ເມື່ອວັນອັງຄານຜ່ານມານີ້ ປະທານາທິບໍດີ ໂອບາມາ ໄດ້ພົບປະ
ກັບເຈົ້າໜ້າທີ່ຈາກຫຼາຍກະຊວງທະບວງກົມຂອງລັດຖະບານ ເພື່ອ
ຊອກຫາຊ່ອງທາງຊ່ວຍເຫຼືອ ບັນດາຜູ້ຜະລິດອາຫານໃນສະຫະລັດ
ທີ່ຖືກກະທົບໂດຍສະພາວະແຫ້ງແລ້ງ ທີ່ທ່ານບັນລະຍາຍວ່າ ຮ້າຍ
ແຮງຄັ້ງປະວັດສາດແລະ ສ້າງຄວາມຫາຍະນະນັ້ນ.
ນຶ່ງໃນຫຼາຍບາດກ້າວສໍາຄັນ ທີ່ທ່ານໂອບາມາກໍາລັງປະຕິບັດນັ້ນ
ກໍຄື ສັ່ງໃຫ້ກະຊວງກະເສດໃຊ້ຈ່າຍເງິນ 30 ລ້ານໂດລາ ເພື່ອສະ
ໜອງນໍ້າເພີ່ມຕື່ມແກ່ພາກສ່ວນປະສຸສັດ ແລະກູ້ເອົາດິນປູກຝັງ
ທີ່ຖືກກະທົບໂດຍໄພແຫ້ງແລ້ງນັ້ນ ຄືນມາ. ນອກນີ້ແລ້ວ ທ່ານ
ໂອບາມາຍັງໄດ້ສະໜອງເງິນກູ້ຢືມສຸກເສີນດອກເບ້ຍຕໍ່າເພີ່ມອີກ
ແກ່ບັນດາເຈົ້າຂອງຟາມປູກຝັງ ແລະຟາມປະສຸສັດທັງຫລາຍ
ແລະເງິນກູ້ຢືມເພີ່ມຕື່ມໃຫ້ແກ່ບັນດາທຸລະກິດລາຍນ້ອຍໆ ທີ່ກ່ຽວຂ້ອງພົວພັນກັບພາກສ່ວນກະເສດນັ້ນນໍາ. ພ້ອມກັນນີ້ ທ່ານໂອບາມາຍັງມີຄໍາສັ່ງໃຫ້ຈັດຕັ້ງໂຄງການນຶ່ງຂຶ້ນມາ ເພື່ອຊ່ວຍເຫຼືອຜູ້ຂັບລົດບັນທຸກສິນຄ້າ ໃຫ້ນໍາສົ່ງສະບຽງຕ່າງໆໄປຍັງຂົງເຂດທີ່ໄດ້ຮັບຄວາມເດືອດຮ້ອນນັ້ນ.
ປະທານາທິບໍດີກ່າວອີກວ່າ ການເອົາບາດກ້າວເພີ່ມຕື່ມອີກໃນເລຶ່ອງນີ້ ມີທາງເປັນໄປໄດ້.
ທ່ານໂອບາມາກ່າວວ່າ: “ພວກເຮົາຈະສືບຕໍ່ ຮ້ອງຂໍຄວາມຄິດຄວາມເຫັນຈາກໜ່ວຍງານ ອົງການລະດັບລັດແລະລະດັບທ້ອງຖິ່ນຕ່າງໆ ຈາກບັນດາອົງການສາສະໜາ ຈາກບັນດາກຸ່ມຈັດຕັ້ງທີ່ຫວັງຜົນກໍາໄລ ຈາກພາກສ່ວນເອກະຊົນ ແລະສໍາຄັນທີ່ສຸດນັ້ນ ກໍຄືຈາກບັນດາຊາວໄຮ່ຊາວສວນ ແລະເຈົ້າຂອງຟາມປະສຸສັດທັງຫຼາຍທີ່ຖືກກະທົບໂດຍກົງ ເພື່ອຊອກຫາຊ່ອງທາງເພີ່ມຕື່ມທີ່ພວກເຮົາສາມາດຊ່ວຍໄດ້ ເພາະເນື່ອງຈາກວ່າ ເວລາ
ໃດທີ່ມີໄພພິບັດແບບນີ້ເກີດຂຶ້ນແລ້ວ ທຸກໆຄົນກໍຈໍາເປັນທີ່ຈະຕ້ອງຮ່ວມແຮງຮ່ວມໃຈ
ກັນແກ້ໄຂ.”
ທ່ານໂອບາມາກ່າວຕື່ມວ່າ ທ່ານໄດ້ປະກາດໃຫ້ ຫຼາຍພາກສ່ວນຂອງ 32 ລັດ ເປັນເຂດປະສົບໄພພິບັດ.
ນອກນີ້ແລ້ວ ປະທານາທິບໍດີໂອບາມາ ຍັງໄດ້ຮຽກຮ້ອງຕໍ່ສະພາຄອງແກຣສ ໃຫ້ຮັບຜ່ານຮ່າງກົດໝາຍຊ່ວຍເຫຼືອກະເສດຕະກອນຮອບດ້ານ ໃນມູນຄ່າ 500 ພັນລ້ານໂດລາ ເປັນເວລາ 5 ປີ ທີ່ສະພາສູງໄດ້ຮັບຜ່ານໄປແລ້ວ ແຕ່ຍັງຄ້າງຄາຢູ່ໃນສະພາຕໍ່ານັ້ນ.
ທ່ານໂອບາມາກ່າວວ່າ: “ສະພາຄອງແກຣສຈະຕ້ອງຮັບຜ່ານຮ່າງກົດໝາຍ ຊ່ວຍເຫຼືອຟາມ ທີ່ບໍ່ແມ່ນສະເພາະແຕ່ຈະສະໜອງຈໍາພວກອຸບປະກອນບັນເທົາໄພພິບັດທີ່ສໍາຄັນຢ່າງດຽວເທົ່ານັ້ນ ແຕ່ຍັງບັງຄັບໃຫ້ທໍາການປະຕິຮູບ ທີ່ຈໍາເປັນ ແລະມອບຄວາມໝັ້ນຄົງແນ່ນອນໃຫ້ພວກເຂົາເຈົ້າ ທີ່ພວກເຂົາເຈົ້າສົມຄວນຈະໄດ້ຮັບນັ້ນ.”
ບັນດາເຈົ້າໜ້າທີ່ກ່າວວ່າ ຄັ້ງນີ້ນັບວ່າເປັນໄພແຫ້ງແລ້ງທີ່ຮ້າຍແຮງທີ່ສຸດຂອງອາເມຣິກາໃນຮອບຫຼາຍສິບປີ.
ທ່ານ Chris Hurt ນັກເສດຖະສາດການກະເສດ ປະຈໍາມະຫາວິທະຍາໄລ Purdue ທີ່ລັດ
ອິນເດຍນາ ກ່າວວ່າ ທົ່ງເຂົ້າສາລີທີ່ເຫືອດແຫ້ງໃນເຂດພາກ ກາງຂ້ອນໄປທາງພາກຕາເວັນຕົກຂອງສະຫະລັດ ຫລື Midwest ນັ້ນ ປີນີ້ແມ່ນໄດ້ຮັບຜົນເສຍຫາຍຢ່າງໜັກປີນຶ່ງ ໃນຫຼາຍປີທີ່ຮ້າຍແຮງທີ່ສຸດ ນັບຕັ້ງແຕ່ພາຍຸຝຸ່ນ ຫຼື Dust Bowl ທີ່ເກີດຂຶ້ນໃນຊ່ວງເສດຖະກິດຕົກຕໍ່າຄັ້ງໃຫຍ່ ເມື່ອຊຸມປີ 1930 ນັ້ນ.
ທ່ານ ເຮິດ ກ່າວວ່າ: “ເວົ້າເລຶ່ອງຜົນຜະລິດເຂົ້າສາລີນີ້ ເປັນຢ່າງນຶ່ງທີ່ພວກເຮົາສາມາດ
ຍ້ອນຫຼັງຄືນໄປຫຼາຍໆສິບປີໄດ້. ໃນປີ 1988 ນັ້ນ ພວກເຮົາກໍ ໄດ້ຜ່ານພົ້ນມາສະພາ
ວະແຫ້ງແລ້ງທີ່ຮ້າຍແຮງທີ່ສຸດບັ້ນນຶ່ງໃນປະວັດສາດຍຸກສະໄໝໃໝ່ມາແລ້ວ ຍ້ອນຫລັງຄືນໄປດົນກ່ວານັ້ນອີກ ກໍແມ່ນປີ 1934 ແລະ ປີ 1936 ພຸ້ນ.”
ທ່ານ ເຮິດ ກ່າວອີກວ່າ ການຂາດແຄນເຂົ້າສາລີແລະຜະລິດຕະພັນສົ່ງອອກ ປະເພດການ
ກະເສດອື່ນໆຂອງສະຫະລັດ ແມ່ນຈະສົ່ງຜົນກະທົບໄປທົ່ວໂລກ.
ທ່ານ ເຮິດ ກ່າວໃນທີ່ສຸດວ່າ: “ຍ້ອນວ່າ ສະຫະລັດເປັນຜູ້ສົ່ງອອກສິນຄ້າ ການກະເສດຫຼັກໆ ລາຍໃຫຍ່ທີ່ສຸດຂອງໂລກນັ້ນ ກໍໝາຍເຖິງວ່າ ລາຄາທີ່ສູງຂຶ້ນແລະຄ່າໃຊ້ຈ່າຍທີ່ສູງຂຶ້ນກວ່າເກົ່າ ຂອງອາຫານແລະນໍ້າມັນເຊື້ອໄຟນີ້ ກໍຈະຖືກສົ່ງອອກໄປທົ່ວໂລກນໍາເຊັ່ນກັນ.”
ບັນດາຊ່ຽວຊານກ່າວວ່າ ການພະຍາກອນຟ້າຝົນ ແລະອຸນຫະພູມທີ່ເຢັນລົງ ສໍາລັບອາທິດນີ້ ໃນພາກສ່ວນຕ່າງໆຂອງເຂດມິດແວສຕ໌ຂອງສະຫະລັດ ອາດຊ່ວຍຜົນລະປູກປະເພດຖົ່ວເຫຼືອງໄດ້ ແຕ່ມັນກໍສາຍເກີນໄປແລ້ວ ສໍາລັບເຂົ້າສາລີ.
ເບິ່ງລາຍງານທີ່ກ່ຽວຂ້ອງກັນ ກ່ຽວກັບກະເສດຕະກອນທີ່ປະສົບໄພແຫ້ງແລ້ງ
ໃນລັດໄອໂອວາ:
