ທ່ານວິດທະວັດ ສີວິຫົກ ເອກອັກຄະລັດຖະທູດໄທ ປະຈໍານະຄອນວຽງຈັນ ຖະແຫລງຢືນ ຢັນວ່າ ການກໍ່ສ້າງສະພານຫລືຂົວຂ້າມແມ່ນໍ້າຂອງແຫ່ງທີ 3 ລະຫວ່າງໄທກັບລາວ ທີ່ເຊື່ອມຕໍ່ຈາກຈັງຫວັດນະຄອນພະນົມ ມາຍັງເມືອງທ່າແຂກໃນແຂວງຄໍາມ່ວນຂອງລາວນັ້ນໄດ້ຄືບໜ້າໄປຢ່າງວ່ອງໄວ ໂດຍໃນໄລຍະ 16 ເດືອນຜ່ານມານີ້ ກໍປາກົດວ່າການກໍ່ສ້າງໄດ້ຄືບໜ້າໄປແລ້ວເກີນກວ່າ 53% ຂອງແຜນການທັງໝົດ ຊຶ່ງດ້ວຍຜົນຈາກການດໍາເນີນງານດັ່ງກ່າວ ຈຶ່ງເຮັດໃຫ້ຄະນະຮັບຜິດຊອບຂອງທາງການໄທກັບລາວ ພິຈາລະນາເຫັນພ້ອມນໍາ ກັນວ່າ ຂົວຂ້າມແມ່ນໍ້າຂອງແຫ່ງທີ່ 3 ລະຫວ່າງລາວ-ໄທດັ່ງກ່າວນີ້ ຈະສາມາດດໍາເນີນການ ກໍ່ສ້າງໃຫ້ສໍາເລັດໄດ້ ພາຍໃນປີ 2011 ຢ່າງແນ່ນອນ ຈຶ່ງໄດ້ມີມະຕິຕົກລົງຮ່ວມກັນວ່າ ຈະເປີດນໍາໃຊ້ຂົວດັ່ງກ່າວຢ່າງເປັນທາງການໃນປີດຽວກັນນັ້ນ ພ້ອມທັງຍັງຈະເລັ່ງດໍາເນີນການກໍ່ສ້າງຂົວຂ້າມແມ່ນໍ້າຂອງແຫ່ງທີ່ 4 ຢູ່ເມືອງຫ້ວຍຊາຍ ແຂວງບໍ່ແກ້ວກັບອໍາເພີຊຽງຂອງ ຈັງຫວັດຊຽງຮາຍ ໃຫ້ສຳເລັດໄວທີ່ສຸດອີກດ້ວຍ ດັ່ງທີ່ທ່ານວິດທະວັດ ໄດ້ໃຫ້ການຢືນຢັນວ່າ:
“ສະພານມິດຕະພາບໄທ-ລາວແຫ່ງທີ່ 3 ທີ່ນະຄອນພະນົມກັບແຂວງຄໍາມ່ວນນີ້ ກໍຕັ້ງໃຈໄວ້ວ່າຈະເປີດໃຊ້ໃນປີໜ້ານີ້ ຄືໃນວັນທີ່ 11 ເດືອນພຶດສະຈິກາ ປີ 2011. ສ່ວນສະພານມິດຕະພາບແຫ່ງທີ່ 4 ທີ່ໄດ້ລົງນາມກັນທີ່ຊຽງຣາຍໄປແລ້ວນັ້ນ ກໍຈະມີການຈັດພິທີວາງສິລາເລິກ ໂດຍສົມເດັດພຣະເທບຣັດຕະນະຣາຊສຸດາ ໃນຊ່ວງເວລາອັນໃກ້ໆນີ້ ຕໍ່ໄປ.”
ສໍາລັບຂົວຂ້າມແມ່ນໍ້າຂອງແຫ່ງທີ່ 3 ລະຫວ່າງລາວ-ໄທ ດັ່ງກ່າວນີ້ ມີທີ່ຕັ້ງຢູ່ໃນເຂດບ້ານ ເວີນໃຕ້ ຊຶ່ງຕັ້ງຢູ່ຫ່າງຈາກເມືອງທ່າແຂກ ປະມານ 13 ກິໂລແມັດ ແລະຢູ່ກົງຂ້າມກັບບ້ານຫົ່ມໃນຈັງຫວັດນະຄອນພະນົມ ຊຶ່ງຂົວດັ່ງກ່າວຈະມີຄວາມກວ້າງ 13 ແມັດ ແລະຍາວ 1.423 ແມັດ ຊຶ່ງຈະຕ້ອງໃຊ້ງົບປະມານສໍາລັບດໍາເນີນການ ທັງໝົດຄິດເປັນມູນຄ່າລວມ 1.810 ລ້ານບາດ ໂດຍມີລັດຖະມານໄທເປັນຝ່າຍອອກຄ່າໃຊ້ຈ່າຍທັງໝົດ ແລະດໍາເນີນການກໍ່ສ້າງໂດຍບໍລິສັດ ອິຕາລຽນ-ໄທ ຈາກປະເທດໄທ.
ແຕ່ຢ່າງໃດກໍຕາມ ສໍາລັບທາງການຝ່າຍລາວແລ້ວ ກໍໄດ້ຄາດຫວັງໄວ້ວ່າ ພາຍຫລັງຈາກຂົວດັ່ງກ່າວນີ້ກໍ່ສ້າງສໍາເລັດແລ້ວແລະເປີດນໍາໃຊ້ຢ່າງເປັນທາງການແລ້ວນັ້ນ ກໍຈະເຮັດໃຫ້ມີການລົງທຶນຈາກຕ່າງປະເທດເຂົ້າມາໃນ ແຂວງຄໍາມ່ວນຫລາຍຂຶ້ນນັບມື້ ໂດຍສະເພາະແມ່ນຢູ່ທີ່ເຂດຕໍ່ເນື່ອງກັບຂົວນັ້ນ ທາງການແຂວງຄໍາມ່ວນກໍໄດ້ ວາງແຜນການທີ່ຈະພັດທະນາໃຫ້ເປັນເຂດເສດຖະກິດພິເສດເພື່ອຮອງຮັບການລົງທຶນຈາກຕ່າງປະເທດຕໍ່ໄປ ໂດຍໃນປັດຈຸບັນນີ້ ຍັງລໍຖ້າພຽງແຕ່ການອະນຸມັດຈາກຄະນະລັດຖະບານລາວ ຢ່າງເປັນທາງການເທົ່ານັ້ນ.
ເຂດເສດຖະກິດພິເສດຢູ່ຂົວຂ້າມແມ່ນໍ້າຂອງແຫ່ງທີ່ 3 ລະຫວ່າງລາວ-ໄທ ຢູ່ທີ່ເມືອງທ່າແຂກນີ້ ຈະມີລັກສະນະດຽວກັນກັບເຂດເສດຖະກິດພິເສດຢູ່ສາມຫລ່ຽມຄໍາໃນແຂວງບໍ່ແກ້ວ ແລະເຂດເສດຖະກິດພິເສດຢູ່ດ່ານບໍ່ເຕັນໃນ ແຂວງຫລວງນໍ້າທາ ຊຶ່ງກໍຄືຈະເປັນເຂດເສດ ຖະກິດພິເສດທີ່ທາງການລາວໄດ້ອະນຸມັດສິດທິສໍາປະທານ ໃນການລົງທຶນແລະການບໍລິ ຫານໃຫ້ແກ່ບໍລິສັດຈາກຕ່າງປະເທດທັງໝົດ. ລາຍງານຂອງພະແນກແຜນການແລະການລົງທຶນຂອງແຂວງຄໍາມ່ວນເມື່ອໝໍ່ໆມານີ້ ໄດ້ບົ່ງໄວ້ວ່າມີບໍລິສັດຕ່າງຊາດຫລາຍກວ່າ 10 ບໍລິສັດແລ້ວ ທີ່ໄດ້ພາກັນສະເໜີຕົວຂໍເຂົ້າມາລົງທຶນຢູ່ທີ່ເຂດຕໍ່ເນື່ອງກັບຂົວ ທີ່ທາງການແຂວງຄໍາມ່ວນຈະພັດທະນາໃຫ້ເປັນເຂດເສດຖະກິດພິເສດດັ່ງກ່າວ ຊຶ່ງຈະມີເນື້ອທີ່ກວ້າງກວ່າ 1 ໝື່ນເຮັກຕ້າ. ທາງການແຂວງຄໍາມ່ວນເຊື່ອໝັ້ນວ່າ ຄະນະລັດຖະບານລາວຈະມີມະຕິໃຫ້ພັດທະນາພື້ນທີ່ ທີ່ຕໍ່ເນື່ອງກັບຂົວຂ້າມແມ່ນໍ້າຂອງແຫ່ງທີ 3 ລະຫວ່າງລາວ-ໄທ ດັ່ງກ່າວ ເປັນເຂດເສດຖະກິດພິເສດ ຢ່າງເປັນທາງການພາຍໃນທ້າຍປີນີ້ ໂດຍຕໍ່ຈາກນັ້ນ ຈຶ່ງຈະມີການພິຈາລະນາຄັດເລືອກເອົາບໍລິສັດ ທັງໃນລາວແລະຈາກຕ່າງປະເທດ ເພື່ອໃຫ້ເຂົ້າມາລົງທຶນໃນເຂດເສດຖະກິດພິເສດດັ່ງກ່າວຕໍ່ໄປ.
ສ່ວນຂະແໜງການລົງທຶນທີ່ທາງການແຂວງຄໍາມ່ວນຈະໃຫ້ການສົ່ງເສີມເປັນກໍລະນີພິເສດນັ້ນ ກໍຄືການລົງທຶນໃນການກໍ່ສ້າງໂຮງແຮມ ຣີສອດ ສະຖານບັນເທີງຄົບວົງຈອນ ບ່ອນກາຊິໂນ ສະຖານທີ່ພັກພາອາໃສ, ຮ້ານອາຫານ, ອາຄານສໍານັກງານໃຫ້ເຊົ່າສູນການຄ້າ ແລະໂຮງ ງານອຸດສາຫະກໍາເບົາ ເຊັ່ນໂຮງງານຜະລິດອາຫານກະປ໋ອງ, ໂຮງງານຕັດຫຍິບ ແລະໂຮງ ງານປະກອບລົດຍົນເປັນຕົ້ນ.
