຍງານຂ່າວຕ່າງໆ ໂດຍປາສະຈາກຄວາມຢ້ານກົວນັ້ນ ການຕັດສິນໃຈດັ່ງກ່າວນີ້ແມ່ນເບິ່ງກັນວ່າ ເປັນການຕຳໜິຂອງລັດຖະບານປະເທດຕ່າງໆ ທີ່ຄັດຄ້ານ ຕໍ່ການປະຕິ ບັດງານຂອງພວກເຂົາເຈົ້າ.
ໃນຖະແຫຼງການທີ່ນຳອອກເຜີຍແຜ່ນັ້ນຜູ້ອຳນວຍການບໍລິຫານຂອງອົງການ CPJ ທ່ານ Joel Simon ກ່າວວ່າ ເປັນທີ່ໜ້າເສຍໃຈທີ່ອົງການສະຫະປະຊາຊາດຊຶ່ງໄດ້ພິຈາລະນານຳເອົາບັນຫາສິດເສລີພາບໃນດ້ານການຂ່າວ ຂຶ້ນສູ່ສະພາຄວາມໝັ້ນຄົງແລະສະມັດຊາໃຫຍ່ອົງການສະຫະປະຊາຊາດ ຢູ່ໃນມະຕິຕ່າງໆ ແລະໂດຍຜ່ານການຮັບຮອງເອົາແຜນ ປະຕິບັດງານສະຫະປະຊາຊາດ ໄດ້ປະຕິເສດບໍ່ຍອມໃຫ້ອະນຸຍາດແກ່ອົງການ CPJ ຊຶ່ງ ມີຄວາມຮູ້ຢ່າງເລິກເຊິ່ງ ແລະເປັນປະໂຫຍດ ທີ່ຈະແຈ້ງໃຫ້ຊາບກ່ຽວກັບການຕັດສິນໃຈ.
ຖານະທີ່ປຶກສານີ້ຈະໃຫ້ການຄ້ຳປະກັນແກ່ຄວາມສາມາດຂອງອົງການ CPJ ຕໍ່ການເຂົ້າເຖິງອົງການຕ່າງໆ ແລະຂັ້ນຕອນຂອງສະຫະປະຊາຊາດ ແລະອະນຸຍາດໃຫ້ CPJ ເປັນເຈົ້າພາບຈັດປະຊຸມນັກຂ່າວອິດສະຫຼະແລະອົງການຕ່າງໆຢູ່ທີ່ສະຫະປະຊາຊາດ. ເວລານີ້ມີຫລາຍກວ່າ 4,000 ອົງການຈັດຕັ້ງທີ່ບໍ່ຂຶ້ນກັບລັດຖະບານໄດ້ຮັບຖານະທີ່ປຶກສາ ອີງຕາມອົງການສະຫະປະຊາຊາດ. ແຕ່ແນວໃດກໍຕາມ ກຸ່ມປົກປ້ອງສິດທິມະນຸດ ເຊັ່ນ ອົງ ການ Freedom House ແລະອົງການອື່ນໆແມ່ນໄດ້ຖືກກ່າວຫາໂດຍສະມາຊິກຂອງອົງ ການສະຫະປະຊາຊາດວ່າ ມີແຜນການທາງດ້ານການເມືອງຈຶ່ງເຮັດໃຫ້ກຸ່ມເຫຼົ່ານີ້ບໍ່ໄດ້ຮັບ ຖານະດັ່ງກ່າວ.
ການລົງຄະແນນສຽງກ່ຽວກັບຄວາມພະຍາຍາມຂອງອົງການ CPJ ໂດຍຜູ້ຕາງໜ້າ 19 ຄົນຢູ່ໃນຄະນະກຳມະການ ແມ່ນ 10 ຄົນຄັດຄ້ານຕໍ່ການຂໍຖານະໂດຍອົງການ CPJ 6 ຄົນເຫັນພ້ອມ ແລະ 3 ຄົນບໍ່ຍອມອອກສຽງ.
Dr. Courtney C. Radsch ຜູ້ອຳນວຍການຂອງອົງການ CPJ ກ່າວວ່າ ເປັນທີ່ຈະແຈ້ງ ພວກເຮົາຮູ້ສຶກເສຍໃຈ ແຕ່ກໍບໍ່ໄດ້ແປກໃຈຫຍັງເລີຍ. ມັນເປັນເລື້ອງທີ່ໜ້າດີໃຈ ທີ່ໄດ້ເຫັນ ຫລາຍໆອົງການ ພວກຜູ້ນຳ ແລະພວກນັກຂ່າວ ໄດ້ອອກມາກ່າວ ໃນນາມຂອງພວກເຮົາ ຮວມທັງທ່ານ Ban Ki-Moon ຊຶ່ງເປັນເລຂາທິການໃຫຍ່ອົງການສະຫະປະຊາຊາດ.
