ຊາວລາວຫລາຍກວ່າ 721,000 ຄົນເດິນທາງໄປຊອກຫາວຽກເຮັດງານທຳຢູ່ໃນໄທ ໃນ 7 ເດືອນຕົ້ນປີ 2024 ຂະນະທີ່ລັດຖະມົນຕີລາວ ຍອມຮັບວ່າມີແຮງງານລາວ 2 ແສນກວ່າຄົນ ໄປເຮັດວຽກຢູ່ໄທ ແບບຜິດກົດໝາຍ. ຊົງຣິດ ໂພນເງິນ ມີລາຍງານ ກ່ຽວກັບເລື້ອງນີ້ຈາກບາງກອກ.
ເຈົ້າໜ້າທີ່ໄທ ປະຈໍາຫ້ອງການຄົນເຂົ້າເມືອງ ເປີດເຜີຍວ່າ: ໃນໄລຍະເດືອນມັງກອນ ຫາ ກໍລະກົດ 2024 ມີພົນລະເມືອງລາວທີ່ເດີນທາງໄປທ່ອງທ່ຽວປະເທດໄທທັງໝົດ 721.924 ຄົນ, ເພີ່ມຂຶ້ນ 46.2% ເມື່ອທຽບໃສ່ໄລຍະດຽວກັນຂອງປີ 2023. ດັ່ງນັ້ນ, ຈືງຄາດຫມາຍວ່າໃນຕະຫຼອດປີ 2024 ຈະມີພົນລະເມືອງລາວຫລາຍກວ່າ 1.23 ລ້ານຄົນທີ່ຈະເດິນທາງໄປໄທໃນຖານະນັກທ່ອງທ່ຽວ ແຕ່ຖ້າຫາກພິຈາລະນາສະພາບຕົວຈິງທີ່ປະຊາຊົນລາວຕ້ອງປະເຊີນກັບວິກິດການເສດຖະກິດຢ່າງໜັກໜ່ວງນັບແຕ່ປີ 2023 ເປັນຕົ້ນມາຈົນເຖິງປັດຈຸບັນ. ຈຶ່ງຖືວ່າຈໍານວນຄົນລາວທີ່ຈະເດີນທາງໄປໄທ ເປັນນັກທ່ອງທ່ຽວແທ້ໆນັ້ນ ມີບໍ່ເກີນ 3 ແສນຄົນ ກວມເອົາ 25% ເທົ່ານັ້ນ ສ່ວນທີ່ເຫຼືອ 75% ຄືຄົນລາວທີ່ເຂົ້າມາເຮັດວຽກແບບຜິດກົດໝາຍຢູ່ໄທ.
ໃນປະຈຸບັນ, ມີຄົນງານມຽນມາ, ລາວ, ກຳປູເຈຍ, ຫວຽດນາມ ໄປເຮັດວຽກຢູ່ໄທຢ່າງຖືກຕ້ອງຕາມກົດໝາຍ. ຈໍານວນທັງໝົດມີຫຼາຍກວ່າ 3.34 ລ້ານຄົນ, ໃນນັ້ນ ມີແຮງງານລາວ 277,354 ຄົນ ທີ່ໄປເຮັດວຽກຢູ່ໄທຢ່າງຖືກຕ້ອງຕາມກົດໝາຍ. ໃນຂະນະທີ່ເຄືອຂ່າຍຊ່ວຍເຫລືອແຮງງານອາຊຽນ ຄາດຄະເນວ່າ ປະຈຸບັນ ມີຄົນງານລາວຫລາຍກວ່າ 900,000 ຄົນທີ່ເຮັດວຽກຢູ່ໄທ. ໝາຍຄວາມວ່າ ໃນເວລານີ້ ມີຄົນງານລາວ ທີ່ໄປເຮັດວຽກຢູ່ໄທແບບຜິດກົດໝາຍ ຫຼາຍກວ່າ 6 ແສນຄົນ ແຕ່ທາງການລາວ ຄາດວ່າ ມີຄົນງານລາວ ໄປເຮັດວຽກ ແບບຜິດກົດໝາຍ ຢູ່ໄທປະມານ 2 ແສນກວ່າຄົນ ແລະ ເຮັດວຽກ ຢູ່ໄທ ແບບຖືກຕ້ອງ ຕາມກົດໝາຍ ທັງໝົດປະມານ 2 ແສນກວ່າຄົນທີ່ມີລາຍໄດ້ລວມຫຼາຍກວ່າ 625 ລ້ານໂດລາຕໍ່ປີ ດັງທີ່ທ່ານນາງໃບຄໍາ ຂັດຕິຍະ ລັດຖະມົນ ຕີກະຊວງແຮງງານ ແລະ ສະຫວັດດີການສັງຄົມ. ໃຫ້ການຢືນຢັນວ່າ:
“ປະຈຸບັນ, ພວກເຮົາໄດ້ສົ່ງຄົນງານໄປຕ່າງປະເທດມີທັງໝົດ 212.795 ຄົນ. ແຕ່ຍັງມີຄົນງານຈຳນວນບ່ໜ້ອຍ, ປະມານ 203.161 ຄົນ, ທີ່ຈິງແລ້ວໄປເຮັດວຽກແບບຜິດກົດໝາຍ, ໄປດ້ວຍຕົນເອງ ແລະ ຜ່ານການປະສານສົມທົບກັບປະເທດປາຍທາງ ແລະ ໂດຍຜ່ານການເກັບກຳຂໍ້ມູນຕົວຈິງແລ້ວ, ພວກເຮາຄາດຄະເນວ່າຄົນງານທີ່ໄປເຮັດວຽກຢູ່ໃນຕ່າງປະເທດນີ້ ຈະມີລາຍຮັບປະມານ 625 ລ້ານໂດລາຕໍ່ປີ.”
ສ່ວນ ສະມາຊິກສະພາແຫ່ງຊາດລາວ ໃຫ້ການຢືນຢັນວ່າການໂຈະການເຂົ້າຮຽນຂອງຊາວໜຸ່ມລາວທຸກຂັ້ນຍັງສືບຕໍ່ເພີ່ມຂຶ້ນ. ອັນນີ້ ເກີດຈາກວິກິດການທາງເສດຖະກິດ ທີ່ເຮັດໃຫ້ຄ່າເງິນກີບຫຼຸດລົງຢ່າງແຮງ ແລະ ອັດຕາເງິນເຟີ້ສູງທີ່ສຸດໃນອາຊຽນ ຄືຢູ່ທີ່ລະດັບ 26.1%, ແລະ ດັດຊະນີລາຄາການຊມໃຊ້ຍັງສືບຕໍ່ເພີ່ມຂຶ້ນຫຼາຍກວ່າ 239% ໃນເດືອນກໍລະກົດ 2024 ເຊິ່ງເຮັດໃຫ້ພໍ່ແມ່ປະຊາຊົນບໍ່ສາມາດສະໜອງທຶນການສຶກສາຊັ້ນສູງໃຫ້ລູກຂອງພວກເຂົາເຈົ້າ ພາຍໃຕ້ສະຖານະການດັ່ງກ່າວ ກະຍັງເປັນປັດໄຈສຳຄັນທີ່ເຮັດໃຫ້ເກີດການຂາດແຄນແຮງງານໃນທຸກຂະແໜງການຜະລິດໃນລາວ. ຍ້ອນວ່າ ຊາວໜຸ່ມລາວທີ່ຢຸດຮຽນ ໄປເຮັດວຽກຢູ່ໄທ. ເຖິງແມ່ນວ່າມັນເປັນວຽກທີ່ຜິດກົດຫມາຍ. ແຕ່ດ້ວຍອັດຕາຄ່າຈ້າງທີ່ສູງກວ່າຢູ່ລາວເຖິງ 5 ເທົ່າ, ສະນັ້ນ ເຂົາເຈົ້າຈຶ່ງເດີນທາງໄປເຮັດວຽກຢູ່ໄທ. ດັງທີ່ ສະມາຊິກສະພາແຫ່ງຊາດລາວ ໃຫ້ທັດສະນະວ່າ:
“ການເຄື່ອນຍ້າຍແຮງງານນີ້ແມ່ນລະບົບປົກກະຕິ. ແຕ່ຂອງໄທເຮານີ້ມັນບໍ່ປົກກະຕິເຫດຜົນຍ້ອນຕອນນີ້ພວກເຮາກຳລັງເຫັນຜົນກະທົບ ຖ້າແຮງງານພວກເຮາຫລາຍພຽງພໍຫັ່ນຫນະ ແລ້ວບໍ່ໄປກະທົບເຖິງ ເຂາເອິ່ນວ່າ, ນັກສຶກສາອອກຈາກລະບົບການສຶກສາ ອັນນີ້ ກະແມ່ນຫນຶ່ງໃນສາເຫດທີ່ພວກເຂົາເຈ້າຍາກໄດ້ເງິນເດືອນຫຼາຍ ຍ້ອນຄວາມທຸກຍາກ ບໍ່ຕໍານິຕິເຂາເຈ້າເດ້ ຢ່າງຫນ້ອຍຫນະ ເຂາເຈ້າພໍຍູ່-ພໍກິນ. ເຂາເຈ້າກະບໍ່ຢາກໄປດອກ. ໄປເຮັດວຽກຍູ່ບ້ານເມືອງເພິ່ນນີ້ຫນະ ມັນທຸກແທ້ໆເດ້.”
ສ່ວນນັກທຸລະກິດຈີນຢູ່ລາວ ໃຫ້ການຢືນຢັນວ່າເຫດຜົນຕົ້ນຕໍທີ່ບໍລິສັດຕ່າງປະເທດມາລົງທຶນຢູ່ລາວ ແມ່ນຍັງຕ້ອງນໍາເຂົ້າແຮງງານຈາກຕ່າງປະເທດເປັນສ່ວນຫລາຍເປັນຍ້ອນຄົນງານລາວຕອບສະຫນອງໄດ້ບໍ່ພຽງພໍກັບຄວາມຕ້ອງການຂອງບໍລິສັດຕ່າງປະເທດ ທັງນີ້ ກໍຍ້ອນວ່າແຮງງານລາວສ່ວນຫລາຍເປັນແຮງງານທີ່ບໍ່ມີຄວາມຮູ້ ແລະ ຄວາມສາມາດທາງດ້ານເຕັກນິກທີ່ທັນສະໄຫມໃນການຜະລິດສິນຄ້າຕ່າງໆ. ລວມທັງນັກສຶກສາລາວສ່ວນຫຼາຍມີເປົ້າໝາຍໃນການເຮັດວຽກເປັນພະນັກງານລັດຖະກອນ. ສະນັ້ນ, ຈຶ່ງເປັນການພັດທະນາຊັບພະຍາກອນມະນຸດທີ່ບໍ່ສອດຄ່ອງກັບການພັດທະນາເສດຖະກິດ-ສັງຄົມຂອງລາວໃນໄລຍະໃໝ່.
ສ່ວນເຈົ້າໜ້າທີ່ ກະຊວງສຶກສາທິການ ແລະ ກິລາ ຢືນຢັນວ່າການຢຸດຕິການສຶກສາຂອງຊາວໜຸ່ມລາວຍັງສືບຕໍ່ເພີ່ມຂຶ້ນ. ສ່ວນທຶນການສຶກສາຈາກຕ່າງປະເທດ ກະມີ ຈໍາກັດ. ເພາະຕ່າງປະເທດໄດ້ຫຼຸດຈໍານວນທຶນການສຶກສາທີ່ໃຫ້ແກ່ລາວ.
ຟໍຣັມສະແດງຄວາມຄິດເຫັນ