ໝູ່ບ້ານຊາວມຸສລິມທີ່ບໍ່ມີໃຜຮູ້ຈັກດີແຫ່ງນຶ່ງໃນນະຄອນຫຼວງ ນິວເດລີ ໄດ້ກາຍເປັນຈຸດສົນໃຈໃນລະດູໜາວຂອງປີ 2019-2020 ເວລາທີ່ແມ່ຍິງຫຼາຍພັນຄົນໄດ້ນັ່ງຢ່ອງຢໍ້ຢູ່ຕາມທາງຫຼວງເປັນເວລາສາມເດືອນເພື່ອປະທ້ວງກົດໝາຍວ່າດ້ວຍສັນຊາດ ທີ່ຖືກນຳສະເໜີໂດຍລັດຖະບານຊາດນິຍົມສາສະໜາຮິນດູຂອງ ອິນເດຍ ທີ່ຊາວມຸສລິມ ກ່າວວ່າ ມີການຈຳແນກຕໍ່ເຂົາເຈົ້າ.
ສີ່ປີຕໍ່ມາ, ເຂດຊົນຊັ້ນກຳມະກອນດັ່ງກ່າວ ທີ່ເອີ້ນວ່າ ຊາຮີນ ບາກ ໄດ້ປ່ຽນຈາກສະຖານທີ່ການປະທ້ວງໄປເປັນສູນກາງອາຫານທີ່ໄດ້ດຶງດູດຫຼາຍຮ້ອຍຄົນ.
ຜູ້ອາໄສຢູ່ໃນທ້ອງຖິ່ນໄດ້ເຊື່ອມໂຍງເອກະລັກໃໝ່ຂອງເຂົາເຈົ້າໃສ່ວັນ ທີ່ປະຊາຊົນຈາກຫຼາຍພາກສ່ວນທີ່ແຕກຕ່າງກັນຂອງເມືອງ ມາລວມກັນເພື່ອສະແດງຄວາມສາມັກຄີກັບບັນດາຜູ້ປະທ້ວງ ແລະ ມັກຈະນັ່ງນຳກັນພ້ອມກັບອາຫານຈຳນວນຫຼາຍ ຕັ້ງຮ້ານສະຫຼຽງຢູ່ກັບຖະໜົນ.
ນາງ ອາຊິຟ ມູດຕາບາ, ນຶ່ງໃນຜູ້ຈັດການປະທ້ວງນັ້ນກ່າວວ່າ “ເວລາເຈົ້ານັ່ງປະທ້ວງດົນ, ເຈົ້າຈະຮູ້ສຶກເມື່ອຍ ແລະ ຈາກຄວາມອິດເມື່ອຍເຈົ້າຈະໄປຮ້ານຂາຍຊາເພື່ອດື່ມນ້ຳຊາຈອກນຶ່ງນຳກັນ. ເຈົ້າບໍ່ມີແຕ່ດື່ມນ້ຳຊາເທົ່ານັ້ນ, ເຈົ້າຈະດູດຊຶມເອົາຄວາມຄິດດ້ວຍ. ມັນເປັນເວລານັ້ນທີ່ໝູ່ບ້ານທີ່ບໍ່ສຳຄັນນີ້ໄດ້ກາຍເປັນທີ່ຮູ້ຈັກ ສຳລັບຄວາມມີນ້ຳໃຈຂອງປະຊາຊົນຂອງເຂົາເຈົ້າ ແລະ ອາຫານທີ່ແຊບ.”
ອາຫານແມ່ນບໍ່ເຄີຍຢູ່ໄກຈາກການປະທ້ວງ. ຜູ້ອາໄສຢູ່ໃນທ້ອງຖິ່ນຈະເຮັດອາຫານຢູ່ບ້ານເພື່ອປະຄັບປະຄອງຜູ້ປະທ້ວງ ຜູ້ທີ່ນັ່ງຢູ່ເທິງທາງຫຼວງໃນລະດູໜາວທີ່ໜາວຈັດຈົນຮອດຕອນກາງຄືນ. ເຮືອນຄົວໃນຊຸມຊົນກໍໄດ້ປາກົດຂຶ້ນມາ. ອາສາສະໝັກຈາກນອກໝູ່ບ້ານແມ່ນໄດ້ນຳເອົາອາຫານ, ຊາ ແລະ ນ້ຳມາໃຫ້. ນັກຂ່າວ ທ່ານ ທານຸສຣີ ບາຊິນ, ຜູ້ທີ່ໄດ້ພົບກັບເຂດດັ່ງກ່າວເປັນຄັ້ງທຳອິດ ໃນລະຫວ່າງການປະທ້ວງ, ເວົ້າວ່າ ປະຊາຊົນໄດ້ຖືກດຶງດູດກັບຄືນມາໂດຍຄວາມເອື້ອຍເຟື້ອເຜື່ອແຜ່ທີ່ຫຼາຍຄົນໄດ້ປະສົບ ເວລາທີ່ຄົນໃນທ້ອງຖິ່ນ ແລະ ຈາກບ່ອນອື່ນແບ່ງປັນອາຫານກັນ.
ຟໍຣັມສະແດງຄວາມຄິດເຫັນ