ກົດໝາຍຂອງ ຍີ່ປຸ່ນ ກຳລັງເຮັດໃຫ້ມັນງ່າຍກວ່າເກົ່າສຳລັບປະເທດທີ່ຈະເນລະເທດຜູ້ທີ່ບໍ່ສາມາດຂໍລີ້ໄພ ໂດຍຈະມີຜົນບັງຄັບໃຊ້ໃນວັນຈັນມື້ນີ້, ເຊິ່ງບັນດານັກປຸກລະດົມໄດ້ເຕືອນວ່າ ລະບົບໃໝ່ດັ່ງກ່າວ ຈະເຮັດໃຫ້ຊີວິດຂອງຄົນທັງຫຼາຍ ຕົກຢູ່ໃນຄວາມສ່ຽງ.
ປະເທດທີ່ມີເສດຖະກິດໃຫຍ່ເປັນອັນດັບສີ່ນັ້ນ ແມ່ນຖືກຕຳໜິວິຈານມາດົນນານສຳລັບການທີ່ເຂົາເຈົ້າຮັບເອົາຜູ້ຂໍລີ້ໄພໃນຈຳນວນທີ່ຕ່ຳ. ປີກາຍນີ້ສະຖານະພາບອົບພະຍົບທີ່ຖືກມອບໃຫ້ 303 ຄົນ ແມ່ນຫຼາຍເປັນປະຫວັດການ, ເຊິ່ງສ່ວນໃຫຍ່ມາຈາກ ອັຟການິສຖານ.
ຕອນນີ້ລັດຖະບານແມ່ນສາມາດເນລະເທດຜູ້ຂໍລີ້ໄພທີ່ຖືກປະຕິເສດສາມເທື່ອ, ພາຍໃຕ້ກົດໝາຍຄົນເຂົ້າເມືອງທີ່ຖືກປ່ຽນແປງໃໝ່ ທີ່ໄດ້ມີຜົນບັງຄັບໃຊ້ປີກາຍນີ້.
ກ່ອນໜ້ານີ້, ຜູ້ທີ່ຂໍສະຖານະພາບອົບພະຍົບ ແມ່ນສາມາດທີ່ຈະອາໄສຢູ່ໃນປະເທດໃນຂະນະທີ່ເຂົາເຈົ້າຂໍອຸທອນການຕັດສິນ, ໂດຍບໍ່ຄຳນຶ່ງເຖິງຈຳນວນຄັ້ງທີ່ເຂົາເຂົ້າໄດ້ພະຍາຍາມຂໍ.
ກົດໝາຍທີ່ຖືກທົບທວນໃໝ່ແມ່ນ “ມີຈຸດປະສົງທີ່ຈະເນລະເທດຜູ້ທີ່ບໍ່ໄດ້ຮັບການອະນຸຍາດໃຫ້ຢູ່ ຢ່າງວ່ອງໄວ, ແລະ ຊ່ວຍຫລຸດຜ່ອນການກັກຂັງໄລຍະຍາວ,” ລັດຖະມົນຕີກະຊວງຍຸດຕິທຳ ທ່ານ ຣິອຸຈິ ໂຄອິຊູມິ ໄດ້ກ່າວໃນເດືອນພຶດສະພາທີ່ຜ່ານມາ.
ທ່ານກ່າວຕື່ມວ່າ “ຜູ້ທີ່ຕ້ອງການການປົກປ້ອງຈະໄດ້ຮັບການປົກປ້ອງ, ໃນຂະນະທີ່ຜູ້ລະເມີດກົດລະບຽບຈະຖືກຮັບມືດ້ວຍຢ່າງເຂັ້ມງວດ.”
ພວກນັກວິຈານໄດ້ສະແດງຄວາມເປັນຫ່ວງ ກ່ຽວກັບຄວາມໂປ່ງໃສໃນຂັ້ນຕອນການກວດກາຂອງ ຍີ່ປຸ່ນ, ໂດຍເຕືອນວ່າ ກົດລະບຽບໃໝ່ອາດເຮັດໃຫ້ຜູ້ຍື່ນເອກະສານຂໍລີ້ໄພ ມີຄວາມສ່ຽງແລະປະເຊີນກັບການປະຫັດປະຫານສູງຂຶ້ນ ຫຼັງຈາກການສົ່ງຕົວກັບຄືນປະເທດ.
ຟໍຣັມສະແດງຄວາມຄິດເຫັນ