ຄໍາຖະແຫລງຂອງທໍານຽບຂາວ ກ່ຽວກັບກອງປະຊຸມສຸດຍອດລະຫວ່າງສະຫະລັດແລະກຸ່ມອາຊຽນຄັ້ງທີສອງ ຊຶ່ງກອງປະຊຸມຄັ້ງທໍາອິດ ໄດ້ຈັດຂຶ້ນທີ່ສິງກະໂປໃນປີກາຍນັ້ນ ເວົ້າວ່າກອງປະຊຸມປີນີ້ແມ່ນໄດ້ເພ່ງເລັງໃສ່ເລື້ອງເສດຖະກິດຕະຫລອດທັງເລື້ອງບັນຫາຂອງໂລກແລະຂົງເຂດ ອັນຮວມ ທັງເລື້ອງການຫ້າມແຜ່ຜາຍອາວຸດນີວເຄລຍ ຄວາມພະຍາ ຍາມຕໍ່ຕ້ານການກໍ່ການຮ້າຍ ແລະບັນຫາການປ່ຽນແປງຂອງດິນຟ້າອາກາດນໍາ.
ຖ້ອຍຖະແຫລງຂອງທໍານຽບຂາວກ່າວວ່າ ຄວາມຈະເລີນຮຸ່ງເຮືອງຂອງສະຫະລັດແລະຂອງກຸ່ມອາຊ່ຽນ ແມ່ນພົວພັນກັນຂຶ້ນຫລາຍນັບມື້ ໂດຍໃຫ້ຂໍ້ສັງເກດວ່າ ເສດຖະກິດຂອງກຸ່ມອາຊ່ຽນທັງໝົດນັ້ນ ລວມກັນແລ້ວແມ່ນປະກອບເປັນຕະ ຫລາດສິນຄ້າສົ່ງອອກທີ່ໃຫຍ່ອັນດັບ 4 ສໍາລັບສະຫະລັດ ຊຶ່ງມູນຄ່າທັງໝົດຂອງການຄ້າສອງຝ່າຍ ຕົກເປັນ 146 ຕື້ໂດລາ ໃນປີ 2009.
ບັນດາຜູ້ນໍາອາຊ່ຽນໄດ້ແຈ້ງໃຫ້ທ່ານໂອບາມາຮູ້ໂດຍສັງເຂບ ກ່ຽວກັບແຜນການຈັດຕັ້ງປະຊາຄົມເສດຖະກິດອາຊ່ຽນຂຶ້ນ ເພື່ອສ້າງຕັ້ງຕະຫລາດແລະຖານຜະລິດສິນຄ້າອັນດຽວຂຶ້ນມາໃຫ້ໄດ້ພາຍໃນປີ 2015. ຖະແຫລງການສະບັບນີ້ກ່າວອີກວ່າ ປະທານາທິບໍດີໂອບາມາໄດ້ໃຫ້ ຄໍາໝັ້ນສັນຍາທີ່ຈະໃຫ້ການຊ່ອຍເຫລືອເພີ່ມຕື່ມ ໃນການສະໜັບສະໜຸນເປົ້າໝາຍດັ່ງກ່າວ ໃຫ້ບັນລຸຜົນ.
ປະທານາທິບໍດີໂອບາມາກ່າວວ່າ ສະຫະລັດໃນຖານະເປັນປະເທດທີ່ຕັ້ງຢູ່ໃນແຄມຝັ່ງມະຫາ ສະມຸດປາຊີຟິກ ມີສ່ວນໄດ້ສ່ວນເສຍຢ່າງໃຫຍ່ຫລວງໃນຂົງເຂດອາຊ່ຽນນັ້ນ ຊຶ່ງທ່ານໂອບາມາກ່າວຊີ້ແຈງວ່າ:
"ພວກເຮົາຕ້ອງການຄວາມເປັນພາຄີກັນກັບພວກປະເທດອາຊ່ຽນ ເພື່ອຮັບມືກັບ ສິ່ງທ້າທາຍຕ່າງໆຂອງເສດຖະກິດທີ່ກຳລັງເຕີບໂຕຂອງພວກເຮົາ ປ້ອງກັນການ ແຜ່ຜາຍດ້ານນີວເຄລຍ ແລະແກ້ໄຂບັນຫາສະພາວະດິນຟ້າອາກາດປ່ຽນແປງ. ດັ່ງນັ້ນ ໃນຖານະເປັນປະທານາທິບໍດີ ຂ້າພະເຈົ້າກໍໄດ້ເຮັດໃຫ້ເປັນທີ່ແຈ້ງຂາວ ແລ້ວວ່າ ສະຫະລັດມີຄວາມຕັ້ງໃຈທີ່ຈະດໍາເນີນບົດບາດຂອງການເປັນຜູ້ນໍາຜູ້ນຶ່ງ ໃນຂົງເຂດເອເຊຍ. ສະນັ້ນ ພວກເຮົາຈຶ່ງໄດ້ສ້າງຄວາມເຂັ້ມແຂງໃຫ້ແກ່ຄວາມ ສໍາພັນຂອງພວກເຮົາກັບພັນທະມິດເກົ່າແກ່ ສ້າງຄວາມແໜ້ນແຟ້ນເລິກເຊິ່ງກັບ ພາຄີໃໝ່ ດັ່ງດຽວທີ່ພວກເຮົາກຳລັງປະຕິບັດກັບຈີນ ແລະພວກເຮົາກໍໄດ້ເຂົ້າໄປພົວພັນຄືນໃໝ່ອີກກັບພວກອົງການຈັດຕັ້ງລະດັບຂົງເຂດ ຊຶ່ງໂຮມທັງສະມາຄົມ ອາຊ່ຽນນັ້ນນຳ."
ທ່ານໂອບາມາກ່າວວ່າ ທ່ານໄດ້ຮັບເອົາການເຊື້ອເຊີນຂອງກຸ່ມອາຊ່ຽນ ເພື່ອໄປຮ່ວມກອງ ປະຊຸມສຸດຍອດເອເຊຍຕາເວັນອອກ ຊຶ່ງກໍານົດຈະໄຂຂຶ້ນທີ່ກຸງຈາກາຕາໃນປີໜ້ານັ້ນ ຊຶ່ງຈະເປັນການຢ້ຽມຢາມອິນໂດເນເຊຍຄັ້ງທີສອງສໍາລັບທ່ານໂອບາມາ ໃນຖານະເປັນປະທານາທິ ບໍດີ ຫລັງຈາກການຢ້ຽມຢາມຄັ້ງທໍາອິດ ທີ່ຈະມີຂຶ້ນໃນເດືອນພະຈິກຈະມານີ້ ຊຶ່ງທ່ານຈະຢຸດແວ່ອິນໂດເນເຊຍ ໃນລະຫວ່າງເດີນທາງໄປຮ່ວມກອງປະຊຸມສຸດຍອດຂອງກຸ່ມ G-20 ທີ່ ເກົາຫລີໃຕ້ ແລະກອງປະຊຸມສຸດຍອດ APEC ທີ່ຍີ່ປຸ່ນ.
ປະທານປະເທດຫວຽດນາມ ທ່ານຫງວຽນມິນຈຽດ ໄດ້ກ່າວຜ່ານນາຍພາສາ ໃນຖານະປະທານກຸ່ມອາຊຽນຄົນປັດຈຸບັນວ່າ:
"ຫວຽດນາມແລະສະມາຄົມ ອາຊ່ຽນ ຍາມໃດກໍສະໜັບ ສະໜູນການເສີມຂະຫຍາຍ ສາຍພົວພັນລະຫວ່າງສະມາ ຄົມອາຊ່ຽນກັບສະຫະລັດ ຫ້ ເລິກເຊີ່ງແໜ້ນແຟ້ນຍິ່ງຂຶ້ນ ທັງແບບສອງຝ່າຍ ແລະ ຫລາຍຝ່າຍ ແລະພວກເຮົາ ກໍຢາກ ຈະຍົກລະດັບຄວາມ ສຳພັນຂອງພວກເຮົາຂຶ້ນໄປ ອີກລະດັບນຶ່ງ ໄປສູ່ລະດັບ ທີ່ ກວມຮອບດ້ານຫລາຍຂຶ້ນອີກ ແລະມີເນື້ອຫາສາລະ ຫລາຍຂຶ້ນ ເພື່ອສັນຕິພາບ ສະຖຽນລະພາບ ການພັດທະນາຂອງຂົງເຂດຂອງ ພວກເຮົາ."
ເຖິງແມ່ນບໍ່ໄດ້ມີການກ່າວເຖິງເກົາຫລີເໜືອແລະມຽນມາ ຢູ່ໃນຄໍາປາໄສສັ້ນໆຢ່າງເປີດເຜີຍຂອງພວກຜູ້ນໍາເຫລົ່ານັ້ນກໍຕາມ ແຕ່ສອງປະເທດນີ້ກໍໄດ້ເປັນຫົວຂໍ້ສໍາຄັນ ໃນການໂອ້ລົມສົນທະນາກັນເມື່ອວັນສຸກຜ່ານມານັ້ນ.
ທໍານຽບຂາວກ່າວວ່າ ທ່ານໂອບາມາໄດ້ຮຽກຮ້ອງອີກຄັ້ງໃໝ່ໃຫ້ລັດຖະບານທະຫານມຽນມາ ລົງມືດໍາເນີນຂັ້ນຕອນສ້າງຄວາມປອງດອງຊາດໂດຍການປ່ອຍໂຕພວກນັກໂທດການເມືອງທັງໝົດ ຮວມທັງທ່ານນາງອອງຊານຊູຈີ ຜູ້ນໍາສັນນິບາດແຫ່ງຊາດເພື່ອປະຊາທິປະໄຕໃນມຽນມາ ແລະໃຫ້ຈັດຕັ້ງການເລືອກຕັ້ງທີ່ເສລີແລະຍຸຕິທໍາໃນເດືອນພະຈິກນັ້ນ.
ໃນຖະແຫລງການສະບັບນຶ່ງຕ່າງຫາກ ບັນດາຜູ້ນໍາອາຊ່ຽນກໍຮຽກຮ້ອງຊໍ້າອີກ ໃຫ້ລັດຖະບານມຽນມາຈັດໃຫ້ມີການເລືອກຕັ້ງທີ່ເສລີ ຍຸຕິທໍາ ເປີດກ້ວາງ ແລະໂປ່ງໃສ ເພື່ອໃຫ້ເປັນທີ່ໜ້າເຊື່ອຖືໄດ້ ສໍາລັບປະຊາຄົມໂລກ.
ນອກນັ້ນ ພວກຜູ້ນໍາກຸ່ມອາຊ່ຽນກໍໄດ້ສະແດງຄວາມຍິນດີເຊ່ນກັນ ນໍາອັນທີ່ເຂົາເຈົ້າເອີ້ນວ່າ ການສືບຕໍ່ພົວພັນຂອງສະຫະລັດກັບລັດຖະບານທະຫານມຽນມານັ້ນ ໂດຍກ່າວວ່າເຂົາເຈົ້າ ຫວັງວ່າການກະທໍາເຊ່ນນີ້ຈະຊຸກຍູ້ໃຫ້ມຽນມາທໍາການປະຕິຮູບດ້ານການເມືອງແລະເສດຖະ ກິດ ເພື່ອສົ່ງເສີມຄວາມປອງດອງຊາດນັ້ນ.
ກ່ຽວກັບເກົາຫລີເໜືອ ສະຫະລັດແລະກຸ່ມອາຊ່ຽນໄດ້ຢືນຢັນອີກເຖິງຄວາມສໍາຄັນໃນການ ປະຕິບັດຕາມມະຕິຂອງສະພາຄວາມໝັ້ນຄົງສະຫະປະຊາຊາດ ແລະຮຽກຮ້ອງໃຫ້ລັດຖະ ບານກຸງພຽງຢາງປະຕິບັດຕາມຄວາມໝັ້ນໝາຍຂອງການເຈລະຈາ 6 ຝ່າຍ ທີ່ຢາກ ໃຫ້ເກົາຫລີ ເໜືອປະຖິ້ມພວກອາ ວຸດນີວເຄລຍທັງໝົດ ຕະຫລອດທັງໂຄງການຜະລິດນີວເຄລຍທີ່ມີຢູ່ ແລະໃຫ້ກັບຄືນ ໃນເວລາອັນໄວເທົ່າທີ່ຈະໄວໄດ້ ໄປສູ່ສົນທິສັນຍາວ່າດ້ວຍການຫ້າມແຜ່ຜາຍອາວຸດນີວເຄລຍ ແລະມາດຕາການປ້ອງກັນຕ່າງໆຂອງອົງການຄວບຄຸມ ພະລັງປະລະມະນູສາກົນ ຫລື IAEA ນັ້ນ.
ຖະແຫລງການຮ່ວມເວົ້າອີກວ່າ ທ່ານໂອບາມາແລະບັນດາຜູ້ນໍາປະເທດອາຊ່ຽນໄດ້ຕົກລົງເຫັນດີນໍາກັນ ກ່ຽວກັບຄວາມສໍາຄັນຂອງການແກ້ໄຂບັນຫາຂັດແຍ່ງໃນຂົງເຂດໂດຍສັນຕິ ວິທີ ແລະກ່ຽວກັບເສລີພາບໃນການເດີນເຮືອ ສະຖຽນລະພາບ ແລະການເຄົາລົບນັບຖືກົດໝາຍສາກົນ ຮວມທັງສົນທິສັນຍາສະຫະປະຊາຊາດວ່າດ້ວຍກົດໝາຍທະເລ ແລະກົດ ໝາຍສາກົນອື່ນໆກ່ຽວກັບທະເລນັ້ນ. ຂໍ້ສະຫລຸບຂອງທໍານຽບຂາວກ່າວວ່າ ກົດໝາຍທາງ ທະເລທີ່ວ່ານີ້ແມ່ນຮວມທັງທະເລຈີນໃຕ້ນໍາ.
ນອກນີ້ ທໍານຽບຂາວຍັງໄດ້ໃຫ້ຂໍ້ສັງເກດໃນວັນສຸກຜ່ານມານັ້ນວ່າ ທ່ານນາງຮິນລາລີ ຄລິນຕັນ ລັດຖະມຸນຕີການຕ່າງປະເທດສະຫະລັດ ກໍຈະໄປຮ່ວມໃນກອງປະຊຸມສຸດຍອດເອເຊຍ ຕາເວັນອອກຂັ້ນຕົ້ນ ທີ່ນະຄອນຫລວງຮາໂນຍ ໃນທ້າຍເດືອນຕຸລາໜ້ານີ້ ແລະລັດຖະມົນຕີປ້ອງກັນປະເທດ Robert Gates ກໍຈະໄປຮ່ວມກອງປະຊຸມຂອງບັນດາລັດຖະມຸນຕີປ້ອງກັນປະເທດຂອງເຂດເອເຊຍປາຊີຟິກທີ່ຮາໂນຍ ຊຶ່ງກໍານົດຈະມີຂຶ້ນໃນເດືອນໜ້ານີ້ເຊ່ນກັນ.
