ປະຊາກອນທີ່ເຖົ້າແກ່ຢ່າງວ່ອງໄວຂອງ ຈີນ ໄດ້ກະຕຸ້ນໃຫ້ເກີດຕະຫຼາດທີ່ເຕັມໄປດ້ວຍຄວາມຫວັງ ແລະ ເຕີບໂຕຢ່າງວ່ອງໄວສຳລັບບັນດາບໍລິສັດທັງຫຼາຍທີ່ສະໜອງຫ້ອງຮຽນກິດຈະກຳຍາມຫວ່າງ ແລະ ກິດຈະກຳຕ່າງໆສຳລັບຄົນຊະລາຊົນຊັ້ນກາງ, ນັບຈາກການຝຶກໂຢກາ ຫາ ການຕີກອງ ອາຟຣິກາ ແລະ ຖ່າຍຮູບດ້ວຍໂທລະສັບມືຖື.
ການເຕີບໂຕທີ່ອາດເປັນໄປໄດ້ຂອງອຸດສາຫະກຳດັ່ງກ່າວ ແມ່ນກົງກັນຂ້າມຢ່າງຫຼວງຫຼາຍກັບການຫຼຸດລົງຂອງຝ່າຍຄູສອນພິເສດ ຫຼັງຈາກເລີກໂຮງຮຽນ ລຸນຫຼັງການປາບປາມຂອງລັດຖະບານ ໃນປີ 2021 ທີ່ແນເປົ້າໃສ່ການຂະຫຍາຍອັດຕາການເກີດລູກທີ່ຕ່ຳເປັນປະຫວັດການ ດ້ວຍການຫຼຸດຄ່າການສຶກສາລົງ.
“ອຸດສາຫະກຳການສຶກສາແມ່ນກຳລັງຫັນປ່ຽນໄປເປັນເສດຖະກິດສີເງິນ,” ກ່າວໂດຍທ່ານນາງ ຈິວ ເປລິນ, ຫົວໜ້າຂອງບໍລິສັດ Mama Sunset ໃນນະຄອນຫຼວງປັກກິ່ງ, ເຊິ່ງແມ່ນທຸລະກິດການຮຽນຮູ້ຂອງຄົນຊະລາ ທີ່ໄດ້ເປີດສູນຫ້າແຫ່ງໃນນະຄອນຫຼວງຂອງປັກກິ່ງ ນັບຕັ້ງໄດ້ເລີ່ມຕົ້ນໃນເດືອນເມສາ 2023.
ບໍລິສັດທີ່ປຶກສາ Frost & Sullivan ຄາດວ່າ ຕະຫຼາດການຮຽນຮູ້ຂອງຜູ້ອາວຸໂສຂອງ ຈີນ ຈະເຕີບໂຕເປັນສ່ວນປະກອບຂອງອັດຕາການເຕີບໂຕປະຈຳປີ 34 ເປີເຊັນ ພາຍໃນປີ 2027 ເປັນ 16.8 ຕື້ໂດລາ, ເພີ່ມຂຶ້ນຈາກ 3.8 ຕື້ໂດລາໃນປີ 2022.
ມັນແມ່ນການແຂ່ງຂັນດ້ານຕົວເລກ.
ໃນນຶ່ງທົດສະວັດຂ້າງໜ້າ, ປະຊາຊົນ ຈີນ ປະມານ 300 ລ້ານຄົນຈະອອກ ວຽກກິນເບ້ຍບຳນານ, ເຊິ່ງເກືອບເທົ່າກັບປະຊາກອນ ສະຫະລັດ ເກືອບທັງໝົດ. ນຶ່ງໃນສອງຄົນທີ່ມີອາຍຸສູງກວ່າ 65 ປີ ໃນພາກພື້ນເອເຊຍປາຊິກດັ່ງກ່າວຈະອາໄສຢູ່ໃນຈີນ ພາຍໃນປີ 2040, ອີງຕາມການຄາດຄະເນຂອງບໍລິສັດ Euromonitor.
ໃນຂະນະທີ່ວິກິດການດ້ານປະຊາກອນຂອງ ຈີນ ແມ່ນກຳລັງເປັນໄພຂົ່ມຂູ່ຕໍ່ຖານອຸດສາຫະກຳ, ແຫຼ່ງເງິນທຶນລັດຖະບານ ແລະ ການພະຍາຍາມລົບລ້າງຄວາມທຸກຍາກນັ້ນ, ບັນດານັກລົງທຶນຈຳນວນນຶ່ງເຫັນວ່າກຸ່ມຂອງຄົນຊະລາທີ່ກຳລັງຂະຫຍາຍໂຕນັ້ນເປັນສິ່ງທີ່ຈະເກີດຂຶ້ນຢ່າງແນ່ນອນ.
ຟໍຣັມສະແດງຄວາມຄິດເຫັນ