ປະຊາຊົນໃນແຂວງ ວຽງຈັນ ໄດ້ສົ່ງມອບທີ່ດິນທີ່ຖືກເວນຄືນໃຫ້ກຸ່ມບໍລິສັດ ຈີນ ທີ່ລົງທຶນກໍ່ສ້າງທາງລົດໄຟ ລາວ-ຈີນ ແລະ ທາງດ່ວນນະຄອນຫຼວງວຽງຈັນ-ວັງວຽງ ເກືອບຈະຄົບຖ້ວນແລ້ວ.
ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ຢືນຢັນວ່າການກໍ່ສ້າງທາງລົດໄຟ ລາວ-ຈີນ ທີ່ຜ່ານແຂວງວຽງຈັນ ຄິດເປັນໄລຍະທາງ 145 ກິໂລແມັດ ແລະ ການກໍ່ສ້າງທາງດ່ວນເຊື່ອມຕໍ່ນະຄອນຫຼວງ ວຽງຈັນ-ວັງວຽງ ທີ່ມີໄລຍະທາງຍາວເຖິງ 109 ກິໂລແມັດໃນພື້ນທີ່ແຂວງວຽງຈັນ ນັ້ນໄດ້ດຳເນີນໄປຢ່າງຕັ້ງໜ້າ ແລະ ເປັນໄປຕາມແຜນການທີ່ວາງໄວ້ໃນທຸກໆດ້ານ ທັງນີ້ກໍເນື່ອງຈາກວ່າໄດ້ຮັບການຮ່ວມມືຈາກປະຊາຊົນໃນແຂວງເປັນຢ່າງດີ ຊຶ່ງລວມເຖິງການທີ່ປະຊາຊົນໄດ້ສົ່ງມອບທີ່ດິນທີ່ຖືກເວນຄືນໃຫ້ກັບທຸກກຸ່ມບໍລິສັດ ຈີນ ທີ່ລົງທຶນໃນທັງ 2 ໂຄງການດັ່ງກ່າວນີ້ເກືອບຈະຄົບທັງໝົດແລ້ວ ໂດຍຍັງເຫຼືອບໍ່ເຖິງ 1 ເປີເຊັນທີ່ກຳລັງເຈລະຈາເພື່ອຕົກລົງ ກ່ຽວກັບ ການຊົດເຊີຍໃນຂັ້ນສຸດທ້າຍເທົ່ານັ້ນ ດັ່ງທີ່ທ່ານ ຄຳພັນ ໄດ້ຢືນຢັນວ່າ:
"ໂດຍພື້ນຖານແລ້ວທາງດ່ວນ ທາງລົດໄຟນີ້ຖືວ່າເຂົາເຈົ້າກະໄດ້ມອບພື້ນທີ່ໝົດແລ້ວ ຖືວ່າການກໍ່ສ້າງປູກສ້າງຕ່າງໆກະໄດ້ເລີ່ມແລ້ວ ກະຍັງມີບາງຈຸດບາງບ່ອນທີ່ວ່າຍັງເລັກໆນ້ອຍ ແຕ່ວ່າສຳຄັນອັນນຶ່ງລະແມ່ນການຊົດເຊີນຫັ້ນ ພວກເຮົາກະໄດ້ມີການໄກ່ເກ່ຍ ໄດ້ມີການແກ້ໄຂ ມີບາງອັນກະແມ່ນທາງເມືອງເຮັດມີບາງກໍລະນີກໍແມ່ນແຂວງ ມີບາງອັນທີ່ມັນພົວພັນກັບສູນກາງ, ພວກເຮົາກະສະເໜີທາງສູນກາງ ທາງລັດຖະບານກະໄດ້ມີການຍົກຍ້ອງຊົມເຊີຍ."
ທາງດ້ານເຈົ້າໜ້າທີ່ກະຊວງແຜນການ ແລະ ການລົງທຶນເປີດເຜີຍວ່າ ປະຊາຊົນ ລາວ ບໍ່ພໍໃຈການຊົດເຊີຍຄ່າທົດແທນທີ່ໄດ້ຮັບຈາກບັນດານັກທຸລະກິດ ຈີນ ທີ່ລົງທຶນພັດທະນາໂຄງການຕ່າງໆໃນ ລາວ ເພີ່ມຂຶ້ນນັບມື້ ເນື່ອງຈາກວ່າທຸກໂຄງການລົງທຶນຂອງບັນດານັກທຸລະກິດ ຈີນ ໃນ ລາວ ນັ້ນໄດ້ຈ່າຍເງິນຄ່າທົດແທນທີ່ດິນ ແລະ ສິ່ງປູກສ້າງຕ່າງໆຂອງປະຊາຊົນທີ່ຖືກເວນຄືນໃນອັດຕາທີ່ຕ່ຳກວ່າສະພາບທີ່ເປັນຈິງ ໂດຍເຫັນໄດ້ຢ່າງຊັດເຈນຈາກໂຄງການກໍ່ສ້າງທາງລົດໄຟ ລາວ-ຈີນ ໂຄງການທາງດ່ວນວຽງຈັນ-ວັງວຽງ ແລະ ເຂດພັດທະນາເສດຖະກິດກວມລວມ ໄຊເສດຖາ ໃນເຂດນະຄອນຫຼວງວຽງຈັນ ທັງປາກົດວ່າພະນັກງານລັດໄດ້ໃຊ້ອຳນາດ-ໜ້າທີ່ບັງຄັບປະຊາຊົນໃຫ້ຕ້ອງຍອມຮັບການຊົດເຊີຍດັ່ງກ່າວອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງຂອງ ລາວ ໃຫ້ການຢືນຢັນວ່າ:
"ຍ້ອນວ່າທົດແທນຖືກທົດແທນນ້ອຍ ມັນກໍກະທົບຕົວຢ່າງວ່າໂຄງການໃຫຍ່ໆ ຊຶ່ງປັດຈຸບັນພວກຮເກຳລັງດຳເນີນການປະຕິບັດໂຄງການທາງລົດໄຟ ຫຼືວ່າໂຄງການທາງດ່ວນວຽງຈັນ ວັງວຽງ ຫຼືວ່າໂຄງການໄຊເສດຖາກວມລວມບໍ່ຫຼືວ່າອື່ນໆ ຖືວ່າເປັນການຊົດເຊີຍທີ່ຕ່ຳຫຼາຍ ທຽບໃສ່ກັບຄ່າຄອງຊີບ ທຽບໃສ່ກັບທ່າອຽງຂອງການຂະຫຍາຍຕົວເສດຖະກິດ ອັນທີສອງມາແມ່ນເຈົ້າພະນັກງານທີ່ລົງໄປປະຕິບັດໜ້າທີ່ກະບໍ່ສຸພາບ ແລ້ວກະບໍ່ອະທິບາຍຊີ້ແຈງໃຫ້ເຂົ້າອົກ-ເຂົ້າໃຈ ສ່ວນຫຼາຍສິມັກຊີ້ອາຍາສິດ ມັນກະເຮັດໃຫ້ເກີດຂໍ້ຂັດແຍ້ງ."
ທັງນີ້ການຊົດເຊີຍຄ່າທີ່ດິນ ແລະ ສິ່ງປູກສ້າງຕ່າງໆທີ່ຖືກເວນຄືນໃນການກໍ່ສ້າງທາງລົດໄຟ ລາວ-ຈີນ ຈະຕ້ອງໃຊ້ເງິນທັງໝົດ 2,492 ຕື້ກີບຫາກແຕ່ວ່າໃນໄລຍະຜ່ານມາ ກໍສາມາດຈ່າຍເງິນຊົດເຊີຍໃຫ້ປະຊາຊົນ ລາວ ໄດ້ພຽງ 369 ຕື້ກີບ ຫຼື 20.4 ເປີເຊັນຂອງຄ່າຊົດເຊີຍທັງໝົດເທົ່ານັ້ນ.
ສ່ວນໂຄງການທາງດ່ວນນະຄອນຫຼວງວຽງຈັນ-ວັງວຽງນັ້ນລັດຖະບານ ລາວ ໄດ້ອະນຸມັດໃຫ້ສຳປະທານແກ່ບໍລິສັດ ຢຸນໜານ ວິສະວະກຳ ແລະ ກໍ່ສ້າງ ນັບແຕ່ປີ 2018 ເປັນຕົ້ນມາ ໂດຍມີໄລຍະທາງຍາວ 113.5 ກິໂລແມັດ ກວ້າງ 23 ແມັດ ມີ 4 ຊ່ອງທາງຈະລາຈອນທີ່ຂະໜານກັບຖະນົນເລກ 13 ເໜືອຕັ້ງຕົ້ນຈາກແຍກ ສີເກີດ ເມືອງນາຊາຍທອງ ຜ່ານໄປເມືອງໂພນໂຮງ-ຫີນເຫີບ-ບ້ານທ່າເຮືອ ແລະ ວັງວຽງ ໃຊ້ເງິນທຶນກໍ່ສ້າງ 1,300 ລ້ານໂດລາ ໂດຍບໍລິສັດ ຈີນ ຈະເກັບເອົາຜົນປະໂຫຍດຈາກຄ່າທຳນຽມທາງເປັນເວລາ 30 ປີ ເລີ່ມແຕ່ປີ 2021 ເປັນຕົ້ນໄປ ແລ້ວຈຶ່ງຈະໂອນໃຫ້ກັບລັດຖະບານ ລາວ ໃນປີ 2051.
ນອກຈາກນີ້ ບໍລິສັດ ຈີນ ຍັງໄດ້ຮັບການຍົກເວັ້ນພາສີການນຳເຂົ້ານ້ຳມັນເພື່ອຕອບສະໜອງໃຫ້ໂຄງການອີກດ້ວຍ ເພາະລັດຖະບານ ລາວ ເຫັນວ່າເປັນໂຄງການທີ່ຈະສ້າງຜົນປະໂຫຍດທາງເສດຖະກິດໃຫ້ກັບ ລາວ ໄດ້ຢ່າງຫຼວງຫຼາຍໃນໄລຍະຍາວນັ້ນເອງ.
