ຄວາມເຄັ່ງຕຶງຍັງສືບຕໍ່ສູງຂື້ນໃນເອເຊຍ ຍ້ອນການຂັດແຍ້ງຜິດ
ຖຽງກັນເລື້ອງເຂດນຳ້ແດນດິນທາງທະເລ. ເກົາຫລີໃຕ້ ໄດ້ເດີນ
ໜ້າໄປກັບການເຝິກຊ້ອມທາງທະຫານ ໃກ້ກັບເກາະນ້ອຍໆ
ເກາະນຶ່ງທີ່ຕົນຄວບຄຸມ ເຖິງແມ່ນວ່າມີການປະທ້ວງຈາກ ຍີ່ປຸ່ນ
ທີ່ອ້າງເອົາເກາະດັ່ງກ່າວເຊັ່ນກັນ. ສ່ວນຈີນນັ້ນ ກໍໄດ້ເອົາຖານ
ເຈາະນຳ້ມັນແຫ່ງທີ່ສອງ ໄປຕັ້ງຂຶ້ນຢູ່ໃນນ່ານນຳ້ ນອກຝັ່ງທະເລ
ຫວຽດນາມ ບ່ອນທີ່ທັງສອງປະເທດ ໄດ້ມີການຂັດແຍ້ງຜິດຖຽງ
ກັນມາ ຢ່າງຍືດເຍື້ອ. Steve Herman ລາຍງານ ມາຈາກຫ້ອງ
ການຂອງ VOA ປະຈຳເອເຊຍອາຄະເນ ທີ່ບາງກອກ ຊຶ່ງ
ກິ່ງສະຫວັນ ຈະນຳມາສະເໜີທ່ານ.
ກອງທັບເຮືອເກົາຫລີໃຕ້ ກ່າວວ່າ ຕົນໄດ້ທຳການຊ້ອມຍິງປືນ ຢູ່ນອກຝັ່ງທະເລກ້ຳຕາເວັນ
ອອກຂອງຕົນ ໃນວັນສຸກທ້າຍອາທິດກ່ອນນີ້ ເພື່ອຍົກສູງສະມັດຕະພາບຂອງຕົນ ໃນການ
ຂັບໄລ່ການໂຈມຕີໃດໆທີ່ອາດມີຂຶ້ນໄດ້ ຈາກເຮືອດຳນໍ້າຂອງເກົາຫລີເໜືອ.
ອົງການຂ່າວ Yonhap ກ່າວວ່າ ການເຝິກຊ້ອມໄດ້ປະຕິບັດຢູ່ໃນເຂດນ່ານນໍ້າ ດັ່ງກ່າວມາ
ເປັນປົກກະຕິ ແຕ່ວ່າເທື່ອນີ້ເປັນເທີ່ອທຳອິດ ທີ່ທາງກອງທັບໄດ້ປະ ກາດອອກມາ ຢ່າງ
ເປີດເຜີຍ.
ແລະນັ້ນໄດ້ເຮັດໃຫ້ມີການຕອບໂຕ້ຢ່າງແຮງແລະໂດຍໄວຈາກຍີ່ປຸ່ນ ທີ່ອ້າງວ່າ ບໍລິເວນ
ເຝິກຊ້ອມທີ່ເກົາຫລີໃຕ້ປະກາດອອກໄປນັ້ນ ແມ່ນຮວມເອົາທັງເຂດນ່ານນໍ້າຂອງຍີ່ປຸ່ນ.
ເຂດດັ່ງກ່າວແມ່ນຢູ່ໃກ້ກັບເກາະ ທີ່ເກົາຫລີໃຕ້ໄດ້ປົກຄອງມາ ເປັນເວລາຫລາຍທົດສະວັດ
ທີ່ຮ້ອງວ່າ Dokdo ແລະຍີ່ປຸ່ນຮ້ອງວ່າ Takeshima.
ຫົວໜ້າຫ້ອງວ່າການລັດຖະບານຍີ່ປຸ່ນ ທ່ານ Yoshihide Suga ກ່າວວ່າ ການເຝິກຊ້ອມ
ຂອງເກົາຫລີໃຕ້ ເປັນທີ່ຮັບເອົາບໍ່ໄດ້.
ຫົວໜ້າຫ້ອງວ່າການລັດຖະບານ ກໍຄືຫົວໜ້າໂຄສົກລັດຖະບານຍີ່ປຸ່ນ ທ່ານ Suga ເວົ້າວ່າ
“ການກະທຳຂອງລັດຖະບານໂຊລ ແມ່ນເປັນທີ່ໜ້າເສຍໃຈຢ່າງຍິ່ງ” ແລະໂຕກຽວ
ຮຽກຮ້ອງຢ່າງແຮງໃຫ້ລົບລ້າງການເຝິກຊ້ອມນັ້ນເສຍ.
ທາງໂຄສົກກະຊວງປ້ອງກັນປະເທດເກົາຫລີໃຕ້ ທ່ານ Wi Yong–seop ກ່າວວ່າ ເກົາຫລີ
ໃຕ້ແມ່ນ “ຈະບໍ່ນຳເອົາມາພິຈາລະນາຢ່າງເດັດຂາດ ຄຳຮຽກຮ້ອງ ຫລືການແຊກແຊງໃດໆ"
ຈາກຍີ່ປຸ່ນ ກ່ຽວກັບເລື່ອງນີ້.
ທ່ານ Wi ກ່າວເພີ້ມເຕີມວ່າ ການເຝິກຊ້ອມ ທີ່ທ່ານບອກລັກສະນະວ່າ ເປັນການປ້ອງກັນຕົນ
ເອງນັ້ນ “ກຳລັງກ້າວໜ້າໄປຕາມແຜນ.”
ການເຝິກຊ້ອມຂອງເກົາຫລີໃຕ້ ໃຊ້ເຮືອລົບ 19 ລໍາ ແລະລາຍງານຂ່າວເວົ້າວ່າ ມີຮວມທັງ
ການຍິງລູກຈະຫລວດ torpedo ຍິງລູກສອນໄຟ Cruise ຈາກເຮືອໃສ່ເຮືອ ແລະລູກສອນ
ໄຟ Harpoon ຈາກອາກາດສູ່ທະເລ.
ກອງທັບເຮືອເກົາຫລີໃຕ້ ອ້າງຄຳເວົ້າ ຂອງພົນເຮືອເອກ Hwang Ki-chul ຫົວໜ້າຝ່າຍ
ປະຕິບັດການຂອງກອງທັບເຮືອວ່າ ທ່ານໄດ້ອອກຄຳສັ່ງໃຫ້ນາຍທະຫານ ຕິດຕາມເຮືອດຳ
ນໍ້າເກົາຫລີເໜືອ ໄປໃຫ້ເຖິງທີ່ສຸດ ແລະ “ຝັງພວກ ເຂົາໄວ້ຢູ່ໃຕ້ທະເລ” ຖ້າຫາກຖືກກໍ່ກວນ.
ເມື່ອຕົ້ນອາທິດດຽວກັນນັ້ນ ຜູ້ນໍາເກົາຫລີເໜືອ ທ່ານ Kim Jong
Un ໄດ້ອອກໄປກວດກາໜ່ວຍທະຫານເຮືອຂອງທ່ານ ໃນເຂດທະ
ເລຕາເວັນອອກ ແລະໄດ້ຖ່າຍຮູບຢູ່ຫໍຄອຍເຮືອດຳນໍ້າເກົ່າເຂົ້າຂີ້
ໝ້ຽງລຳນຶ່ງ.
ສື່ຂອງລັດໄດ້ອ້າງຄໍາເວົ້າ ຂອງທ່ານ Kim ທີ່ບອກພວກຜູ້ບັນຊາ
ການ ແລະທະຫານເຮືອວ່າ ເຂົາເຈົ້າຕ້ອງລະມັດລະວັງ “ສັດຕູທີ່
ກຽດຊັງເຂົາເຈົ້າ” ແລະ ກຳລັງລໍຖ້າໂອກາດທີ່ຈະບຸກລຸກ ເພາະ
ສະນັ້ນ ມັນຈຶ່ງຈຳເປັນທີ່ສຸດ ທີ່ຈະຕ້ອງຕຽມພ້ອມສຳຫລັບການ
ສູ້ລົບ.
ສາມພັນກິໂລແມັດ ລົງໄປທາງທິດໃຕ້ ການເຄື່ອນໄຫວທາງທະເລທີ່ເພີ້ມທະວີຂຶ້ນຂອງຈີນ
ສືບຕໍ່ດຶງດູດຄວາມສົນໃຈ ແລະຄວາມເປັນຫ່ວງຢ່າງໃຫຍ່ ຈາກຫວຽດນາມ.
ຫ້ອງການຄວາມປອດໄພທາງທະເລຂອງຈີນ ປະກາດວ່າ ຕົນໄດ້ເອົາຖານເຈາະນຳ້ມັນ
ແຫ່ງທີ່ສອງມີຊື່ວ່າ Nanhai-9 ໄປຕັ້ງໄວ້ ຢູ່ໃນບໍລິເວນນ່ານນຳ້ ທີ່ຢູ່ຫ່າງໄກເທົ່າໆກັນ
ຈາກເກາະ Hainan ຂອງຈີນ ແລະຝັ່ງທະເລຂອງ ຫວຽດນາມ.
ຖານເຈາະນຳ້ມັນແຫ່ງໃໝ່ນີ້ ທີ່ຈີນເອົາໄປຕັ້ງຢູ່ອ່າວຕົງແກງ ບ່ອນທີ່ບໍ່ໄດ້ມີການເຫັນພ້ອມ
ເປັນອັນດຽວກັນ ກ່ຽວກັບການປັກເຂດຊາຍແດນນັ້ນ ແມ່ນຢູ່ໄກຈາກ ໝູ່ເກາະ Paracel ທີ່
ເປັນເຂດຜິດຖຽງກັນນັ້ນ ຫລາຍກ່ວາຖານເຈາະນຳ້ມັນແຫ່ງທຳອິດຂອງຈີນ.
ການເອົາຖານເຈາະນຳ້ມັນແຫ່ງທຳອິດ ເປັນເອີ້ນວ່າ Haiyang Shiyou-981 ໄປຕັ້ງໄວ້ໃນ
ຕົ້ນເດືອນແລ້ວນີ້ ໄດ້ເຮັດໃຫ້ຄວາມເຄັ່ງຕືງທະວີຂຶ້ນມາໃໝ່ ລະຫວ່າງ ປັກກິ່ງ ແລະຮ່າໂນຍ
ທີ່ໄດ້ກ່າວຫາກັນແລະກັນວ່າ ອີກຝ່າຍເອົາເຮືອແລ່ນຕຳເຮືອຂອງຕົນ. ມັນຍັງໄດ້ເຮັດໃຫ້ເກີດການປະທ້ວງຕໍ່ຕ້ານຈີນຢ່າງແຮງ ຢູ່ໃນຫວຽດນາມອີກ.
ຈີນໄດ້ເອົາ ກຳປັ່ນພົນລະເຮືອນ ແລະເຮືອຍາມຝັ່ງ 80 ລຳ ຕິດຕາມໄປສົ່ງຖານເຈາະນຳ້
ມັນແຫ່ງທຳອິດ ຢູ່ບ່ອນຕິດຕັ້ງ ໃນເຂດເສດທະກິດທີ່ເປັນຂອງຫວຽດນາມ ໂດຍສະເພາະນັ້ນ.
ການຫາລືກັນທີ່ເຄັ່ງຕືງລະຫວ່າງສອງຝ່າຍ ຢູ່ຮ່າໂນ້ຍ ເມື່ອກາງເດືອນນີ້ ກ່ຽວກັບຖານເຈາະ
ນໍ້າມັນນັ້ນ ບໍ່ມີລາຍງານວ່າ ໄດ້ມີຄວາມກ້າວໜ້າໃດໆ.
ຈີນໄດ້ຍາດເອົາ ເຄືອໝູ່ເກາະ Paracel ຈາກຫວຽດນາມໃຕ້ ໄປໃນປີ 1974. ປະເທດທັງ
ສອງໄດ້ຕໍ່ສູ້ສົງຄາມຊາຍແດນ ທາງບົກກັນໃນຫ້າປີຕໍ່ມາ.
ປັກກິ່ງ ອ້າງເອົາເຂດແດນທັງໝົດຂອງທະເລຈີນໃຕ້ ຊຶ່ງເປັນນ່ານນຳ້ທີ່ອຸດົມສົມບຸນໄປດ້ວຍຊັບພະຍາກອນທຳມະຊາດ.
ນອກຈາກຫວຽດນາມ ແລະຈີນແລ້ວ ອີກຫ້າລັດຖະບານ ອັນມີ ບຣູໄນ ອິນໂດເນເຊຍ ມາເລເຊຍ ຟິລິບປີນ ແລະໄຕ້ຫວັນ ກໍໄດ້ອ້າງເອົາກຳມະສິດກວມກັນຢູ່ໃນທະເລຈີນໃຕ້ນັ້ນ.
