ຜູ້ນຳລັດຖະບານທະຫານມຽນມາ ທ່ານ ມິນ ອອງ ລາຍ (Min Aung Hlaing) ຈະເດີນທາງໄປ ຈີນ ໃນອາທິດນີ້ ເພື່ອເຂົ້າຮ່ວມກອງປະຊຸມສຸດຍອດຢູ່ໃນພາກພື້ນ, ອີງຕາມອົງການຂ່າວລັດຖະບານທີ່ລາຍງານອອກມາໃນວັນຈັນ ມື້ນີ້, ເຊິ່ງເປັນການຢ້ຽມຢາມຄັ້ງທຳອິດຂອງພົນເອກຂັ້ນສູງກັບປະເທດເພື່ອນບ້ານທີ່ມີອິດທິພົນ ນັບຕັ້ງແຕ່ທ່ານໄດ້ຢຶດອຳນາດດ້ວຍການກໍ່ລັດຖະປະຫານໃນປີ 2021.
ນັບຕັ້ງແຕ່ການກໍ່ລັດຖະປະຫານ ມຽນມາ ໄດ້ເກີດຄວາມສັບສົນວຸ້ນວາຍຂຶ້ນ, ລວມທັງບໍລິເວນຕ່າງໆຢູ່ຕາມຂົງເຂດຊາຍແດນທີ່ຕິດກັບຈີນ ໃນຂະນະທີ່ ຂະບວນການຕໍ່ຕ້ານຕິດອາວຸດ ໄດ້ຮ່ວມມືກັບກຸ່ມທະຫານບ້ານຊົນເຜົ່າກຸ່ມນ້ອຍ ທີ່ຕັ້ງຂຶ້ນມາເພື່ອຍາດແຍ່ງເຂດການຄວບຄຸມດິນແດນຂະໜາດໃຫຍ່ຈາກລັດຖະບານທະຫານ.
ອົງການຂ່າວ MRTV ເປີດເຜີຍວ່າ ທ່ານ ມິນ ອອງ ລາຍ ຈະເຂົ້າຮ່ວມກອງປະຊຸມສຸດຍອດອະນຸພາກພື້ນລຸ່ມແມ່ນ້ຳຂອງ ແລະການຮ່ວມມືທາງຍຸດທະສາດດ້ານເສດຖະກິດຂອງແມ່ນໍ້າ ອີຢາວາດີ-ເຈົ້າພະຍາ-ແມ່ນ້ຳຂອງ ຫຼື ACMECS ພ້ອມທັງເຂົ້າຮ່ວມກອງປະຊຸມກັບ ກຳປູເຈຍ, ລາວ ແລະ ຫວຽດນາມ ຢູ່ເມືອງຄຸນໝິງ ໃນວັນທີ 6 ຫາ 7 ພະຈິກ ທີ່ຈະມາເຖິງນີ້.
“ທ່ານຈະມີການພົບປະ ແລະຫາລືກັບບັນດາເຈົ້າໜ້າທີ່ຈາກ ຈີນ ແລະຈະດໍາ ເນີນງານກ່ຽວກັບການເພີ້ມທະວີການພົວພັນສອງຝ່າຍ, ດ້ານເສດຖະກິດ ແລະການພັດທະນາໃນຂະແໜງການຕ່າງໆ,” ອີງຕາມຖະແຫຼງການທີ່ອ້າງເຖິງ ຫົວໜ້າຄະນະລັດຖະບານທະຫານ.
ກອງທັບມຽນມາ ກໍາລັງຊຸດໂຊມລົງ ເມື່ອປະເຊີນກັບການຕໍ່ຕ້ານຢ່າງໄວວາ ໂດຍບັນດານັກສູ້ຕ້ານລັດຖະບານທະຫານ ນັບຕັ້ງແຕ່ການໂຈມຕີທີ່ບໍ່ຄາດຄິດໃນເດືອນຕຸລາທີ່ຜ່ານມາ, ເຊິ່ງໄດ້ສ້າງຄວາມກັງວົນຕໍ່ ຈີນ, ເຮັດໃຫ້ ຈີນ ຕ້ອງປິດຊາຍແດນບາງສ່ວນ ແລະໂຈະການນໍາເຂົ້າທີ່ສໍາຄັນໄປຍັງຂົງເຂດ ທີ່ກຸ່ມກະບົດຄວບຄຸມຢູ່, ອີງຕາມລາຍງານຂອງອົງການຂ່າວ Reuters.
ຈີນ ມີຜົນປະໂຫຍດທາງຍຸດທະສາດດ້ານເສດຖະກິດກັບ ມຽນມາ, ລວມທັງທໍ່ສົ່ງນ້ຳມັນ ແລະອາຍແກັສຂ້າມປະເທດທີ່ສຳຄັນ ພ້ອມທັງທ່າເຮືອນ້ຳເລິກທີ່ໄດ້ວາງແຜນໄວ້ໃນອ່າວບັງກາລ (Bengal).
ປັກກິ່ງ ຍັງໄດ້ນຳເຂົ້າແຮ່ທາດຫາຍາກຈາກປະເທດເພື່ອນບ້ານທີ່ນ້ອຍກວ່າ ເພື່ອໃຊ້ໃນຂະແໜງຍານພາຫະນະລົດຍົນ ແລະຂະແໜງພະລັງງານລົມອື່ນໆ.
ຟໍຣັມສະແດງຄວາມຄິດເຫັນ