ໄທລາຍງານວ່າ ຕົນຈັບໄດ້ ງາຊ້າງຈຳນວນຫລາຍທີ່ສຸດ ທີ່ຖືກ
ລັກລອບສົ່ງເຂົ້າມາປະເທດເທື່ອດຽວພ້ອມກັນ ໃນການປະຕິບັດ
ງານ ທີ່ເປັນສ່ວນນຶ່ງຂອງຄວາມພະຍາຍາມຂອງລັດຖະບານໄທ
ເພື່ອສະແດງໃຫ້ເຫັນເຖິງຄວາມໝາຍໝັ້ນຂອງຕົນ ທີ່ຈະປາບ
ປາມການຄ້າສັດປ່າທີ່ຜິດກົດໝາຍ ຕໍ່ໜ້າການລົງໂທດທີ່ຈະມີ
ຂຶ້ນນັ້ນ. ຜູ້ສື່ຂ່າວວີໂອເອ Steve Herman ມີລາຍງານຈາກ
ບາງກອກ ຊື່ງດາຣາຈະນຳມາສະເໜີທ່ານ.
ໃນວັນຈັນວານນີ້ ເຈົ້າໜ້າທີ່ໄທໄດ້ເອົາມາວາງສະແດງ ງາຊ້າງພັນອາຟຣິກາ ຈຳນວນ 739
ອັນ ທີ່ຖືກລັກລອບສົ່ງເຂົ້າມາໄທຢ່າງຜິດກົດໝາຍ ມີນ້ຳໜັກເຖິງ 4 ໂຕນ ທີ່ເຈົ້າໜ້າທີ່ຍຶດ
ມາໄດ້ ຈາກທ່າເຮືອຄອງເຕີຍ ທີ່ບາງກອກ ເມື່ອວັນເສົາຜ່ານມາ.
ທ່ານ Richard Thomas ຜູ້ປະສານງານຝ່າຍສື່ສານທົ່ວໂລກ ທີ່ນະຄອນຫລວງລອນດອນ ສຳຫລັບອົງການ TRAFFIC International ຊຶ່ງເປັນເຄືອຂ່າຍຕິດຕາມເບິ່ງການຄ້າສັດປ່າ
ທີ່ຜິດກົດໝາຍ ບອກກັບ ວີໂອເອ ວ່າ ນີ້ແມ່ນການຍຶດງາຊ້າງລາຍໃຫຍ່ທີ່ສຳຄັນອີ່ຫລີ.
ທ່ານ Richard Thomas ເວົ້າວ່າ “ການເຄື່ອນຍ້າຍເຄື່ອງຂອງຈັດສົ່ງ ໜັກ 4 ໂຕນ
ໄປເຄິ່ງຂ້ອນໂລກ ບໍ່ແມ່ນກິດຈະກຳເລັກໆນ້ອຍໆເລີຍ. ການເຄື່ອນຍ້າຍປະເພດນີ້
ແມ່ນເປັນສິ່ງຊີ້ບອກຢ່າງແຂງແຮງທີ່ສຸດ ເຖິງການກໍ່ອາຊະຍາກຳແບບມີການຈັດຕັ້ງ.”
ຖ້າເວົ້າຕາມນ້ຳໜັກແລ້ວ ການຍຶດງາຊ້າງເທື່ອນີ້ແມ່ນເປັນຄັ້ງໃຫຍ່ທີ່ສຸດ ໃນປະຫວັດສາດ
ຂອງລາດຊະອານາຈັກໄທ ອິງຕາມຄຳຖະແຫລງ ຂອງເຈົ້າໜ້າທີ່ພາສີໄທ ແຕ່ມັນກໍບໍ່ແມ່ນຈຳນວນຫລວງຫລາຍທີ່ສຸດໃນຂົງເຂດ. ເມື່ອປີ 2002 ສິງກະໂປຍຶດໄດ້ງາຊ້າງ 7.2 ໂຕນ
ແລະເຈົ້າໜ້າທີ່ມາເລເຊຍ ກໍຍຶດໄດ້ 6 ໂຕນ ໃນປີ 2012.
ເຈົ້າໜ້າທີ່ໄທກ່າວວ່າ ງາຊ້າງທີ່ຍຶດໄດ້ ຊຶ່ງຊຸກເຊື່ອງໄວ້ໃນຖົງໝາກຖົ່ວ ແມ່ນຖືກສົ່ງອອກມາຈາກ ສາທາລະນະລັດປະຊາທິປະໄຕ Congo ໂດຍມີຈຸດໝາຍປາຍທາງທີ່ ສປປ ລາວ ຊຶ່ງເຮັດໃຫ້ເປັນໄປໄດ້ວ່າ ຕະຫລາດປາຍທາງສຸດທ້າຍແທ້ໆນັ້ນ ແມ່ນປະເທດຈີນ.
ໄທ ສາທາລະນະລັດປະຊາທິປະໄຕ Congo ແລະໄນຈີເຮຍ ແມ່ນເປັນສາມປະເທດ ທີ່ຖືກລະບຸຊື່ວ່າ ມີສ່ວນພົວພັນໃນການຄ້າຂາຍ ງາຊ້າງຢ່າງຜິດກົດໝາຍໃນທົ່ວໂລກ. ໂຄສົກ Thomas ແຫ່ງເຄືອຂ່າຍຕິດຕາມເບິ່ງການຄ້າສັດປ່າທີ່ຜິດກົດໝາຍ TRAFFIC International ກ່າວວ່າ ບັນດາເຈົ້າໜ້າທີ່ໄທຄວນຈະໄດ້ຮັບກຳລັງໃຈ ແລະໄດ້ຮັບການສະໜັບສະໜຸນ ໃຫ້ຕິດຕາມການຍຶດງາຊ້າງໄດ້ຄັ້ງນີ້ຕໍ່ໄປ ໂດຍທຳການສືບສວນຢ່າງລະ
ອຽດ ກ່ຽວກັບຕາໜ່າງລັກລອບຂົນສົ່ງງາຊ້າງນັ້ນ.
ທ່ານ Richard Thomas ກ່າວວ່າ “ແນ່ນອນວ່າ ບັນດາເຈົ້າໜ້າທີ່ໄທ ຄວນຈະໄດ້
ຮັບການຍົກຍ້ອງຊົມເຊີຍ ທີ່ຈັບການຂົນສົ່ງງາຊ້າງຄັ້ງໃຫຍ່ແລະສຳຄັນແບບນີ້ໄດ້
ແຕ່ມັນກໍເນ້ນໜັກໃຫ້ເຫັນວ່າ ກິດຈະກຳຜິດກົດໝາຍທຳນອງນີ້ ທີ່ກຳລັງດຳເນີນ
ຢູ່ຕໍ່ມານັ້ນ ມັນຮ້າຍແຮງສ່ຳໃດ.”
ເຈົ້າໜ້າທີ່ໄທໄດ້ເອົາບົດບາດຢ່າງແຂງຂັນຕັ້ງໜ້າຫລາຍຂຶ້ນ ໃນການດຳເນີນຄວາມພະຍາ
ຍາມເພື່ອຍຶດເອົາ ການລັກລອບຂົນສົ່ງງາຊ້າງຢ່າງຜິດກົດໝາຍນັ້ນ ຫລັງຈາກທີ່ອົງການ CITES (Convention on International Trade in Endangered Species) ທີ່ວາງ
ກົດລະບຽບ ຄວບຄຸມການຄ້າສັດປ່າ ໄດ້ແຈ້ງໃຫ້ໄທຊາບວ່າ ທຸລະກິດກ່ຽວກັບສັດປ່າທັງໝົດ
ຂອງໄທ ຈະປະເຊີນກັບການລົງໂທດນາໆປະການ ຖ້າຫາກວ່າໄທບໍ່ຍັບຍັ້ງການຄ້າງາຊ້າງ
ຢູ່ໃນຜືນແຜ່ນດິນຂອງຕົນ ພາຍໃນເດືອນສິງຫາປີນີ້.
ພວກງາຊ້າງຈາກຊ້າງທີ່ລ້ຽງຢູ່ໃນປະເທດ ແລະຂຶ້ນທະບຽນກັບທາງການນັ້ນ ແມ່ນຂາຍໄດ້
ຢ່າງຖືກຕ້ອງຕາມກົດໝາຍ ຢູ່ໃນໄທ. ມີການຖິ້ມໂທດໃສ່ການອະນຸຍາດດັ່ງກ່າວນີ້ວ່າ ເຮັດ
ໃຫ້ມັນງ່າຍຂຶ້ນຫລາຍ ສຳຫລັບການນຳເອົາງາຊ້າງ ທີ່ໄດ້ມາຈາກການລັກຂ້າຊ້າງຢູ່ອາຟຣິ
ກາ ເຂົ້າມາຟອກຢູ່ໃນປະເທດໄທ.
ບັນດານັກອະນຸລັກສິ່ງແວດລ້ອມ ກ່າວວ່າ ໃນຈຳນວນຊ້າງອາຟຣິກາ 500,000 ຕົວທີ່ຍັງເຫລືອຢູ່ນັ້ນ 20,000 ຕົວ ໄດ້ຖືກຂ້າໃນປີ 2013 ຊຶ່ງສ່ວນໃຫຍ່ແມ່ນຖືກລັກຂ້າເອົາງາ ເພື່ອຕອບສະໜອງຄວາມຮຽກຮ້ອງຕ້ອງການ ຢູ່ໃນເອເຊຍ.
ມີການກະປະມານກັນວ່າ ຈີນແມ່ນເປັນປາຍທາງ ສຳຫລັບຫລາຍເຖິງ 70 ສ່ວນຮ້ອຍຂອງຕະຫລາດງາຊ້າງຜິດກົດໝາຍ. ຊາວຈີນສະໄໝໃໝ່ ຊັ້ນກາງແລະຊັ້ນສູງ ຫລາຍໆຄົນເຊື່ອ
ວ່າ ງາຊ້າງແລະວັດຖຸທີ່ເຮັດຈາກງາຊ້າງ ຈະນຳໂຊກລາບມາໃຫ້ ຫລືເປັນເຄື່ອງເອ້ສະແດງ
ເຖິງສະຖານະພາບ ທີ່ຮັ່ງມີ.
ອົງການ CITES ຊຸກຍູ້ໃຫ້ໄທ ຍັບຍັ້ງການຄ້າງາຊ້າງ ຫລືວັດຖຸທີ່ເຮັດດ້ວຍງາຊ້າງ:
