ສະພາຄວາມໝັ້ນຄົງແຫ່ງຊາດຂອງເກົາຫຼີໃຕ້ ຫຼື NSC ກ່າວໃນວັນຈັນມື້ນີ້ວ່າ ລັດຖະບານ ໂຊລ ຈະໂຈະຂໍ້ຕົກລົງວ່າດ້ວຍການຫລຸດຜ່ອນຄວາມເຄັ່ງຕຶງທາງທະຫານປີ 2018 ກັບເກົາຫລີເໜືອ ທີ່ມີອາວຸດນິວເຄລຍ ຢ່າງເຕັມຮູບແບບ ຫລັງຈາກພຽງຢາງໄດ້ສົ່ງບາລລູນທີ່ບັນຈຸຂີ້ເຫຍື້ອຫຼາຍຮ້ອຍລູກຂ້າມຊາຍແດນມາ, ອີງຕາມອົງການຂ່າວ AFP.
ໂຊລ ໄດ້ໂຈະຂໍ້ຕົກລົງສະບັບດັ່ງກ່າວເປັນບາງສ່ວນໃນປີກາຍນີ້ ຫຼັງຈາກທີ່ ເກົາຫຼີເໜືອ ໄດ້ສົ່ງດາວທຽມສອດແນມຂຶ້ນສູ່ວົງໂຄຈອນ, ແຕ່ NSC ກ່າວວ່າ ຕົນຈະແຈ້ງໃຫ້ຄະນະລັດຖະບານ “ໂຈະຜົນບັງຄັບທັງໝົດຂອງ 'ຂໍ້ຕົກລົງທາ ງການທະຫານວັນທີ 19 ກັນຍາ' ຈົນກວ່າຄວາມໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງ 2 ເກົາຫຼີ ຈະໄດ້ຮັບການຟື້ນຟູຄືນໃໝ່.”
ໃນອາທິດທີ່ຜ່ານມາ, ພຽງຢາງ ໄດ້ສົ່ງບາລລູນເກືອບ ນຶ່ງພັນລູກ ທີ່ບັນທຸກຂີ້ເຫຍື້ອ ລວມທັງກົ້ນຂອງຢາສູບ ແລະ ປຸ໋ຍມູນສັດ ເຂົ້າໄປໃນເກົາຫຼີໃຕ້, ໂດຍກ່າວວ່າເພື່ອເປັນການຕອບໂຕ້ ຕໍ່ຈົດໝາຍທາງການ ທີ່ນຳໄປສູ່ການໂຄສະນາເຜີຍແຜ່ເພື່ອຕໍ່ຕ້ານລະບອບການປົກຄອງຂອງຕົນ ທີ່ຈັດຕັ້ງໂດຍ ບັນດານັກເຄື່ອນໄຫວຢູ່ເກົາຫຼີໃຕ້.
ເກົາຫຼີໃຕ້ ໄດ້ເອີ້ນການເກາະຜິດຄັ້ງຫຼ້າສຸດຈາກປະເທດເພື່ອນບ້ານຂອງຕົນວ່າ “ບໍ່ມີເຫດຜົນ” ແລະ “ຕໍ່າ” ແຕ່ບໍ່ຄືກັນກັບການຍິງລູກສອນໄຟຂີປະນາວຸດຫຼາຍຄັ້ງທີ່ຜ່ານມາ, ການຖິ້ມຂີ້ ເຫຍື້ອ ບໍ່ໄດ້ລະເມີດມາດຕະການລົງໂທດຂອງອົງການສະຫະປະຊາຊາດ ທີ່ມີຕໍ່ລັດຖະບານທີ່ໂດດດ່ຽວຂອງທ່ານ ກິມ ຈອງ ອຶນ.
ເກົາຫຼີເໜືອ ໄດ້ຍົກເລີກການໂຈມຕີດ້ວຍບາລລູນ ໃນວັນອາທິດວານນີ້ ໂດຍກ່າວວ່າ ເປັນມາດຕະການຕອບໂຕ້ທີ່ມີປະສິດທິຜົນ ແຕ່ກ່າວເຕືອນວ່າ ອາດຈະເກີດຂຶ້ນອີກ ຖ້າຈຳເປັນ.
ຂໍ້ຕົກລົງການທະຫານ ປີ 2018 ທີ່ລົງນາມ ໃນລະຫວ່າງໄລຍະການພົວພັນທີ່ອົບອຸ່ນຂຶ້ນ ລະຫວ່າງສອງປະເທດທີ່ໃນທາງດ້ານວິຊາການແລ້ວແມ່ນຍັງຢູ່ໃນ ພາວະສົງຄາມຢູ່, ແມ່ນມີເປົ້າໝາຍເພື່ອແນໃສ່ການຫລຸດຜ່ອນຄວາມເຄັ່ງຕຶງຢູ່ແຫຼມເກົາຫຼີ ແລະ ຫຼີກລ້ຽງບໍ່ໃຫ້ເກີດຄວາມຮຸນແຮງຂຶ້ນໂດຍບໍ່ຕັ້ງໃຈ, ໂດຍສະເພາະແມ່ນຢູ່ຕາມຊາຍແດນທີ່ມີການປ້ອງກັນທີ່ໜ້າແໜ້ນ.
ຟໍຣັມສະແດງຄວາມຄິດເຫັນ