ຜົນການສອບເສັງຂັ້ນສຸດທ້າຍ ສຳຫລັບສົກປີ 2014 ຂອງນັກ
ສຶກສາກຳປູເຈຍ ອອກມາ ແມ່ນວ່າ ຂີ້ຮ້າຍຫຼາຍ ດ້ວຍຈຳນວນ
ຫຼາຍກວ່າ ເຄິ່ງໜຶ່ງ ຂອງນັກສຶກສາທັງໝົດ 90,000 ຄົນແມ່ນ
ເສັງຕົກ. ສາເຫດຫັ້ນວະ? ແມ່ນບັນດາເຈົ້າໜ້າທີ່ໄດ້ກວດລ້າງ
ການລັກກ່າຍຂໍ້ສອບ ຊຶ່ງເປັນມາດຕະການ ຊຸດທຳອິດຂອງ
ຫຼາຍໆຊຸດ ໃນການປະຕິຮູບ ທີ່ແນໃສ່ເພື່ອແກ້ໄຂ ພາກສ່ວນ
ການສຶກສາທີ່ເພພັງ ຂອງປະເທດທີ່ທຸກຍາກດັ່ງກ່າວ. ຜູ້ສື່ຂ່າວ
ວີໂອເອ Robert Carmichael ລາຍງານຈາກພະນົມເປັນ ຊຶ່ງ
ໄຊຈະເລີນສຸກ ຈະນຳມາສະເໜີທ່ານໃນອັນດັບຕໍ່ໄປ.
ການຕັດສິນໃຈ ທີ່ຈະກວດລ້າງ ການລັກກ່າຍຂໍ້ສອບນັ້ນ ໄດ້ສົ່ງຜົນສະທ້ອນຢ່າງໃຫຍ່.
ເຖິງແມ່ນວ່າ ໄດ້ຮັບໂອກາດໃຫ້ ສອບເສັງຄືນອີກ ເປັນຄັ້ງທີສອງ ໃນເດືອນຕຸລາ ກໍຕາມ
ຫົກສິບເປີເຊັນ ຂອງຈຳນວນນັກສຶກສາ ໃນສົກຮຽນປີ 2014 ໄດ້ເສັງຕົກປີສຸດທ້າຍ
ຂອງການສຶກສາ.
ບັນດານັກສຶກສາ ໃນສົກຮຽນປີ 2015 ໄດ້ຮັບຮູ້ເຖິງ ຂໍ້ສັງເກດດັ່ງກ່າວ.
ທ້າວ ລັດຕະນາ ນັກສຶກສາປີສຸດທ້າຍ ກ່າວວ່າ ພວກໝູ່ຄູ່ຂອງລາວ ຮັບຮູ້ວ່າ ກົດລະບຽບ
“ຫ້າມກ່າຍກັນ ໃນການສອບເສັງ” ໝາຍຄວາມວ່າ ພວກເຂົາເຈົ້າຈະຕ້ອງ ໄດ້ຮ່ຳຮຽນ
ດ້ວຍໂຕເອງ ເພື່ອທີ່ຈະເສັງຜ່ານ ແລະເຂົ້າມະຫາວິທະຍາໄລ ໄດ້ຕໍ່ໄປ.
ທ້າວ ລັດຕະນາ ເວົ້າວ່າ “ນະໂຍບາຍໃໝ່ນີ້ ໝາຍຄວາມວ່າ ພວກເຮົາ ຈະຮ່ຳຮຽນ
ຫຼາຍຂຶ້ນ ແລະ ບໍ່ອອກໄປທ່ຽວຫຼິ້ນຫຼາຍ ດັ່ງທີ່ພວກເຮົາເຄີຍເຮັດ. ມັນຍັງໝາຍ
ຄວາມວ່າ ພວກເຮົາ ຈະບໍ່ຈຳເປັນໃຊ້ຈ່າຍເງິນ ໃນລະຫວ່າງການສອບເສັງນັ້ນ.”
ນະໂຍບາຍໃໝ່ນີ້ ແມ່ນເປັນຜົນງານຂອງຊາຍຄົນໜຶ່ງ ທີ່ໄດ້ຖືກແຕ່ງຕັ້ງມາໃນປີກາຍນີ້
ຫຼັງຈາກຮັບໜ້າທີ່ເປັນຮອງລັດຖະມົນຕີກະຊວງການເງິນ ມາໄດ້ໜຶ່ງທົດສະວັດແລ້ວ
ລັດຖະມົນຕີກະຊວງສຶກສາ ທ່ານ Hang Chuon Naron ກ່າວວ່າ ການປະຕິຮູບລະບົບ
ການສຶກສາ ແມ່ນສຳຄັນຢ່າງຍິ່ງ ໃນການພັດທະນາຂອງກຳປູເຈຍ…
ທ່ານ Naron ເວົ້າວ່າ “ສະນັ້ນ ປັດໄຈອັນໜຶ່ງ ທີ່ສຳຄັນທີ່ສຸດ ກໍແມ່ນວ່າ ມັນມີ
ສະພາບ ຄວາມສາມາດ ແມ່ນບໍ່ກົງກັນກັບວຽກງານ ຢູ່ໃນກຳປູເຈຍ. ແລະມັນ
ໄດ້ກາຍມາເປັນອຸປະສັກ ເພື່ອການພັດທະນາເສດຖະກິດ ເພື່ອການຂະຫຍາຍຕົວ
ເພື່ອດຶງດູດເອົາການລົງທຶນໂດຍກົງຈາກຕ່າງປະເທດ. ສະນັ້ນ ພວກເຮົາມີບັນດາ
ນັກລົງທຶນເຂົ້າມາ ຊຶ່ງພວກເຂົາເຈົ້າຕ້ອງການ ບັນດາແຮງງານທີ່ມີຄວາມສາມາດ
ຊຶ່ງພວກເຮົາບໍ່ມີພຽງພໍ. ແຕ່ວ່າ ໃນດ້ານການຕອບສະໜອງນັ້ນ ພວກເຮົາມີພວກ
ນັກຮຽນທີ່ຮຽນຈົບການສຶກສາແລ້ວນັ້ນ ຫຼາຍຄົນທີ່ບໍ່ສາມາດຫາວຽກເຮັດງານທຳ. ແລະອັນນີ້ ເປັນບັນຫາທີ່ຫຼາຍໆປະເທດ ກຳລັງປະເຊີນໜ້າຢູ່ ກໍຄື ຄວາມສາມາດບໍ່ກົງກັນກັບວຽກ.”
ນະໂຍບາຍໃໝ່ນີ້ ມີເປົ້າໝາຍ ເພື່ອປັບປຸງ ດ້ານຕ່າງໆເຊັ່ນ ການຝຶກອົບຮົມນາຍຄູ ການ
ປົກຄອງໂຮງຮຽນໃຫ້ດີຂຶ້ນຕື່ມ ແລະ ສົ່ງເສີມແນວຄິດທີ່ສຳຄັນ ແລະ ການແກ້ໄຂບັນຫາ
ສຳຫລັບ ພວກເດັກນ້ອຍຢູ່ໃນໄວຮຽນ ຂອງກຳປູເຈຍຈຳນວນ 2 ລ້ານ 9 ແສນຄົນ.
ບັນດານາຍຄູທີ່ໄດ້ຮັບເງິນເດືອນຕ່ຳ ຈະໄດ້ຮັບສູງຂຶ້ນກວ່າເກົ່າ ແລະ ໂຮງຮຽນຕ່າງໆ ຈະ
ໄດ້ຮັບທຶນສະໜັບສະໜຸນເພີ້ມຂຶ້ນ ຈາກງົບປະມານການສຶກສາ ທີ່ຈະເພີ້ມສູງຂຶ້ນເລື້ອຍໆ
ເຖິງ 440 ລ້ານດອນລາ.
ກຳປູເຈຍ ເປັນທີ່ແນ່ນອນແລ້ວວ່າ ເສັ້ນທາງແມ່ນຍັງໄກຢູ່:
ຍົກຕົວຢ່າງ ອັດຕາສ່ວນຂອງ ນັກຮຽນ 46 ຄົນ ຕໍ່ນາຍຄູຊັ້ນປະຖົມຄົນໜຶ່ງນັ້ນ ແມ່ນຂີ້ຮ້າຍ
ທີ່ສຸດໃນໂລກ ນອກເໜືອຈາກອາຟຣິກາ.
ທະນາຄານພັດທະນາເອເຊຍ ຫຼື ADB ແມ່ນໄດ້ສະໜອງທຶນ 90 ລ້ານດອນລາ ໃນລະຍະ
5 ປີ ເພື່ອປັບປຸງ ຄຸນນະພາບຂອງການສຶກສາ ແລະ ຕັດລົງອັດຕາການອອກໂຮງຮຽນ
ກ່ອນຮຽນຈົບ. ທ່ານ Sophea Mar ຈາກ ADB ສັນລະເສີນ ການຕັດສິນໃຈຂອງລັດ
ຖະບານ ທີ່ເພີ້ມທຶນໃຊ້ຈ່າຍດ້ານການສຶກສາຂຶ້ນ ແຕ່ກ່າວວ່າ ການໃຊ້ຈ່າຍໃນລະດັບ 17
ເປີເຊັນ ນັ້ນ ກໍຍັງຖືວ່າ ຕ່ຳຢູ່.
ທ່ານ Mar ເວົ້າວ່າ “ການຈັດສັນງົບປະມານ ແມ່ນມີຄວາມສຳຄັນ ແຕ່ການໃຊ້ຈ່າຍນັ້ນ ຍັງມີຄວາມສຳຄັນຍິ່ງກວ່າອີກ. ແລະ ອັນນີ້ ແມ່ນຄວາມທ້າທາຍອັນໃຫຍ່ຫລວງ ເພາະວ່າຄືກັບທ່ານຮູ້ຈັກແລ້ວ ວ່າຄວາມອາດສາມາດ ຢູ່ໃນລະດັບໂຮງຮຽນ ຢູ່ໃນລະດັບ ທ້ອງຖິ່ນນັ້ນ ແມ່ນຍັງເປັນບັນຫາຢູ່. ສະນັ້ນ ການປະຕິຮູບ ບໍ່ພຽງເກີດຂຶ້ນຢູ່ພາຍໃນກະຊວງເທົ່ານັ້ນ. ການປະຕິຮູບ ແມ່ນຈະຕ້ອງເລີ້ມຕົ້ນ ຈາກຫ້ອງຮຽນ ຈະຕ້ອງເລີ້ມຕົ້ນຈາກລະດັບຕ່ຳ.”
ເພື່ອຮັບປະກັນວ່າ ການປະຕິຮູບເຫຼົ່ານີ້ ຈະປະສົບຜົນສຳເລັດ ທ່ານ Mar ກ່າວວ່າ ຈະ
ຕ້ອງການໆສະໜັບສະໜຸນ ບໍ່ພຽງແຕ່ລັດຖະບານເທົ່ານັ້ນ ແຕ່ ຈາກບັນດານັກສຶກສາ ບັນດາພໍ່ແມ່ນັກສຶກສາ ແລະ ຈາກ ພາກສ່ວນເອກະຊົນອີກດ້ວຍ.
