ສະພາຕ່ຳສະຫະລັດ, ໃນວັນທີ 15 ເມສາ ໄດ້ມີການພິຈາລະນາການຊ່ວຍເຫຼືອໃຫ້ແກ່ ອິສຣາແອລ ແລະ ຢູເຄຣນ ອັນເປັນຮ່າງກົດໝາຍແຍກອອກຕ່າງຫາກ ໃນອາທິດນີ້, ອີງຕາມການກ່າວຂອງປະທານສະພາຕໍ່າຈາກພັກຣີພັບບລີກັນ ທ່ານໄມຄ໌ ຈອນສັນ ໃນວັນຈັນວານນີ້, ເຊິ່ງເປັນເວລາຫຼາຍກວ່າ ສອງເດືອນລຸນຫຼັງສະພາສູງໄດ້ຜ່ານຮ່າງກົດໝາຍທີ່ປະກອບເຂົ້າກັນຂອງທັງສອງຂໍ້ດັ່ງກ່າວ.
ຫຼັງຈາກອອກຈາກກອງປະຊຸມຂອງພັກຣີພັບບລີກັນ ໃນຕອນແລງຂອງວັນຈັນວານນີ້, ທ່ານ ຈອນສັນ ກ່າວວ່າ ຂໍ້ຈໍາກັດທີ່ໄດ້ແບ່ງແຍກສະພາຢ່າງວຸດວິດນັ້ນ ຈະພິຈາລະນາຮ່າງກົດໝາຍ 4 ສະບັບ ລວມທັງການໃຫ້ການຊ່ວຍເຫຼືອແກ່ ໄຕ້ຫວັນ, ເຊິ່ງເປັນພັນທະມິດຂອງສະຫະລັດຢູ່ໃນບໍລິເວນຂົງເຂດ ອິນໂດ-ປາຊີຟິກ ແລະບູລິມະສິດດ້ານຄວາມໝັ້ນຄົງແຫ່ງຊາດຂອງສະຫະລັດ.
ທ່ານ ຈອນສັນ ກ່າວຕໍ່ບັນດານັກຂ່າວວ່າ “ພວກເຮົາຮູ້ວ່າ ທົ່ວໂລກກໍາລັງເບິ່ງພວກເຮົາ ເພື່ອມອງວ່າ ພວກເຮົາຈະດໍາເນີນການແບບໃດ, ພວກເຂົາກຳລັງເບິ່ງພວກເຮົາ ເພື່ອມອງວ່າ ອາເມຣິກາຈະຢືນຂື້ນເພື່ອພັນທະມິດຂອງຕົນ ແລະເພື່ອຜົນປະໂຫຍດຂອງພວກຕົນຢູ່ໃນທົ່ວໂລກ.”
ການຊ່ວຍເຫຼືອຂອງສະຫະລັດ ໄດ້ເລື່ອນເວລາ ຍ້ອນຄວາມບໍ່ເຕັມໃຈຂອງ ທ່ານ ຈອນສັນ ທີ່ຈະພິຈາລະນາຮ່າງກົດໝາຍຂອງສອງຝ່າຍມູນຄ່າຈໍານວນ 95 ຕື້ໂດລາ ທີ່ສະພາສູງໄດ້ຮັບຜ່ານໃນເດືອນກຸມພາທີ່ຜ່ານມາ, ລວມທັງເງິນ 14 ຕື້ໂດລາສໍາລັບອິສຣາແອລ ແລະ 60 ຕື້ໂດລາ ສໍາລັບຢູເຄຣນ.
ໃນນັ້ນລວມມີຫຼາຍພັນລ້ານໂດລາ ເພື່ອສ້າງຄວາມເຂັ້ມແຂງໃຫ້ແກ່ບັນດາປະເທດພັນທະມິດໃນບໍລິເວນ ອິນໂດປາຊີຟິກ, ເຊິ່ງເປັນຂົງເຂດທີ່ ຈີນ ມີການຮຸກຮານຫຼາຍຂຶ້ນ, ແລະເພື່ອການຊ່ວຍເຫຼືອດ້ານມະນຸດສະທຳສາກົນ.
ທ່ານຈອນສັນ ກ່າວວ່າ ຮ່າງກົດໝາຍສະບັບໃໝ່ຂອງສະພາຕ່ຳ ຈະໃຫ້ການຊ່ວຍເຫລືອແກ່ຕ່າງປະເທດທີ່ມີຂະໜາດປະມານເທົ່າກັບຮ່າງກົດໝາຍຂອງສະພາສູງ ແຕ່ຈະລວມມີຄວາມແຕກຕ່າງກັນ ໂດຍລວມທັງການຊ່ວຍເຫລືອບາງຢ່າງ ໃນລັກສະນະຂອງເງິນກູ້ຢືມ.
ພັກຣີພັບບລີກັນ ມີເປົ້າໝາຍທີ່ຈະເປີດເຜີຍຮ່າງກົດໝາຍໃນຕອນເຊົ້າຂອງວັນອັງຄານມື້ນີ້ ແຕ່ຈະໃຊ້ເວລາໃນການທົບທວນຈໍານວນ 72 ຊົ່ວໂມງ ກ່ອນການລົງຄະແນນສຽງ. ທ່ານ ຈອນສັນ ກ່າວວ່າ ການລົງຄະແນນສຽງໃນທິດທາງດັ່ງກ່າວ ຈະມີຂຶ້ນໃນຕອນແລງຂອງມື້ວັນສຸກທີ່ຈະມາເຖິງນີ້.
ການຜັກດັນເພື່ອໃຫ້ຜ່ານການຊ່ວຍເຫລືອດັ່ງກ່າວ ໄດ້ເຮັດໃຫ້ມີຄວາມຮີບດ່ວນຂຶ້ນ ລຸນຫລັງການໂຈມຕີໃສ່ ອິສຣາແອລ ດ້ວຍລູກສອນໄຟ ແລະເຮືອບິນບໍ່ມີຄົນຂັບຂອງ ອີຣ່ານ ໃນທ້າຍອາທິດທີ່ຜ່ານມາ ເຖິງແມ່ນຈະມີການຄັດຄ້ານກັນຢ່າງຮຸນແຮງຢູ່ໃນສະພາທີ່ແບ່ງແຍກກັນຢ່າງເລິກເຊິ່ງນັ້ນ ກໍຕາມ.
3 ໃນ 4 ຮ່າງກົດໝາຍທີ່ ທ່ານ ຈອນສັນ ໄດ້ສະເໜີອອກມາ ຈະລວມມີ ຢູເຄຣນ, ອິສຣາແອລ ແລະ ອິນໂດປາຊີຟິກ. ສ່ວນຮ່າງກົດໝາຍທີ 4 ແມ່ນຍັງບໍ່ທັນໄດ້ອອກມາຢ່າງແຈ່ມແຈ້ງໃນທັນທີ.
ຟໍຣັມສະແດງຄວາມຄິດເຫັນ