ຜູ້ບັນຊາການ ກອງທັບເຮືອ ໃນເຂດປາຊີຟິກຄົນໃໝ່ຂອງ ສະຫະລັດ ກຳລັງຊອກຫາຊ່ອງທາງ ເພື່ອໃຫ້ການຄ້ຳປະກັນແກ່ ພັນທະມິດໃນພາກພື້ນວ່າ ການຫັນກອງກຳລັງທະຫານສະຫະລັດໄປຍັງຂົງເຂດ ຈະດຳເນີນຕໍ່ໄປ ຖ້າມກາງຄວາມເປັນຫ່ວງ ກ່ຽວກັບການຂະຫຍາຍອິດທິພົນທາງທະເລຂອງ ຈີນ. ນັກຂ່າວ ວີໂອເອ Steve Herman ມີລາຍງານຈາກຫ້ອງການປະຈຳເຂດເອເຊຍ ຕາເວັນອອກສຽງໃຕ້ ຂອງພວກເຮົາທີ່ ບາງກອກ
ເຊິ່ງ ພຸດທະສອນ ຈະນຳເອົາລາຍລະອຽດມາສະເໜີທ່ານ.
ຕັ້ງແຕ່ທ່ານໄດ້ຮັບຕຳແໜ່ງ ເມື່ອສາມເດືອນກ່ອນ ເປັນຜູ້ບັນຊາການນຳພາກອງທັບເຮືອ ໃນເຂດປາຊີຟິກ ພົນເຮືອເອກ Scott Swift ໄດ້ໄປຢ້ຽມຢາມປະເທດ ຟີລິບປິນ, ເກົາຫຼີໃຕ້, ຍີ່ປຸ່ນ, ອອສເຕຣເລຍ, ນິວຊີແລນ ແລະ ມາເລເຊຍ ເພື່ອພົບປະກັບບັນດາຄູ່ ຕຳແໜ່ງໃນບັນ ດາກອງທັບເຮືອຂອງປະເທດເຫລົ່ານີ້.
ກ່ອນທີ່ທ່ານຈະເດີນທາງໄປ ສິງກະໂປ, ຜູ້ບັນຊາການກອງເຮືອ ສະຫະລັດ ຂະນະທີ່ຢູ່ໃນ ກົວລາລຳເປີ ໄດ້ລົມກັບກຸ່ມຂອງບັນດານັກຂ່າວຜ່ານ ທາງໂທລະສັບ.
ພົນເຮືອເອກ Swift ໄດ້ຍອມຮັບວ່າ ທຸກໆສະຖານທີ່ ທີ່ທ່ານເຄີຍໄປຢ້ຽມຢາມມາ ຕ່າງກໍ “ມີຄວາມຮູ້ສຶກບໍ່ສະບາຍໃຈ” ຍ້ອນຄວາມເປັນຫ່ວງ ກ່ຽວກັບ “ຂະໜາດ ແລະ ຂອບ ເຂດ” ຂອງໂຄງການຖົມດິນຂອງ ປັກກິ່ງ ໃນທະເລຈີນໃຕ້.”
ທ່ານ Swift ກ່າວວ່າ “ພວກເຂົາທຸກຄົນໄດ້ສະແດງຄວາມເປັນຫ່ວງ ແລະ ບໍ່ແນ່ໃຈ ກ່ຽວກັບວ່າອະນາຄົດຈະເປັນແນວໃດ. ແຕ່ຂ້າພະເຈົ້າ ຄິດວ່າ, ສິ່ງທີ່ສຳຄັນທີ່ສຸດ ແມ່ນການເຂົ້າມາຮ່ວມກັນ ໃນຫຼາຍຝ່າຍ ແລະ ວິທີການໄກ່ເກ່ຍຄວາມແຕກຕ່າງ ພວກນີ້ ໃນການກ່າວອ້າງ ພາຍໃນພາກພື້ນ ໃນວິທີທາງແງ່ບວກ ແລະ ບໍ່ອະນຸຍາດໃຫ້ມີການ ບີບບັງຄັບດ້ວຍການໃຊ້ກຳລັງ ຫຼື ທະຫານ ເປັນດັ່ງກັບວິທີການ ເພື່ອ ແກ້ໄຂບັນຫາ ເພື່ອຜົນປະໂຫຍດຂອງຝ່າຍໃດຝ່າຍໜຶ່ງ ຫຼື ຝ່າຍອື່ນໆ.”
ວີໂອເອ ໄດ້ຖາມຜູ້ບັນຊາການ Swift ກ່ຽວກັບຄວາມສົງໄສ ທີ່ໄດ້ສະແດງອອກໂດຍ ພັນທະມິດຂອງ ສະຫະລັດ ກ່ຽວກັບຄຳໝັ້ນສັນຍາ ໄລຍະຍາວຂອງ ທຳນຽບຫ້າແຈ ໃນການຫັນໄປສູ່ປາຊີຟິກ ທີ່ໄດ້ໂຄສະນາອອກໄປຢ່າງກວ້າງ.
ທ່ານ Swift ກ່າວວ່າ “ມັນແມ່ນການສະທ້ອນກັບອັນເລັກນ້ອຍ ໃນສິ່ງທີ່ຄວາມ ສາມາດຂອງ ສະຫະລັດ ແມ່ນເພື່ອສະໜັບສະໜູນ ເຂດທີ່ກັບມາໃຫ້ຄວາມສຳຄັນ ຄືນ, ມັນແມ່ນການສະທ້ອນກັບ ຂອງຄວາມບໍ່ສະບາຍໃຈ ໃນສະຖານທີ່ຂອງເຫດ ການຫຼາຍກວ່າ, ດັ່ງກັບທີ່ທ່ານໄດ້ສະເໜີ, ມີຫຼາຍປະເທດແມ່ນມີຄວາມເປັນຫ່ວງ ກ່ຽວກັບວ່າ ອະນາຄົດຈະເປັນແນວໃດ. ແລະຫຼາຍປະເທດໃນນັ້ນ ໄດ້ຫັນມາຫາ ສະຫະລັດ ດັ່ງກັບເປັນຜູ້ສືບຕໍ່ຮັບປະກັນ ຄວາມໝັ້ນຄົງ ທີ່ພວກເຂົາໄດ້ຮັບ ໃນ ທົ່ວພາກພື້ນ, ແນ່ນອນສຳລັບ 70 ປີທີ່ຜ່ານມາ.”
ໂຄງການຄວາມໝັ້ນຄົງທາງທະເລຂອງ ກະຊວງປ້ອງກັນປະເທດ ເຊິ່ງໄດ້ເປີດເຜີຍອອກ ໃນສັບປະດາທີ່ແລ້ວ, ແມ່ນມີ 60 ເປີເຊັນຂອງອຸປະກອນທາງກອງທັບເຮືອ ແລະ ການບິນ ຈະເຂົ້າໄປຕັ້ງຖານ ປະຕິບັດງານໃນຂົງເຂດ ເອເຊຍ ປາຊີຟິກ ໃນປີ 2020. ຍີ່ປຸ່ນ ຈະເປັນ ເສົາຫຼັກສຳຄັນກັບເກາະ Guam ດັ່ງກັບສູນກາງຍຸດທະສາດ ທີ່ສຳຄັນ. ຍັງຈະມີການຮ່ວມມື ກັບ ຫວຽດນາມ ແລະ ອິນເດຍ ເຊິ່ງທັງສອງປະເທດແມ່ນເປັນຄູ່ແຂ່ງຂອງ ຈີນ. ແລະ ປະຕິບັດການ ຮ່ວມທາງທະຫານ ແມ່ນຈະຖືກຂະຫຍາຍ ອອກໄປກັບ ອິນໂດເນ ເຊຍ, ຍີ່ປຸ່ນ ແລະ ມາເລເຊຍນຳດ້ວຍ.
ຜູ້ບັນຊາການກອງເຮືອກ່າວວ່າ ນັ້ນຄວນຮັບຮອງຄຳໝັ້ນສັນຍາທັງໝົດຂອງກອງທັບເຮືອ ສະຫະລັດ ຕໍ່ພາກພື້ນດັ່ງກ່າວ.
ທ່ານ Swift ກ່າວວ່າ “ມັນມີຫຼາຍຕົວຢ່າງຂອງການທີ່ວ່າບໍ່ແມ່ນພຽງແຕ່ຂະໜາດໃນ ການສົ່ງກຳລັງໄປສະໜັບສະໜຸນເທົ່ານັ້ນ ແຕ່ວ່າມັນແມ່ນຄວາມສາມາດເຊັ່ນກັນ.”
ພົນເຮືອເອກ Swift ກ່າວວ່າ ທ່ານຕັ້ງໃຈທີ່ຈະຮັບປະກັນວ່າ ກອງເຮືອໃນເຂດປາຊີຟິກແມ່ນ “ກອງທັບແຫ່ງທາງເລືອກເພື່ອຕອບສະໜອງຕໍ່ເຫດການໃດໆເຊິ່ງອາດຈະເກີດຂຶ້ນ” ໃນພາກພື້ນ.
ທ່ານພົນເຮືອເອກ, ໃນອະດີດໄດ້ບັນຊາກອງເຮືອທີ 7, ຍັງໄດ້ສະແດງຄວາມຫວັງໃນການຂະຫຍາຍການຕິດຕໍ່ກັບ ກອງທັບເຮືອ ແລະໜ່ວຍ ຍາມຝັ່ງຂອງ ຈີນ ເພື່ອພະຍາຍາມທີ່ຈະ “ຫຼຸດຜ່ອນ ອົງປະກອບຂອງຄວາມບໍ່ໝັ້ນຄົງ ທີ່ກຳລັງເກີດຂຶ້ນຢູ່ໃນພາກພື້ນ.”
