ລິ້ງ ສຳຫລັບເຂົ້າຫາ

logo-print

ວິທີຕ່າງໆທີ່ແກ້ໄຂບັນຫາ ​ເພື່ອຫຼຸດ​ຜ່ອນ​ຜົນ​ກະ​ທົບ​ໃຫ້​ມີໜ້ອຍ​ສຸດ ຕໍ່​ການ​ສ້າງ​ເຂື່ອນ​ໃນ​ລາວ


​ເຂື່ອນ​ໄຊ​ຍະ​ບຸ​ລີ

ເຂື່ອນ​ໄຟ​ຟ້າ​ເທິງ​ນ້ຳ​ຂອງ​ໃນ​ຈີນ​ແລະ​ລາວ ໄດ້​ສົ່ງ​ຜົນ​ກະ​ທົບ​ຕໍ່​ປະ​ຊາ​ຊົນ​ທີ່​ຢູ່​ໃນ​ເຂດ
ຕອນລ່າງ​ຫຼາຍ​ຂຶ້ນ ສ່ວນ​ນັກ​ລົງ​ທຶນ​ໄທ ກໍ​ຢືນ​ຢັນ​ວ່າ ການ​ກໍ່​ສ້າງ​ເຂື່ອນ​ໄຊ​ຍະ​ບຸ​ລີ
ໃນ​ລາວ ຈະ​ສຳ​ເລັດ​ໃນ​ປີ 2019 ຊົງຣິດ ​ໂພນ​ເງິນ ມີ​ລາຍ​ງານ​ຈາກ​ບາງກອກ.

ແກນ​ນຳຂອງ​ເຄືອ​ຂ່າຍ​ປະ​ຊາ​ຊົນ​ໄທ ເພື່ອ​ການ​ອະ​ນຸ​ລັກ​ສິ່ງ​ແວດ​ລ້ອມ​ທຳ​ມະ​ຊາດ
ໃນ​ລຸ່ມ​ແມ່​ນ້ຳ​ຂອງ ຢືນ​ຢັນ​ວ່າ ເຂື່ອນ​ໄຟ​ຟ້າ​ເທິງ​ແມ່​ນ້ຳ​ຂອງ ໃນ​ເຂດແຂວງ​ຢຸນ​ນານ
​ຂອງ​ຈີນ ທີ່​ກໍ່​ສ້າງ​ເສັດ​ແລ້ວ 7 ໂຄງ​ການ​ ຈາກ​ແຜນ​ການ​ທີ່​ວາງ​ໄວ້ 8 ໂຄງ​ການ​ນັ້ນ
ໄດ້​ສົ່ງ​ຜົນ​ກະ​ທົບ​ຕໍ່​ສະ​ພາບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ ໃນ​ເຂດ​ຕອນ​ລ່າງ​ຂອງ
​ເຂື່ອນ​ຢ່າງກວ້າງ​ຂວາງ​ໃນ​ປັດ​ຈຸ​ບັນ ໂດຍ​ສະ​ເພາະ​ແມ່ນ​ຜົນ​ກະ​ທົບ​ຕໍ່​ການ​ປະ​ມົງ​ແລະ​
ການ​ປູກ​ພື​ດ​ຢູ່​ແຄມ​ຝັ່ງ​ແມ່​ນ້ຳ​ຂອງ​ນັ້ນ ດັ່ງ​ທີ່​ແກນ​ນຳ​ຂອງ​ເຄືອ​ຂ່າຍປະ​ຊາ​ຊົນ​ໄທ
ຢືນ​ຢັນ​ວ່າ: “ສະໄໝ​ກ່ອນ​ປາ​ຫຼາຍ ຫາ​ກິນ​ສະ​ບາຍ ໃນ​ປັດ​ຈຸ​ບັນ​ນີ້ ຫາ​ປາ​ນີ້ ຖ້າເຈົ້າ​
ບໍ່​ຖະ​ນັດ ບໍ່​ເກັ່ງ ກໍ​ບໍ່​ໄດ້​ດອກ ສິບ​ວັນ​ຍັງ​ບໍ່​ໄດ້​ຈັກ​ຕົວ​ຍັງ​ມີ ສວນ​ທີ່​ເຮົາ​ມີ​ຮິມ​ຝັ່ງ
ເຮົາ​ປູກ​ເສັດແລ້ວ ນ້ຳ​ແຫ້ງເນາະ ຈີນ​ຍັງ​ບໍ່ ໄດ້​ປ່ອຍ​ນ້ຳ​ມາ​ອີກ ຖ້າ​ເຂົາ​ມາ​ຕັນ​ເຂື່ອນ​
ແລ້ວ ກໍ​ເຮົາ​ໝົດ​ສິດ​ເດ ເຮົາ​ບໍ່​ມີ​ທີ່​ທຳ​ມາ​ຫາ​ກິນ.”
ທັງ​ນີ້ໂດຍ​ເຄືອ​ຂ່າຍ​ປະ​ຊາ​ຊົນ​ໄທ
ເພື່ອ​ການ​ອະ​ນຸ​ລັກ​ສິ່ງ​ແວດ​ລ້ອມ​ທຳ​ມະ​ຊາດ ໃນ​ແມ່​ນ້ຳ​ຂອງ ໄດ້​ພາກັນເຄື່ອນ​ໄຫວ
​ເພື່ອ​ຄັດ​ຄ້ານ​ການ​ກໍ່​ສ້າງ​ເຂື່ອນ​ໄຟ​ຟ້າ​ເທິງ​ແມ່​ນ້ຳ​ຂອງ​ມາ​ຢ່າງ​ຕໍ່​ເນື່ອງ ໃນ​ນີ້​ຮວມ​ເຖິງ​
ໂຄງ​ການ​ເຂື່ອນ​ປາ​ກແບງ ເທິງ​ແມ່​ນ້ຳ​ຂອງ

ໃນ​ເຂດ​ແຂວງ​ອຸ​ດົມ​ໄຊ​ຂອງ​ລາວ​ດ້ວຍ ໂດຍ​ໄດ້​ຍື່ນ​ຄຳ​ຟ້ອງ​ຮ້ອງ ຕໍ່​ສານ​ປົກ​ຄອງ​ໃນ​ໄທ
ເພື່ອ​ຂໍ​ໃຫ້​ມີ​ຄຳ​ສັ່ງ​ບັງ​ຄັບ​ໃຫ້​ລັດ​ຖະ​ບານ​ໄທ ຕ້ອງ​ສະ​ແດງ​ການ​ຄັດຄ້ານ​ໂຄງ​ການ​ດັ່ງ​ກ່າວ​
ໃນ​ກອງ​ປະ​ຊຸມ​ຄະ​ນະ​ກຳ​ມາ​ທິການແມ່​ນ້ຳ​ຂອງ (MRC) ທີ່​ໄທ​ເປັນ​ສະ​ມາ​ຊິກ​ຮ່ວມ
​ກຳ​ພູ​ເຈຍ ຫວຽດ​ນາມ ແລະ​ລາວ ​ດ້ວຍ​ນັ້ນ.

ທັງ​ນີ້ ກໍ​ເນື່ອງ​ຈາກ​ເຫັນ​ວ່າໂຄງ​ການ​ກໍ່​ສ້າງ​ເຂື່ອນ​ເທິງ​ແມ່​ນ້ຳ​ຂອງ ໃນ​ລາວ​ນັ້ນ ຈະ​ສົ່ງ​ຜົນ
​ກະ​ທົບ​ຕໍ່​ການ​ອົບ​ພະ​ຍົບ​ຂອງ​ປາ ທັງ​ຍັງ​ຈະ​ສົ່ງ​ຜົນ​ກະ​ທົບ​ຕໍ່​ລະ​ບົບ​ນິ​ເວດ​ທຳ​ມະ​ຊາດ
​ໃນ​ແ​ມ່​ນ້ຳ​ຂອງ​ຕະ​ຫຼອດ​ທັງ​ສາຍ ໃນ​ເຂດ​ຕອນ​ລ່າງ​ຂອງ​ແມ່​ນ້ຳ​ຂອງ​ອີກ​ດ້ວຍ ຫາກ​ແຕ່​ວ່າ
ກໍ​ເປັນ​ການ​ຍາກ​ທີ່​ຈະ​ຄັດ​ຄ້ານ​ໂຄງ​ການ​ເຂື່ອນ​ປາກ​ແບງ ໄດ້​ໂດຍ​ທາງ​ການ​ໄທ
ເພາະ​ໂຄງ​ການ​ຕັ້ງ​ຢູ່​ໃນ​ເຂດ​ອະ​ທິ​ປະ​ໄ​ຕ​ຂອງ​ລາວ ຈຶ່ງ​ບໍ່​ສາ​ມາດ​ແຊກ​ແຊງ​ໄດ້
ນອກ​ຈາກ​ການ​ພິ​ຈາ​ລະ​ນາ ຂໍ້ມູນຕ່າງໆ​ທີ່​ທາງ​ການ​ລາວ​ແລະ​ຜູ້​ລົງ​ທຶນ ໃນ​ໂຄງ​ການ
​ໄດ້​ນຳ​ສະເໜີເທົ່າ​ນັ້ນ.

ແຕ່​ຢ່າງ​ໃດກໍ​ຕາມ ທ່ານ​ນາງ​ພຽງ​ພອນ ດີ​ເທດ ຜູ້​ອຳ​ນວຍ​ການ​ຝ່າຍ​ຈັດ​ກິດ​ຈະ​ການ​ຂອງ​
ອົງ​ການ​ແມ່​ນ້ຳ​ສາ​ກົນ (International Rivers) ໃນ​ໄທ ຢືນ​ຢັນ​ວ່າ ການ​ເຄື່ອນ​ໄຫວ​
ຄັດ​ຄ້ານ​ໂຄງ​ການ​ກໍ່​ສ້າງ​ເຂື່ອນ​ໄຟ​ຟ້າ ເທິງແມ່​ນ້ຳ​ຂອງ​ໃນ​ໄລ​ຍະ​ໃໝ່​ນີ້ ໄດ້​ໃຫ້ຄວາມ​
ສຳ​ຄັນ ໃນ​ບັນ​ຫາແລະ​ຜົນ​ກະ​ທົບ​ທີ່​ມີ​ລັກ​ສະ​ນະ ຂ້າມ​ພົມ​ແດນ​ລະ​ຫວ່າງປະ​ເທດ
ໃນ​ລຸ່ມແມ່​ນ້ຳ​ຂອງ ​ດ້ວຍ​ກັນ ​ຊຶ່ງ​ໄດ້ຮັບ​ການ​ຕອບ​ສະ​ໜອງ​ແລ້ວ ເມື່ອ​ປາ​ກົດ​ວ່າ ສານ
​ປົກ​ຄອງ​ສູງ​ສຸດ​ຂອງ​ໄທ ໄດ້​ຮັບ​ຮອງ​ການ​ຟ້ອງ​ຮ້ອງ​ຂອງ​ເຄືອ​ຂ່າຍ​ປະ​ຊາ​ຊົນ​ໄທ ທີ່​ຄັດ
​ຄ້ານ​ການ​ຮັບ​ຊື້​ກະ​ແສໄຟຟ້າ​ຈາກ​ໂຄງ​ການ​ເຂື່ອນ​ໄຊ​ຍະ​ບຸ​ລີ ເທິງ​ແມ່​ນ້ຳ​ຂອງ​ໃນ​ລາວ
ຊຶ່ງ​ມີ​ການ​ໄຟ​ຟ້າ​ຝ່າຍ​ຜະ​ລິດ​ແຫ່ງ​ປະ​ເທດ​ໄທ (EGAT) ເປັນ​ຜູ້​ຮັບ​ຊື້ໄຟ​ຟ້າ​ນັ້ນ.

​ທາງ​ດ້ານ ທ່ານ​ເຣວັດ ສຸ​ວັນ​ນະ​ກິດ​ຕິ ຮອງ​ປະ​ທານ​ບໍ​ລິ​ສັດ​ໄຊ​ຍະ​ບຸ​ລີ ພາວ​ເວີ​ຣ໌​ຈຳ​ກັດ​
ໃຫ້​ການ​ຢືນ​ຢັນ​ວ່າ​ການ​ກໍ່​ສ້າງ​ເຂື່ອນໄຊ​ຍະ​ບຸ​ລີ ໄດ້​ຄືບ​ໜ້າ​ແລ້ວ ເຖິງ 95 ເປີ​ເຊັນ
ຂອງ​ແຜນ​ການ ຈຶ່ງ​ໝັ້ນ​ໃຈ​ວ່າ ການ​ກໍ່ສ້າງຈະ​ແລ້ວ​ເສັດ​ແລະ​ຜະ​ລິດ​ໄຟ​ຟ້າ​ສົ່ງ​ຂາຍ​ໃຫ້
​ໄທ​ໄດ້ ​ໃນ​ທ້າຍ​ປີ 2019 ເຖິງ​ປີ 2048 ໂດຍ​ການ​ກໍ່​ສ້າງເຂື່ອນ​ໄດ້​ນຳ​ໃຊ້​ເທັກ​ນິກ​ທັນ
​ສະ​ໄໝ​ທີ່​ໄດ້​ມາດ​ຕະ​ຖານ​ທີ່​ມີ​ການ​ປ້ອງ​ກັນ​ຜົນ​ກະ​ທົບ​ຕໍ່​ສິ່ງ​ແວດ​ລ້ອມ​ທຳ​ມະ​ຊາດ
ແລະ​ສັດ​ນ້ຳ​ໃນ​ແມ່​ນ້ຳ​ຂອງ ໄດ້​ດີ​ທີ່​ສຸດ​ໃນ​ໂລກ ດັ່ງ​ທີ່ ທ່ານ​ເຣ​ວັດໄດ້​ອະ​ທິ​ບາຍ​ວ່າ:
“ເວ​ລາ​ນີ້ເຮົາສາ​ມາດ​ເວົ້າ​ໄດ້​ເຕັມ​ທີ່​ວ່າ ທາງ​ປາຜ່ານ​ຂອງ​ໂຮງ​ໄຟ​ຟ້າ​ໄຊ​ຍະ​ບູ​ລີ​ນີ້
ດີ​ທີ່​ສຸດ​ໃນ​ໂລກ ເຮົາ​ມີ​ຊ່ອງ​ຫຼາຍ​ຊ່ອງ​ໃຫ້​ປາ​ເລືອກ​ຜ່ານ ຕາມ​ຄວາມ​ພໍ​ໃຈ ແລ້ວກໍ
​ອີກ​ຢ່າງ​ນຶ່ງ ກໍ​ຄື​ທີ່​ນີ້ ຈະ​ເປັນ​ແຫ່ງ​ທຳ​ອິດຂອງ​ເອ​ເຊຍ ທີ່​ມີ lift ຍົກ​ປາ ໂດຍ​ເຮົາ​ປ້ຳ​ນ້ຳ
ເຂົ້າ​ໄປ​ລໍ້​ປາ ໃຫ້​ເຂົ້າ​ມາ​ໃນ​ລະ​ບົບ​ຂອງ​ໂຮງ​ໄຟ​ຟ້າ ແລ້ວ​ກໍ​ຈະ​ຊັກ​ນຳ​ຜ່ານ​ເຂົ້າ​ມາ​
ຈົນ​ກະ​ທັ້ງ​ເຖິງ​ຈຸດ​ຮວມ​ປາ ພໍ​ເຖິງ​ຈຸດ​ຮວມ​ນີ້ ເຮົາ​ກໍ​ຈະ​ມີ lift ຍົກ​ປາ​ຂຶ້ນ​ໄປ​ແລ້ວ
ກໍ​ປ່ອຍ​ອອກ​ທາງ​ຄອງ​ດ້ານ​ເໜືອ​ນ້ຳ​ໃຫ້​ປາ​ລອຍ​ອອກ​ໄປ​ໄດ້.

ໂຄງ​ການ​ເຂື່ອນໄຟ​ຟ້າ​ໄຊ​ຍະ​ບູ​ລີ ມີ​ມູນ​ຄ່າ​ການ​ລົງ​ທຶນ ຮວມ​ເຖິງ 4,000 ລ້ານ​ໂດ​ລາ
ໂດຍ​ເປັນ​ການ​ຮ່ວມ​ມື ​ລະ​ຫວ່າງ​ບໍ​ລິ​ສັດ ​ຊ. ການ​ຊ່າງ ຈຳ​ກັດ (ມະ​ຫາ​ຊົນ) ​ບໍ​ລິ​ສັດ​ນະ​ທີ
ຊິນ​ເນີ​ຍີ່​ຈຳ​ກັດ ​ບໍ​ລິ​ສັດ​ຜະ​ລິດ​ໄຟ​ຟ້າ​ຈຳ​ກັດ (ມະ​ຫາ​ຊົນ) ແລະ​ບໍ​ລິ​ສັດ​ພີ​ທີ ຄອນ​ສ​ຕ​ຣັກ​ຊັນ
ແອນ ອີ​ຣິ​ເກ​ຊັນ​ຈຳ​ກັດ ໂດຍ​ເຂື່ອນ​ໄຊ​ຍະ​ບຸ​ລີ ກຳ​ລັງ​ຕິດ​ຕັ້ງ 1,285 ເມ​ກາ​ວັດ ຈະ​ສົ່ງ​ຂາຍ
​ໄປ​ໄທ 1,225 ເມ​ກາ​ວັດ ໃນ​ມູນ​ຄ່າ​ສະ​ເລ່ຍ 455 ລ້ານ​ຕໍ່​ປີ ລັດ​ຖະ​ບານ​ລາວ ຈະ​ໄດ້ຮັບ
ສ່ວນ​ແບ່ງ 135 ລ້ານ​ໂດ​ລາ ຕໍ່​ປີ ສ່ວນ 60 ເມ​ກາ​ວັດ ທີ່​ເຫຼືອ​ກໍ​ຈະ​ຂາຍ​ໃຫ້​ລັດ​ວິ​ສາ​ຫະ​ກິດ​
ໄຟ​ຟ້າ​ລາວ (EDL) ເພື່ອ​ຕອບ​ສະ​ໜອງ​ຄວາມ​ຕ້ອງ​ການຊົມ​ໃຊ້​ພາຍ​ໃນ​ລາວ.

ເບິ່ງຄວາມເຫັນ (3)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG