ລິ້ງ ສຳຫລັບເຂົ້າຫາ

ວັນອາທິດ, 27 ພະຈິກ 2022

ການດໍາເນີນທຸລະກິດ ກ່ຽວກັບການຈັດສັນທີ່ດິນ


ພາບປະກອບ-ເຮືອນຈັດສັນ ຢູ່​ເຂດ​ຈັນ​ສັນ​ໃຫ້​ແກ່​ພວກ​ໄດ້​ຮັບ​ເຄາະ​ຮ້າຍ​ຈາ​ກ​ເຫດ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ​ໃນ ປີ 2018

ຢູ່ໃນຕົວເມືອງໃຫຍ່ ຫຼືໂຕເມືອງທີ່ກໍາລັງມີການຂະຫຍາຍ ຄວາມຕ້ອງ ການດິນ ເພື່ອການປຸກສ້າງແມ່ນມີຫຼາຍຂຶ້ນ, ແຕ່ການຊື້ທີ່ດິນ ອາດຈະພົບກັບຄວາມຫຍຸ້ງຍາກ ເມື່ອຜູ້ຂາຍຕ້ອງການຂາຍດິນໝົດຕອນ ຜູ້ຊື້ຊໍ້າພັດບໍ່ມີຄວາມສາມາດພຽງພໍ, ດັ່ງນັ້ນ ທຸລະກິດໃນການຈັດສັນທີ່ດິນ ຈຶ່ງເປັນທາງເລືອກນຶ່ງຂອງຄົນທົ່ວໄປ, ທິບສຸດາ ມີລາຍລະອຽດກ່ຽວກັບການດໍາເນີນທຸລະກິດຈັດສັນ ທີ່ດິນຢູ່ບໍລິເວນຊານເມືອງນະຄອນຫຼວງວຽງຈັນ ມາສະເໜີທ່ານ ໃນອັນດັບຕໍ່ໄປ.

ເນື່ອງຈາກການຂະຫຍາຍໂຕຂອງໂຕເມືອງແລະການເພີ້ມຂຶ້ນຂອງພົນລະເມືອງ ຢູ່ໃນໂຕເມືອງ ໂດຍສະເພາະນະຄອນຫຼວງວຽງຈັນ, ດັ່ງນັ້ນ ຈຶ່ງເຮັດໃຫ້ຄວາມຕ້ອງການທີ່ດິນຂອງປະຊາຊົນ ທີ່ຢາກອາໄສຢູ່ໃກ້ໂຕເມືອງ ເພີ້ມຂຶ້ນເຊັ່ນກັນ.

ນັກທຸລະກິດລາວ ທີ່ອາໄສຢູ່ໃນນະຄອນຫຼວງວຽງຈັນທ່ານນຶ່ງ ເພິ່ນເຫັນໄດ້ເຖິງຄວາມຕ້ອງການດັ່ງກ່າວ ຈຶ່ງໄດ້ຕັ້ງບໍລິສັດອະສັງຫາລິມະຊັບຂຶ້ນມາໄດ້ 7 ປີແລ້ວ, ໂດຍບໍລິສັດຂອງເພິ່ນ ແມ່ນການຈັດສັນທີ່ດິນຂາຍໃຫ້ແກ່ກຸ່ມລູກຄ້າເປົ້າໝາຍທີ່ມີເງື່ອນໄຂໜ້ອຍ.

ເພິ່ນເລົ່າສູ່ຟັງວ່າ ລັກສະນະການຈັດສັນທີ່ດິນຂອງບໍລິສັດເພິ່ນ ແມ່ນການຊອກຫາເນື້ອທີ່ດິນທີ່ຢູ່ບໍລິເວນຊານເມືອງນະຄອນຫຼວງວຽງຈັນ ແລະບໍ່ໄກຈາກໂຕເມືອງຫຼາຍ ອາດຈະມີໄລຍະທາງເຂົ້າມາຫາໂຕເມືອງປະມານ 15 ກິໂລແມັດ ຫຼືຢ່າງໜ້ອຍ 20 ນາທີ, ເຊິ່ງເພິ່ນເລົ່າສູ່ຟັງກ່ຽວກັບຂັ້ນຕອນໃນການໂອນກໍາມະສິດດິນຈາກຊາວບ້ານໃຫ້ຟັງວ່າ:

“ສ່ວນຫຼາຍຊື້ດິນແນວນີ້ຫັ້ນ ກໍຂຶ້ນກັບແຕ່ຂັ້ນບ້ານກັບເມືອງ, ບໍ່ເຖິງຂັ້ນແຂວງ ແຕ່ຫຼັກໆນັ້ນສ່ວນຫຼາຍກໍແມ່ນຂັ້ນບ້ານ ເວລາເຮົາໄປເບິ່ງດິນ ຊອກດິນ ກໍແມ່ນໄປເບິ່ງກັບປະຊາຊົນ-ບ້ານ, ເວລາເຮົາເຫັນດິນຕອນໃນຕອນນຶ່ງທີ່ເຮົາເບິ່ງ ເຮົາເຫັນເຈົ້າຂອງມັນແລ້ວ ເຮົາກໍໄປພັວພັນກັບບ້ານ ສອບຖາມທີ່ໄປທີ່ມາຂອງດິນຢູ່ຈຸດນີ້ແມ່ນຂອງຜູ້ນີ້ແທ້ບໍ ເພາະວ່າບ້ານກໍຊິເກັບກໍາໄດ້ເດເນາະ ດິນໃຜດິນໃຜ ຢູ່ຈຸດໃດບ່ອນໃດ.”

ດິນແຕ່ລະໂຄງການ ແມ່ນພົວພັນຊື້ຂາຍກັບຊາວບ້ານ, ໂດຍຜ່ານການປະກອບບັນທຶກເອກະສານຊ້ອງໜ້າກັນລະຫວ່າງຜູ້ຊື້ ແລະຜູ້ຂາຍ ຢູ່ທີ່ຫ້ອງການບ້ານ ເຊິ່ງທາງຜູ້ປະກອບການ ໄດ້ມອບຄ່າໝັດຈໍາ ໃຫ້ແກ່ຜູ້ຂາຍກ່ອນ 30 ເປີເຊັນຂອງຈໍານວນມູນຄ່າທີ່ດິນ, ເມື່ອເອກະສານທຸກຢ່າງສົມບູນ ຜູ້ປະກອບການຈຶ່ງໄດ້ໂອນສ່ວນທີ່ເຫຼືອໃຫ້ຜູ້ຂາຍ ໃນມື້ມອບຮັບກໍາມະສິດທີ່ດິນ.

ຢ່າງໃດກໍໍຕາມ, ເພື່ອເຮັດໃຫ້ບໍລິສັດດໍາເນີນໄປຢ່າງຖືກຕ້ອງ ກ່ອນອື່ນຕ້ອງເປີດບໍລິສັດໃຫ້ຖືກຕ້ອງຕາມກົດໝາຍ ໂດຍຂໍໃບທະບຽນທຸລະກິດຜ່ານກະຊວງການຄ້າ ຫຼືທີ່ເອີ້ນວ່າ ໃບປະຕັງ ເຊິ່ງເພິ່ນໄດ້ໃຊ້ຫຼັກຄໍ້າປະກັນໃນເບື້ອງຕົ້ນເວລາຈົດທະບຽນດ້ວຍທຶນ 200,000 ໂດລາ.

ເພິ່ນເລົ່າສູ່ຟັງອີກວ່າ ດິນແຕ່ລະຕອນ ເພິ່ນຈະແບ່ງຂາຍເປັນຫຼາຍຕອນທີ່ມີຂະໜາດ 20 ຄູນ 20 ແມັດ, ເຊິ່ງລູກຄ້າຂອງເພິ່ນສ່ວນຫຼາຍ ແມ່ນມັກຈະຊື້ດິນເປັນຕອນດຽວ.

ໃນການຈັດສັນທີ່ດິນຂາຍ, ເພິ່ນຈະກວດທີ່ດິນໃຫ້ພຽງ, ເປັນລະບຽບ, ສ້າງສິ່ງ ອໍານວຍຄວາມສະດວກດ້ວຍການສ້າງຈັດຖະໜົນຫົນທາງເຂົ້າໄປ, ມີໄຟຟ້າເຂົ້າເຖິງ, ມີນໍ້າເຂົ້າເຖິງ, ນະຈຸດນີ້ ເພິ່ນຈະບວກມູນຄ່າລົງທຶນຕື່ມໃສ່ 10 ເປີເຊັນ ຂອງມູນຄ່າທີ່ດິນ, ໂດຍເພິ່ນເລົ່າລາຍລະອຽດສູ່ຟັງວ່າ:

“ມັນຊິເພີ້ນຂຶ້ນປະມານ 20-25 ເປີເຊັນ, ຄືສົມມຸດວ່າ ໄຮ່ນຶ່ງເຮົາຊິໄດ້ຢູ່ 4 ຕອນ ແຕ່ລະຕອນມີເນື້ອທີ່ 400 ກາເລ, ມັນຕົກເປັນຕົນທຶນ ສົມມຸດວ່າເຮົາຊື້ແມັດກາເລນຶ່ງ ບວກຄ່າແລ່ນໄຟ ບວກຄ່າຈົ່ງທາງ ແລ່ນນໍ້າ ເຮັດໃບຕາດິນເຂົ້າໄປ ມັນກໍຊິຕົກຢູ່ປະມານ 10 ເປີເຊັນຕໍ່ຕອນ, ເວລາເຮົາເອົາມາຂາຍ ເຮົາກໍຍົກຂຶ້ນເປັນ 30-35 ເປີເຊັນຈາກຕົ້ນທຶນເດີມ.”

ເພິ່ນເລົ່າສູ່ຟັງວ່າ ລາຄາໃນການຂາຍ ແມ່ນບວກໃສ່ຕື່ມອີກປະມານ 20-30 ເປີເຊັນ, ໂດຍລູກຄ້າຈະມີໜັງສືສັນຍາຊື້ຂາຍ ກັບຜູ້ປະກອບການຢູ່ຂັ້ນບ້ານ, ຈ່າຍກ່ອນ 30 ເປີເຊັນຂອງມູນທີ່ດິນທີ່ລູກຄ້າຊື້ ໃນສັນຍາທີ່ຕົກລົງກັນ 2 ປີ ແບບບໍ່ມີດອກເບ້ຍ. ຖ້າກາຍເວລານັ້ນ ລູກຄ້າມີເວລາອີກ 6 ເດືອນໃນການຊໍາລະ ແຕ່ຈະຕ້ອງໄດ້ຈ່າຍເພີ້ມອີກ 5 ເປີເຊັນຂອງມູນຄ່າທີ່ຍັງເຫຼືອ, ແຕ່ ຖ້າລູກຄ້າຕ້ອງການເວລາຕື່ມ ທາງບໍລິສັດກໍເພີ້ມເວລາໃຫ້ໄດ້ອີກ 6 ເດືອນ ໂດຍເສຍຄ່າຊໍາລະຕື່ມພ້ອມດ້ວຍດອກເບ້ຍອີກ 10 ເປີເຊັນ. ຢ່າງໃດກໍດີ, ເພິ່ນກ່າວວ່າ ລູກຄ້າທັງໝົດຂອງເພິ່ນໃນແຕ່ລະໂຄງການ ລະຫວ່າງ 300-500 ຄົນ ແມ່ນເສຍຄ່າຊໍາລະພາຍໃນ 2 ປີ. ສະນັ້ນ ລາຍໄດ້ສະເລ່ຍໃນແຕ່ລະມື້ຂອງເພິ່ນມີຢ່າງໜ້ອຍ 5,000,000 ກີບ.

ເຈົ້າຂອງບໍລິສັດດັ່ງກ່າວຍັງບອກອີກວ່າ, ແຕ່ລະປີ ເພິ່ນຈະເສຍຄ່າອາກອນກໍາໄລຢູ່ 10 ເປີເຊັນ. ເນື່ອງຈາກໃນແຕ່ລະປີ ລາຍຮັບແມ່ນຫຼາຍໜ້ອຍແຕກຕ່າງກັນ ດັ່ງນັ້ນ ເພິ່ນຈຶ່ງສະຫຼຸບໃຫ້ຟັງໂດຍສະເລ່ຍວ່າ ຫຼັງຈາກຕັດທຸກໆຢ່າງອອກໝົດ ພ້ອມທັງພາສີ ເພິ່ນມີລາຍຮັບມາໃຫ້ຄອບຄົວ ຢູ່ປະມານ 200,000 ໂດລາ.

ເພິ່ນກ່າວຕື່ມວ່າ ການດໍາເນີນທຸລະກິດກ່ຽວກັບການຈັດສັນທີ່ດິນ ແມ່ນສະດວກ ແລະງ່າຍຫຼາຍ ເພາະວ່າບໍ່ຈໍາເປັນຕ້ອງມີເອກະສານຫຼາຍ ບໍ່ໄດ້ຜ່ານຫຼາຍຂັ້ນຕອນ, ແຕ່ມີລາຍຮັບຫຼາຍກວ່າ ແລະຜົນຕອບແທນທີ່ສູງກວ່າ

ທ່ານອາດຈະມັກເລື້ອງນີ້ຄືກັນ

XS
SM
MD
LG