ກອງທັບມຽນມາ ກ່າວໃນວັນພຸດມື້ນີ້ວ່າ ຂ່າວລືທີ່ນາຍພົນລະດັບສູງ ໄດ້ດໍາເນີນ ການກັກຂັງຜູ້ບັນຊາການຂອງລັດຖະບານທະຫານ ໃນການກໍ່ລັດຖະປະຫານຄັ້ງ ໃໝ່ ແມ່ນ “ການໂຄສະນາຊວນເຊື່ອ” ທີ່ເຜີຍແຜ່ໂດຍ “ພວກຂາຍຊາດ” ກ່ອນການຢ້ຽມຢາມໂດຍລັດຖະມົນຕີການຕ່າງປະເທດຂອງຈີນ, ອີງຕາມ ລາຍງານຂອງອົງການຂ່າວ AFP.
ຜູ້ນຳລັດຖະບານທະຫານ ທ່ານ ມິນ ອອງ ແລງ ໄດ້ປະເຊີນໜ້າກັບການວິ ຈານ ຈາກຜູ້ສະໜັບສະໜູນທາງທະຫານໃນບໍ່ເທົ່າໃດອາທິດທີ່ຜ່ານມາ ໃນຂະນະທີ່ລັດຖະບານທະຫານ ໄດ້ສູນເສຍດິນແດນໃຫ້ແກ່ກຸ່ມຕິດອາວຸດ ຊົນເຜົ່າກຸ່ມນ້ອຍ ແລະບັນດາຝ່າຍຄ້ານອື່ນໆ ທີ່ຕໍ່ສູ້ເພື່ອໂຄ່ນລົ້ມອໍານາດ ຂອງລັດຖະປະຫານ ທີ່ໄດ້ຍຶດອໍານາດໃນປີ 2021.
ໃນວັນອັງຄານວານນີ້ ສື່ສັງຄົມອອນລາຍຫຼາຍສື່ໄດ້ອ້າງວ່າ ນາຍພົນຂັ້ນສູງໄດ້ກັກຂັງ ທ່ານ ມິນ ອອງ ແລງ ຢູ່ນະຄອນຫຼວງ ເນປີດໍ ເພື່ອທໍາການສັບ ປ່ຽນການນຳຂັ້ນສູງຂອງລັດຖະບານທະຫານ.
ກອງທັບລັດຖະບານກ່າວໃນຖະແຫຼງການສະບັບນຶ່ງວ່າ ການກ່າວອ້າງດັ່ງກ່າວແມ່ນ “ການໂຄສະນາຊວນເຊື່ອ... ເພື່ອແນໃສ່ລົບກວນສັນຕິພາບ ແລະສະຖຽນລະພາບຂອງປະເທດ,” ໂດຍກ່າວຫາພວກທີ່ເຜີຍແຜ່ຂ່າວເຫຼົ່ານັ້ນວ່າ ເປັນ “ພວກຂາຍຊາດ.”
ຖະແຫຼງການກ່າວວ່າ “ປະມຸກລັດ ແລະບັນດາເຈົ້າໜ້າທີ່ຂອງປະເທດກໍາລັງ ປະຕິບັດຄວາມຮັບຜິດຊອບແຫ່ງຊາດຂອງເຂົາເຈົ້າຮ່ວມກັນ.”
ລັດຖະມົນຕີການຕ່າງປະເທດຂອງຈີນ ທ່ານ ຫວັງ ຢີ ມີກຳນົດຈະໄປຮອດມຽນມາໃນວັນພຸດມື້ນີ້ ເພື່ອທໍາການຫາລືກັບ ທ່ານ ມິນ ອອງ ແລງ.
ໂຄສົກກະຊວງການຕ່າງປະເທດຈີນທີ່ບໍ່ປະສົງອອກນາມກ່າວໃນວັນອັງຄານວານນີ້ວ່າ ການຢ້ຽມຢາມແມ່ນ “ແນເປົ້າໝາຍໃສ່ລົງເລິກການຮ່ວມມື ທີ່ຕ່າງຝ່າຍຕ່າງມີຜົນປະໂຫຍດໃນດ້ານຕ່າງໆຮ່ວມກັນ.”
ຈີນແມ່ນປະເທດພັນທະມິດທີ່ສຳຄັນ ແລະເປັນຜູ້ສະໜອງອາວຸດໃຫ້ແກ່ລັດຖະບານທະຫານ, ແຕ່ບັນດານັກວິເຄາະກ່າວວ່າ ພວກເຂົາຍັງຄົງຮັກສາການພົວພັນກັບບັນດາກຸ່ມປະກອບອາວຸດຊົນເຜົ່າ ທີ່ຍຶດເອົາພາກພື້ນໃກ້ກັບຊາຍແດນຂອງຕົນ.
