ລິ້ງ ສຳຫລັບເຂົ້າຫາ

logo-print

ລາຍງານປະຈໍາປີ 2019 ຂອງກະຊວງການຕ່າງປະເທດ ສຫລ ກ່ຽວກັບເສລີພາບ ໃນການນັບຖືສາສະໜາ ໃນລາວ


ບົດລາຍງານດ້ານເສລີພາບໃນການນັບຖືສາສະໜາປະຈໍາປີ 2020 ຂອງຄະນະກໍາມະການວ່າດ້ວຍເສລີພາບໃນການນັບຖືສາສະໜໜາສາກົນ ຂອງສະຫະລັດ

ກະຊວງການຕ່າງປະເທດສະຫະລັດເວົ້າຢູ່ໃນບົດລາຍງານດ້ານເສລີພາບ ໃນການນັບຖືສາສະໜາ ປີ 2019 ຂອງຕົນນັ້ນວ່າ ຢູ່ໃນລາວບ່ອນທີ່ຄົນສ່ວນໃຫຍ່ນັບຖືສາສະໜາພຸດນັ້ນ ມີລາຍງານມາຈາກພວກຜູ້ນໍາສາສະໜາກຸ່ມນ້ອຍ ເຊັ່ນ ສາສະໜາຄຣິສຕຽນວ່າ ການຈໍາກັດເສລີພາບໃນການນັບຖືສາສະໜາທີ່ບໍ່ເໝາະສົມຍັງມີຫລາຍຢູ່ ໂດຍສະເພາະໃນເຂດຊົນນະບົດ ທີ່ຢູ່ຫ່າງໄກສອກຫຼີກ ເນື່ອງຈາກພວກເຈົ້າໜ້າທີ່ທ້ອງຖິ່ນບາງຄົນ ຍັງບໍ່ມີຄວາມເຂົ້າໃຈກ່ຽວກັບເສລີພາບໃນການນັບຖືສາສະໜາ ດັ່ງລະບຸໄວ້ໃນລັດຖະທໍາມະນູນລາວ. ແຕ່ໃນຂະນະດຽວກັນ ອົງການບໍ່ຂຶ້ນກັບລັດຖະບານແຫ່ງນຶ່ງຂອງສະຫະລັດກໍເວົ້າວ່າ ສະພາບການກ່ຽວກັບເສລີພາບ ໃນການນັບຖືສາສະໜາໃນລາວໄດ້ຮັບການປັບປຸງໃຫ້ດີຂຶ້ນມາຕະຫລອດ ໃນໄລຍະ 17 ປີຜ່ານມານີ້ ຊຶ່ງບົວສະຫວັນ ຈະນໍາລາຍລະ ອຽດມາສະເໜີທ່ານ ໃນອັນດັບຕໍ່ໄປ.

ກະຊວງການຕ່າງປະເທດສະຫະລັດເວົ້າ ຢູ່ໃນບົດລາຍງານດ້ານເສລີພາບໃນການນັບຖືສາສະໜາ ປະຈໍາປີ 2019 ຂອງຕົນວ່າ ໃນປີ 2019 ລາວມີພົນລະເມືອງປະມານ 7 ລ້ານ 3 ແສນຄົນ. ໃນນັ້ນ ພວກທີ່ນັບຖືສາສະໜາກຸ່ມນ້ອຍ ກວາມເອົາພຽງແຕ່ 3 ເປີເຊັນກວ່າເທົ່ານັ້ນ. ສ່ວນທີ່ເຫລືອ ກໍຄື 64.7 ເປີເຊັນ ແມ່ນນັບຖືສາສະໜາພຸດນິກາຍຫິນະຍານ ໃນຂະນະທີ່ອີກ 31.4 ເປີ ເຊັນແມ່ນບໍ່ນັບຖືສາສະໜາໃດໝົດ. ອີງຕາມແນວໂຮມສ້າງຊາດທີ່ເປັນອົງການຂອງພັກປະຊາຊົນປະຕິວັດລາວ ຮັບຜິດຊອບຄຸ້ມຄອງທາງສາສະໜາຮ່ວມກັນກັບກະຊວງພາຍໃນແລ້ວ ລາຍງານສະບັບນີ້ບອກວ່າ ຢູ່ໃນສາສະໜາກຸ່ມນ້ອຍນັ້ນ ແມ່ນລວມມີສາສະໜາຄຣິສຕຽນ ຊຶ່ງກວາມເອົາ 1.7 ເປີເຊັນ ຂອງພົນລະເມືອງລາວ ແລະສາສະໜາອື່ນໆ ອີກ ເຊັ່ນສາສະໜາອິສລາມ, ບາຮາຍ, ສາສະໜາພຸດນີກາຍມະຫາຍານ, ການນັບຖືຜີ ແລະນັບຖືວິນຍານ ຂອງບັນພະບູລຸດ ລວມກັນກວາມເອົາບໍ່ຮອດ 3 ເປີເຊັນ ຂອງພົນລະເມືອງທັງໝົດຂອງປະເທດ.

ລາຍງານສະບັບດັ່ງກ່າວເວົ້າອີກວ່າ ມີລາຍງານຈາກບັນດາຜູ້ນໍາທາງສາສະໜາ ກຸ່ມນ້ອຍຢູ່ໃນລາວ ທີ່ບອກວ່າ ພວກເຈົ້າໜ້າທີ່ໃນເຂດເມືອງໃຫຍ່ ແລະໃນບາງ ຕົວເມືອງນ້ອຍ ສ່ວນຫລາຍແລ້ວ ມີຄວາມເຂົ້າໃຈກ່ຽວກັບລັດຖະທໍາມະນູນຂອງ ລາວ ທີ່ເວົ້າວ່າພົນລະເມືອງລາວ “ມີສິດ ແລະເສລີພາບທີ່ຈະນັບຖື ຫລືບໍ່ນັບຖື ສາສະໜາໃດກໍໄດ້” ແລະກົດໝາຍທີ່ກ່ຽວຂ້ອງກັນນັ້ນ ດີສົມຄວນ ແລະລັດຖະ ບານ ກໍໃຫ້ໄດ້ການຮັບຮູ້ຢ່າງເປັນທາງການວ່າ ຢູ່ລາວມີສາສະໜາຢູ່ 4 ສາສະ ໜາດ້ວຍກັນຄື: ສາສະໜາພຸດ, ຄຣິສຕຽນ, ອິສລາມແລະບາຮາຍ. ແຕ່ໂດຍອີງ ໃສ່ລາຍງານຂອງອົງການຂ່າວຕ່າໆ ລາຍງານຂອງກະຊວງການຕ່າງ ປະເທດສະຫະລັດສະບັບນີ້ເວົ້າວ່າ ຍັງສືບຕໍ່ມີ ລາຍງານເລື້ອຍໆວ່າ ມີການຈັບກຸມພວກນັບ ຖືສາສະໜາກຸ່ມນ້ອຍເປັນຕົ້ນແມ່ນພວກນັກຖືສາສະໜາຄຣິສຕຽນ ໂດຍສະເພາະ ແມ່ນຢູ່ໃນເຂດຫ່າງໄກສອງຫລີກ. ອີງຕາມການລາຍງານ ຂອງ ໜັງສືພິມ Asia News, ເອເຊຍເສຣີຫລື RFA ແລະແຫລ່ງຂ່າວໃນທ້ອງຖິ່ນ, ບົດລາຍງານປະຈໍາປີສະບັບນີ້ເວົ້າວ່າ ໃນເດືອນມີນາ 2018 ມີການຈັບກຸມສະມາຊິກຄົນນຶ່ງຂອງໂບດຄຣິສຕະຈັກຂ່າວປະເສີດ ຫຼື Lao Evangelical Church ຢູ່ໃນເມືອງພິນ, ແຂວງສະຫວັນນະເຂດໃນຂໍ້ກ່າວຫາວ່າ ຕັດກົກໄມ້ຕົ້ນນຶ່ງຢູ່ໃນປ່າປົກປ້ອງແຫ່ງນຶ່ງ. ແຕ່ວ່າຊາຍຄົນນັ້ນກັບເວົ້າວ່າ ຕົນຖືກຈັບກໍຍ້ອນວ່າ ເປັນຄົນນັບຖືສາສະໜາຄຣິສຕຽນ ແລະເວົ້າວ່າໃນໄລຍະທີ່ລາວ ຢູ່ໃນບ່ອນຄຸມຂັງ ນັ້ນ ຕໍາຫລວດໄດ້ທຸບຕີຫົວລາວ ຊຶ່ງເຮັດໃຫ້ລາວຫູໜວກໄປຊົ່ວໄລຍະນຶ່ງແລະ ເອົາໄຟຟ້າຊັອດລາວ ແລ້ວຈຶ່ງປ່ອຍລາວໃນ 7 ວັນຕໍ່ມາ.

ບົດລາຍງານສະບັບນີ້ເວົ້າອີກວ່າໃນເດືອນຕໍ່ມາກໍຄື ເດືອນເມສາ 2018 ພວກເຈົ້າໜ້າທີ່ໄດ້ກັກຂັງພົນລະເມືອງອາເມຣິກັນ 3 ຄົນເປັນເວລາ 10 ວັນຢູ່ແຂວງ ຫລວງນໍ້າທາຍ້ອນໄດ້ແຈກໜັງສືໂຄສະນາດ້ານສາສະໜາແລະເອກະສານອື່ນໆ ໂດຍບໍ່ໄດ້ຮັບອະນຸຍາດຈາກລັດຖະບານ. ເຈົ້າໜ້າທີ່ທ້ອງຖິ່ນໄດ້ເຕືອນປະຊາຊົນ ບໍ່ໃຫ້ປ່ຽນສະສະໜາໄປນັບຖືສາສະໜາຄຣິສຕຽນ ແລະຫ້າມຊາວຄຣິສຕຽນບໍ່ໃຫ້ ເຕົ້າໂຮມກັນ ເພື່ອທໍາພິທີທາງສາສະໜາ, ອີງຕາມຂ່າວສານຕ່າງໆ ທີ່ຜູ້ຂຽນບົດລາຍງານນີ້ໄດ້ຮັບ.

ໃນດ້ານກົດໝາຍນັ້ນ ດໍາລັດເລກທີ 184 ຂອງລັດຖະບານ ໄດ້ກໍານົດຫຼັກການ ແລະກົດລະບຽບໃນດ້ານຄຸນສົມບັດຂອງພະນັກງານລັດອອກມາ ຊຶ່ງມີຈຸດປະສົງສ່ວນນຶ່ງເພື່ອຮັບປະກັນວ່າ ເຈົ້າໜ້າທີ່ທ້ອງຖິ່ນອອກບັດປະຈໍາຕົວໃຫ້ຄົນທີ່ນັບຖືສາສະໜາຄຣິສຕຽນ ຢູ່ໃນເຂດຊົນນະບົດ ແຕ່ລາຍງານນີ້ເວົ້າວ່າ ອີງຕາມການບອກເລົ່າຂອງຜູ້ນໍາທາງສາສະໜາ ຢູ່ໃນແຂວງຫົວພັນນັ້ນ, ເຈົ້າໜ້າທີ່ຂັ້ນເມືອງບາງຄົນ ໄດ້ສັ່ງໃຫ້ຜູ້ນໍາໃນຂັ້ນບ້ານ ປະຕິເສດບໍ່ອະນຸມັດຄໍາຮ້ອງໃດໆ ທີ່ຂໍເຮັດ ບັດປະຈໍາຕົວ ຫລືເອກະສານອື່ນໆ ຈາກລັດຖະບານ ທີ່ໄດ້ລົງທະບຽນກັບຫ້ອງ ການລັດຖະບານທ້ອງຖິ່ນວ່າ ເປັນຄົນນັບຖືສາສະໜາຄຣິສຕຽນ.

ເມື່ອເວົ້າເຖິງການລົງທະບຽນໃນການດໍາເນີນພາລະກິດທາງສາສະໜານັ້ນເຈົ້າ ໜ້າທີ່ກະຊວງພາຍເວົ້າວ່າໃນເມື່ອກ່ອນ, ລັດຖະບານໄດ້ຊຸກຍູ້ໃຫ້ຄົນທີ່ນັບຖືສາສະໜາຄຣິສຕຽນໃນຫລາຍໆນິກາຍນັ້ນວ່າ ໃຫ້ລົງທະບຽນຢູ່ໃນນາມຂອງໂບດຄຣິສຕະຈັກຂ່າວປະເສີດ ຫລື Lao Evangelical Church ແຕ່ວ່າໄດ້ ມີນະໂຍບາຍໃໝ່ອອກມາ, ໃນເດືອນສິງຫາປີ 2018 ນັ້ນ ໂບດມື້ທີເຈັດຂອງ ພວກນັບຖືນິກາຍແອັດເວັນທິສ ຫລື Seventh-day Adventist Church ຊຶ່ງເປັນອົງການສາສະໜາຄຣິສຕຽນໃໝ່ໃນລາວກໍສາມາດລົງທະບຽນຂອງຕົນ ເອງຢ່າງເປັນອິດສະຫລະກັບລັດຖະບານໄດ້.

ອີກດ້ານນຶ່ງພວກຜູ້ນໍາທາງສາສະໜາຍັງສືບຕໍ່ເວົ້າວ່າ ດໍາລັດ 315 ທີ່ອອກມາ ໃນປີ 2016 ໄດ້ລະບຸເຈດຈໍານົງວ່າ ຈະເຮັດໃຫ້ກົດລະບຽບໃນການປະຕິບັດສາສະໜາກິດຈະແຈ້ງຂຶ້ນກວ່າເກົ່າ ແຕ່ວ່າ ລັດຖະບານ ຊຶ່ງເປັນຜູ້ມີສິດຕັດສິນຊີ້ຂາດໃນການອອກໃບອະນຸຍາດໃຫ້ປະຕິບັດສາສະໜາກິດນັ້ນ ແມ່ນມີຂໍ້ກໍານົດທີ່ເຮັດໃຫ້ເກີດຄວາມຫຍຸ້ງຍາກຂຶ້ນ ຊຶ່ງບາງຄັ້ງກໍໄດ້ນໍາໄປໃຊ້ ເປັນຂໍ້ຈໍາກັດ ໃນການເດີນທາງເພື່ອຈຸດປະສົງທາງສາສະໜາ.

ອີງຕາມບົດລາຍງານປະຈໍາປີ 2019 ນີ້ ບັນດາກຸ່ມຄຣິສຕຽນຍັງສືບຕໍ່ລາຍງານວ່າ ມີບັນຫາໃນການສ້າງໂບດຢູ່ໃນບາງຂົງເຂດ. ມີເຫດການຢູ່ໃນເຂດຊົນນະບົດບາງ ແຫ່ງທີ່ພວກເຈົ້າໜ້າທີ່ ໄດ້ລົບກວນພວກທີ່ນັບຖືສາສະໜາຄຣິສຕຽນ ທີ່ໄປເຕົ້າໂຮມກັນສູດມົນຢູ່ເຮືອນ ແລະໃນສະຖານທີ່ອື່ນໆ ທີ່ບໍ່ໄດ້ລົງທະບຽນວ່າ ອະນຸຍາດໃຫ້ເປັນບ່ອນຊຸມນຸມ ກັນທາງສາສະໜານັ້ນ. ບົດລາຍງານສະບັບນີ້ ຍັງສັງເກດອີກວ່າ ບັນດາສະມາຊິກຂອງສາສະໜາກຸ່ມນ້ອຍເວົ້າວ່າ ພວກເຂົາເຈົ້າຕ້ອງໄດ້ ປິດອໍາການນັບຖືສາສະໜາຂອງເຈົ້າເພື່ອຈະໄດ້ເຂົ້າເປັນສະມາຊິກພັກປະຊາຊົນປະຕິວັດລາວ, ເຂົ້າ ເຮັດການນໍາລັດຖະບານ ແລະເຂົ້າເປັນທະຫານ ແລະເພື່ອຈະຫລີກລ້ຽງການຖືກຈໍາແນກທາງສາສະໜາໄດ້ ໃນສະຖາບັນເຫລົ່ານີ້.

ແຕ່ຢ່າງໃດກໍຕາມ ໂດຍໄດ້ຮັບການອະນຸຍາດລ່ວງໜ້າ ແລະໂດຍບໍ່ໃຫ້ມີການຊັກຊວນໃຫ້ປ່ຽນສາສະໜາຢ່າງເປີດແປນ ເຈົ້າໜ້າທີ່ລັດຖະບານກໍອະນຸຍາດໃຫ້ຄົນລາວ ແລະ ຊາວຕ່າງຊາດທີ່ອາໄສໃນລາວຈັດງານສະແດງດົນຕີກາງແຈ້ງ ໃຫ້ຄົນທົ່ວໄປເບິ່ງ ໄດ້ສາມປີລຽນກັນມາແລ້ວ. ງານສະແດງດົນຕີ ເພັງສວດມົນໃນສາສະໜາຄຣິສຕຽນສາກົນໄດ້ຈັດຂຶ້ນໃນເດືອນພະຈິກ 2018 ຢູ່ສູນການ ຄ້າໄອເຕັກ (ITECC) ໂດຍມີນັກສິນລະປິນຈາກທັງຈາກພາຍໃນ ແລະຕ່າງປະເທດມາຮ່ວມສະແດງ.

ກ່ອນໜ້ານນັ້ນ ປະຊາຄົມນັບຖືສາສະໜາບາຮາຍ ໃນນະຄອນຫລວງວຽງຈັນກໍໄດ້ຈັດງານສະຫລອງວັນຄົບຮອບ 200 ປີຂອງພະເຈົ້າບັບ (Bab) ຊຶ່ງເປັນຜູ້ສໍາຄັນໃນການກໍ່ຕັ້ງສາສະໜາບາຮາຍ ໂດຍມີຜູ້ຕາງໜ້າຫລາຍຄົນຈາກກະຊວງ ພາຍໃນ ແລະຈາກສະພາແຫ່ງຊາດ ເຂົ້າຮ່ວມ. ແລະທ່ານ ບຸນທະວີ ພອນທະ ສິນ (Bounthavy Phonethasine), ຮອງຫົວໜ້າກົມສາສະໜາ ທີ່ແນວລາວສ້າງຊາດກໍໄດ້ໄປກ່າວຄໍາປາໄສຢຢູ່ໃນງານນັ້ນ ພ້ອມທັງເຂົ້າໄປຫາປະຊາຄົມ ບາຮາຍ ເພື່ອດໍາເນີນງານຮ່ວມກັນເພື່ອປັບປຸງເຮັດໃຫ້ “ປະຊາຄົມລາວດີຂຶ້ນກວ່າເກົ່າ.”

ສ່ວນສະຖານເອກອັກຄະລັດຖະທູດສະຫະລັດ ປະຈໍາລາວ ໃນເດືອນກັນຍາຂອງປີດຽວກັນນັ້ນ ກໍໄດ້ຈັດງານຄອນເສີດຫລາຍຄັ້ງເພື່ອໃຫ້ກຸ່ມວົງດົນຕີເພັງສວດມົນອາເມຣິກັນໃຫ້ຄົນລາວເບິ່ງ ຊຶ່ງເປັນການ “ແລກປ່ຽນດົນຕີລະຫວ່າງສາສະໜາ” ສູງສຸດຂອງປະເທດ.”

ໃນດ້ານການສ້າງນິຕິກໍາທີ່ກ່ຽວຂ້ອງກັບເສລີພາບ ແລະຄຸ້ມຄອງກິດຈະກໍາທາງສາສະໜານັ້ນ, ອີງຕາມອົງການສາສະໜາພຸດຕ່າງໆແລ້ວ, ບັນດາພຸດທະສາສະນິກະຊົນທີ່ມີຊື່ສຽງ ໄດ້ເຮັດວຽກຮ່ວມກັບລັດຖະບານໃນການຮ່າງນິຕິກໍາເພື່ອຮັບປະກັນວ່າ ກົດໝາຍຕ່າງໆ ສະທ້ອນໃຫ້ເຫັນເຖິງບົດບາດຂອງສາສະໜາພຸດ ຢູ່ໃນວັດທະນະທໍາລາວ. ແຕ່ຢ່າງໃດກໍຕາມສະພາແຫ່ງຊາດກໍໄດ້ຈັດການຝຶກອົບຮົມ 3 ມື້ ກ່ຽວກັບເສລີພາບໃນການນັບຖືສາສະໜາ ໃນເດືອນ ຕຸລາ 2018 ຊຶ່ງມີຜູ້ ຕາງໜ້າຂອງອົງການຈັດຕັ້ງທາງສາສະໜາຫລາຍແຫ່ງ ຕະຫຼອດທັງບັນດາເຈົ້າ ໜ້າທີ່ລັດຖະບານຂັ້ນສູນກາງ ແລະຂັ້ນແຂວງເຂົ້າຮ່ວມນໍາ. ພວກເຈົ້າໜ້າທີ່ຂັ້ນສູນກາງເວົ້າວ່າ ພວກເພິ່ນຍັງສືບຕໍ່ ເດີນທາງໄປຍັງເຂດແຂວງຕ່າງໆ ເພື່ອຝຶກອົບຮົມບັນດາເຈົ້າໜ້າທີ່ ໃນການຈັດຕັ້ງປະຕິບັດ ດໍາລັດເລກທີ 315 ແລະກົດ ໝາຍອື່ນໆທີ່ຄຸ້ມຄອງສາສະໜາຢ່າງຖືກຕ້ອງ.

ພ້ອມກັນນັ້ນ ເຈົ້າໜ້າທີ່ສະຖາບັນການພົວພັນກັນໃນໂລກ ຫຼື Global Enga-gement (IGE) ຊຶ່ງເປັນອົງການບໍ່ຂຶ້ນກັບລັດຖະບານ ທີ່ຕັ້ງຢູ່ໃນສະຫະລັດກໍໃຫ້ຄໍາເຫັນວ່າ ສະພາບການເສລີພາບໃນການນັບຖືສາສະໜາຢູ່ລາວ ແມ່ນໄດ້ ຮັບການປັງປຸງໃຫ້ດີຂຶ້ນເລື້ອຍໆ ໃນຕະຫລອດ 17 ປີຜ່ານມານີ້ເມື່ອທຽບໃສ່ຕອນທໍາອິດທີ່ທ່ານໄດ້ໄປຢ້ຽມຢາມລາວ. ທ່ານເວົ້າວ່າ ກະຊວງພາຍໃນໄດ້ມີບົດບາດອັນຫຼໍ່ແຫຼມສໍາຄັນ ໃນການສົ່ງເສີມເສລີພາບໃນການນັບຖືສາສະໜາໃນປີນັ້ນ ແລະແນວຄວາມຄິດ ແລະຄວາມເຂົ້າໃຈກ່ຽວກັບເສລີພາບ ໃນການນັບຖືສາສະໜາ ໃນບັນດາເຈົ້າໜ້າທີ່ຂັ້ນສູນກາງນັ້ນແມ່ນດີສົມຄວນ ແຕ່ໃນຂະນະດຽວກັນ ກໍມີຫລາຍຄົນຢູ່ໃນລັດຖະບານທີ່ຍັງເຊື່ອວ່າ ສາສະໜາພຸດຄວນເປັນສາສະໜາດຽວເທົ່ານັ້ນໃນປະເທດ ແລະເຈົ້າໜ້າທີ່ໃນລະດັບທ້ອງຖິ່ນບາງຄົນ ກໍຍັງບໍ່ເຂົ້າໃຈຍັງບໍ່ທັນເຂົ້າໃຈກັນຢ່າງກວ້າງຂວາງ ກ່ຽວກັບເສລີພາບໃນການນັບຖືສາສະໜາໃນລາວ.

ທີ່ທ່ານໄດ້ຮັບຟັງຜ່ານໄປນັ້ນ ແມ່ນລາຍງານປະຈຳປີຂອງກະຊວງການຕ່ງປະເທດສະຫະລັດ ກ່ຽວກັບເສລີພາບໃນການນັບຖືສາສະໜາ ຢູ່ໃນປະເທດລາວ.

ອ່ານກ່ຽວກັບລາຍງານນີ້ເພີ້ມເປັນພາສາອັງກິດຈາກະຊວງການຕ່າງປະເທດສະຫະລັດ

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG