ພາຍໃນປີ 2018 ໂຮງໄຟຟ້າຂະໜາດໃຫຍ່ແຫ່ງນຶ່ງ ທີ່ໃຊ້ພະ ລັງແສງແດດເຂດທະເລຊາຍຊາຮາຣາ ຂອງຕູນີເຊຍ ອາດຈະເລີ້ມສົ່ງກະແສໄຟຟ້າໄປໃຫ້ພວກປະເທດໃນພາກຕາເວັນຕົກຢູໂຣບ. ບໍລິສັດທີ່ແລ່ນໂຮງໄຟຟ້າດັ່ງກ່າວ ເວົ້າວ່າ ເມື່ອໃດໂຮງໄຟຟ້າດັ່ງກ່າວແລ່ນເຕັມອັດຕາແລ້ວມັນຈະຜະລິດພະລັງໄຟຟ້າໄດ້ເກືອບສອງເທົ່າໂຕຂອງໂຮງ ໄຟຟ້ານີວເຄລຍລະດັບປານກາງຜະລິດໄດ້ ແລະຈະສົ່ງກະແສໄຟຟ້າໄປໃຫ້ບ້ານເຮືອນໄດ້ 2 ລ້ານຫຼັງໃນຢູໂຣບ. ສິງຈະນຳເອົາລາຍງານເລື້ອງນີ້ຈາກນາຍ George Putic ຜູ້ສື່ຂ່າວວີໂອເອ ມາສະເໜີທ່ານຕໍ່ໄປ…
ອີງຕາມສະຖາບັນພະລັງງານຂອງຄະນະກຳມາທິການຢູໂຣບ ແລ້ວ ພຽງແຕ່ 0.3 ເປີເຊັນເທົ່ານັ້ນຂອງພະລັງໄຟຟ້າທີ່ໃຊ້ແສງແດດ ຂອງທະເລຊາຍຊາຮາຣາ ກໍສາມາດສະໜອງໃຫ້ຢູໂຣບມີພະລັງໄຟຟ້າໃຊ້ ຕາມທີ່ຕົນຕ້ອງການນັ້ນ.
ບໍລິສັດນຶ່ງທີ່ເອີ້ນວ່າ Nur Energy ວາງແຜນທີ່ຈະຍຶດເອົາເຂດທະເລຊາຍບາງແຫ່ງເພື່ອກໍ່ສ້າງໂຮງໄຟຟ້າ ທີ່ໃຊ້ພະລັງແສງແດດຄ້າຍຄືກັນ ກັບຂອງອິສຣາແອລ ໃນເຂດທະເລຊາຍ Negev ທີ່ໃຊ້ພວກກະຈົກທີ່ ຫັນໄປທາງແສງແດດນັ້ນ. ເທັກໂນໂລຈີແບບນີ້ ບໍ່ຄືກັນ ກັບແຜ່ນເກັບໄຟຟ້າແສງແບບແສງຕາເວັນ ມັນສາມາດຜະລິດພະລັງໄຟຟ້າໄດ້ແມ່ນ ແຕ່ໃນເວລາທີ່ທ້ອງຟ້າມີເມກປົກຄຸມ ຫຼືຍາມກາງຄືນກໍຕາມ.
ພວກກະຈົກຫຼາຍພັນແຜ່ນ ຕິດຕັ້ງຢາຍກັນໄປໃນເນື້ອທີ່ຫຼາຍກວ່າ 100 ກິໂລແມັດມົນທົນ ແມ່ນຈະສົ່ງແສງແດດຫຼືແສງພະອາທິດໄປຍັງຫໍຄອຍ ບ່ອນທີ່ໃຫ້ຄວາມຮ້ອນ ແລະເຮັດໃຫ້ເກືອພິເສດເປື່ອຍລະລາຍໄປ.
ທ່ານ Kevin Sara ຫົວໜ້າບໍລິຫານບໍລິສັດ Nur Energy ກ່າວວ່າ:
“ຫຼັງຈາກນັ້ນ ເຮົາກໍສາມາດເກັບຄວາມຮ້ອນໄວ້ຢ່າງງ່າຍໆ ເພື່ອວ່າເຮົາຈະສືບຕໍ່ຜະລິດພະລັງໄຟຟ້າໄດ້ ຫຼັງຈາກຕາເວັນຕົກດິນແລ້ວ.”
ໃນບ່ອນແລກປ່ຽນຄວາມຮ້ອນນັ້ນ ເກືອທີ່ເປື່ອຍລະລາຍໄປ ເຮັດໃຫ້ນ້ຳກາຍເປັນອາຍນ້ຳ ສຳລັບປິ່ນກັງຫັນເຄື່ອງຜະລິດໄຟຟ້າ.
ທ່ານ Sara ກ່າວວ່າ ໂຄງການນີ້ ສາມາດລົດຜ່ອນການໃຊ້ພວກເຊື້ອ ເພີງທຳມະຊາດ ລົງຢ່າງຫຼວງຫຼາຍໄດ້ໃນຢູໂຣບນັ້ນ ຊຶ່ງທ່ານກ່າວດັ່ງນີ້….
“ພວກເຮົາສາມາດລົດຜ່ອນການປ່ອຍທາດ Carbon ລົງເທື່ອລະຂັ້ນໆສຳລັບ
ຕາໜ່າງໄຟຟ້າຂອງຢູໂຣບ ໂດຍໃຊ້ພະລັງໄຟຟ້າຈາກທະເລຊາຍ ໃຊ້ພະລັງໄຟຟ້າຈາກແສງຕາເວັນ ທີ່ເກັບໄວ້ຈາກທະເລຊາຍຊາຮາຣາ ແລະເຊື່ອມໂຍງຢູໂຣບດ້ວຍສາຍໄຟຟ້າແຮງສູງ ທີ່ຈະເຮັດໃຫ້ຄວາມເສຍຫາຍຂອງເຂົາເຈົ້າລົດລົງຫຼາຍທີ່ສຸດນັ້ນ.”
ການເຊື່ອມໂຍງກັບຢູໂຣບດ້ວຍສາຍໄຟຟ້າແຮງສູງນີ້ ເປັນພາກສ່ວນນຶ່ງອີກທີ່ໜ້າສົນໃຈຂອງໂຄງການດັ່ງກ່າວ.
ແທນທີ່ຈະໃຊ້ການສົ່ງພະລັງໄຟຟ້າສະຫລັບກັນໃນປັດຈຸບັນນີ້ ບໍລິສັດ Nur Energy ວາງແຜນທີ່ຈະສົ່ງພະລັງໄຟຟ້າ ໂດຍສາຍໄຟຟ້າໃຕ້ນ້ຳໂດຍກົງໃນປັດຈຸບັນນີ້ຊຶ່ງໄດ້ເສຍ
ພະລັງໄຟຟ້າພຽງແຕ່ 3 ເປີເຊັນ ຕໍ່ 1 ພັນກິໂລແມັດນັ້ນ. ນອກຈາກຈະມີລາຄາຖືກແລ້ວ
ເທັກໂນໂລຈີ ໃໝ່ນີ້ບໍ່ຈຳເປັນທີ່ຈະຕ້ອງໃຊ້ລະບົບທີ່ໃຫ້ມັນແລ່ນໄປພ້ອມໆກັນ ລະຫວ່າງລະບົບສາຍສົ່ງໄຟຟ້າແບບສະຫລັບ.
ຫວ່າງໄວໆຜ່ານມານີ້ ຕູນີເຊຍ ໄດ້ເປີດການເລືອກຕັ້ງເອົາສະມາຊິກສະພານິຕິບັນຍັດແບບປະຊາທິປະໄຕຮອບສອງຂຶ້ນ ຊຶ່ງທ່ານ Sara ກ່າວວ່າ ໂຄງການຜະລິດພະລັງໄຟຟ້າທີ່ໃຊ້ພະລັງແສງແດດ ສາມາດ ສ້າງສະຖຽນລະພາບໃນປະເທດຂຶ້ນໄດ້ ຊຶ່ງທ່ານ ກ່າວຕື່ມວ່າ..
“ອຸບປະກອນຫຼາຍຢ່າງ ສາມາດຜະລິດຂຶ້ນໄດ້ໂດຍພວກບໍລິສັດພາຍໃນປະເທດຕູນີເຂຍ ແລະວ່າ ຈະສ້າງໜ້າວຽກ ແລະໂອກາດວຽກເຮັດງານທຳສຳລັບພວກຊາວໜຸ່ມຕູນິເຊຍໄດ້.
ການກໍ່ສ້າງໂຮງໄຟຟ້າທີ່ໃຊ້ພະລັງຈາກແສງແດດ ໃນພາກຕາເວັນຕົກສຽງໃຕ້ຂອງຕູນີເຊຍ ຄາດວ່າຈະເລີ້ມຂຶ້ນພາຍໃນທ້າຍປີ 2016 ແລະຈະເລີ້ມສົ່ງກະແສໄຟຟ້າເປັນເທື່ອທຳອິດໄດ້ ພາຍໃນທ້າຍປີ 2018.
