ການຝຶກອົບຮົມວິຊາຊີບ ແລະ ການບຳບັດຜູ້ຕິດຢາເສບຕິດ ໃນລາວ ຍັງບໍ່ທັນໄດ້ມາດຕະຖານສາກົນ ແລະ ຍັງບໍ່ພຽງພໍ. ທັ້ງຍັງເປັນປັດໃຈທີ່ເຮັດໃຫ້ຜູ້ທີ່ຜ່ານການປິ່ນປົວໄປແລ້ວນັ້ນ ກັບຄືນມາໃຊ້ຢາອີກເທື່ອໃຫມ່.
ພົນເອກ ວິໄລ ຫລ້າຄຳຟອງ, ຮອງນາຍົກລັດຖະມົນຕີ - ລັດຖະມົນຕີວ່າການກະຊວງປ້ອງກັນຄວາມສະຫງົບ ຢືນຢັນວ່າ ໃນປັດຈຸບັນນີ້ ທາງການລາວ ຍັງບໍ່ທັນມີສະຖານທີ່ຝຶກອົບຮົມວິຊາຊີບ ແລະ ສະຖານທີ່ບຳບັດຜູ້ຕິດຢາເສບຕິດ ທີ່ໄດ້ມາດຕະຖານສາກົນ. ທັງນີ້ ກໍຍ້ອນວ່າ ລັດຖະບານລາວ ຍັງບໍ່ມີງົບປະມານ ທີ່ຈະນຳໃຊ້ ໃນການກໍ່ສ້າງ ແລະຍັງລໍຖ້າການຊ່ວຍເຫຼືອຈາກຕ່າງປະເທດເປັນດ້ານຫລັກ ເພາະສະນັ້ນ ການຝຶກອົບຮົມວິຊາຊີບ ແລະ ປິ່ນປົວຜູ້ຕິດຢາເສບຕິດຢູ່ໃນລາວ ທຸກມື້ນີ້ ຈືຶ່ງເປັນພຽງການດຳເນີນງານໃນຂັ້ນພື້ນຖານເທົ່ານັ້ນ ຍ້ອນຄວາມສາມາດດ້ານງົບປະມານມີຈຳກັດດັ່ງທີ່ ພົນເອກ ວິໄລ ໄດ້ໃຫ້ການຢືນຢັນວ່າ “ກະຄິດເບິ່ງວ່າ ຫຼາຍກວ່າຫ້າຫົກສິບພັນຄົນແລ້ວໃນປັດຈຸບັນ ແລ້ວລ້ຽງມື້ໜຶ່ງງຫັ່ນລັດຖະບານນີ້ ກໍບໍ່ແມ່ນເສີຍເງິນຫນ້ອຍໃນການລ້ຽງພາກສ່ວນດັ່ງກ່າວນີ້ ແລ້ວກະຢາປັວກໍບໍ່ພຽງພໍ, ກັກຂັງບໍ່ໃຫ້ກິນສື່ໆນີ້ຫນ່າ ບໍ່ແມ່ນກັກຂັງເພື່ອປິ່ນປັວ ເພາະການປິ່ນປັວມັນຕ້ອງມີລະບົບຂອງມັນ ມີການກວດກາຄັກແນ່ ວິຊາຊີບນີ້ ກໍບໍ່ໄດ້ຝືກດອກບໍ່ມີດອກວ່າ ສິໄດ້ສອນເຈົ້າມາຈອດເຫຼັກຈອດຂາງ ເຮັດນັ້ນເຮັດນີ້. ມີແຕ່ວ່າ ມີເຮັດໂຕຈິງໂລດ ປູກຜັກຈັງຊັ້ນແຫລະ ສານແຫ ສານມອງຫັ່ຢູ່ຫັ້ນແຫລະ ຄັນສິໃຫ້ຈົບມີວິຊາຊີບໄປປະກອບອາຊີບອື່ນໆໄດ້ນີ້ ແມ່ນຍາກ ບາດນີ້ ຜູ້ທີ່ຕິດໜັກນີ້ ຢານີ້ ສິເອົາມາຝຶກວິຊາຊີບນີ້, ແລ້ວເທົ່ານັ້ນ ມັນບໍ່ເຂົ້າໃຈນໍາເຈົ້າຊ້ຳ.”
ໂດຍທາງການລາວສາມາດສະກັດການລັກລອບຄ້າຢາເສບຕິດໄດ້ຫລາຍກວ່າ 12,000 ກໍລະນີ ແລະ ຈັບຜູ້ຕ້ອງສົງໄສໄດ້ຫລາຍກວ່າ 20,000 ຄົນ ຍຶດຢາບ້າໄດ້ຫລາຍກວ່າ 37 ໂຕນ ສານເຄມີກວ່າ 290 ໂຕນ ອຸປະກອນສື່ສານທັນສະໄໝກວ່າ 37,000 ລາຍການ ໃນຮອບ 22 ເດືອນຜ່ານມາ ໂດຍນອກຈາກສະແດງໃຫ້ເຫັນວ່າ ການກະທໍາຜິດກ່ຽວກັບຢາເສບຕິດໃນລາວ ຢັງມີທ່າອຽງເພີ້ມຂຶ້ນນັບມື້ ແລ້ວກໍຍັງສະແດງໃຫ້ເຫັນດ້ວຍວ່າ ແກັ່ງຢາເສບຕິດໃນລາວ ໄດ້ເປັນສ່ວນນຶ່ງຂອງຂະບວນການຄ້າຢາເສບຕິດຂ້າມຊາດແລ້ວ ໂດຍສະເພາະໃນເຂດສາມຫລ່ຽມຄຳລະຫວ່າງ ມຽນມາ-ລາວ-ໄທ ກໍຍັງເປັນເຂດທີ່ມີການຜະລິດຢາບ້າແລະຍາໄອສ໌ຫຼາຍທີ່ສຸດໃນໂລກ ລວມທັງການລັກລອບຂົນສົ່ງສານເຄມີ ທີ່ໃຊ້ໃນການຜະລິດຢາເສບຕິດດ້ວຍນັ້ນ ຈຶ່ງເຮັດໃຫ້ທາງການລາວ ຕ້ອງອອກກົດໝາຍເພື່ອບັງຄັບໃຊ້ໃນການປາບປາມເປັນການສະເພາະ ດັ່ງທີ່ເຈົ້າໜ້າທີ່ຂັ້ນສູງໃນຝ່າຍປາບປາມການຄ້າຢາເສບຕິດໃນລາວ ໄດ້ໃຫ້ການຢືນຢັນວ່າ “ກົມສືບສວນ-ສອບສວນ ເຈົ້າໜ້າທີ່ຕຳຫຼວດຄົນນີ້ ໄດ້ຍົກສູງຄວາມຮັບຜິດຊອບໃນການປົກປັກຮັກສາຄວາມສະຫງົບ ຄວາມເປັນລະບຽບຮຽບຮ້ອຍຂອງສັງຄົມ ນຳໃຊ້ຫຼາຍວິທີການ ແລະມາດຕະການເພີ່ມທະວີການຄວບຄຸມ ແລະສະກັດການປູກ, ການຜະລິດ ປຸງແຕ່ງ ຊົມໃຊ້ ຄ້າຂາຍ, ການຈໍາໜ່າຍ, ຂົນສົ່ງ, ຄອບຄອງ ນໍາເຂົ້າ-ສົ່ງອອກພືດທີ່ມີສານເສບຕິດ ຫຼືຜະລິດຕະພັນທີ່ມີສ່ວນປະສົມຂອງສານຕັ້ງຕົ້ນ ແລະສານເສບຕິດປະເພດຕ່າງໆ.”
ພາຍໃຕ້ສະພາບການດັ່ງກ່າວ ຍັງໄດ້ສົ່ງຜົນກະທົບຕໍ່ເປົ້າໝາຍຂອງລັດຖະບານລາວ ທີ່ຈະສ້າງຕັ້ງບ້ານ ແລະ ໂຮງຮຽນປອດຢາເສບຕິດໃຫ້ໄດ້ 80 ເປີເຊັນ ແລະ 95 ເປີເຊັນຂອງບ້ານແລະໂຮງຮຽນທັ້ງໝົດພາຍໃນປີ 2025 ດ້ວຍເຊັ່ນກັນ ເພາະວ່າການດຳເນີນມາດຕະການສະກັດກັ້ນ ແລະປາບປາມການຄ້າຂາຍຢາເສບຕິດ ໃນປັດຈຸບັນຍັງມີປະສິດທິພາບຕໍ່າເນື່ອງຈາກວ່າ ພາກສ່ວນທີ່ກ່ຽວຂ້ອງຍັງບໍ່ທັນໄດ້ໃຫ້ການຮ່ວມມືຢ່າງຈິງຈັງ ຊຶ່ງເຫັນໄດ້ຈາກຈໍານວນອາຊະຍາກໍາ ແລະຜູ້ກະທໍາຜິດໃນຄະດີຢາເສບຕິດທີ່ເພີ່ມສູງຂຶ້ນ ຈົນວ່າສະຖານທີ່ຄຸມຂັງບໍ່ສາມາດຮອງຮັບໄດ້ທັນ ແລະຈະຕ້ອງມີການກໍ່ສ້າງເພີ່ມຂຶ້ນຢ່າງຮີບດ່ວນ ໃນທຸກພາກອີກດ້ວຍ.
ຟໍຣັມສະແດງຄວາມຄິດເຫັນ