ລິ້ງ ສຳຫລັບເຂົ້າຫາ

ວັນອາທິດ, ໑໙ ພຶດສະພາ ໒໐໒໔

ຜູ້ນໍາກອງທັບເຮືອໄຕ້ຫວັນ ຂໍຄວາມຮ່ວມມືກັບສະຫະລັດ ຢູ່ທີ່ງານວາງສະແດງປະຈຳປີ


ພົນເຮືອເອກ ຖັງ ຮົວ ຜູ້ບັນຊາການກອງທັບເຮືອໄຕ້ຫວັນ ເຂົ້າຮ່ວມພິທີມອບຮັບ ເຮືອລາດຕະເວນ Tuo Chiang-class 6 ລໍາ ໃນຢີລານ, ໄຕ້ຫວັນ, ທີ 26 ມີນາ 2024. ລະຫວ່າງການຢ້ຽມຢາມ ວໍຊິງຕັນ ອາທິດນີ້, ທ່ານ ຮົວ ກ່າວວ່າໄຕຫວັນຕ້ອງການການຮ່ວມມືກັບສະຫະລັດ ແລະປະເທດອື່ນໆຫຼາຍຂຶ້ນ ທ່າມກາງຄວາມກົດດັນທາງທະຫານຈາກຈີນ.
ພົນເຮືອເອກ ຖັງ ຮົວ ຜູ້ບັນຊາການກອງທັບເຮືອໄຕ້ຫວັນ ເຂົ້າຮ່ວມພິທີມອບຮັບ ເຮືອລາດຕະເວນ Tuo Chiang-class 6 ລໍາ ໃນຢີລານ, ໄຕ້ຫວັນ, ທີ 26 ມີນາ 2024. ລະຫວ່າງການຢ້ຽມຢາມ ວໍຊິງຕັນ ອາທິດນີ້, ທ່ານ ຮົວ ກ່າວວ່າໄຕຫວັນຕ້ອງການການຮ່ວມມືກັບສະຫະລັດ ແລະປະເທດອື່ນໆຫຼາຍຂຶ້ນ ທ່າມກາງຄວາມກົດດັນທາງທະຫານຈາກຈີນ.

ພົນເຮືອເອກ ຖັງ ຮົວ (Tang Hua) ຜູ້ບັນຊາການກອງທັບເຮືອໄຕ້ຫວັນ ໃນລະຫວ່າງການເດີນມາໄປຍັງ ລັດແມຣີແລນ ໄດ້ກ່າວວ່າ ເກາະທີ່ປົກຄອງຕົນເອງນັ້ນ ຕ້ອງການການຮ່ວມມືກັບສະຫະລັດ ແລະປະເທດອື່ນໆຫຼາຍຂຶ້ນ ທ່າມກາງຄວາມກົດດັນທາງທະຫານຈາກຈີນ.

​ແຕ່​ເຖິງວ່າທ່ານຈະ​ເຈລະຈາ​ໂດຍ​ກົງ​ກັບ​ພົນ​ເຮືອ​ເອກ ລີຊາ ຟຣານເຊັດຕິ (Lisa Franchetti) ຫົວໜ້າ​ຝ່າຍປະຕິບັດ​ການ​ກອງທັບ​ເຮືອ​ສະຫະລັດ​ ຫຼື​ບໍ່ນັ້ນ ກໍຕາມ, ອີງຕາມ​ການ​ລາຍ​ງານ​ຂອງ ອົງການຂ່າວຣອຍເຕີສ໌, ທ່ານ ຖັງ ຮົວ (Tang Hua) ກ່າວ​ວ່າ ທ່ານ​ຈະ​ບໍ່​ໃຫ້​ຄຳ​ເຫັນ ​ເພື່ອ​ຫຼີກ​ເວັ້ນການ​ປະ​ທ້ວງ​ຂອງ​ຈີນ​ທີ່​ສ້າງ​ຄວາມ​ຫຍຸ້ງຍາກ​ໃຫ້​ຝ່າຍ​ສະຫະລັດ.

​ໃນການລົມກັບວີໂອເອ ເມື່ອ​ວັນ​ຈັນທີ່ຜ່ານມາ ຢູ່ທີ່​ກອງ​ປະຊຸມດ້ານ​ອະວະກາດ ແລະດ້ານ​ທະ​ເລ ​ໃນ​ປີ​ນີ້ ໂດຍການເປັນເຈົ້າພາບຂອງໜ່ວຍງານ​ສັນນິບາດ​ກອງທັບ​ເຮືອ​ຂອງ​ສະຫະລັດ ຢູ່​ທ່າ​ເຮືອ​ແຫ່ງ​ຊາດ ​ນອກ​ນະຄອນຫຼວງ ວໍ​ຊິງ​ຕັນ, ທ່ານ ຖັງ (Tang) ໄດ້ກ່າວ​ວ່າ ທ່ານ​ຈະ​ພົບ​ປະ​ກັບ​ເຈົ້າໜ້າທີ່ກອງທັບ​ເຮືອ​ຈາກ​ສະຫະລັດ ​ແລະ​ປະ​ເທດ​ອື່ນໆ.

ທ່ານໄດ້ກ່າວວ່າ "ຂ້າພະເຈົ້າຄິດວ່າ ບັນຫາຂອງກອງທັບປົດປ່ອຍປະຊາຊົນ (PLA) ກັບໄຕ້ຫວັນ ບໍ່ພຽງແຕ່ກ່ຽວກັບໄຕ້ຫວັນເທົ່ານັ້ນ. ມັນອາດຈະຢູ່ໃນທະເລຈີນຕາເວັນອອກ ຫຼືທະເລຈີນໃຕ້. ມັນເປັນບັນຫາລະດັບໂລກ, ບໍ່ແມ່ນບັນຫາທີ່ແນເປົ້າໃສ່ໄຕ້ຫວັນໂດຍສະເພາະ."

ໄຕ້ຫວັນໄດ້ແຍກອອກຈາກຈີນ ໃນປີ 1950 ຫຼັງຈາກພວກຊາດນິຍົມໄດ້ເສຍໄຊໃຫ້ພວກຄອມມິວນິສ ແລະໄດ້ຫລົບໜີໄປຢູ່ເກາະດັ່ງກ່າວ, ບ່ອນທີ່ເຂົາເຈົ້າໄດ້ສ້າງຕັ້ງລັດຖະບານ ເຊິ່ງໃນທີ່ສຸດກໍກາຍເປັນປະຊາທິປະໄຕ.

ຈີນ​ອ້າງ​ວ່າ​ ໄຕ້​ຫວັນ​ເປັນ​ແຂວງ​ທີ່​ແຕກ​ແຍກ ​ທີ່​ຈະ​ມີ​ມື້​ໜຶ່ງ​ຕ້ອງກັບມາ​ໂຮມ​ເຂົ້າ​ກັບ​ແຜ່ນ​ດິນ​ໃຫຍ່​ຄືນອີກ, ໂດຍການໃຊ້ກຳລັງ ຖ້າ​ຈຳ​ເປັນ.

ຈີນ​ຍັງ​ມີ​ຂໍ້​ຂັດ​ແຍ້ງ​ດ້ານ​ດິນ​ແດນ​ກັບ​ຍີ່​ປຸ່ນ ​ຢູ່​ທະ​ເລ​ຈີນ​ຕາ​ເວັນ​ອອກ ​ແລະ​ອ້າງສິດ​ຕໍ່ທະ​ເລ​ຈີນ​ໃຕ້​ເກືອບທັງໝົດ ວ່າ​ເປັນ​ຂອງ​ຕົນເອງ, ​ເຮັດ​ໃຫ້ເກີດຄວາມຂັດ​ແຍ້ງ​ກັບ​ບຣູ​ໄນ, ອິນ​ໂດ​ເນ​ເຊຍ, ມາ​ເລ​ເຊຍ, ຟີ​ລິບ​ປິນ, ໄຕ້​ຫວັນ ແລະ​ຫວຽດນາມ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG