ສບາຍດີແຟນລາຍການສຽງເພງຈາກແດນໄກຂອງ VOA ແລະຍິນດີຕ້ອນຮັບທຸກໆທ່ານ
ເຂົ້າສູ່ລາຍການສຽງເພງຈາກແດນໄກຂອງ VOA ໃນຄໍ່າຄືນນີ້ ຕັ້ງໃຈທີ່ຈະມາຈັດເພງໃຫ້ທ່ານຜູ້ຟັງແບບຫວານໆ ແບບວ່າຟັງໄປ ຝັນໄປ ຈິນຕະນາການໄປຄິດຮອດເຈົ້າຂອງສຽງໄປ...ຕ້ອງຟ້າວໄປຟັງເພງຂອງນ້ຳຫວານ ກັນແລ້ວລະວ່າ ຈະມ່ວນສົມກັບຄຳກ່າວໄວ້ຫຼືບໍ່...ເຊີນຟັງເພງ ສັນຍາຮັກ.
ສ່ວນເພງຣ໊ອກ ຕໍ່ໄປນີ້ ເປັນຜົນງານເພງຂອງ ເລະ ແກ້ວທະວີ ສິນລະປິນ ລາວອາເມຣິກັນ ຈາກລັດ Florida ທີ່ໄດ້ກັ່ນກອງຄວາມຮູ້ສຶກທີ່ດີອອກມາເປັນບົດກອນ ແຕ່ງເປັນເພງເພື່ອມອບໃຫ້ກັບສາວລາວໂດຍສະເພາະ ຊຶ່ງມີຄວາມໝາຍຂອງຄວາມເປັນກຸນລະສະຕີ ອັນງົດງາມຂອງລາວ ໃນບົດເພງ ສາວງາມເມືອງລາວ ຫວັງວ່າທ່ານຜູ້ຟັງຄົງເຫັນດ້ວຍໃນບົດເພງນີ້…ຂໍຈັດເພງໃຫ້ຜູ້ຟັງ ບຸນເລັ່ງ ໂພທິລາດ ຜູ້ຟັງຈາກສປປ ລາວ ທີ່ມາເຮັດວຽກຢູ່ປະເທດໄທ ຂຽນບອກມາວ່າ ຫຼັງຈາກທີ່ໄດ້ຟັງເພງ ທີ່ທາງເຮົາຈັດໃຫ້ໄປແລ້ວ ຄິດຮອດບ້ານ ຄິດຮອດຕອນຍັງນ້ອຍທີ່ຈູງຄວາຍກິນຫຍ້າວ່າຊັ້ນ. ຈັ່ງໃດເອື້ອຍວັນນະສອນ ກໍຂໍເປັນກຳລັງໃຈໃຫ້ຄົນໄກບ້ານທີ່ອອກມາເຮັດວຽກໃນຕ່າງແດນ ໃຫ້ອົດທົນ ອົດກັ້ນ ຕັ້ງໃຈແລະສູ້ທົນຕໍ່ໄປ ເພື່ອສິ່ງທີ່ດີໃນວັນຂ້າງໜ້າທີ່ລໍຢູ່ ແລະຫວັງວ່າເພງນີ້ຄົງເຮັດໃຫ້ ບຸນເລັ່ງ ຍັງມີຄວາມຮູ້ສຶກວ່າ ສາວລາວຍັງງົດງາມສະເໝີໄປ.
ຂໍນຳສະເໜີຜົນງານເພງໃໝ່ຂອງສິນລະປິນລາວ-ການາດາ ພີດ ສະກຸນກູ້ ສິນລະປິນໜ້າ
ໃໝ່ຢູ່ໃນວົງການເພງລາວຕ່າງແດນ…ຂໍຝາກຜົນງານເພງນີ້ ໄວ້ໃຫ້ຄົນລາວທຸກໆທ່ານ
ໃນບົດເພງ ໂຊກດີທີ່ຮັກ.
