ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ການຢູ່ຮ່ວມກັນຂອງຊຸມຊົນຢູ່ໃນທ້ອງຖິ່ນ ແລະວັດທະນະທໍາຂອງຊາວຜູ້ອົບພະຍົບລາວ ໃນລັດເທັນເນັສຊີຂອງ ສະຫະລັດ


ການຢູ່ຮ່ວມກັນຂອງຊຸມຊົນຢູ່ໃນທ້ອງຖິ່ນ ແລະວັດທະນະທໍາຂອງຊາວຜູ້ອົບພະຍົບລາວ ໃນລັດເທັນເນັສຊີຂອງ ສະຫະລັດ.

ສະຫະລັດ ມີປະຊາກອນທີ່ມາຈາກຫຼາຍເຊື້ອຊາດ ສາດສະໜາ ແລະພາສາທີ່ແຕກຕ່າງກັນ, ແລະປະເທດແຫ່ງນີ້ ກໍເປັນດິນແດນທີ່ມີຫຼາຍໆຄົນ ປາຖະໜາຢາກເຂົ້າມາຕັ້ງຕົ້ນ ແລະສ້າງຊີວິດໃໝ່. ແຕ່ການເຂົ້າມາຂອງຜູ້ຄົນຈາກຕ່າງຖິ່ນ ຍ່ອມນໍາມາເຊິ່ງຄວາມແຕກຕ່າງທາງດ້ານວັດທະນະທໍາ ແລະການດໍາລົງຊີວິດ.

ອີງຕາມສະຖິຕິຄົນເຂົ້າເມືອງທີ່ຖືກຕ້ອງຕາມກົດໝາຍ ຈາກປີ 2010 ຫາ 2021 ພົບວ່າ ມີຈໍານວນທັງໝົດ 45.4 ລ້ານຄົນ Monthly Census Bureau Data Shows Big Increase in Foreign-Born (cis.org) ໃນນັ້ນ, ມີອົບພະຍົບເຊື້ອສາຍລາວ ທີ່ໄດ້ເຂົ້າມາຕັ້ງຖິ່ນຖານໃນຊ່ວງສົງຄາມຫວຽດນາມ ມີຈໍານວນ 254,000 ຄົນ ອີງຕາມສະທິຕິໃນປີ 2000 ຫາ 2019 (Laotians | Data on Asian Americans | Pew Research Center). ໃນນັ້ນ, ລັດທີ່ມີປະຊາຊົນອາເມຣິກັນເຊື້ອສາຍລາວອາໄສຢູ່ຫຼາຍກວ່າໝູ່ແມ່ນເມືອງ Sacramento, CA ມີຈໍານວນ 11,000 ຄົນ, ເມືອງ San Francisco, CA ມີຈໍານວນ 9,000 ແລະ ເມືອງ Minneapolis, MN ມີຈໍານວນ 8,000 ຄົນ ຕາມລໍາດັບ.

ດຣ. ຈັນໂທ ສຸຣິໂຍ, ປະທານກິດຕິມະສັກຂອງວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.
ດຣ. ຈັນໂທ ສຸຣິໂຍ, ປະທານກິດຕິມະສັກຂອງວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.

ສໍາລັບລັດ TN ມີປະຊາຊົນຊາວອາເມຣິກັນເຊື້ອສາຍລາວອາໄສຢູ່ຈໍານວນປະມານ 7,000 ຄົນ, ເຊິ່ງຈະແຈກຢາຍກັນຢູ່ບໍລິເວນເມືອງ ນາສວີລ, ເມີຟຣີໂບໂຣ ແລະເມືອງອື່ນໆທີ່ຢູ່ໃກ້ຄຽງ.

ວັດລາວພຸດທາຣາມ, ເປັນວັດລາວ ທີ່ໄດ້ຮັບການສ້າງຕັ້ງຂຶ້ນໂດຍຊາວລາວອົບພະຍົບໃນຕົ້ນຊຸມປີ 1980 ເພື່ອໃຫ້ເປັນສູນລວມຈິດໃຈຂອງຊາວພຸດ, ໂດຍຕັ້ງຢູ່ບໍລິເວນທີ່ໃກ້ຄຽງກັບສະຖານທີ່ທ່ອງທ່ຽວທາງປະຫວັດສາດດ້ານສະໜາມລົບ ຫຼື Battle Field ຂອງເມືອງພຽງ 3 ນາທີເທົ່ານັ້ນ. ດັ່ງນັ້ນ, ການປະສານງານ ແລະພົວພັນກັນຈຶ່ງເປັນປັດໄຈສໍາຄັນຂອງຄະນະກໍາມະການ ເພື່ອໃຫ້ງານບຸນທີ່ຈັດຂຶ້ນຕາມຂະນົບທໍານຽມ ດໍາເນີນໄປແບບບໍ່ຂັດຂ້ອງ ຫຼືສ້າງຄວາມຫຍຸ້ງຍາກໃຫ້ແກ່ຊຸມຊົນໃກ້ຄຽງ, ດັ່ງທີ່ ດຣ. ຈັນໂທ ສຸຣິໂຍ, ປະທານກິດຕິມະສັກຂອງວັດລາວພຸດທາຣາມ ພ້ອມທັງເປັນ City council ທີ່ປະສານງານກັບລັດຖະບານທ້ອງຖິ່ນ ກ່າວວ່າ:

“ກ່ອນພວກເຮົາຊິໄດ້ເຮັດບຸນແຕ່ລະປີ ກໍໄດ້ເຊື້ອເຊີນເຈົ້າໜ້າທີ່ ທ່ານເຈົ້າເມືອງຕ່າງໆ ຫົວໜ້າຕໍາຫຼວດ ຫົວໜ້າເຂດ ຕໍາຫຼວດເຂດ ຜູ້ວ່າການເຂດ ເຊີນໝົດຕຄັນບໍ່ໄດ້ມາກໍຕ້ອງໄດ້ເຊີນໄປໝົດທຸກຄົນ ເພື່ອມາໂອ້ລົມກັນວ່າຊິມີຫຍັງຂຶ້ນທຸກຢ່າງ ພວກເຮົາກໍເລີຍໄດ້ເຮັດແບບນັ້ນ ເພື່ອແຈ້ງໃຫ້ເພິ່ນຮູ້ຈັກ ເຮົາຢູ່ນໍາເພິ່ນ ເຮົາຕ້ອງຢາກຮູ້ຈັກເພິ່ນ, ໃຫ້ເພິ່ນຮູ້ຈັກເຮົາອີກ ມັນຈຶ່ວເຂົ້າໃຈກັນດີ. ຖາມ: ຕາມປະສົບການຂອງທ່ານ ດຣ. ເນາະ ວຽກງານທາງສັງຄົມກໍມີຢ່າງຫຼວງຫຼາຍ, ແລະ ດຣ. ສັງເກດ ພ້ອມທັງໃຫ້ຄໍາຕອບຂະນ້ອຍໄດ້ບໍວ່າ ໃນການຮ່ວມກັນຢ່າງມີຄວາມສຸກ ບໍ່ວ່າຊິເປັນການຕ່າງເຊື້ອຊາດ ສາດສະໜານີ້ ພວກເຮົາຄວນຖືເອົາຈຸດໃດເປັນຫຼັກ? ຕອບ: ຈຸດສໍາຄັນແທ້ໆກໍຄືວ່າການພົວພັນ ກະຄິດວ່າເປັນການທີ່ດີທີ່ສຸດ ເຮົາໃນຖານະນຶ່ງຄ້າຍໆວ່າເປັນຄົນກາງ ຄັນມາຢູ່ກະ ການພົວພັນນິແມ່ນສໍາຄັນຫຼາຍ.”

ຜູ້ເຂົ້າຮ່ວມໃນຂະບວນແຮ່ ຈາກວັດລາວພຸທປະທີບ.
ຜູ້ເຂົ້າຮ່ວມໃນຂະບວນແຮ່ ຈາກວັດລາວພຸທປະທີບ.

ໃນໄລຍະທ້າຍເດືອນພຶດສະພາຂອງທຸກໆປີ ເຊິ່ງກົງກັບຊ່ວງໄລຍະບຸນ ແມມໂມຣີໂອເດ ຂອງສະຫະລັດ (Memorial Day). ໃນງານບຸນມື້ນີ້ ຈະເລີ້ມຕົ້ນຂຶ້ນຕັ້ງແຕ່ຕອນສວາຍຂອງວັນສຸກ ສຸດທ້າຍຂອງເດືອນ ຫາ ຕອນເຊົ້າວັນຈັນສຸດທ້າຍຂອງເດືອນ ປະກອບມີການສະແດງຮ້ອງເພງ ໝໍລໍາ ແລະດົນຕີອື່ນໆລວມທັງໝົດສາມເວທີ, ໃນນັ້ນ ມີຜູ້ມາຂາຍອາຫານການກິນຕ່າງໆ, ຂາຍເຄື່ອງພື້ນເມືອງ ແລະເຄື່ອງຂອງອື່ນໆອີກ ຫຼາຍກວ່າ 200 ຮ້ານ, ເຊິ່ງເປັນຜູ້ປະກອບການມາຈາກຫຼາຍຂົງເຂດທົ່ວສະຫະລັດ, ໃນນັ້ນ ລວມທັງ ທ້າວ Matthew ເປັນນັກທ່ອງທ່ຽວຈາກລັດຄາລິຟໍເນຍ ທີ່ມາງານບຸນຄັ້ງນີ້ເປັນເທື່ອທໍາອິດກັບຄອບຄົວຂອງລາວ ແລະຍັງຖືໂອກາດນີ້ມາຂາຍນໍ້າອ້ອຍຊ່ວຍແມ່ເຖົ້າຂອງລາວອີກດ້ວຍ, ເຊິ່ງລາວກ່າວວ່າ:

“ເປັນເທື່ອທໍາອິດຂອງຂ້ອຍທີ່ໄດ້ມາທີ່ນີ້ ເພື່ອມາຊ່ວຍແມ່ເຖົ້າຂາຍເຄື່ອງ ແລະກະເປັນປະສົບການທີ່ວິເສດຫຼາຍ ຜູ້ຄົນກະເປັນມິດ ພົບກັບຫຼາຍຢ່າງ ໄດ້ຮຽນຮູ້ວັດທະນະທໍາຫຼາຍຂຶ້ນ ແລະພວກເຮົາກໍມີຊ່ວງເວລາທີ່ດີຫຼາຍ.”

ກຸ່ມນັກຟ້ອນນາດຕະສິນລາວ ໃນງານແຮ່ຢູ່ທີ່ວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.
ກຸ່ມນັກຟ້ອນນາດຕະສິນລາວ ໃນງານແຮ່ຢູ່ທີ່ວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.

ນອກຈາກຜູ້ມາຂາຍເຄື່ອງແລ້ວ, ທີ່ຂາດບໍ່ໄດ້ເລີຍ ແລະເປັນສີສັນຂອງງານບຸນກໍຄືບັນດານັກທ່ອງທ່ຽວທີ່ມາຈາກລັດຕ່າງໆທົ່ວສະຫະລັດ, ໃນນັ້ນ ກໍຍັງມີນັກທ່ອງທ່ຽວຈາກລັດ New York, ຈາກປະເທດການາດາ ທີ່ພວກເພິ່ນກ່າວເຖິງຄວາມປະທັບໃຈຂອງງານນີ້ ທີ່ຈັດອອກມາໄດ້ດີ ມີການເຕົ້າໂຮມກັນທີ່ຫຼາກຫຼາຍອາຍຸ ຈາກຫຼາຍຂົງເຂດ.

ນັກທ່ອງທ່ຽວຈາກເມືອງໂຣເຈັສເຕີ, ລັດນິວຢອກ:

“ມັກຫຼາຍ ເພິ່ນເຮັດໄດ້ດີຫຼາຍ ດີໃຈ, ເມືອງນີ້ເພິ່ນເຮັດດີຫຼາຍ”

ທ່ານສຸຣິຍາ ສີຫາຣາດ, ນັກທ່ອງທ່ຽວຈາກເມືອງ ມົງເຣອານ, ການາດາ:

“ມາເຫັນຄວາມແຕກຕ່າງຄືວ່າ ຢູ່ພີ້ຜູ້ຄົນກະມາຫຼາຍ ມາຈາກຕ່າງລັດຫຼາຍ, ຖ້າເຮົາປຽບທຽບຈາກນະຄອນມົງເຣອານ ປະເທດການາດາ ຢູ້ພຸ້ນກໍອາດຈະມີຄວາມອົບອຸ່ນ ມີຄວາມຄຶກຄື້ນຄືກັນ ແຕ່ວ່າອາດຊິມີໜ້ອຍ, ຄືເພິ່ນເວົ້າຫັ້ນແຫຼະ ຄັນແມ່ນມັນມີຄົນຫຼາຍ ມັນກໍອາດຈະມ່ວນໂລດ. ແລະຄວາມຕ່າງໂຕທີສອງແມ່ນເລື້ອງຂອງອາຫານການກິນ ແຕ່ວ່າຄວາມຮັກແພງ ຄວາມກົມກຽວ ຄວາມເປັນນໍ້ານຶ່ງໃຈດຽວກັນ ມັນພິສູດໄດ້ຈາກວ່າ: ວັດ ສັງຄົມ ແລະພິທີກໍາຕ່າງໆ ມັນຍັງແໜ້ນໜາ ແລະກໍແໜ້ນໜຽວຄືເກົ່າ.”

ເດັກຊາຍ ພາກັນໃສ່ເຄື່ອງພື້ນເມືອງ ແລະເຂົ້າຮ່ວມຂະບວນແຮ່ ຢູ່ທີ່ວັດລາວພຸດທາຣາມ.
ເດັກຊາຍ ພາກັນໃສ່ເຄື່ອງພື້ນເມືອງ ແລະເຂົ້າຮ່ວມຂະບວນແຮ່ ຢູ່ທີ່ວັດລາວພຸດທາຣາມ.

ແນວໃດກໍຕາມ, ກໍຍັງມີນັກທ່ອງທ່ຽວບາງຄົນ ທີ່ໄດ້ສະແດງຄວາມຮູ້ສຶກຂອງຕົນເອງອອກມາວ່າ ຢາກໃຫ້ງານບຸນ ປະເພນີ ຈັດອອກມາເປັນແບບປະເພນີດັ້ງເດີມ ຫຼາຍກວ່າເປັນການຟ້ອນລໍາເຮຮາແບບນີ້, ແຕ່ແນວໃດກໍຕາມ ເພິ່ນກໍຍັງສະແດງຄວາມດີໃຈ ທີ່ເຫັນຫຼາຍໆຄົນມາເຕົ້າໂຮມກັນ.

ທ່ານເຝືອຄໍາ ກິ່ງສະຫວັນ, ນັກທ່ອງທ່ຽວຈາກເມືອງເມລເບິລ, ວິກຕໍເລຍ, ອອສເຕຣເລຍ:

“ອັນສໍາຄັນທີ່ສຸດນີ້ແມ່ນ ເຂົາເຈົ້າຈັດໄດ້ດີ ສະຖານທີ່ໃຫຍ່ ແລະເປັນສະຖານທີ່ລວມຈິດໃຈຂອງພີ່ນ້ອງຊາວລາວທີ່ແຕກມາຢູ່ຕ່າງປະເທດນິ, ເວົ້າງ່າຍໆ ສະຫະລັດອາເມຣິການີ້ ມັນເປັນບ້ານໃຫຍ່ ເມືອງໃຫຍ່ ຫຼາຍລັດ, ແລະວັດນີ້ກໍປາກົດວ່າ ໃຫຍ່ກວ່າວັດຢູ່ວິກຕໍເລຍ ຢູ່ເມລເບິນບ່ອນພວກອ້າຍຢູ່, ສະຖານທີ່ຂອງເຂົາເຈົ້າກວ້າງຂວາງດີ. ມຖາມ: ມ່ວນບໍ ມາມື້ນີ້? ຕອບ: ກະມ່ວນ ມ່ວນ, ຫາກຄົນຫຼາຍໂພດມາມື້ວັນເສົາ ຈົນຍ່າງບໍ່ໄດ້ຕອນຍາມກາງຄືນຫັ້ນນະ.”

ຍານາງ ໄພວັນ ເມກອາລຸນ, ນຶ່ງໃນຄະນະກໍາມະການຈັດງານກ່າວວ່າ ຈຸດປະສົງໃນການຈັດງານ ກໍເພື່ອສ້າງຄວາມມ່ວນຊື່ນ, ສ້າງຄວາມສາມັກຄີຂອງຄົນຢູ່ໃນຊຸມຊົນ ແລະຄົນຢູ່ໃນທ້ອງຖິ່ນດັ້ງເດີມ ໃຫ້ຢູ່ຮ່ວມກັນຢ່າງມີຄວາມສະງົບສຸກ ແລະໃຫ້ດີຂຶ້ນໃນທຸກໆປີ.

“ເຂົາເຈົ້າດີໃຈເພາະວ່າຫຍັງ ເວລາທີ່ເຮົາຈັດງານນີ້ນະ ເວລາທີ່ເຮົາຈັດງານແຕ່ລະປີ ປີໃໝ່ເນາະ ວັດ ເີ່ນວັດຕັ້ງຊາວເອເກີ້ ຊາວກວ່າເອເກີ້ນິ ບໍ່ພໍສໍາລັບບ່ອນຈອດລົດ, ແລະເຂົາເຈົ້າກໍເປິດໂອກາດໃຫ້ລົດມາຈອດໄດ້ໃນບ້ານເຂົາເຈົ້າ ແລະເຂົາເຈົ້າກເກັບເງິນ 5 ໂດລາ, 10 ຄັນເຂົາເຈົ້າກະໄດ້ 50 ເນາະ, ເຂົາເຈົ້າກະໃຫ້ຄວາມຮ່ວມມືນໍາແບບຊີ້ຫັ້ນນະ.”

ການແຮ່ນາງສັງຂານ ໃນຂະບວນແຮ່ຢູ່ທີ່ວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.
ການແຮ່ນາງສັງຂານ ໃນຂະບວນແຮ່ຢູ່ທີ່ວັດລາວພຸດທາຣາມ, ເມືອງເມີຟຣີສໂບໂຣ, ລັດເທັນເນັສຊີ.

ງານບຸນປີໃໝ່ ປະຈໍາປີທີ່ຈັດຢູ່ວັດລາວພຸດທາຣາມ, ນອກຈາກຜູ້ມາຮ່ວມຈະເປັນຊາວອາເມຣິກັນເຊື້ອສາຍລາວແລ້ວ ຍັງມີຊາວອາເມຣິກັນເຊື້ອສາຍຫວຽດນາມ, ຊາວອາເມຣິກັນເຊື້ອສາຍກໍາປູເຈຍ ຫຼືແມ່ນແຕ່ຊາວອາເມຣິກັນຢູ່ໃນທ້ອງຖິ່ນເອງ ທີ່ພາກັນມາກັບໝູ່ເພື່ອນ ຫຼືມາກັບຄອບຄົວ ແລະລູກໆຫຼານໆ, ເຊິ່ງສະແດງອອກເຖິງສີສັນຂອງງານບຸນ ທີ່ເຮັດໃຫ້ເຫັນວ່າ ທຸກໆຄົນ ມີຄວາມສຸກສັນສຳລານ, ຊຸມຊົນມີຄວາມມ່ວນຊື່ນຮ່ວມກັນ ກໍອາດຈະສົ່ງຜົນໃຫ້ສັງຄົມມີຄວາມສຸກແລະເຂົ້າໃຈປະເພນີຂອງກັນແລະກັນຫຼາຍຂຶ້ນ ຍ່ອມຈະສົ່ງຜົນໃຫ້ມີ ການປະສານງານ ພ້ອມທັງພົວພັນກັນທີ່ດີຂຶ້ນກວ່າເກົ່າ.

ຟໍຣັມສະແດງຄວາມຄິດເຫັນ

ສົດ ລາຍການວິທະຍຸ-ໂທລະພາບ ພາກພາສາລາວ

XS
SM
MD
LG