ສານປະຊາຊົນລາວໄດ້ອະນຸຍາດໃຫ້ອອກໝາຍຈັບ ເລຂານຸການ ອະດີດ ເຈົ້າແຂວງ ອັດຕະປື ທີ່ຍັກຍອກເອາເງິນ 2 ລ້ານໂດລາ ຈາກກອງທືນຊ່ວຍເຫລືອ ຜູ້ເຄາະຮ້າຍ ຈາກກໍລະນີ ເຂື່ອນ ເຊປຽນ-ເຊນໍ້ານ້ອຍແຕກ.
ເຈ້າຫນ້າທີ່ໃນຄະນະກວດກາພັກ-ລັດ ເປີດເຜີຍວ່າການດຳເນິນງານເພື່ອຟື້ນຟູຊີວິດການເປັນຢູ່ຂອງປະຊາຊົນທີ່ຖືກກະທົບຈາກກໍລະນີເຂື່ອນເຊປຽນ-ເຊນໍ້ານ້ອຍແຕກນັບຕັ້ງແຕ່ປີ 2018 ເປັນຕ້ນມາ ໄດ້ດໍາເນີນໄປຢ່າງຊັກຊ້າຫລາຍ ຊື່ງເຫັນໄດ້ຈາກການກໍ່ສ້າງເຮືອນຢູ່ເຂດຈັດສັນໃຫມ່ທີ່ໃຊ້ເວລາຢາວນານກວ່າ 4 ປີ ຈືງໄດ້ສົ່ງມອບໃຫ້ແກ່ປະຊາຊົນທີ່ຖືກກະທົບໄດ້ຍ່າງຄົບຖ້ວນໃນທ້າຍປີ 2023, ໃນຂະນະທີ່ບໍລິສັດລົງທຶນໄດ້ ສ້ອມແປງເຂື່ອນສຳເລັດ ແລະ ໄດ້ຜະລິດກະແສໄຟຟ້າເພື່ອສົ່ງອອກໄປຕ່າງປະເທດຕັ້ງແຕ່ທ້າຍປີ 2019 ເປັນຕົ້ນມາແລ້ວ ຫາກແຕ່ຈາກການກວດກາ ເມື່ອບໍ່ດົນມານີ້ພົບວ່າໄດ້ມີການຍັກຍອກເອາເງິນ 2 ລ້ານໂດລາ ຈາກກອງທຶນເພື່ອຟື້ນຟູຊີວິດການເປັນຢູ່ຂອງຜູ້ປະສົບເຄາະຮ້າຍຈາກເຫດເຂື່ອນແຕກດັງກ່າວ ໂດຍຜູ້ທີ່ຍັກຍອກເງິນໃນຄັ້ງນີ້ ກໍຄື ທ້າວສຸລິໄຊ ສຸລິຍະໄລ ເລຂານຸການຂອງ ທ່ານເລັດ ໄຊຍະພອນ ອະດີດເຈົ້າແຂວງ ໆ ອັດຕະປືທີ່ຖືກໂຍກຍ້າຍໃຫ້ໄປເປັນປະທານສະຫະພັນກຳມະບານລາວແລ້ວໃນປະຈຸບັນນີ້
ແຕ່ຍ່າງໃດກໍຕາມ ທ້າວສຸລິໄຊ ກໍໄດ້ຫລົບໜີການຈັບກຸມ ຈືງເຮັດໃຫ້ສານປະຊາຊົນລາວຕ້ອງອະນຸຍາດໃຫ້ອອກຄຳສັ່ງຈັບຕົວໃນຄັ້ງນີ້, ສ່ວນ ທ່ານເລັດ ໄຊຍະພອນ ໃນຖານະທີ່ເປັນອະດີດຫັວຫນ້າຂອງຜູ້ຖືກກ່າວຫາລາຍດັງກ່າວນີ້ ກໍຍັງບໍ່ທັນມີຄວາມເຫັນກ່ຽວກັບກໍລະນີດັ່ງກ່າວ ແຕ່ຈາກການກວດກາທີ່ລົງເລິກກ່ຽວກັບການນຳໃຊ້ເງິນກອງທຶນຮອນໃນໄລຍະຜ່ານມາ ກໍຍັງພົບດ້ວຍວ່າໄດ້ມີການໃຊ້ຈ່າຍເງິນໂດຍບໍ່ໂປ່ງໃສ ກໍຄືມີການສໍ້ລາດບັງຫຼວງເກີດຂຶ້ນ ຈືງເຮັດໃຫ້ການຟື້ນຟູຊີວິດການເປັນຍູ່ຂອງບັນດາຜູ້ປະສົບໄພມີການຊັກຊ້າເລື່ອຍມາ ດັງເຈ້າຫນ້າທີ່ໃນຄະນະກວດກາພັກ ລັດ ໄດ້ໃຫ້ການຢືນຢັນວ່າ
“ການຊົດເຊີຍປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນເຊປຽນ-ເຊນໍ້ານ້ອຍແຕກ ບ່ວງເງິນທີ່ຈ່າຍແລ້ວຈໍານວນ 1,022.08 ຕື້ກີບ ກວດກາເຫັນລາຍຈ່າຍທີ່ບໍ່ຕິດພັນກັບການຊົດເຊີຍ ບໍ່ຖືກກັບລະບຽບການ ຈໍານວນ 81.22 ຕື້ກີບ ແລະບໍ່ມີລາຍລະອຽດການຈ່າຍ 1.81 ຕື້ກີບ”
ສ່ວນ ຜູ້ຊ່ຽວຊານດ້ານສິ່ງແວດລ້ອມທໍາມະຊາດໃນລຸ່ມນໍ້າຂອງ ໃຫ້ທັດສະນະວ່າການຟື້ນຟູຊີວິດການເປັນຢູ່ຂອງປະຊາຊົນທີ່ຖືກກະທົບຈາກໂຄງການພັດທະນາຕ່າງໆໃນລາວ ຍັງບໍ່ປະຕິບັດໄປຕາມກົດໝາຍ ໂດຍເຫັນໄດ້ຈາກການຍົກຍ້າຍປະຊາຊົນໄປຍູ່
ເຂດຈັດສັນໃຫມ່ນັ້ນ ເຖິງແມ່ນວ່າຈະໄດ້ເຮືອນໃໝ່ ມີຖະຫນນ ໄຟຟ້າ ນ້ຳປະປາ ສຸກ ສາລາ ແລະ ໂຮງຮຽນກໍຕາມ ແຕ່ວິຖີຊີວິດທາງສັງຄົມແລະວັດທະນະທຳຂອງຊຸມຊົນນັ້ນໄດ້ຖືກທຳລາຍໄປຢ່າງສິ້ນເຊີງແລ້ວ ດັ່ງທີ່ຜູ້ຊ່ຽວຊານ ໄດ້ໃຫ້ການຢືນຢັນວ່າ
“ກົດໝາຍລາວເຮາ ມາດຕາ 49, ກົດໝາຍສົ່ງເສີມການລົງທຶນນີ້ ດິນສະຫງວນນີ້ນ່ະ ປ່າສະຫງວນ ດິນທີ່ມັນຖືກໂຄງການນີ້ ກໍຕ້ອງໄດ້ຮັບອະນຸຢາດຈາກສະພາແຫ່ງຊາດ ມາດຕາ 50 ນີ້ ຖ້າເປັນດິນປອກຫລ່ອນເນື້ອທີ່ 100 ເຮັກຕານີ້ ກະຕ້ອງໄດ້ຜ່ານສະພາ ປະຊາຊົນຂັ້ນແຂວງ ອັນນີ້ລ່ະຜ່ານມານີ້ ຜະແຫນກແຜນການ ກໍວ່າບໍ່ມີບົດແນະນຳ ຈາກກະຊວງແຜນການ ກະເລົຍບໍ່ໄດ້ຜ່ານກັນ ອັນນີ້ ກໍຢາກໃຫ້ເຮັດຕາມກົດໝາຍ. ພຽງແຕ່ຂໍ້ຕົກລົງຂອງເຈົ້າແຂວງ ແລ້ວກະເອາລົດຈົກໄປບຸກໂຈມໂລດນີ້ ມັນກະສ່ງຜົນກະທົບເດ້ ປະຊາຊົນນີ້ເອາຫລັກຮົ້ວອອກນຳກະບໍ່ທັນ ມ້າງຖຽງນາກະບໍ່ທັນ ທັ້ງໆທີ່ບໍ່ທັນຊົດເຊີຍ”
ໂດຍໄພນໍ້າຖ້ວມໃຫຍ່ຈາກເຂື່ອນເຊປຽນ-ເຊນໍ້ານ້ອຍແຕກ ໃນວັນທີ 23 ກໍລະກົດ 2018 ຜ່ານມາ ໄດ້ເຮັດໃຫ້ນາຂ້າວເສຍຫາຍຫລາຍກວ່າ 8,050 ເຮັກຕາ ໂດຍທີ່ໄດ້ຮັບຜົນກະທົບໜັກທີ່ສຸດ ກໍຄື ບ້ານຫີນລາດ. ບ້ານສະໜອງໃຕ້, ບ້ານທ່າຫີນ, ບ້ານໃໝ່, ບ້ານທ່າແສງຈັນ ແລະບ້ານໃຫຍ່ແທ ປະຊາຊົນລາວໄດ້ຮັບຜົນກະທົບທັງໝົດ 7,095 ຄົນ ໃນ 1,611 ຄອບຄົວ ໃນນີ້ ໄດ້ຮັບມອບເຮືອນຍຸ່ອາໃສທັ້ງຫມດ 700 ຫລັງ ແລະໄດ້ຮັບການຈັດສັນທີ່ດິນທຳກິນລວມກັນ 2,140 ເຮັກຕາ
ຟໍຣັມສະແດງຄວາມຄິດເຫັນ